OMAPSALOME 86
86
Eindilo lomufininikwa
Eindilo laDavid.
1Omwene, endeka okutwi kwoye, u ude nge,
osheshi aame epongo nohepele!
2Diinina omwenyo wange;
osheshi aame omuyuki;
Kalunga kange, xupifa omupiya woye,
ou te ku lineekele!
3Omwene, file nge onghenda,
osheshi efiku alishe ohandi ku ifana.
4Hafifa omwenyo womupiya woye;
osheshi omwenyo wange
ohandi u yelulile kwoove, Omwene.
5Osheshi Omwene, Ove u nonghedi iwa,
u yadi ekufilo,
Ove u nolukeno naava have ku ifana.
6Omwene, uda eindilo lange,
yavelela eilikano lange lomokule!
7Fiku handi hangika koudjuu, ohandi ku ifana,
osheshi Ove ho udu nge.
8Omwene, moikalunga kamu na umwe e ku fa,
nopehe na eshi sha fa oilonga yoye.
9Oiwana aishe yovapaani, ngaashi we i shita,
otai ke uya i linyongamene
koshipala shoye, Omwene,
nai fimaneke edina loye;
10osheshi Oove omunene nomulongi woikumwifa,
Oove auke Kalunga.
11Omwene, ulikile nge ondjila yoye,
ame ndi ende moshili yoye,
omutima wange u mangeleka mokutila edina loye.
12Omwene, Kalunga kange,
onda hala oku ku tanga nomutima aushe
nokufimaneka edina loye fiyo alushe.
13Osheshi ouwanghenda woye
we u ningila nge, ounene;
Ove wa xupifa omwenyo wange moshovafi.
14Kalunga, ovalundakani ova fikamena nge
netanga lovakolokoshi otali nangele omwenyo wange,
noihave ku tula moipafi yavo.
15Ndelenee Omwene, Oove omunalukeno
omunanghenda, nomunanheni,
omunene mouwanghenda nomoshili.
16Talele nge u file nge onghenda;
pa omupiya woye eenghono doye,
Ove u xupife nge, aame omona omumati
womupiya woye okakadona.
17Tule nge oshidimbulukifo shouwa,
ovatondi vange ve shi mone, nova fifwe ohoni,
nokutya Omwene, Oove ekwafo lange
nehekeleko lange.
Currently Selected:
OMAPSALOME 86: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
