OMAPSALOME 104
104
Eimbilotumbalo kOmushiti waaishe
1Omwenyo wange, tanga Omwene!
Omwene, Kalunga kange,
ounene woye ou fike peni!
Ove owa djala efimano noshinge,
2Oove ou, ho liuvikile nouyelele wa fa omudjalo,
nowa valela eulu ngaashi ofaila,
3ou, ho diki ongulu yoye momeva,
noilemo ho i ningi etemba loye,
noho ende nomavava omhepo;
4ou, ho ningi eemhepo ovatumwa voye,
nomalaka omundilo oo ovapiya voye.
5Edu owe li shitila keengudi dalo,
lo liha tengauke nande fiyo alushe,
6oto li tuvikilifa omeva efuta ngaashi oshikutu;
fiyo okombada yeemhunda,
eyelu la li la hanga ko;
7ndelenee oku li hanyena kwoye,
okwe li shunifile lwanima;
ondaka yoye yengungumo oye
li kungulukifa ko.
8Eemhunda ode litumbile pombada,
nomalufilu okwe lishunifile
meenhele edi we a longela.
9Opo we a taulilile eengaba edi itaa tauluka,
aha tuvikile vali edu.
10Oye ta fulukifa eefifiya momalufilu;
notadi tondoka pokati keemhunda.
11Ndele odo otadi nwefa oifitukuti yomofuka,
tadi kumwifa eefine.
12Eedila dokoshi yeulu
otadi tungile oihadi komiti daapo,
ndele otadi sheketele moitai.
13Ota tekele eemhunda momufima waye womeulu;
nedu otali paluka kepunapalo loilonga yoye.
14Oimuna ote i menifile omwiidi,
noimeno i dje eenhwika,
do di ninge oilonga yomake ovanhu,
opo Ye a menife eendja medu,
15nomaviinyu, aa taa hafifa omutima womunhu,
opo a vemife oshipala shaye komaadi,
Ye a pameke omutima womunhu neendja.
16Omiti dOmwene otadi likumifa nokunwa,
omiti omisederi daLibanon, edi a twika,
17omo hamu dalele eedila, momusipresi
nanakandunga ota tungile mo oshihadi.
18Eemhunda dile oda shitilwa oupundja,
noikulundudu oyo ehondameno louyelemani.
19Ohani okwe i shita, i yeleke omafimbo,
etango oli shii efimbo tali ningine.
20Ngeenge to undulile po omulaulu,
oufiku otau uya,
opo mofuka otamu hondoloka
oifitukuti aishe.
21Eenghoshona otadi kumbile okulya,
eshi tadi pula eendja dado kuKalunga.
22Etango nge tali piti, otadi shuna
oku ka nangala momakwena ado.
23Opo nee omunhu ota piti, a ye koilonga yaye,
e i longe fiyo onguloshi.
24Omwene, oilonga yoye oi fike peni!
Aishe owe i shita nounongo,
edu oli yadi oishitwa yoye.
25Efuta opo li li linene
la mbwalangadja keembinga adishe,
omo mu yadi ndoondoo oinamwenyo
itai dulika okuvalwa, ei inini naai yakula.
26Omo notamu ende eeskepa,
naLeviatan omo i li,
ei wa shitila okudanauka mo.
27Aishe oyo, otai ku teelele,
Ove u i pe eendja pefimbo la yuka;
28Ove ngeenge to i pe, yo otai toola;
ngeenge to kamutuluka eke loye,
otai likutifa nouwa.
29Ove to holeke oshipala shoye,
oyo otai haluka;
Ove to kufa mo omuku wayo,
opo otai shuna vali mondwi yedu, omu ya dja.
30Ngeenge to pitifa mo omufudo wOmhepo yoye,
opo yo otai shitwa ipe,
noshitwe yedu oto i shitulula ipe.
31Efimano lOmwene otali kala po fiyo alushe!
Omwene na hafele oilonga yaye!
32Ngeenge ta konenene edu, otali kakama,
ngeenge ta kumu eemhunda,
do tadi twimaana omwifi.
33Ame onda hala okwiimbila Omwene,
fimbo ndi nomwenyo,
nokutanga Kalunga kange, fimbo ndi li po.
34Eshipululo lange nali mu wapalele.
Ohandi hafele mOmwene.
35Ovalunde, ngeno nava kombololwe po kombada yedu,
novadinikalunga vaha kale po vali.
Omwenyo wange, tanga Omwene!
Halleluya!
Currently Selected:
OMAPSALOME 104: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
