MARKUS 12

Ovalongi vepya lomiviinyu

(Mat. 21:33-46; Luk. 20:9-19)

1Ndele Ye okwa hovela oku va lombwela momafaneko: “Omulumenhu umwe okwa tota epya lomiviinyu ndele okwe li umbila ongubu, ndele okwa fa mo elambo lokukamena eeviinyu, okwa tunga ongulu yokukelela, ndele okwa nangeka mo ovalongi vepya, ndele ye okwa ya koilongo. 2Efimbo eshi la fika, okwa tuma ko omupiya kovalongi, a pewe oiimati yepya lomiviinyu. 3Ndele vo ove mu kwata ndele tave mu denge ndele tave mu shunifa hamakasha. 4Ndele okwa tumununa ko vali omupiya umwe, naau ove mu denga eembole momutwe, ndele tave mu tukaele ndele tave mu shunifa. 5Ndele okwa tuma ko umwe, ndele ove mu dipaa, nosho tuu oovakwao vahapu, vamwe ve va denga navamwe ve va dipaa. 6Ndele Ye okwa li e na umwe natango, omona omuholike. Ye okwe mu tuma kuvo hauxuuninwa, ndele ta ti: ‘Vo otave mu fi eenghoto.’ 7Ndelenee ovalongi vepya lomiviinyu ova tongafana: ‘Ou omufyuululi, ileni, tu ke mu dipaeni, opo efyuululo li ninge letu.’ 8Ndele ove mu kwata, ve mu dipaa, ndele tave mu ekele kondje yepya lomiviinyu. 9Nena mwene wepya lomiviinyu ota ka ninga mbela ngahelipi?” Ote uya: “Ndele ta hanaununa po ovalongi vepya lomiviinyu, ndele ta yandje epya kuvamwe. 10Hamba, inamu lesha nande eshangelo eli:

‘Emanya olo ovatungi ve li ekelashi,

ola ninga emanya lokolonela.

11Eshi osha dja mOmwene,

noshikumwifa momesho etu’?”

12Ndele ova diladila oku mu kwata, ndele ova tila ovanhu, shaashi ova koneka kutya, ovo e va popya mefaneko eli. Ove mu fiya po, ndele tava i.

Efendelo lepangelo

(Mat. 22:15-22; Luk. 20:20-26)

13Ndele vo ova tuma kuye vamwe vomOvafarisai novomOvakwaherodes, ve mu kwate meendjovo. 14Ndele ove uya ndele tava ti kuye: “Omuhongi, otu shi shii, Oove omunashili, ku na sha nomunhu, osheshi Ove iho tale oshipala shomunhu ndele to longo ovanhu ondjila yaKalunga pashili. Osha yuka tuu okupa omukesari oifendela, ile ahowe?” 15Ndele Ye okwa shiiva oihelele yavo, ndele ta ti kuvo: “Oshike tamu yeleke nge ngaha? Eteleni nge odenari, ndi i tale.” 16Ndele vo ve i eta. Ndele Ye okwa tya kuvo: “Efano eli neshangelo olalyelye?” Vo ova tya kuye: “Olomukesari.” 17Opo nee Jesus okwa tya kuvo: “Eshi shomukesari, shi peni omukesari, naasho shaKalunga, shi peni Kalunga.” Ndele vo ova kala ve mu kuminwa shili.

Enyumuko

(Mat. 22:23-33; Luk. 20:27-40)

18Opo nee Ovasadukai ve uya kuye, ava hava ti, kaku nenyumuko, ndele tave mu pula tava ti: 19“Omuhongi, Moses okwe tu shangela momhango kutya, ‘ngeenge oku na omunhu ta filwa omumwaina a fiya po omukainhu, ndele ye ine mu fiila nande oludalo, nena ye na hombole po omukainhu wamumwaina ye a dalele mumwaina oludalo.’ 20Okwa li nee ku na ovamwainafana ovalumenhu vaheyali. Ou wotete okwa hombola omukainhu ndele mokufya ina fiya po oludalo. 21Omutivali okwe mu hombola po, ndele okwa fya yo ina fiya po oludalo. Nosho tuu omutitatu. 22Naaveshe vaheyali inava fiya po oludalo. Opo nee omukainhu okwa xuunina okufya. 23Hano penyumuko eshi tava ka nyumuka, ota ka ninga omukainhu walyelye mwaava, osheshi ye okwa li omukainhu waaveshe ovo vaheyali.”

24Jesus okwe va nyamukula: “Inamu puka mbela, shaashi muhe shii omishangwa neenghono daKalunga? 25Osheshi mokunyumuka kwavo koufi ihava hombola ngaashi ihava hombolwa, ohava kala ngaashi ovaengeli meulu. 26Ndele mokupopya ovafi nenyumuko lavo koufi, inamu lesha hamba momushangwa waMoses, mehepaululo olo tali popi oshixwa sheno, Kalunga nhumbi e mu popifa ta ti: ‘Aame Kalunga kaAbraham naKalunga kaIsak naKalunga kaJakob.’ 27Ye ke fi Kalunga kovafi, ndelenee okovanamwenyo. Nye omwa puka unene.”

Oshipango shotete

(Mat. 22:34-40; Luk. 20:39-40)

28Opo nee okwe uya umwe womovanongo vomishangwa ou a uda okukundafana kwavo nokwa koneka kutya, okwe va nyamukula nawa. Ye okwe uya kuye ndele te mu pula ta ti: “Oshipango shotete shi dule oipango aishe, oshilipipo?” 29Jesus okwa nyamukula: “Shotete osho eshi: ‘Israel, pwilikina, Omwene Kalunga ketu, Oye aeke Omwene. 30Ove hola Omwene Kalunga koye nomutima woye aushe nomwenyo woye aushe neenghono doye adishe.’ 31Oshitivali osheshi: ‘Hola mukweni ngaashi u lihole mwene.’ Kaku na oshipango shinene shi dule ei.” 32Omunongo womishangwa okwa tya kuye: “Heeno, omuhongi, owa popya doshili, nokutya, Oye umwe aeke, nokaku na mukwao, Oye tuu aeke. 33Noku mu hola komutima aushe nokeendunge adishe nokeenghono adishe, nokuhola mukweni ngaashi u lihole mwene, okwo oku dule oiyandjiwa aishe yexwikilo nomayambo makwao.” 34Hano Jesus eshi a mona ye a nyamukula nawa, okwa tya kuye: “Ove ku li kokule nouhamba waKalunga.” Ndele kakwa li vali ou e nouladi oku mu pula sha.

Omwene, Omona waDavid

(Mat. 22:41-46; Luk. 20:41-44)

35Ndele mokulonga ovanhu motembeli, Jesus okwa popya vali ndele ta ti: “Ovanongo vomishangwa otava ti ngahelipi, Kristus Oye Omona waDavid? 36Osheshi David mwene okwa tile kOmhepo Iyapuki:

‘Omwene okwa lombwela Omwene wange:

Kala omutumba kolulyo lange,

fiyo handi tula ovatondi voye koshi yeemhadi doye.’

37David ye mwene ote mu ifana ngaha Omwene, openi nee hano omona waye?” Ndele ovanhu vahapu ova kala ve mu pwilikina nehafo.

Oihelele neyambo lomufiyekadi

(Mat. 23:1-36; Luk. 20:45-47; 21:1-4)

38Ndele mokulonga ovanhu Ye okwa tya: “Lungameni ovanongo vomishangwa, ovo va hokwa okweenda va djala oikutu ile, nove hole okukundilwa poilandelo, 39noipundi yokomesho meeshinagoga neenhele dopombada moivilo, 40ovo tava mane po omaumbo ovafiyekadi, nohava ningi omailikano malemale okulimonikifa kwongaho. Vo otava ka pewa etokolo lidjuu.”

41Ye okwa li omutumba a taalela koshikefa shoiyandjiwa ndele okwa tala ovanhu nhumbi tava umbile oimaliwa moshikefa. Oipuna ihapu oya umbila mo ihapu. 42Ndele ope ke uya omufiyekadi wohepele, ndele ta umbile mo oumaliwa vavali, kumwe okapeni kamwe ngeno. 43Opo Ye okwa ifana ovalongwa vaye kuye ndele okwa tya kuvo: “Oshili handi mu lombwele: omufiyekadi ou wohepele okwa tula mo shihapu, e dule aveshe ovo va umbila mo moshikefa. 44Osheshi aveshe ova umbila mo eshi inava pumbwa, ndelenee ye moluhepo laye okwa tula mo ashishe eshi e kwete, emona laye alishe.”

Currently Selected:

MARKUS 12: OKYB

Highlight

Copy