MATEUS 28

Enyumuko laJesus nelihololo laye

(Mark. 16:1-10; Luk. 24:1-12; Joh. 20:1-10)

1Ndele Eshabata eshi la pita neluwa la tenda, olefiku lotete loshivike, Maria Magdalena, naMaria mukwao ova ka tala kombila. 2Ndele tala, opa ninga ekakamo linene ledu, osheshi omweengeli wOmwene a dja meulu, okwe uya po ndele ta kandula po emanya ndele te li kala omutumba. 3Ndele okufa kwaye okwa li kwa fa oluvadi noikutu yaye itoka too, ya fa eemhawe. 4Ndele mokuhalukilila ovanangeli vombila ova kakama, va fa va fya.

5Ndele omweengeli okwa popifa ovakainhu ndele okwa tya: “Nye inamu tila; osheshi ndi shi shii, onye tamu kongo Jesus, omuvalelwa komushiyakano. 6Ke mo, osheshi okwa nyumuka, ongaashi a tile. Ileni, mu tale onhele, apa a li a nangala. 7Ndele indeni nee nokweendelela mu ka lombwele ovalongwa vaye nokutya, okwa nyumuka. Ndele tala, ote mu tetekelele okuya kuGalilea; oko tamu ke mu mona. Tala, aame nde shi mu lombwela.” 8Ndele opo nee ova dja ko kombila diva nokutila nokuhafa pombada, ndele va tondoka va ka twalele ovalongwa vaye ondaka. 9Ndele tala, Jesus okwe va shakeneka ndele ta ti: “Kundweni!” Ovo va ehena kuye, ove mu dingatela keemhadi daye, ndele ove mu twila eengolo. 10Ndele opo nee Jesus okwa tya kuvo: “Inamu tila, indeni mu ka lombwele ovamwatate, va ye kuGalilea, oko tava ka mona nge.”

Ovanangeli tava pewa ombubo

11Ndele fimbo va ya ko, tala, ovanangeli vamwe ove uya koshilando ndele va hepaululila ovapristeli ovakulunhu aishe ei ya ningwa ko. 12Ndele ovo va ongala pamwe novakulunhu, ova kundafana, ndele va pa ovakwaita oimaliwa ihapu 13ndele va tya: “Tyeni, ovalongwa vaye ve uya oufiku, ndele ve mu vaka mo oufiku fimbo twa kofa. 14Ndele ngeenge tashi udika komupangeli, fye ohatu mu handukulula, ndele hatu mu popile, nye mu shiive okukala muhe noshisho.” 15Ovo va tambula oimaliwa ndele va ninga ngaashi va lombwelwa. Ndele ehepaululo eli ola tandavelifwa mOvajuda, ndele tali hepaululwa nonena.

Elombwelo loshilonga shetumo

(Mark. 16:14-18; Luk. 24:36-49; Joh. 20:19-23; Oil. 1:1-8)

16Ndele ovalongwa ovo omulongo naumwe ova ya kuGalilea okomhunda inya, Jesus e i va lombwela. 17Ndele ovo eshi ve mu mona, ove mu linyongamena, ndele vamwe ova limbililwa. 18Ndele Jesus okwe uya kuvo, okwe va lombwela ndele ta ti: “Ame onda pewa eenghono adishe meulu nokombada yedu. 19Indeni hano ka ningeni ovanhu aveshe ovalongwa vange, noku va shashela medina laXe nolOmona nolOmhepo Iyapuki, 20noku va longa okudiinina aishe ei nde i mu lombwela. Ndele tala, Ame ondi li pamwe nanye omafiku aeshe, fiyo okexulilo lefimbo lounyuni.”

Currently Selected:

MATEUS 28: OKYB

Highlight

Copy