MATEUS 26

Jesus ta kundafanwa

(Mark. 14:1-2; Luk. 22:1-2; Joh. 11:45-53)

1Ndele opa ningwa, Jesus eshi a mana eendjovo odo adishe, okwa tya kovalongwa vaye: 2“Onye omu shi shii, ngeenge taku piti omafiku avali oku nOpaasa; nOmona wOmunhu ota yandjwa okuvalelwa.”

3Opo nee ovapristeli ovakulunhu novakulunhu voshiwana va ongala meumbo lomupristeli omukulunhu, edina laye Kajafas 4ndele va kundafana, va kwate Jesus nekonda ve mu dipae. 5Ndele tava ti: “Hapefimbo loshivilo shinene, puha ninge epiyaano movanhu.”

Jesus ta vaekwa

(Mark. 14:3-9; Joh. 12:1-8)

6Opo nee Jesus eshi a li muBetania omeumbo laSimon omunashilundu, 7omukainhu umwe okwe uya kuye, e nokashanga ke yadi omaadi e nondilo, ndele okwe a tila komutwe waJesus, fimbo a kala omutumba poshililo. 8Ndele ovalongwa vaye eshi ve shi mona va ninga omwenyo mwii ndele tava ti: “Oshike hano taa hepifwa ashike? 9Ngeno a landifwa po, ngeno oimaliwa ihapu, i yandjelwe eehepele.” 10Ndelenee opo Jesus eshi e shi koneka, ota ti kuvo: “Oshike tamu nyikifa omukainhu oluhodi? Oye okwa longela nge oshilonga shiwa. 11Eehepele omu va kwete alushe punye, ndele Ame kamu kwete nge alushe. 12Osheshi eshi a tila omaadi aa kolutu lange, okwe shi ningila epako lange. 13Oshili handi mu lombwele: Keshe apa mounyuni aushe evaengeli eli tali udifwa, noshilonga eshi shaye otashi ka hepaululwa moku mu dimbulukwa.”

Jesus ta landwa po

(Mark. 14:10-11; Luk. 22:3-6)

14Opo nee umwe womwaava omulongo navavali, edina laye Judas Iskariot, okwa ya kovapristeli ovakulunhu 15ndele ta ti: “Omwa hala okupa nge shike, ndi mu yandje momake eni?” Ovo ove mu futa oimaliwa oisiliveli omilongo itatu. 16Ndele okudja kefiku tuu eli okwa li ta kongo efimbo la wapala oku mu kengelela.

Odjona yaPaasa

(Mark. 14:12-16; Luk. 22:7-13)

17Ndele efiku lotete lomingome inadi fingwa, ovalongwa ove uya kuJesus ndele tava ti: “Openi wa hala, tu ku longele odi yaPaasa u i lye?” 18Ndele Ye okwa tya: “Indeni koshilando kunima nye mu ke mu lombwele, mu tye: ‘Omuhongi ota ti: efimbo lange ola fika; opwoove handi ka lya oikulya yaPaasa pamwe novalongwa vange.’ ” 19Ovalongwa ova ninga ngaashi Jesus e va lombwela, ndele va longekida odi yaPaasa.

Jesus ta holola Omukengeleli

(Mark. 14:17-21; Luk. 22:14, 21-23; Joh. 13:21-30)

20Ndele onguloshi eshi ye uya, okwa kala omutumba poshililo pamwe novalongwa vaye omulongo navavali. 21Ndele fimbo tava li, Ye okwa tya: “Oshili handi mu lombwele: umwe womokati keni ota kengelele nge.” 22Opo vo ova nyika oluhodi shili, ndele va hovela oku mu pula va shikulafana, ndele tava ti: “Omwene, haame ndi shii?” 23Oye okwa nyamukula, ta ti: “Ou a twa eke laye metiti pamwe naame, oye ta kengelele nge. 24Heeno, Omona wOmunhu ota i ngaashi pa shangwa, ndele woo, omunhu ou, te mu kengelele! Omunhu ou ngeno okwa li ina dalwa, she mu wapalela.” 25Ndelenee Judas, ou e mu kengelela, okwa nyamukula ta ti: “Omuhongi, haame ndishi?” Oye ta ti kuye: “Ove we shi tya.”

Ouvalelo Uyapuki tau dikwa

(Mark. 14:22-26; Luk. 22:15-20; 1 Kor. 11:23-25)

26Ndele eshi va li tava li, Jesus okwa kufa omungome, ndele ta hambelele, ndele te u pambula, ndele te u pe ovalongwa vaye ndele ta ti: “Tambuleni, lyeni; eshi olutu lange.” 27Opo Ye okwa kufa eholo, ndele ta pandula, ndele te li va pe, ndele ta ti: “Nweni mo amushe; 28osheshi olo ohonde yange, ohonde yehangano, tai tilwashi omolwavahapu okudima po omatimba. 29Ndele handi mu lombwele: okunena eli Ame itandi nu vali oiimati ei yomuviinyu fiyo efiku olo, handi ke a nwa mape pamwe nanye omouhamba waTate.”

Jesus a fila ovalongwa vaye oshisho

(Mark. 14:27-37; Luk. 22:31-34; Joh. 13:36-38)

30Ndele eshi va imba eimbilo lepandulo ova dja mo ndele tava i kOmhunda yEemono. 31Ndele Jesus ta ti kuvo: “Oufiku ou wonena onye amushe otamu lidimbike nge, osheshi okwa shangwa: ‘Ame ohandi denge omufita, needi doufita otadi lihane.’ 32Ndele Ame ngeenge nda nyumuka, ohandi mu tetekelele kuGalilea.” 33Opo Petrus okwa nyamukula ta ti kuye: “Nande aveshe nave ku lidimbike, haame handi ku lidimbike nande efiku limwe.” 34Jesus ta ti kuye: “Oshili handi ku lombwele: oufiku ou, ekondobolo fimbo inali kwena, ove to lidimbike nge lutatu.” 35Petrus okwa tya kuye: “Nande ondi fye naave, itandi ku lidimbike nande.” Osho tuu ovalongwa vakwao aveshe va tya.

Jesus ta indile muGetsemane

(Mark. 14:32-42; Luk. 22:39-46)

36Opo nee Jesus okwa ya navo konhele, edina layo Getsemane; ndele okwa tya kovalongwa vaye: “Kaleni omutumba apa, fimbo handi i kwinya ndi ka ilikane.” 37Ndele pamwe naye okwa kufa Petrus novana vavali vaSebedeus. Ye okwa hovela okunyika oluhodi nokuudite oudjuu. 38Ndele okwa tya kuvo: “Omwenyo wange owa nyika oluhodi fiyo okufya, kaleni apa mu kale oupafi pamwe naame.” 39Ndele okwa ehena ko kanini, ndele a wila eombe poshi, okwa indila ndele ta ti: “Tate, ngeenge tashi dulika, eholo eli nali koye nge; ndele hangaashi Ame nda hala, ndelenee ongaashi Ove wa hala.”

40Ndele okwe uya kovalongwa, ndele okwe va hanga va kofa ndele ta ti kuPetrus: “Hano osho mwa nyengwa okukala oupafi okafimbo kamwe pamwe naame. 41Kaleni oupafi, nye mu indile, muha hangike komahongaulo; omhepo oya hala, ndele ombelela i noungone.”

42Ndele okwa shuna ko lutivali, okwa indila ta ti: “Tate, ngeenge itashi dulika eholo eli li koye nge inandi li nwa, ehalo loye nali wanifwe.” 43Ndele okwa aluka ko ndele okwe va hanga vali va kofa, osheshi omesho avo a dinda keemhofi. 44Ndele okwe va fiya po, ndele okwa shuna ko, ndele ta ilikana lutitatu, a popyulula eendjovo dinya.

45Opo nee okwe uya kovalongwa ndele ta ti kuvo: “Otamu kofa natango, ndele tamu tulumukwa! Tala, efimbo ola fika, Omona wOmunhu ota yandjwa momake ovalunde. 46Fikameni, tu yeni, tala, ou ta kengelele nge oku li popepi.”

Jesus ta kwatwa ndele ta hokololifwa

(Mark. 14:43-52; Luk. 22:47-53; Joh. 18:3-12)

47Ndele tala, fimbo ta popi, Judas, umwe waava omulongo navavali, okwe uya, ta ende pamwe nongudu inene i nomaongamukonda needibo, va dja kovapristeli ovakulunhu nokovakulunhu voshiwana. 48Naau, e mu kengelela, okwa li e va pa oshidimbulukifo ta ti: “Ou handi mu fipi komulungu, Oye ou, mu kwateni.” 49Ndele okwa ya kuJesus divadiva ndele ta ti: “Rabbi, wa tokelwa!” Ndele te mu fipi komulungu. 50Ndelenee Jesus okwa tya kuye: “Kaume, owa ila shike apa?” Opo nee ova ehena kuJesus, ve mu nanena omake ndele ve mu kwata. 51Ndele tala, umwe womwaava va li pamwe naJesus, okwa nana eke laye, a pweya mo eongamukonda laye, ta denge omupiya womupristeli omukulunhu, ndele okwe mu teta okutwi. 52Opo nee Jesus ta ti kuye: “Shunifa mo eongamukonda loye moshilaleko shalo, osheshi aveshe ava tava kwata keongamukonda, otava fi keongamukonda. 53Ile ou shii, nghi dulu okwiindila Tate, a tumine nge paife ovaengeli ve dule eengudu dakula omulongo nambali! 54Ndele omishangwa otadi wanifwa ngahelipi ngeno, odo tadi ti, oshi nokuningwa ngaha?”

55Efimbo tuu eli Jesus okwa lombwela eengudu: “Onye mwe uya okukwata nge ongaashi omukolokoshi, mu nomaongamukonda needibo. Omafiku aeshe kwa li nda kala omutumba motembeli ndele nda longa, nye inamu kwata nge. 56Ndelenee aishe ei oya ningwa, omishangwa dovaxunganeki opo di wanifwe.” Opo nee ovalongwa aveshe ve mu fiya po, ndele va ya onhapo.

Jesus koshipala shovakulunhu

(Mark. 14:53-56; Luk. 22:54, 63-71; Joh. 18:12-14, 19-24)

57Ndele ovakwati vaJesus ove mu twala komupristeli omukulunhu, Kajafas, omo mwa ongala ovanongo vomishangwa novakulunhu. 58Ndele Petrus okwe mu shikula e li konima kokule, fiyo omomukala womupristeli omukulunhu; okwa ya mo ndele okwa kala omutumba povapiya, a mone nhumbi tashi ningwa.

59Ndele ovapristeli ovakulunhu noshiongalele ashishe shovakulunhu ova li tava kongele Jesus oihokolola yoipupulu, va shiive oku mu dipaa, 60ndele inave i mona, nande eendobwedi dihapu doipupulu da holokela po. Ndele hauxuuninwa eendobwedi mbali de uya mo 61ndele tadi ti: “Ou okwa tile: ‘otembeli yaKalunga ohandi dulu oku i ngumauna po, noku i tungulula omafiku atatu.’ ” 62Omupristeli omukulunhu okwa fikama ndele ta ti kuye: “Ito nyamukula sha, ava eshi tave ku popi.” 63Ndelenee Jesus okwa mwena. Opo nee omupristeli omukulunhu okwa tya kuye: “Ohandi ku anifa kuKalunga omunamwenyo, u tu lombwele, ngeenge Oove Kristus, Omona waKalunga?” 64Jesus okwa tya kuye: “Ove we shi tya. Ndele ohandi mu lombwele: onena eli otamu ka mona Omona wOmunhu ta kala omutumba kolulyo lEenghono ndele te uya, ta ende kombada yoilemo yokeulu.” 65Opo nee omupristeli omukulunhu okwa pombaula oikutu yaye, ndele okwa tya: “Okwa tuka Kalunga. Ohatu kongele vali shike ondobwedi? Tala, paife eshi omwa uda etukano laye. 66Otamu ti ngahelipi?” Ovo va nyamukula tava ti: “Oku netimba lokufya.” 67Opo nee vo ve mu fiila omate moshipala ndele ove mu denga neengonyo; vamwe ove mu denga omanghava 68ndele va tya: “Kristus, tu xunganekela, olyelye ou e ku denga.”

Okulidimbika kwaPetrus

(Mark. 14:66-72; Luk. 22:55-62; Joh. 18:15-17, 25-27)

69Ndele Petrus okwa li omutumba momukala. Ndele omukalele okakadona umwe e uya kuye ndele ta ti: “Naave yo owa li pamwe naJesus, Omugalilea.” 70Ndele ye okwe lidimbika omoipafi yaaveshe ndele ta ti: “Nghi udite ko eshi to popi.” 71Ndele eshi a ya moluvanda, okakadona kamwe ke mu mona ndele okwa tya kwaavo va li mo: “Naau yo okwa li pamwe naJesus, Omunasareti.” 72Navali okwe lidimbika nokwaana: “Omulumenhu ou nghi mu shii.” 73Ndele konima yokafimbo opwe uya vamwe ava va li ko ofika, ndele va tya kuPetrus: “Oshili naave yo oumwe waavenya, osheshi nelaka loye ole ku holola.” 74Oye okwe lidimbika vali nokulifingaela nokwaana kutya: “Omulumenhu ou nghi mu shii. Ndele ekondobolo la kwena.” 75Petrus okwa dimbulukwa eendjovo daJesus, e di mu lombwela: “Ekondobolo fimbo inali kwena, oto lidimbike nge lutatu.” Ye okwa ya pondje, ndele okwa lila unene.

Currently Selected:

MATEUS 26: OKYB

Highlight

Copy