MATEUS 13

Jesus ta popi omafaneko: Omukuni

(Mark. 4:1-9; Luk. 8:4-8)

1Ndelenee efiku olo Jesus okwa dja mo meumbo ndele ta ka kala omutumba pefuta. 2Ndele ovanhu vahapu ova ongala kuye, onghee okwa ya mowato ndele ta kala omutumba, novanhu aveshe va li ofika komunghulo.

3Ndele Ye okwe va lombwela dihapu domafaneko, ta ti: “Tala, omukuni okwa pita a ka kune. 4Ndele mokukuna kwaye dimwe oda wila mondjila, needila ode uya notadi di shomona po. 5Ndele dimwe oda wila pemanya, puhe nedu lihapu, ndele da mena diva, osheshi da li dihe nedu lihapu. 6Ndelenee etango eshi la pita oda lemba, ndele eshi da li dihe na omidi oda kukuta. 7Ndele dimwe oda wila meeshosholo, neeshosholo eshi dakula, ode di fininika. 8Ndele dimwe oda wila medu liwa, ndele da dala, dimwe efele, dimwe omilongo hamano nadimwe omilongo nhatu. 9Hano ou e nomatwi okuuda, na ude ko!”

10Ndele ovalongwa vaye ove uya po ndele tava ti kuye: “Oshike to va lombwele odo domafaneko?” 11Oye okwa nyamukula ndele ta ti: “Nye omwa pewa okushiiva oiholekwa youhamba weulu, ndele venya inave i pewa. 12Osheshi ou e na, oye ta pewa, ndele ta kala a wanenena, ndele ou ehe na, oye ta kufwa naashi e shi kwete. 13Onghee hano handi va lombwele odo domafaneko, osheshi nande ove nomesho okutala, ihava mono ko, nomatwi okuuda, ihava udu ko, nongaashi kave udite ko. 14Ndele omwaava omaxunganeko aJesaja taa ningi oshili, eshi ta ti:

‘Okuuda ohamu udu ko, nye kamu udite ko,

nokumona ohamu mono ko, nye itamu koneke sha.

15Osheshi omutima woshiwana eshi owa kukuta,

nomatwi avo ve a fitika,

nomesho avo ve a fifikinifa,

vaha mone ko nomesho avo,

novaha ude ko nomatwi avo,

novaha koneke komitima davo,

vehe lidilulule, Ame ndihe va velule.’

16Ndelenee omesho eni oku nelao, eshi e wete ko, nomatwi eni eshi haa udu ko. 17Oshili handi mu lombwele: Ovaxunganeki vahapu novayuki ova li va hala va halelela okumona ei hamu i mono, vo inave i mona, nokuuda odo hamu di udu, vo inave di uda.

18“Pwilikineni hano odo domafaneko omukuni: 19Ngeenge oku na ou ta udu eendjovo douhamba ye ke di udite ko, opo nee omunawii te uya ndele ta nyeka mo odo da kunwa momutima; odo tuu odo da kunwa mondjila. 20Ndele odo da kunwa pemanya, oye tuu ou, ta udu eendjovo ndele te di tambula nehafo, 21ndelenee ke na omidi muye mwene, ota diinine okafimbo kongaho, ndele ngeenge tape uya oudjuu netewatewo omolweendjovo, ota efa diva. 22Ndele odo da kunwa meeshosholo, oye tuu ou ta udu eendjovo, ndelenee oshisho shounyuni neheka loupuna tali fininike eendjovo, ndele ta kala ehe noiimati. 23Ndele odo da kunwa medu liwa, oye tuu ou ta udu eendjovo, e di udite ko ndele ta dala, umwe ta dala efele, umwe omilongo hamano naumwe omilongo nhatu.”

Eu, ombuto yoshinapi, onhafi

(Mark. 4:30-32; Luk. 13:18-21)

24Ndele okwe va lombwela eendjovo dikwao domafaneko ta ti: “Ouhamba wokeulu owa fa omunhu, a kuna ombuto iwa mepya laye. 25Ndelenee fimbo ovanhu va kofa, omutondi waye okwe uya, ndele ta kunu mo eu mokati koilya, ndele ta i. 26Ndele oimeno eshi ya kula ndele tai dala, opo nee eu la holoka yo. 27Opo nee ovamati vomwene ve uya ndele tava ti kuye: ‘Omwene, ino kuna mo hamba eembuto diwa mepya loye? Eu ola dja peni hano?’ 28Ndele okwa tya kuvo: ‘Omutondi okwe shi ninga.’ Ovamati ova tya kuye: ‘Owa hala tu ye tu ke li dude mo?’ 29Ndelenee oye okwa tya: ‘Ahowe, opo muha dude mo oilya pamwe nalo. 30Efeni, aishe ivali i kale po i kule mumwe fiyo efiku leteyo; efiku leteyo ohandi lombwele ovatei: ongeleni manga eu, nye mu li mange oipandi, li xwikwe po, ndele oilya i tuvikileni momaanda ange.’ ”

31Neendjovo domafaneko makwao okwe va lombwela ndele ta ti: “Ouhamba wokeulu owa fa ombuto yoshinapi, omulumenhu e i kufa ndele te i kunu mepya laye. 32Oyo okandji kanini ke dulike keembuto adishe, ndele ngeenge tai kulu, oyo i dule oimbodi aishe ndele tai ningi omuti, needila dokeulu otadi uya ndele tadi tungile mo oihadi yado moitai yao.”

33Neendjovo dikwao domafaneko e va lombwela: “Ouhamba wokeulu wa fa onhafi, omukainhu e i kufa ndele te i pilulile moufila weelita omilongo nhee, fiyo aushe wa pya.”

34Jesus okwa tonga adishe edi keengudu dovanhu momafaneko, Oye ina tonga kuvo dihe fi domafaneko, 35opo eendjovo odo domuxunganeki di ninge doshili eshi ta ti:

“Ohandi popi momafaneko,

ndele handi holola eshi sha kala sha holekwa keshito lounyuni.”

36Opo nee Ye okwa lekela ovanhu ndele ta i meumbo. Ovalongwa vaye ove uya kuye ndele tava ti: “Tu fatululila efaneko leu lomepya.” 37Ndele Ye okwa nyamukula ta ti: “Ou ha kunu mo ombuto iwa, Oye Omona wOmunhu. 38Ndele epya olo ounyuni, ombuto iwa oyo ovanhu vOuhamba, eu olo ovanhu vomunawii. 39Nomuyelani ou e li kuna mo, oye Satana, eteyo olo exulilo lefimbo lounyuni, novatei ovo ovaengeli. 40Hano ngaashi eu tali ongelwa notali xwikwa po momundilo, hano osho taku kala pexulilo lefimbo lounyuni. 41Omona wOmunhu ota tumu ko ovaengeli vaye, ndele tava ka ongela mo mouhamba waye omashindo aeshe naava hava nyono ouyuki, 42ndele tave va ekele mediko la hanya; omo hamu kala elilaano nomalikweshelo omayoo. 43Opo nee ovayuki otava ka vilima ngaashi etango mouhamba waXe. Ou e nomatwi, na ude ko.

Emona la holekwa

44“Ouhamba wokeulu owa fa emona la holekwa mepya, omunhu e li mona, note li holeke, nomoku li hafela okwa ka landifa po oinima yaye aishe, ndele te lilandele epya olo. 45Ndele vali, ouhamba wokeulu wa fa omushingifi, ta kongo okawe ka wapala, 46ndele eshi a mona ko okawe kamwe kawa unene ke nondado ihapu, okwa ya ndele ta landifa po oinima yaye aishe, ndele te ke lilandele.

Oshiyulifo

47“Ndele vali, ouhamba wokeulu owa fa oshiyulifo sheeshi, sha endifilwa mefuta, ndele sha ongela eeshi doludi keshe. 48Ndele eshi sha yada, ove shi shilila komunghulo, va kala omutumba, ndele tava tongola mo edi diwa, ndele ve di tula moikwatelwa, ndele edi dii ove di ekelashi. 49Hano osho tashi ningwa pexulilo lefimbo lounyuni; ovaengeli otava i notava ka tongola ovanawii movayuki 50ndele tave va ekele mediko la hanya; omo tamu kala elilaano nelikweshelo lomayoo.

51“Omwa uda ko tuu adishe edi?” Ovo va tya kuye: “Heeno.” 52Ndele opo nee Ye okwe va lombwela: “Onghee hano keshe omunongo womishangwa ou a ninga omulongwa wouhamba wokeulu okwa fa mwene weumbo, ta holola melimba laye oipe noikulu.”

Jesus ta dinwa muNasaret

(Mark. 6:1-6; Luk. 4:16-30)

53Ndele opa ningwa, Jesus eshi a mana eendjovo odo domafaneko, okwa dja ko oko. 54Ndele okwe uya koshilando shambulavo nokwe va longa moshinagoga yavo ndele vo va kumwa ndele tava ti: “Ounongo oo e u kwete noilonga yeenghono e i na, oyapeni? 55Ou haye omona womuhongi womiti? Ina ke fi ta ifanwa Maria, novamwaina havoovo: Jakob naJosef naSimon naJudas? 56Novamwaina ovakainhu aveshe havoovo ve li pufye apa? Ndele ye, aishe ei okwe i hanga peni?” 57Ndele vo ve liyala omolwaye. Jesus okwa tya kuvo: “Omuxunganeki ke na opo a dinwa, omoshilando tuu shambulavo nokeumbo lambulavo.” 58Ndele omolwokuhaitavela kwavo ina ningila ko oilonga ihapu yeenghono.

Currently Selected:

MATEUS 13: OKYB

Highlight

Copy