LUKAS 3

Johannes ta longekidile Omwene ondjila

1Ndele momudo omutimulongo nanhano wepangelo lomukesari Tiberius, Pontius Pilatus eshi kwa li omupangeli waJudea, naHerodes omupangeli woshitine muGalilea, nondenge yaye Filippus omupangeli woshitine shoshilongo shaIturea naTrakonitis, naLisanias omupangeli woshitine muAbilene, 2naHannas naKajafas eshi va li ovapristeli ovakulunhu, eendjovo daKalunga ode uya kuJohannes, omona waSakaria, mombuwa. 3Ndele ye okwa ya komikunda adishe dokuJordan nokwa udifa kutya, ovanhu nave lidilulule nava shashwe, opo omatimba avo a dimwe po, 4ongaashi mwa shangwa momishangwa domaxunganeko omuxunganeki Jesaja:

“Ondaka yomwiingidi tai udika mombuwa:

‘Longekidileni Omwene ondjila,

mu yelakanifileni omalila,’

5omalufilu aeshe naa fufilwe,

eemhunda nomituni adishe nadi kulumunwe po,

naashi sha endama nashi yukifwe,

noifilukutumba nai palwe,

6nombelela aishe oi nokumona exupifo laKalunga.”

7Ndele okwa lombwela eengudu odo de uya po va shashwe kuye: “Nye oludalo lomafu, olyelye e mu lombwela mu ye onhapo yehandu tali uya? 8Imikeni hano oiimati yelidilululo, nye muha hovele okulipopila nokutya: ‘otu na tate Abraham;’ osheshi handi mu lombwele, Kalunga ta dulu okupendulila Abraham ounona momamanya aa. 9Ndele paife ekuva ola tulwa pefina lomiti, keshe tuu omuti itau imi oiimati iwa otau kewa po ndele tau ekelwa momundilo.”

10Ndele eengudu dovanhu ode mu pula da tya: “Tu nokuninga shike hano?” 11Ndele ye okwe di nyamukula ta ti: “Ou e na oikutu ivali, shimwe ne shi pe ou ehe na, naau e neendja osho tuu na ninge.” 12Ndele ovafutifi yo ove uya keshasho, ova tya kuye: “Omuhongi, otu na okuninga shike?” 13Ndele ye okwe va lombwela: “Inamu futifa ovanhu shi dule eshi sha pangelwa.” 14Ndele ovakwaita ve mu pula tava ti: “Fye otu na okuninga shike?” Ye okwe va lombwela: “Inamu fininika ovanhu, nye inamu va nyeka, ondjabi yeni tuu nai mu wanene.”

Johannes ta fimaneke Jesus

15Ndele ovanhu eshi va li va teelela, ndele aveshe va diladila momitima davo, Johannes shiimba oye Kristus, 16Johannes okwe va lombwela aveshe: “Ame ohandi mu shashe nomeva, ndele taku di ou e dule nge meenghono, ame inandi wana okuditula nande omiya deenghaku daye, ye ote mu shashe nOmhepo Iyapuki nomundilo. 17Ye oku na oshiyelifo meke laye ndele ta kombo oshipale shaye, oilya ote i tuvikile momaanda aye nolungu ote li xwike nomundilo ihau dimi.”

18Nomakumaido mahapu e lili okwe va kumaida noku va udifila evaengeli. 19Ndelenee omupangeli woshitine, Herodes, eshi a hanyenwa kuye omolwaHerodias, omukainhu wondenge yaye nomolwowii aushe Herodes e u ninga, 20koinima aishe ei okwa weda ko vali eshi, shokwiidilila Johannes modolongo.

Okushashwa kwaJesus

21Ndele opa ningwa, ovanhu aveshe eshi va shashwa naJesus eshi a shashwa ndele ta ilikana, eulu ola yeuluka 22nOmhepo Iyapuki ya fa onghuti Oye mu kulukila nondaka ya dja meulu tai ti: “Oove Omona wange omuholike, onde ku hokwa.”

Efina lepata laJesus

23Ndele Jesus eshi a hovela oshilonga shaye, omido daye oda li di fike pomilongo itatu; okwa li, ngaashi kwa tengenekwa, omona waJosef owaEeli, 24owaMatat owaLevi owaMelki owaJannai owaJosef, 25owaMatatia owaAmos owaNahum owaEsli owaNagai, 26owaMaat owaMatatia owaSemei owaJosek owaJooda, 27owaJohanan owaResa owaSerubbabel owaSalatiel owaNeri, 28owaMelki owaAddi owaKoosam owaElmadam owaEr, 29owaJosua owaElieser owaJorim owaMatat owaLevi, 30owaSimeon owaJuda owaJosef owaJonam owaEliakim, 31owaMelea owaMenna owaMatat owaNatan owaDavid, 32owaIsai owaObed owaBoas owaSala owaNashon, 33owaAminadab owaAdmin owaArni owaHesron owaPeres owaJuda 34owaJakob owaIsak owaAbraham owaTera owaNahor, 35owaSeruh owaRehu owaPeleg owaEber owaShela, 36owaKainan owaArfasad owaSem owaNoa owaLamek, 37owaMetusala owaHenok owaJared owaMahalalel owaKainan, 38owaEnos owaSet owaAdam owaKalunga.

Currently Selected:

LUKAS 3: OKYB

Highlight

Copy