LUKAS 19

Jesus naSakeus

1Ndele Ye okwe uya muJeriko, ndele okwa pitilila mo. 2Ndele tala, oko kwa li ku nomulumenhu, edina laye Sakeus, omukulunhu wovafutifi, oshipuna. 3Ndele ye a hala okumona Jesus nokutya, Ye olyelye, ndele okwa nyengwa kouhapu wovanhu, shaashi ye okwa li muxupi momufika waye. 4Ndele ye okwa tondokela komesho ndele ta londo komukwiyu e mu mone, osheshi Ye okwa li e nokweenda po. 5Ndele Jesus eshi a fika po, okwa tala pombada, ndele ta ti kuye: “Sakeus, londoloka ko diva, osheshi nena eli ondi nokuuhala meumbo loye.” 6Ye okwa londoloka ko divadiva, ndele okwe mu tambula nehafo. 7Ndele eshi ve shi mona, aveshe ova ngongota, tava ti: “Okwa ya a ka uhale pomulumenhu omulunde.” 8Ndelenee Sakeus okwa fikama ndele ta ti kOmwene: “Omwene tala, emona lange ohandi li tukula pokati, ombinga imwe ndi i pe eehepele, ndele ngeenge oku na ou nde mu nyekele ohandi mu shunifile lune.” 9Opo Jesus okwe mu lombwela: “Onena tuu eli eumbo eli la mona exupifo, osheshi naye yo omona waAbraham, 10osheshi Omona wOmunhu e uya okukonga nokuxupifa eshi sha kana.”

Eembongo omulongo

11Ndele vo eshi va pwilikina odo okwa weda ko efaneko, osheshi a li popepi naJerusalem naashi vo va li ve shii ouhamba waKalunga otau holoka diva 12Ye okwa tya hano: “Okwa li ku na omunhu a daleka a ya koshilongo shokokule a vaekwe ouhamba, ye a aluke ko. 13Ndele ye okwa ifana ovapiya vaye omulongo, ndele te va pe eeponda omulongo ndele okwa tya kuvo: ‘Ke di landifeni fiyo handi aluka.’ 14Ndelenee ovanhu vomoshilongo ove mu tonda ndele ove mu shikulifa ovatumwa ve mu lombwele: ‘Ou inatu mu hala e tu pangele.’

15“Ndele mokwaaluka kwaye, eshi a nangala oshilongo okwa lombwela ovapiya venya a pa oimaliwa, ve uye kuye opo a shiive nhumbi va longa nayo mokulandakanifa. 16Ndele wotete okwe uya mo ndele ta ti: ‘Omwene, oshimaliwa shoye osha likolifa oimaliwa omulongo.’ 17Ndele ye okwe mu lombwela: ‘Iyaloo, omupiya ove muwa, ove eshi wa diinina ngaha mushinininini, oto pewa epangelo loilando omulongo.’ 18Nomutivali okwe uya mo ta ti: ‘Omwene, oshimaliwa shoye oshe likola oimaliwa itano.’ 19Naau a lombwelwa kuye: ‘Naave yo pangela oilando itano.’ 20Ndele umwe vali e uya po ndele ta ti: ‘Omwene, tala, oshimaliwa shoye osheshi, osheshi onde shi tuvikila moshikaiwa. 21Osheshi ame onde ku tila, osheshi ove omunhu mudjuu, to kufa osho ino shi tuvikila noho teya osho ino shi kuna.’ 22Opo nee ye okwe mu lombwela: ‘Ohandi ku tokolifa okanya koye mwene, omupiya ove mwii. U shii nge ame omunhu mudjuu, handi kufa eshi inandi shi tuvikila, ndele handi teya osho inandi shi kuna, 23oshike hano ino yandja oshimaliwa shange kovakumaani, ame mokwaaluka kwange ngeno nde shi hanga noishoshela.’ 24Ndele okwa lombwela ava va li po ofika: ‘Mu kufeni oshimaliwa shaye, mu shi pe ou e noimaliwa omulongo.’ 25Ndele ovo va tya kuye: ‘Omwene, ou oku na nale oimaliwa omulongo.’ 26Ame ohandi mu lombwele: ‘Keshe tuu ou e na, ota pewa, naau ehe na, ota kufwa osho e shi kwete. 27Ndelenee ovatondi vange ovo inava hala ndi va pangele va eteni oku, mu va dipaele apa moipafi yange.’ ”

Efiko laJesus kuJerusalem

28Ndele Ye eshi a dimbuka okupopya odo, okwa twikila ondjila yaye a yuka kuJerusalem. 29Ndele opa ningwa, eshi a ehena kuBetfage naBetania komhunda ei ya ifanwa Omhunda yEemono, Ye okwa tuma ovalongwa vaye vavali 30ndele ta ti: “Indeni momukunda winya twe u taalela, ndele ngeenge mwa i mo, otamu ka hanga mo okambulwena ka pandekwa, inaka londwa nale nande okomunhu, ka pandekululeni, nye mu ka ete oku. 31Ndele ngeenge oku na ou te mu pula: ‘Oshike tamu ka pandekulula’, tyeni: Omwene e ka pumbwa.” 32Ndele ovatumwa ova ya ko, ndele ova hanga ngaashi va lombwelwa. 33Ndele fimbo va li po tava pandekulula okambulwena, oovene vako ove va pula: “Oshike tamu pandekulula okambulwena?” 34Ndele vo ova tya: “Omwene e ka pumbwa.” 35Opo nee ove ka eta kuJesus, ndele ova tula ko oikutu yavo kokandongwena nova londeka Jesus kuko. 36Ndele Ye eshi a li ta ende, ovanhu ova yala oikutu yavo mondjila. 37Ndele eshi a fika popepi, ndele tava kulukile ekulukila lOmhunda yEemono, ongudu aishe yovalongwa oya hovela okuhambelela Kalunga nehafo nondaka inene, ve mu hambelelela oilonga aishe yeenghono ve i mona, 38ndele tava ti: “Na nangekwe noupuna ohamba, ou te uya medina lOmwene, ombili omeulu nefimano opombada.”

39Ndele Ovafarisai vamwe vomongudu ove mu lombwela: “Omuhongi, hanyena ovalongwa voye.” 40Ndele Ye okwe va nyamukula ta ti: “Ohandi mu lombwele: Ava ngeenge tava mwena, omamanya otaa ingida.”

Jesus ta lilile Jerusalem

41Ndele eshi a ehena popepi ndele ta tale oshilando, te shi lilile, 42ndele ta ti: “Ngeno mefiku eli ove wa koneka osho sha wapalela ombili yoye, ndelenee paife eshi sha holekwa omesho oye. 43Osheshi omafiku otae ke uya, ovatondi voye tave ku fele omikangha ndele tave ku dingilile, ndele otave ku fininike keembinga adishe, 44ndele tave ku ngumauna po fiyo okomikangha, novamwoye vomwoove, vo itava fii po emanya la londekwa kulikwao, osheshi ove ino koneka efimbo lekongo loye.”

Jesus ta te mo ovalandifi motembeli

45Ndele Ye okwa ya motembeli ndele ta hovele okuta mo ovo va landifa, 46ndele te va lombwele: “Pa shangwa: ‘Ongulu ei yange oyo ongulu yeilikano,’ ndele nye omwe i ninga oshikololo shovanyeki.”

47Ndele Ye okwa li he va longo omafiku aeshe motembeli, ndele ovapristeli ovakulunhu novanongo vomishangwa ove mu konga ve mu dipae, nosho tuu ovakulunhu voshilongo, 48ndele va nyengwa nhumbi ve mu ninge, osheshi ovanhu aveshe ve mu hokwa ndele ove mu pwilikina.

Currently Selected:

LUKAS 19: OKYB

Highlight

Copy