LUKAS 17
17
Elondwelo molwomapukifo nekumaido okukufilafana po
1Ndele Ye okwa lombwela ovalongwa vaye: “Itashi dulika omahongaulo ehe uye, ndelenee woo, ou te a eta! 2Oshiwa kuye ngeno a mangelwe emanya loshini kofingo yaye, ye a ekelwe mefuta, shi dule eshi ta hongaula kamwe kaava vanini. 3Lilungameneni nye vene!
“Omumwanyoko ngeenge ta nyono, mu hanyena, ndele ngeenge te lidilulula, mu kufila po. 4Ndele ngeenge te ku ningi nai luheyali mefiku limwe alike, ndele ta aluka luheyali ndele ta ti: ‘Onde lialuluka,’ mu dimina po.”
5Ovayapostoli ova tya kOmwene: “Tu wedela eitavelo.” 6Ndele Omwene ta ti: “Ngeno omu na eitavelo li fike pombuto yoshinapi ndele tamu lombwele omukwiyu ou: ‘Lidikula po ove u litwike mefuta,’ ngeno tau mu udu.
7“Ndele olyelye womunye e na omupiya ta pulula ile ta lifa, ngeenge ta di kepya ndele te mu lombwele ngeno: ‘Ila diva, ove u lye?’ 8Ite mu lombwele mbela, ta ti: ‘Pakele nge po ouvalelo, ove u lidike ndele to yakula nge fimbo handi li ndele handi nu. Opo nee ove to ka lya ndele to nu.’ 9Ile u shii ta pandula omupiya ou eshi a longa osho e shi lombwelwa? 10Hano osho nanye yo, ngeenge mwa wanifa ashishe mwe shi lombwelwa, tyeni: ‘Ofye ovapiya vongaho, otwa longa osho ashike twa li tu noku shi longa.’ ”
Okuvelulwa kwovanashilundu omulongo
11Ndelenee pa ningwa, Ye eshi a li mondjila ta i kuJerusalem, okwa enda nongaba yaSamaria naGalilea. 12Ndele eshi e uya komukunda umwe wonhumba, ovalumenhu ovanashilundu omulongo ve mu shakeneka, ve li ofika kokule, 13vo ova popya mokule tava ti: “Jesus, omuhongi, tu filonghenda!” 14Ndele eshi e va mona, okwa tya kuvo: “Indeni mu ke liulikile kovapristeli.” Hano opa ningwa fimbo tava i, ova veluka. 15Ndele umwe womuvo eshi a mona a veluka, okwa aluka nokuhambelela Kalunga nondaka inene, 16ndele ye a wila poshi peemhadi daJesus ndele te mu pandula, ye nee okwa li Omusamaria. 17Jesus okwa nyamukula ta ti: “Hamulongo ovo va velulwa? Venya omugoi ove li peni? 18Inaku monika vali nande oumwe a aluka, a hambelele Kalunga, omunailongo oye tuu aeke?” 19Ndele Ye okwe mu lombwela: “Fikama ove u ye, eitavelo loye le ku velula.”
Euyo louhamba waKalunga
20Ndele eshi a pulwa kOvafarisai ouhamba waKalunga otau uya naini, okwe va nyamukula ta ti: “Ouhamba waKalunga itau uya u wetike, 21ndele itaku tiwa: ‘tala opopo’, ile ‘tala opapenya,’ osheshi tala, ouhamba waKalunga ou li meni munye.”
22Ndele Ye okwa lombwela ovalongwa vaye: “Omafiku tae uya, nye otamu kala mwa djuulukwa mu mone nande efiku limwe lOmona wOmunhu, nye itamu li mono. 23Ndele tamu lombwelwa: ‘Tala, oku li penya,’ ile: ‘Tala, opapa,’ inamu ya ko. 24Osheshi ongaashi oluvadi mokushela kwalo tali minikile kominghulo deulu fiyo okominghulo dikwao, osho ngaha Omona wOmunhu ta kala mefiku laye. 25Ndele tete oye e nokuhepekwa unene ndele ta ekelwashi kepupi eli. 26Ndele ngaashi pa ningilwe pomafiku aNoa, osho tapa ka ningwa pomafiku Omona wOmunhu, 27va kala hava li ndele hava nu, va hombola ndele va hombolwa fiyo efiku olo Noa a ya mongulu yomomeva, eyelu le uya ndele ole va nyona po aveshe. 28Ndele ngaashi pa ningilwe pomafiku aLot, va kala hava li ndele hava nu, va landa vo va landifa, va twika nova tunga, 29ndelenee efiku olo Lot a dja mo muSodom, opa loka omundilo nosulfuri wa dja meulu, ndele owe va nyona po aveshe, 30osho ngaha taku ka ningwa efiku olo Omona wOmunhu ta ka holoka.
31“Efiku olo ou ta hangika kombada yongulu e na oinima yaye meumbo, aha londoloke e ke i tale ko, nosho tuu ou ta hangika mepya ina aluka mo. 32Dimbulukweni omukainhu waLot. 33Ou ta kendabala okulixupifila omwenyo waye, ote u kanifa, ndele ou te u kanifa, ote ke u xupifa. 34Ohandi mu lombwele: oufiku winya ovalumenhu vavali tava kala momutala umwe; umwe ta tambulwa namukwao ta fiwa po. 35Ovakainhu vavali tava hangwa poshini tava tu; umwe ta tambulwa namukwao ta fiwa po.
36“Ovalumenhu vavali ve li mepya; umwe ta tambulwa namukwao ta fiwa po.”
37Ndele vo ove mu nyamukula va tya: “Omwene, openi?” Ye okwa tya kuvo: “Oko ku na oshimhu, oko taku ongala eenhwa.”
Currently Selected:
LUKAS 17: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
