JEREMIA 24
24
Oimbale ivali yeenghwiyu
1Omwene okwa talifa nge oimbale ivali i neenghwiyu ya tulwa moluvanda lotembeli yOmwene, Nebukadnesar, ohamba yaBabilon eshi a kufa Jekonia yaJehoiakim, ohamba yaJuda muJerusalem nokwe mu twala kuBabilon, pamwe novakulunhu vomuJuda novahambwidi novahambuli voiidilifo. 2Oshimbale shimwe osha li shi neenghwiyu dinyenye diwa ngaashi eedive noshimbale shikwao osha li shi neenghwiyu dii unene dihe shii kuliwa. 3Ndele Omwene okwa lombwela nge ta ti: “Jeremia, ou wete shike?” Ame onda nyamukula: “Eenghwiyu, eenghwiyu odo odiwa unene nadikwao odii unene dihe shii kuliwa.” 4Opo nee ondjovo ei yOmwene oya hanga nge tai ti: 5Omwene Kalunga kaIsrael ota ti ngaha: Ngaashi eenghwiyu odo diwa, osho yo Ame handi ka tala nomesho ombili ovapika vokuJuda, nde va kufa mo monhele ei nonde va tuma kedu lOvakaldea, 6nohandi ka lyaamena nomesho ange kuvo ndi va ningile ouwa nohandi ke va alulila kedu eli, handi va tungu, ndele itandi va ngumauna po; handi va twike, ndele itandi va duda mo. 7Ndele ohandi va pe omutima wokushiiva nge nokutya, Aame Omwene, ndele vo otava ka ninga oshiwana shange, naame ohandi ka kala Kalunga kavo, osheshi vo otava ka alukila kwaame nomutima wavo aushe. 8Ndelenee ngaashi eenghwiyu dinya dii dihe shii kuliwa omolwowii wado, Omwene ta ti, osho Ame ohandi ka ninga Sedekia, ohamba yaJuda nomalenga aye naava va xupa muJerusalem, va fyaala mo moshilongo eshi naavo va kala medu laEgipiti. 9Ndele Ame ohandi ke va ninga noshitilifa nomupya koilongo aishe kombada yedu nokudinwa nokupopiwa nokuyeelwa nokufingwa meenhele adishe omo handi ke va tela mo. 10Ndele Ame ohandi ka tuma mokati kavo eongamukonda nondjala noudu wolutapo fiyo ova dimwa mo medu olo nde li va pa, ovo vene nooxekulu vavo.
Currently Selected:
JEREMIA 24: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
