JEREMIA 22
22
Eehamba Sallum, Jehoiakim naKonja tadi xunganekwa
1Omwene osho ta ti: Inda ko kouhamba wohamba yaJuda, ove u popye ondjovo ei, 2u tye: “Uda ondjovo yOmwene, ove ohamba yaJuda u li omutumba kolukalwapangelo laDavid, ove mwene novapiya voye novanhu voye ava hava piti mo moivelo ei.” 3Omwene osho ta ti: “Longeni eshi sha yuka, wanifeni ouyuki nye mu xupife oonakunyekwa momake ovahepeki, omunailongo nofiye nomufiyekadi inamu va ningila osho inashi yuka, ndele inamu va hepeka ndele inamu tilashi ohonde ihe netimba monhele ei. 4Osheshi ngeenge tamu wanifa shili ondjovo ei, moivelo ei yomouhamba tamu ya, eehamba odo tadi ka kala omutumba kolukalwapangelo laDavid, tadi ende momatemba oita nokeenghambe, heeno, ohamba pamwe novapiya vayo noshiwana shayo. 5Ndelenee ngeenge itamu udu eendjovo odo, ohandi lianene mwaame mwene, Omwene osho ta ti, ongulu ei otai ka ninga onduba yomakuma.
6“Osheshi Omwene mokupopya ongulu youhamba wohamba yaJuda ota ti ngaha: Oove Gilead kwaame, oove oxulo yaLibanon. Oshili, Ame ohandi ke ku ninga ombuwa noilando kai novanhu. 7Ndele ovahanauni voye handi ve ku yapulile, keshe umwe noilwifo yaye. Omiti doye omisederi omihoololwa tadi kewa po kuvo ndele tadi ekelwa momundilo. 8Opo nee oiwana ihapu mokupitilila po oshilando eshi otava pulafana tava ti: ‘Oshilando eshi shinene, Omwene okwe shi ningila ngahelipi ngaha?’ 9Ndele tapa ka nyamukulwa: ‘Osheshi vo ova nyonauna ehangano lOmwene, Kalunga kavo, nove linyongamena koikalunga noku i longela.’ ”
10Inamu lila onakufya, nye inamu lila eenghali, ndelenee lileni ou ta tembuka mo, ta i, osheshi ke na vali apa ta ka alukila mo, ye ita ka mona vali oshilongo shedalo laye. 11Osheshi Omwene mokupopya Sallum yaJosia, ohamba yaJuda, a shikula xe Josia mouhamba a tembuka mo monhele ei ota ti ngaha: “Ye ita ka aluka ko vali. 12Osheshi konhele tuu inya ve mu twala ko onghwate, oko ta ka fila ko, oshilongo eshi ite ke shi mona vali.”
13Woo ou, ta tungu ongulu yaye nowii, nomadimongulu aye okombada ite a tungu nouyuki, ou ta longifa omukwao oshimha note mu anyene ondjabi yaye; 14ou ta ti: “Ame ohandi ke litungila ongulu yakula nomadimongulu manene okombada.” Ndele ta hokele mo eembululu domakende ndele te di pangelifa oipilangi omisederi ndele te i vaekifa ondomo itilyana. 15Ou shii, oove ohamba, osheshi wa hokwa omiti omisederi! Xo ina lya, ye ina nwa vati nokwa li ha tokola pauyuki nokudiinina eshi sha yuka. Onghee ye a mona elao. 16Oonakuhepekwa neehepele okwe va yukifila eendjovo davo opo nee ye a kala nawa. Okukala ngaha hako okushiiva nge, Omwene ta ti? 17Ndelenee omesho oye nomutima woye itau kongo shimwe shi lili, eliko tuu loye mwene nokutilashi ohonde ihe netimba nokuhepeka nokunyeka. 18Onghee Omwene ota popi Jehoiakim yaJosia, ohamba yaJuda, ndele ta ti: “Ye ita lilwa eenghali ngaashi tapa ingidwa: ‘Woo, omumwatate omulumenhu! Woo, omumwameme omukainhu!’ Ye ita lilwa nokukwena: ‘Woo, omwene, woo, oshingepangelo shaye!’ 19Ngaashi okambulu taka fudikwa, osho ta fudikwa yo, ta ka kokololwa ndele ta ekelwashi kokule pondje yoivelo yaJerusalem.”
20Londa komhunda yaLibanon, ove u ingide pombada, ondaka yoye nai udike muBasan, ingida mokule komhunda yaAbarim, osheshi ovaholike voye aveshe ova hanaunwa po. 21Ame onde ku popifa momafiku a wapala, ndelenee ove wa tile: Ame inandi hala okupwilikina. Ondjila yoye oyo tuu ei nghee wa dja kounyasha woye, ove wa li ino pwilikina ondaka yange. 22Ovafita voye aveshe otava ka halakanifwa komhepo idjuu, novaholike voye aveshe otava ka ya moupika. Heeno, mefimbo olo ove oto ka kala nelengaifo ndele to ka fifwa ohoni molwowii woye aushe. 23Ove ou to kala kuLibanon noshihadi shoye we shi tungila momiti omisederi; ove oto ka kala nokukema nekemo li fike peni, omaudjuu ngeenge tae ku hange, efeto ngaashi efeto lomudali?
24“Oshili, ngaashi Ame ndi nomwenyo, Omwene ta ti. Konja yaJehoiakim, ohamba yaJuda, nande na kale okalinga koshihako meke lange lokolulyo namulo ohandi ke mu xukula ko. 25Ndele Ame ohandi ke ku yandja momake aava va nangela omwenyo woye, momake aava we va tila, momake aNebukadnesar, ohamba yaBabilon, nomomake Ovakaldea. 26Ndele Ame ohandi ke ku kupula mo pamwe nanyoko, ou e ku dala, koshilongo shimwe omo inamu dalelwa mo, oko tamu ka fila. 27Ndelenee koshilongo osho tave shi djuulukwa keemwenyo davo va shune ko, itava shuna ko.” 28Omulumenhu ou Konja okwa kala mbela a dinika ngaashi oshitoo sha tatuka, ile ngaashi oshinima inashi halika kovanhu? Oshike hano ye mwene noludalo laye va ekelwashi nova kupulwa moshilongo vehe shi shii.
29Akutu, oshilongo, oshilongo, oshilongo! Uda ondjovo yOmwene! 30Omwene osho ta ti: Omulumenhu ou mu didilikeni ye ehe noludalo, ngaashi omulumenhu ehe nelao momafiku aye aeshe. Osheshi kape na nande umwe womoludalo laye ta ka kala e nelao, a kale ngeno omutumba kolukalwapangelo laDavid ye a nangale oshilongo shaJuda e shi pangele.
Currently Selected:
JEREMIA 22: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
