JEREMIA 17
17
Etimba laJuda
1Etimba laJuda ola shangwa noshishangifo shoshivela nonhele yodiamande, la shatelwa moshitaafula shomomutima wavo nomeembinga deealtari deni. 2Nosho ngaha ovana vavo tava dimbulukwa shili eealtari davo nomiti davo daAsera da tetwa oitai pomiti da hapa okoikulundudu ile. 3Omhunda yange mwene ei i li moixwa noinima yoye yo nomamona oye aeshe, ohandi i yandje oshihakanwa pamwe nomatunda oye eealtari medu loye alishe ohandi i yandja oshihakanwa omolwetimba loye. 4Ndele ove u nokweefa efyuululo loye, olo nde li ku pele. Ndele ohandi ku twala moupika wovatondadi medu ku li shii, osheshi nye omwa tema omundilo wehandu lange, tau kala wa xwama fiyo alushe. 5Omwene osho ta ti:
“Omulumenhu omufingwa oye ou te lineekele ovanhu, nombelela te i ningi okwooko kwaye nomutima waye tau liteeka Omwene.” 6Ndele ye ota ka kala ngaashi oshixwa shongaho shomofuka, noita ka mona ouwa tau uya, ndelenee ye ota ka kala meenhele doluteni mombuwa ya nyika omongwa kamu novanhu. 7Omulumenhu omunangekwa noupuna oye ou te lineekele Omwene, naau a ninga Omwene eameno laye. 8Osheshi ota ka kala ngaashi omuti wa twikwa pomeva, nomidi dao otau di twala komatondokelo omeva; ou itau tila, nande nau hangike koluteni, nomafo ao otaa kala a hapa, kau noshisho shomudo woluteni nongaashi ihau kuka.
9Omutima woovene ou nomakoto u dule ashishe nowa nyonauka. Olyelye ta dulu oku u shiiva? 10Aame Omwene, Ame ohandi konakona omutima nokuyeleka eefiyo, opo ndi va pe keshe umwe shi fike pokweenda kwaye noshi fike poiimati yoilonga yaye. 11Ngaashi odila tai tendula omai inai a dala, osho yo ou te lilikolele oupuna nomakoto. Pokati komafiku okukala kwaye oku noku a fiya po, nopexulilo laye ota ka kala elai.
12Olukalwapangelo lefimano ola fimana okudja kehovelo, onhele yotembeli yetu! 13Eteelelo laIsrael Oove Omwene, aveshe ava tave ku liteeka otava ka fifwa ohoni. Heeno, aveshe ve liteeka nge otava shangelwa mondwi yedu, osheshi vo ova efa ofifiya yomeva omanamwenyo, Omwene mwene. 14Velule nge, Omwene, nohandi veluka. Kwafe nge, opo ndi kale nda kwafwa, osheshi Oove ehambelelo lange. 15Tala, venya otava lombwele nge tava ti: Ondjovo yOmwene oya kala peni? Nai wanifwe! 16Ndelenee ame inandi likufa mo, ndiha kale ngeno omufita ndi ku shikule noinandi hala efiku loshiponga. Ove ou shi shii. Keshe eshi omilungu dange de shi pitifa mo osha kala koshipala shoye. 17Oove, ino ninga ehalwifo lokutilifa nge, Oove eameno lange mefiku loshiponga. 18Ava hava taataa nge, nava fifwe ohoni, Ove ino fifa nge ohoni. Nava tilifwe, ndelenee ino tilifa nge. Va undulila efiku loshiponga ndele va hanauna po nomahanauno avali.
Okuyapula efiku lEshabata
19Omwene okwa lombwela nge ngaha: Inda u ka kale ofika poshivelo shovana voshiwana, omo eehamba daJuda hadi uya mo ndele hadi piti mo moivelo aishe yaJerusalem. 20Ove u va lombwele u tye ngaha: Udeni ondjovo yOmwene, onye eehamba daJuda nOvajuda amushe noonakukalamo nye amushe vomuJerusalem hamu piti moivelo ei. 21Omwene ota ti ngaha: Litaleni nye vene omolweemwenyo deni, inamu humbata nande omutengi mefiku lEshabata ndele inamu u eta moivelo yaJerusalem. 22Nye inamu tumba mo nande omutengi momaumbo eni mefiku lEshabata, nakeshe oshilonga inamu shi longa. Ndelenee diinineni okuyapula efiku lEshabata ngaashi nde shi lombwela ooxokulu. 23Ndelenee vo inava uda nongaashi inava ameka omatwi avo kwaame, ndelenee ova tangalala, ndele inava dulika ndele itava tambula epukululo. 24Nongeenge onye tamu pwilikine nge, Omwene ta ti, noitamu eta mo nande omutengi moivelo yoshilando mefiku lEshabata, ndele tamu yapula efiku lEshabata, muha longe nande oshilonga mefiku olo, 25opo nee eehamba nomalenga hava kala omutumba kolukalwapangelo laDavid, otava kala nokuuya mo moivelo yoshilando eshi, tava ende momatemba oita nokeenghambe pamwe nomalenga avo novalumenhu vaJuda noonakukalamo muJerusalem, noshilando eshi otashi ka kala alushelushe. 26Ndele tamu uya ovanhu vomoilando yaJuda novokominghulo daJerusalem nomedu laBenjamin novomoixwa novokeemhunda novokoumbuwanhu, ava tava etele ongulu yOmwene omaxwikiloyambo nomatomenoyambo neendjayambo noitwimininoyambo nomapanduloyambo. 27Ndelenee ngeenge itamu pwilikine nge, nye itamu yapula efiku lEshabata noku li diinina notamu humbata omitengi mefiku lEshabata nokweenda moivelo yaJerusalem mefiku lEshabata, opo ohandi ka shakala omundilo moivelo yasho, tau lafa po eengulu doipuna domuJerusalem ndele itau dimi po.
Currently Selected:
JEREMIA 17: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
