JEREMIA 15
15
Ehandu laKalunga koshiwana
1Ndele Omwene okwa lombwela nge: Nande Moses naSamuel va kale ofika koshipala shange, omwenyo wange itau liameke vali koshiwana eshi. Va ta po koshipala shange. Nava ye! 2Ndele ngeenge tava pula kwoove: Ohatu i peni? Va nyamukula u tye: Omwene ota ti:
Ou a tongolelwa oudu wolutapo, okoudu wolutapo, naau a tongolelwa eongamukonda, okeongamukonda, naau a tongolelwa ondjala, okondjala, naau womoupika, omoupika. 3Ndele Ame ohandi va undulile oiponga yopane, Omwene osho ta ti: eongamukonda lokudipaa po, eembwa dokukokolola po needila dokeulu noifitukuti yokombada yedu yokulyana nokuhanauna po. 4Ame onda hala ndi va ninge oshihalukifo shoixuna koilongo aishe yomounyuni, omolwaManasse yaHiskia, ohamba yaJuda, molwaasho ashishe ye e shi ningila muJerusalem.
5Osheshi olyelye ou te ku file onghenda Jerusalem, olyelye te ku nyikile oufiye nolyelye te uya oku ku pendulila po? 6Ove owa ekelashi nge, Omwene osho ta ti, ove owa shuna monima. Onghee Ame nda twala eke lange kwoove nohandi ku hanauna po. Ame onda loloka oku ku fila onghenda vali. 7Ndele Ame ohandi ke va yela noshiyelifo, handi va pepe mo moivelo yoshilongo, oshiwana shange ohandi ke shi ninga shihe noludalo, ndele handi shi hanauna po, osheshi vo inava aluka keendjila davo dii. 8Ovafiyekadi vavo tava ka hapupalela nge vahapuhapu ve dule eheke lopefuta. Ooina yovanyasha ohandi ke va undulila omuhanauni pokati komutenya. Ohaluka, Ame ohandi ke va tilila oumbada netilifo. 9Ou a dala ovamati vaheyali, ye okwa kanghwa nomwenyo we mu fiya po. Etango laye ola toka fimbo pe nomutenya, ye a lengaifwa a fifwa ohoni. Naava tava ka xupa po kuvo, ohandi va yandje keongamukonda moipafi yovatondadi vavo, Omwene ta ti. 10Woo aame, meme eshi wa dala nge omulumenhu weemhata nowoihokolola koshilongo ashishe. Ame nande inandi lilwa oikolo noinandi lya oikolo, vo ohava fingaele nge aveshe. 11Omwene okwa tya: “Oshili, Ame ohandi ku mangulula, ove u ningwe nawa. Oshili, ovatondi voye ohandi va ilikanifa ve ku indile ekwafo mefimbo lomupya noloudjuu.” 12Oshivela otashi teka tuu? Oshivela shoumbangalanhu noshikushu? 13Oinima yoye nemona loye ohandi i yandje oshihakanwa ihe nondado yasha, itapa di nande sha omolwoulunde woye aushe medu loye alishe. 14Ndele Ame ohandi ku endifa pamwe novatondadi voye moshilongo, wa li uhe shi shii. Osheshi omundilo wehandu lange owa tema, tau xwama kombada yeni.
Jeremia ta hepululwa kOmwene
15Omwene, Ove u shi shii. Dimbulukwa nge Ove u kalele nge noshisho, Ove u handukile nonghone ovataataai vange ponhele yange. Monheni yoye ino duda nge mo. Kala u shi shii ame ohandi ku shekelwa. 16Eendjovo doye oda hanga nge, ame onde di lya nde di pona. Ndele eendjovo doye oda li kwaame enyaku nehafo lomutima wange, osheshi ame onda lukilwa edina loye, Omwene, Kalunga komatanga ovakwaita. 17Ame inandi kala omutumba mokati kovadini. Omolweke loye ame nda kala aame andike, osheshi Ove owa yadifa nge noupyuhandu woye. 18Omolwashike ouyehame wange tau kalele nge alushe? Noshipute shange sha handuka, tashi anye okuveluka? Ove u li kwaame ngaashi ekungulukilo lomeva tali pwinine, ngaashi omeva itaa kalelele.
19Onghee Omwene ota ti ngaha: “Ove ngeenge to lialuluka, Ame ohandi ke ku alula ndele ove to itavelwa okukala ofika koshipala shange. Nongeenge to eta osho shiwa hasho shii, opo nee ove oto ka kala okanya kange. Ovo naave uye kwoove, ndele ino shuna kuvo. 20Ndele Ame ohandi ke ku ninga ohotekuma ya pama yoshikushu kovanhu ava. Otave ke ku lwifa ndelenee itave ku dulu. Osheshi Ame ondi li pwoove. Ame ohandi ku mangulula nohandi ku xupifa, Omwene osho ta ti. 21Ndele Ame ohandi ke ku xupifa momake ovadinikalunga nohandi ku pitifa mo meenyala dovakolokoshi.”
Currently Selected:
JEREMIA 15: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
