JESAJA 66
66
Ovanyoni tava ka handukilwa Sion tashi tumbalekwa
1Omwene osho ta ti: Eulu olo olukalwapangelo lange, nedu olo oshipundi sheemhadi dange. Ongulu ei tamu i tungile nge oi li peni? Nonhele yokutulumukwa kwange oi li peni? 2Osheshi eke lange ola ninga oinima ei aishe, nosho aishe ei oya holoka, Omwene ta ti.
Ndelenee Ame ohandi ka tala komufyoona nakwaau e nomhepo ya nyanyaulwa, ndele ta kakama molwondjovo yange. 3Ou ta tomo ongobe, oye a fa ou ta dipaa omulumenhu, ou ta yambe odi ngaashi ou ta teya yo ombwa ofingo; ou ta yambe eendjayambo ngaashi ou ta yambe ohonde yoshingulu, ou ta yambe etwimino ngaashi edimbulukifoyambo, oye e li ngaashi ou ta fimaneke oshikalunga. Ngaashi ovo ve lihoololela eendjila davo vene neemwenyo davo oda hokwa oixuna yavo, 4hano osho ngaha naame yo ohandi ke va hoololela omupya, ndele handi va efele eshi tave shi tila, osheshi Ame nda ifana, ndele inapa itavela nande umwe, Ame nda popya, ndele vo inava uda ko, ndelenee vo va longa eshi inashi yuka momesho ange; nove lihoololela eshi inashi wapalela nge.
5Udeni ondjovo yOmwene, onye ava hamu kakama molwondjovo yaye! Ovamwaxo oonaku mu tonda, ndele tave mu taataa molwedina lange, tava ti: “Omwene na holole oshinge shaye, opo tu tale ehafo leni!” Ndelenee vo otava ka fifwa ohoni! 6Ondaka oyeweelelo otai di moshilando! Ondaka tai di motembeli! Ondaka yOmwene, ou ota futile ovatondadi vaye ondjabi yavo!
7Fimbo ina fetwa ye okwa dala, omauyehame fimbo inaa holoka kuye, ye a dala okaana okamati. 8Olyelye e shi uda? Olyelye a mona oinima ya tya ngaha? Oshilongo otashi dalwa tuu mefiku limwe alike? Ile oshiwana otashi dalwa tuu shimwe? Osheshi Sion okwa dala ounona pefimbo tuu olo a fetwa. 9Ame nandi ete ngeno edalo popepi, Ame ndi li kelele, Omwene ta ti. Ame mwene ou handi dalifa, ondi kelele vali? Kalunga koye ta ti.
10Kaleni mwa hafa pamwe naJerusalem nye mu shi nyakukilwe amushe ava mu shi hole! Kuwilileni amushe pamwe nasho, kuwilileni pombada onye ava mwa li mwe shi nyikila oluhodi. 11Opo nye mu shiive okunyama, nye mu kute komavele omahekeleko aye, nye mu shiive okunwa nye mu hekelekwe kouyadi woshinge shaye. 12Osheshi Omwene osho ta ti: Taleni, Ame ohandi ke mu endifila ombili ngaashi omulonga noupuna woiwana ngaashi omulonga wa fula. Ndele nye otamu ka nyama, tamu ka kumininwa mombuda, ndele tamu ka ukatwa komatundji. 13Ngaashi ina ta hekeleke omona, osho Ame handi ke mu hekeleka, ndele tamu ka hekelekelwa muJerusalem. 14Ndele nye otamu ke shi tala, nomitima deni otadi nyakukwa pombada, nomakipa eni otaa tutuma ngaashi omwiidi mupe, opo nee eke lOmwene tali ka shiivika kovapiya vaye, ndele Ye ota ka xweenena ovatondadi vaye. 15Osheshi tala, Omwene ote ke uya momundilo, nomatemba aye ngaashi okafudaela, opo a holole ehandu laye la hanya netanguno laye melaka lomundilo. 16Osheshi Omwene ota ka tokola nomundilo neongamukonda ombelela aishe. Noonakudipawa kOmwene otava ka ninga vahapu.
17Ovo tave liyapula ndele tave likosho molwoikunino yomiti, ndele tava shikula umwe ou e li pokati kavo, ava tava li ombelela yoshingulu nashimwe shoixuna neemhuku, aveshe mumwe otava ka kombwa po, Omwene ta ti.
18Ndelenee Ame ondi shii oilonga yavo nomadiladilo avo.
Efimbo tali uya, fiku oiwana aishe nomalaka aeshe ohandi i ongele kumwe, ndele vo otave ke uya va tale oshinge shange. 19Ndele Ame ohandi ka didilika edidiliko mokati kavo, naava vomokati kavo va xupifwa ohandi va tumu koiwana kuTarsis, kuPul, kuLud noonakulukilomauta, okuTubal, kuJavan nokeenhunhu dokokulekule, inava uda eenghundana dange noinava mona oshinge shange; ndele vo otava ka hepaulula oshinge shange mokati koiwana. 20Ndele vo otava ka eta kOmwene ovamwaxo ngaashi eyambo vomoiwana aishe, va londa keenghambe nokomatemba nomoipundi tai humbatwa nokomamula nokeengamelo komhunda yange iyapuki kuJerusalem, Omwene osho ta ti; ngaashi ovana vaIsrael tava etele motembeli yOmwene eendjayambo moshitoo shiyela. 21Nomokati kavo ohandi ka kufa mo yo ava tava ningi ovapristeli nOvalevi, Omwene osho ta ti. 22Osheshi ngaashi eulu lipe nedu lipe handi ke a shita, taa ka kalelela koshipala shange. Omwene ta ti. Osho yo oludalo leni nedina leni tali ka kalelela. 23Ndele keshe omwedi mefiku lohani ipe nakeshe oshivike mefiku lEshabata, ombelela aishe otai ka ongala koshipala shange okulinyongamena, Omwene ta ti. 24Ndele vo otava piti mo ndele tava ka tala oimhu yovalumenhu ava ve liteeka nge; osheshi einyo lavo itali fi, nomundilo wavo itau dimi, ndele tava ka kala oixuna yongaho kombelela aishe.
Currently Selected:
JESAJA 66: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
