EXODUS 22
22
Eemhango dokupangela emona omukwao
1“Umwe ngeenge ta vake ongobe ile odi ndele te i dipaa po ile te i landifa po, oye na fute eengobe nhano mongobe imwe ile eedi nhee modi imwe. Oye e nokufuta ofuto ei ya wana. Ndelenee ngeenge ke na sha, na landifwe po a ninge omupika, a futile oulunga waye.
2“Omulunga ngeenge ta hangika ta panukile mo oufiku ndele ta dipawa, naku mu dipaa ke netimba, 3ndelenee etango ngeenge la pita, nakudipaa e netimba. 4Eshi sha vakwa po, ngeenge ongobe ile ondongi ile shimwe shomoimuna, tashi monika puye shi nomwenyo, ye e nokuwedela po imwe puikwao.
5“Umwe ngeenge ta lifa epya ile oshikokola shomiviinyu shamukwao, ndele ta efa oimuna ndele tai ka lya epya lomunhu, e nokukufa mepya laye oilya iwa i dule ikwao naai yomoshikokola shaye shomiviinyu iwa i dule ikwao, e i mu alulile.
6“Epeya ngeenge tali di moixwa yomano tali uya moilya yomoshipale ile moilya mepya tali pi, hano ou a xwika epeya, na fute ofuto ya wana.
7“Umwe ngeenge ta pe mukwao e mu tuvikilile oimaliwa ile emona, ndelenee tali vakwa mo meumbo laye, omulunga ngeenge ta monika, e nokufuta, e nokuweda ko shikwao kushikwao. 8Omulunga ngeenge ita monika po, mwene weumbo e nokuholoka koshipala shovatokoli, ye na ane nokutya, ina nanena emona lamukwao eke laye.
9“Meendjovo adishe deemhata ngeenge odongobe ile odondongi ile deedi noikutu ile shimwe shi lili eshi sha kana, omunhu ngeenge ta ti: ‘oye naanaa’; hano eendjovo davo aveshe vavali nadi uye kovatokoli veendjovo. Oye ou ta pewa oushima kovatokoli, e nokufuta mukwao nokuweda ko oshikwao kushikwao.
10“Umwe ngeenge ta pe omunhu oufita wondongi ile wongobe ile wodi ile keshe oshimuna, ndele tashi nyonauka po ile tashi hangika koshiponga ile tai iwa nasho inashi monika komunhu, 11opo nee eano lokwaana Omwene nali tokole eendjovo, kashiimba ina kumifa eke laye oinima yamukwao, nomwene woinima na itavele, ndelenee winya ite mu futu; 12ndelenee ngeenge sha vakwa kuye, ne shi futile mwene washo. 13Sho ngeenge sha nyanyaulwa koshilyani, ne shi ete po ngaashi oundobwedi. Eshi sha nyanyaulwa, ita pumbwa oku shi futa.
14“Ndele umwe ngeenge ta tambula oshinamwenyo shamushiinda shaye e shi mu alulile komesho, ndele sho tashi mono oshiponga ile tashi fi, namwene washo ina hangika po, ne shi fute efuto la wana. 15Mwene ngeenge opo a hangika, winya ita pumbwa okufuta. Sho ngeenge osha li sha tambulwa panghedi yofuto, ofuto oyo oya wana kusho.
16“Umwe ngeenge ta hongaula okakadona inaka valekwa, ndele ta nangala nako, ne ka fute oyoonda ya wana, ne ka hombole. 17Xe ngeenge ta anye oku ke mu pa, omumati e nokufuta oimaliwa yoyoonda ngaashi oyoonda yokakadona.
18“Ondudu yomukainhu ino i efa i kale nomwenyo.
19“Keshe ou ta nangala noshimuna, e nokufya shili.
20“Ou ta yambele oikalunga imwe, haMwene Kalunga, na fingwe a fye.
21“Omunailongo ino mu fininika, u mu hepeke, osheshi nye vene mwa li ovanailongo medu laEgipiti. 22Ino fininika omufiyekadi nofiye. 23Osheshi ngeenge oto va fininike, ndele vo tava kuwile nge ekwafo, Ame ohandi ka uda shili onghuwo yavo, 24nehandu lange tali ka xwama ndele handi ke mu dipaifa neongamukonda, ovalikadi veni opo va ninge ovafiyekadi novana veni eefiye.
25“Ove ngeenge ho yandje oimaliwa kuumwe womoshiwana shange, kohepele hai kala pwoove, ino kala panghedi yovalandakanifi voimaliwa, ino i pula oishoshela.
26“Ove ngeenge wa kufa ekumbafa lamukweni ombabyona, u noku li mu alulila etango fimbo inali ningina. 27Osheshi olo alike eliuviko lolutu laye. Ye ote liuvike nashike mokunangala kwaye ngeno? Ndele ye ngeenge ta ifana nge, Ame ohandi mu udu, osheshi Aame omunamutimanghenda.
28“Kalunga ino mu sheka, nomukulunhu woshiwana ino mu tuka.
29“Ino ongaonga okuyandja oiyandjiwa yoilya noyomaviinyu.
“Oshiveli okamati u noku shi pa nge. 30Nosho yo u nokuninga noiveli yeengobe noyeedi doye. Nashi kale puina omafiku aheyali. Mefiku etihetatu shi yandja kwaame.
31“Ndele nye mu nokukala ovanhu vange ovayapuki; onghee hano inamu lya ombelela ya likila mofuka; i ekeleni eembwa.”
Currently Selected:
EXODUS 22: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
