EXODUS 20

Oipango omulongo

1Ndele Kalunga okwa popya eendjovo adishe edi ndele ta ti: 2“Aame Omwene Kalunga koye, ou nde ku pitifa mo medu laEgipiti, meumbo loupika.

3“Ino kala u noikalunga imwe koshipala shange.

4“Ino lihongela oshihongwafano ile efano laashi shi li pombada meulu ile laashi shi li poshi kombada yedu, ile laashi shi li momeva okoshi yedu.

5“Ino linyongamena moipafi yayo ndele ino i longela. Osheshi Aame Omwene Kalunga koye, Aame Kalunga omuladi, ou ta kongolola omanyono ooxe kovana fiyo okepupi etitatu netine, kwaava hava tondo nge. 6Ndele Ame ohandi file onghenda omayovi, aava ve hole nge ndele tava diinine oipango yange.

7“Edina lOmwene Kalunga koye, ino li tumbulila ongaho, osheshi Omwene ita efa ina handukila ou ta tumbulile edina laye hamungaho.

8“Dimbulukwa efiku lEshabata, u li yapule. 9Omafiku ahamano ou nokulonga nokulipyakidila oshilonga shoye keshe, 10ndelenee efiku etiheyali olo Eshabata lOmwene Kalunga koye, opo nee inamu longa sha, oove mwene ile omona woye omumati ile omona woye okakadona ile omupiya woye omulumenhu ile omupiya woye omukainhu ile oshinamwenyo shoye ile omweenda e li peenhu doye. 11Osheshi momafiku ahamano Omwene okwa shita eulu nedu, nefuta naaishe i li mo, ndele mefiku etiheyali Ye okwa tulumukwa. Onghee hano Omwene okwa nangeka noupuna efiku lEshabata nokwe li yapula.

12“Fimaneka xo nanyoko, Omwene Kalunga koye ngaashi e ku lombwela, omafiku oye opo a ninge mahapu, ndele ove u kale nelao medu olo Omwene Kalunga koye te ke li ku pa.

13“Ino dipaa.

14“Ino nyona ohombo.

15“Ino vaka.

16“Omukweni ino mu hepaululila ehepaululo loipupulu.

17“Ino haluka eumbo lamukweni. Ino haluka omwalikadi womukweni, ile omupiya waye omulumenhu ile omukainhu ile ongobe yaye ile ondongi yaye ile keshe eshi shamukweni.”

18Ndele ovanhu aveshe eshi va uda endundumo nomapwalakato nondaka yenghuma nova mona omhunda ya dja omwifi, ova kakama nova kala ofika kokule. 19Ndele vo va lombwela Moses: “Ove u nokupopya nafye, opo tu shiive okupwilikina. Ndelenee Kalunga Oye mwene ngeno aha popye nafye, tuha fye.” 20Opo nee Moses okwa nyamukula ovanhu ta ti: “Kaleni inamu tila, osheshi Kalunga e uya oku mu yeleka, opo etilo laye li kale momesho eni, muha nyone.” 21Osho hano ovanhu va kala ofika kokule. Ndelenee Moses okwa ehena komilaulu doshilemo omo mwa li Kalunga.

Omalombwelo okutunga oaltari

22Ndele Omwene okwa lombwela Moses: “Lombwela Ovaisraeli u tye: Nye vene mwa mona, Ame nde mu popifa meulu. 23Inamu liningila ponho yange oitelekwakalunga oisiliveli ile oingoldo. 24Ningile nge oaltari yedu, nokombada yayo u nokuyamba omaxwikiloyambo oye nomapanduloyambo oye, oimuna yoye neengobe doye. Monhele keshe Ame ohandi dikile mo edimbuluko ledina lange, Ame ohandi ke uya kwoove ndi ku nangeke noupuna. 25Ndelenee ngeenge tamu tungile nge oaltari yomamanya, ino i tunga nomamanya a hongwa. Osheshi ngeenge to kumifa omamanya noshilongifo shoshivela, ove to a nyateke. 26Ino londa koaltari yange nomhani, ohoni yoye opo iha monike.

Currently Selected:

EXODUS 20: OKYB

Highlight

Copy