EXODUS 18

Okutalela po kwaJetro

1Ndele Jetro, omupristeli waMidian, xemweno yaMoses, eshi a uda ashishe Kalunga e shi ningila Moses noshiwana shaye Israel nokutya, Omwene eshi a pitifa Israel muEgipiti, 2Jetro, xemweno yaMoses, okwa kufa Sippora, omwalikadi waMoses, konima ye eshi e mu shunifile ko, 3novana vaye ovamati vavali. Edina laumwe Gersom, osheshi Moses okwa tile: “Ame nda ninga omunailongo medu kali fi letu.” 4Nedina lamukwao ola li Elieser, osheshi ye okwa tile: “Kalunga katate Oye ekwafo lange, ndele Ye okwa xupifa nge keongamukonda laFarao.”

5Ndele Jetro, xemweno yaMoses, okwe uya novana vaye nomwalikadi waye kuMoses mombuwa, apa ye a kala monhanda pomhunda yaKalunga. 6Ndele ye okwa tuma kuMoses ndele ta ti: “Aame xomweno Jetro, handi uya nomwalikadi woye novana voye ovamati vavali pamwe naye.”

7Opo nee Moses okwa fikama po a ka shakeneke xemweno, ndele ye okwe linyongamena nokwe mu fipa komilungu. Ndele vo ova kundafana nhumbi ve li ndele va ya mofaila. 8Opo nee Moses okwa hepaululila xemweno ashishe eshi Kalunga a ningila Farao nOvaegipiti omolwaIsrael nomaudjuu aeshe ve a mona mondjila nonhumbi Omwene e va xupifa. 9Ndele Jetro okwa hafela ouwa aushe ou Omwene e u ningila Israel, Ye eshi e va xupifa mo momake Ovaegipiti. 10Opo nee Jetro a tya: “Omwene na hambelelwe, ou e mu xupifa momake Ovaegipiti nomeke laFarao. 11Paife ondi shi shii nokutya, Omwene omunene e dule oikalunga aishe. Eshi Ovaegipiti ve linenepeka.” 12Opo nee Jetro, xemweno yaMoses, okwa yambela okufimaneka Kalunga exwikiloyambo netomenoyambo. Ndele Aron novakulunhu aveshe vaIsrael ve uya va lye pamwe naxemweno yaMoses moipafi yaKalunga.

Ovatokoli veendjovo tava hoololwa

13Ndele mefiku lomongula Moses okwa kala omutumba a tokole eendjovo dovanhu; novanhu va kala ofika koshipala shaMoses okudja ongula fiyo onguloshi. 14Ndele xemweno yaMoses, eshi a mona ashishe eshi te shi ningile ovanhu ye a tya: “Ove oho longo ngahelipi nye novanhu? Omolwashike ove wa kala omutumba okutokola oove auke, novanhu aveshe tava kala pwoove okudja ongula fiyo onguloshi?” 15Ndele Moses ta nyamukula xemweno: “Osheshi ovanhu tave uya kwaame okupula Kalunga. 16Vo ngeenge ve noihokolola otave uya nokutokola eendjovo daau nodaawinya, ndele handi va shiivifile eenghedimhango daKalunga neemhango daye.” 17Ndelenee xemweno yaMoses okwe mu lombwela ta ti: “Onghedi ei ove ho longifa, inai wapala. 18Ngaha ove ho lilolola ashike, ove mwene novanhu tava kala pwoove. Osheshi oshilonga eshi oshidjuu unene kwoove. Iho shi dulu oku shi longa oove auke. 19Pwilikine nge hano paife; ame ohandi ku pukulula naKalunga ta ka kala naave. Ove kala omupopili wovanhu koshipala shaKalunga; neendjovo davo di twala koshipala shaKalunga, 20ove u va longe eenghedimhango neemhango, noku va shiivifila ondjila ei ve nokweenda nayo noshilonga osho ve noku shi longa. 21Ndelenee hoolola movanhu aveshe ovalumenhu ovanaendunge hava tila Kalunga, ovalumenhu ve shii kulineekelwa hava tondo eliko loulunde. Ndele vo oto va ningi ovakulunhu vavo: ovakulunhu veyovi, ovakulunhu vefele novakulunhu vomilongo nhano novakulunhu vomulongo umwe. 22Ava nava tokole eendjovo dovanhu efimbo keshe. Eendjovo adishe dinene ve noku di eta kwoove, ndelenee meendjovo adishe dinini voovene ve noku di tokola, osho ove to lipupaleke, naavenya nave ku kwafe. 23Ngeenge to ningi ngaha naKalunga mwene ote ku lombwele ngaha, ove ho dulu, ito ka loloka, novanhu aveshe ava tava shuna komatwali avo ve nomwenyo muwa.” 24Ndele Moses okwa pwilikina xemweno nokwa ninga ashishe ye e shi tonga. 25Moses okwa hoolola mo muIsrael ashishe ovalumenhu ovanaendunge ndele e va ninga ovakulunhu veyovi, ovakulunhu vefele, ovakulunhu vomilongo nhano novakulunhu vomulongo umwe. 26Ndele vo ova tokola eendjovo dovanhu efimbo keshe. Eendjovo didjuu vo ve di eta kuMoses, ndelenee eendjovo adishe dinini vo ove di tokola. 27Opo nee Moses okwa findikila xemweno, ndele ye okwa ya koshilongo shavo.

Currently Selected:

EXODUS 18: OKYB

Highlight

Copy