2 PETRUS 2
2
Ovapukifilongi
1Ndelenee ovaxunganeki ovanaipupulu va holokele yo mokati kovanhu, nongaashi mokati keni yo tamu ka holoka ovalongi ovanaipupulu, tava etele mo monangumika omalongo opomunghulo haa nyonifa ovanhu, nongaashi have lidimbike Omwene nokuli, ou e va kulila ndele tave lishilile voovene ekano tali va vakele. 2Notava ka shikulwa kuvahapu meenghedi davo dii, nomolwavo ondjila yoshili tai ka shekwa. 3Nomolwolwisho tave mu likola neendjovo domaheko, ndelenee etokolo lavo la kala nale la pashuka nenyonauko lavo ihali kofa.
4Osheshi Kalunga ina xupifa ovaengeli venya va nyona, ndelenee okwe va undulila moshi mwi nokwe va efela momambulukwena omulaulu, va teelele etokolo. 5Nounyuni winya wonale ine u fya eenghoto, nande a amena Noa, omuudifi wouyuki navakwao vaheyali, eshi a yelulifa ounyuni wovahenakalunga eyelu. 6Noilando inya Sodom naGomorra okwe i xwika po nokwe i tokolela enyonauko nokwe i ninga edidiliko lokulondwela ovalunde tave va shikula komesho. 7Ndelenee okwa xupifa Lot, omuyuki kwa li a yehamekwa keenghedi dovalundakani va kala moixuna yokuwanifa ouhalu; 8eshi a kala mokati kavo, omuyuki ou, omwenyo waye owa yehamekwa efiku nefiku molwoilonga yavo ihe nomhango, oyo e i tala noku i uda. 9Osho ngaha Omwene e shii okuxupifa ovayuki momahongaulo nokukwatelela ovalunde va ka handukilwe efiku letokolo, 10ndele unene tuu ava hava lambalala ombelela meenyata douhalu nohava dini omapangelo, oonakulitanga moulafalafi wavo ihava tila okuyeela omapangelomhepo.
11Nande ovaengeli ove va dule oupamene neenghono, itava eta etokolo lokusheka koshipala shOmwene, 12ndelenee vo ova fa oinamwenyo ihe neendunge ya dalelwa okukwatwa nokunyonwa po, eshi hava sheke oinima vehe i shii nande, otava ka nyonauka meolelo lavo vene, 13ndele tava ka pewa ondjabi youhenouyuki wavo. Ove udite ounyenye mokukala moumbwada efiku alishe, ovo omalopyolopyo ohoni nomadiko ekako; ove udite ounyenye momakoto avo eshi hava kala moivilo pamwe nanye. 14Omesho avo e yadi ohole yoipala, vo itava kuta oulunde; hava hongaula eemwenyo dovatengauki, ve nomutima wa deukila olwisho; ovo ovana vefingo. 15Ondjila ya yuka ve i efa ndele va puka, ndele va shikula ondjila yaBileam, omona waBeor, ou a hokwa ondjabi youhenouyuki, 16ndelenee okwa pukululwa mokunyona kwaye; okambulu kake shii okupopya oka popya ngaashi omunhu noka kelela oulai womuxunganeki.
17Ovanhu va tya ngaha ova fa eefifiya dihe nomeva, noilemo hai shingwa koshikungulu, nomulaulu fokofoko we va tuvikililwa. 18Osheshi ohava popi eendjovo da nyika elinenepeko noushima mokukala mouhalu wombelela ohava hongaula noilonga yoihole, vo ova dja konyala onhapo va pume mondjila, 19ndele have va udanekele emanguluko, nande voovene ovapika venyonauko, osheshi keshe ou a findwa kusha, oye yo omupika washo. 20Osheshi nande ova dja onhapo eenyata dounyuni, mokukoneka Omwene nOmuxupifi Jesus Kristus, ndele otava yulwa vali notava findwa kudo, hano oxuuninwa yavo oii i dule yotete. 21Oshipu kuvo ngeno va li inava shiiva ondjila youyuki shi dule eshi, ve i shii nova pilamena koshipango shiyapuki ve shi pewa. 22Ndelenee vo ova ningwa ngaashi omayeletumbulo ashili taa ti: “Ombwa otai alukile konghungo yayo, noshingulu sha koshwa otashi alangatele monhata.”
Currently Selected:
2 PETRUS 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.