1 PETRUS 3
3
Omahombolo Ovakriste
1Osho ngaha nye yo ovakainhu, dulikeni kovalumenhu veni, opo naavo yo inava dulika kondjovo, va findwe keenghedi dovakainhu nande eendjovo kadi po. 2Eshi ve wete, nhumbi hamu ende moukoshoki nometilokalunga. 3Omidjalo deni doulenga diha kale dokombada ngaashi omapando eexwiki nokulimangela eenyemba doshingoldo ile okudjala oikutu youlenga, 4ndelenee omunhu womeni womomutima omokuhaxula po kwomhepo yombili noyelimweneneno oyo i nondilo koshipala shaKalunga. 5Osheshi osho tuu ngaha noshito nale ovakainhu venya ovayapuki mokulineekela Kalunga ve liwapeka ndele va dulika kovalumenhu vavo; 6ongaashi Sara kwa li ha dulika kuAbraham nokwe mu ifana omwene; onye mwa ninga ovana vaye, ngeenge ohamu longo ouwa nomuhe noumbada womatilifo.
7Osho vali ovalumenhu nye, kaleni novakainhu veni neendunge ngaashi oiyuma inai pama, nye mu va fimaneke yo, osheshi ovo ovafyuululi vonghenda yomwenyo pamwe nanye, omaindilo eni aha pyakidilwe.
Kaleni noilonga iwa
8Ndele hauxuuninwa: Kaleni amushe momukoo umwe nokufilafana onghenda, mu hole ovamwatate mu nolukeno nelininipiko. 9Inamu alulilafana owii netukano, ndelenee nangekafaneni noupuna, ngaashi mwa ifanwa mu fyuulule enangeko noupuna. 10Osheshi:
“Ou a hala
okuhafela okukalamwenyo
nokumona omafiku mawa,
oye na kelele elaka laye kowii
nomilungu daye keendjovo doipupulu;
11ye na amuke kowii, ye na longe ouwa,
na konge ombili, ye ne i lalakanene.
12Osheshi omesho Omwene ohaa pashukile ovayuki
nomatwi aye ohaa endekele komailikano avo,
ndelenee oshipala shOmwene sha twa ondubo
naava hava longo owii.”
Inamu tila okuhepekelwa ouyuki
13Olyelye ou te mu etele oshiponga sha sha, ngeenge tamu lalakanene ouwa? 14Ndele nande omu hepekelwe ouyuki, onye ovanelao. Inamu tila etilifo lavo, nye inamu haluka, 15ndele yapuleni Omwene Kristus momitima deni, nye mu hangike alushe mu shii okunyamukula keshe tuu ou te mu pula ekanghameno leteelelo eli li li munye, ndelenee shi ningeni nengungumano netilo, 16ndele mu kale mu neliudo liwa, opo oonakusheka okweenda kweni kuwa muKristus va fifwe ohoni omwaai have i mu shekele. 17Osheshi okuhepekelwa ouwa, Kalunga ngeenge e shi hala, oku dule okuhepekelwa owii.
Ondjila yokoshinge
18Osheshi naKristus okwa fila yo omatimba lumwe aluke, omuyuki ponhele yovalunde, opo e tu twale kuKalunga; okwa dipawa palutu nokwa tulwa omwenyo pamhepo, 19omo yo a ya mo nokwa udifila eemhepo di li modolongo, 20ovo tuu ovo va li inava dulika, onhalanheni yaKalunga eshi ye va teelela pomafiku enya aNoa, ongulu yomomeva eshi ya pangelwa, omo mwa xupifilwa vamwe aveke, nokutya ovanhu vahetatu, va xupifwa komeva. 21Pafaneko eli paife nanye yo otamu xupifwa komeva, okeshasho, lo kali fi ekufepo lonyata yombelela, ndelenee okwiindila kuKalunga eliudo liwa omolwenyumuko laJesus Kristus. 22Oye ou ya meulu nokwa kala kolulyo laKalunga, nokwa pewa koshi yaye ovaengeli nomapangelo neenghono e di pangele.
Currently Selected:
1 PETRUS 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
