APOCALIPSIS 7
7
Yra tebgwyuuno-txuplalno-tapmil men-Israel ne ka sey xudx
1Chene wluzh wak yra neree, wii noo zu tap angel ydap lad gyëzlyu, rsoow ne lo mee ne rlen ydap lad gyëzlyu chen ybiidet mee gyëzlyu, ni lo nisdoo, ni lo yag. 2No wii noo ste angel ne zëëd nes ledne rlen ngbiz, nzen ne xsey Dëdyuzhmbán. Ndípse wnii angel guin lo ydap angel ne wkakwent poder chen ylaa ne gyii gyëzlyu no le lo nisdoo, re ne:
3―Ylaadetgue de gyii gyëzlyu, ni nisdoo, ni yag axtegue ne ykaa noo sey xudx yra xpén XDëdyuzh be.
4No won noo gan palal nak mén ne wkaa sey xudx: tebgwyuuno-txuplalno-tapmil nak men yra men zegne zëëd men xnëz Israel. 5Chibtxupmil men ne zëëd xnëz Judá nak ne wkaa sey xudx, chibtxupmil men ne zëëd xnëz Rubén, chibtxupmil men ne zëëd xnëz Gad, 6chibtxupmil men ne zëëd xnëz Aser, chibtxupmil men ne zëëd xnëz Neftalí, chibtxupmil men ne zëëd xnëz Manasés, 7chibtxupmil men ne zëëd xnëz Simeon, chibtxupmil men ne zëëd xnëz Leví, chibtxupmil men ne zëëd xnëz Isacar, 8chibtxupmil men ne zëëd xnëz Zabulón, chibtxupmil men ne zëëd xnëz Xeb, chibtxupmil men ne zëëd xnëz Benjamin.
Yra menroo menduxtee ne nak lërngyich
9Wluzhse wak yra neree, wii noo ndalyaa ndalduxtee mén ne nuu yrandxee nacion, yralondxee klas mén, men ne rnii wren wren diiz, men ne nuu yrandxee gyëz. Kesentyent ndalyaa ndalduxtee men axtegue ni rut rundet gan ylab men. Yrandxee men zenga ndxinzuli nes lo yagzhil ne zob Dëdyuzh no le nes lo Men ne nak zegnak mëkzhiil bëën bëënleg. Teblose lërngyich nak men no nzen men zin. 10Noze nesree nesrotee rlen xrëz men yra men, re men:
Laa XDëdyuzh be ne zob lo yagzhil rnebééy
nak ne wselaa be lo dol
yrup Ne Men ne nak zegnak mëkzhiil bëën bëënleg.
11Le yrandxee angel ndxinzuli kbii yagzhil guin no le kbii yra mengol guin ne ndxin nga no le kbii ydap menmbán guin, lex wzuzhib ne ledne zu yagzhil axtegue wtee lo ne lyu, wzaknon ne Dëdyuzh, 12re ne:
¡Zengaw! Lo Dëdyuzh nak ne ryal ydee mén dexkyizhtee no ynii mén dizwen,
Dëdyuzh nak ne ryal gyelenzoon, gyelenyenii, gyelnon, no le poder, no le fwers
ydeblo siguelendxee. ¡Zengaw!
13Orguin wnabdiiz te mengol guin lo noo, na men:
―¿Txu nak yra men gwa ne nak lërngyich no pazh wruu men ne ndxin men nee?
14Wke noo, re noo lo men:
―Dechey, laa de nak ne nano.
Lex na men lo noo:
―Laa yra men gwa nak ne kesentyent wii gyelenles; wlangyichdoo men xab men por ne waa meno lo xren Men ne nak zegnak mëkzhiil bëën bëënleg. 15Por neguin ndxin men nes lo xyagzhil Dëdyuzh ne zob Ne rnebééy Ne, dxe gyëëltee rlaa men dxiin lenxeydoo Ne; laa Ne nak ne gaknonen men yra men. 16Che ylaandendetre men, ni ylaandetre men nis, ni yzeeydetre ngbiz led men, ni sakneeydendetre men, 17porke laa Men ne nak zegnak mëkzhiil bëën bëënleg ne zu nes lo yagzhil ne zob Dëdyuzh gapkwent men yra men zegnak men ne rapkwent mëkzhiil no tsano men men rubzin ne rlen nis ne rguu gyelembán, no laa Dëdyuzh nak ne ykwiidx nis lo men chen nunk goondetre men.
Currently Selected:
APOCALIPSIS 7: zpi
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.