MARCOS 15

Wano mén Jesus lo Pilato

(Mt. 27:1-2, 11-14; Lc. 23:1‑5; Jn. 18:28-38)

1Chene wyenii lyu, wdop yra fxuz ne rnebééy lo yra fxuz, no le men ne rnebééy lo men-Israel, no le maxter ley, no le yrandxee men ne nak xtis-Israel. Wliib men Jesus, zano men Ne wdekwent men Ne lo Pilato. 2Lex wnabdiiz Pilato lo Ne, re Pilato:

―¿Pe laa de nak xerrey men-Israel?

Wke Ne re Ne:

―Zegwa we zeg na de.

3Lex wzelo fxuz ne rnebééy lo yra fxuz noze ndal ne rkagyii men Ne. 4Wberee Pilato wnabdiiz Pilato lo Ne ste, re Pilato:

―¿Pe bet ykedet de? Gukwii palaltee ne rkagyii men de.

5Per wkedetre Ne. Por neguin kesentyent wzee wzak Pilato.

Wkyeen mén guet Jesus

(Mt. 27:15-31; Lc. 23:13‑25; Jn. 18:38–19:16)

6Lo lni nak xkoxtumber Pilato rselaa Pilato te mén ne nuu chegyiib, log mén ne guetee mengyëz. 7Cheguin nuu te men ne la Barrabás chegyiib por ne wket men mén yra men stebëd men ne wket ke mén chene wtsëldil men gobyeren. 8Wdxiin yra mén, wzelo men rnab men lo Pilato ne ylaa Pilato zegnak xkoxtumber men. 9Lex wnabdiiz Pilato lo men, re Pilato:

―¿Pe rlaan de yselaa noo xerrey men-Israel?

10Re Pilato zenga porke wyenen Pilato ne por gyelembidye wdekwent yra fxuz ne rnebééy lo yra fxuz Jesus lo Pilato. 11Per che wun yra fxuz ne rnebééy lo yra fxuz gan wguu men lextoo yrandxee mén chen ynab men ne yláá Barrabás. 12Lex wnabdiiz Pilato lo yra mén guin ste, re Pilato:

―¿Pagox rlaan de ylaa noo menree ne rnii de xerrey men-Israel?

13Wke yra mén, noze rderëz men, re men:

―¡Lo kruz gukaa men!

14Lex re Pilato lo men:

―¿Penako? ¿Pe ne malzhe wlaa men?

Per lel mazre rderëz men, re men:

―¡Lo kruz gukaa men!

15Kom rlaan Pilato gyan Pilato wen nes lo yra mén, wselaa Pilato Barrabás; lex wkyeen Pilato soldad ne ydee soldad xkwent Jesus; chene wluzh wdee men xkwent Ne, wdekwent Pilato Ne lo men chen tsakaa men Ne lo kruz.

16Zhich guin zano men Ne ruyuloow; lex wtop men yrandxee sesoldad men. 17Wnegak men Ne te lërnloren, no wzhexkwaa men te korongyëts wzoob meno xtoo Ne. 18Wzelo men rderëz men, re men:

―¡Kesentyent non xerrey men-Israel!

19Lex rkyits men tebla bëg xtoo Ne, rtxonxen men led Ne, no rzuzhib men lo Ne, rlaa men zeg rlaa men ne rzaknon Ne. 20Chene wluzh wlaa men Ne zenga, wboo ke men lërnloren guin led Ne, lex wnegak ke men Ne xab Ne. Zhich guin zano men Ne chen ykaa men Ne lo kruz.

Wkaa mén Jesus lo kruz

(Mt. 27:32-44; Lc. 23:26‑43; Jn. 19:17-27)

21Nëz wtsëlo men te men-Cirene ne la Simon, xuz Lej nak men yrup Lej Rufo; den wberee mén guin, lex wkyenfwers men men weey men xekruz Jesus.

22Wano men Ne ledne la Gólgota. (Gólgota rna, Berxtoo Mengut.) 23Lex wdee men bin ne noots ne la mirra goo Ne, per woodet No. 24Zhich guin wkaa soldad Ne lo kruz. Lex wa soldad pwest kon xab Ne gan gonezhe yganen men te te men.

25Beygaa rsil or guin ne wkaa men Ne lo kruz. 26Lex wkaa men leter xtoo xekruz Ne gan pe kwentzhe ka Ne nga, re leter guin: “Laa xerrey men-Israel nee.” 27No wkaa men txup ngbaan lo kruz, te men wkaa lo kruz ne zob koo Ne ladbëë, le ste men wkaa lo kruz ne zob koo Ne ladbëg. 28Zenga wak kumplir diiz ne zëëd lo xgyiich Dëdyuzh ledne re: “Wun mén men kwent lad menmal.”

29Yrandxee mén ne rdee nga, rdxii xtoo men, rninyaan men lo Ne, re men:

―Laa de nga nlitla xeydoo Dëdyuzh no tsonegue gbiz nlep ke do ste, 30orrenaa guselaa de laake de. Gugyët lo kruz.

31Zenga ke rzhidxno yra fxuz ne rnebééy lo yra fxuz Ne yra men maxter ley, re men:

―Wselaa ménree ste mén, per rundet men gan yselaa men men laake men. 32Belne laa men nak Crist xerrey men-Israel, gyët men lo kruz naa chen ylaleedx be men.

Axtegue no men ne ka lo kruz ne zob koo Ne wninyaan lo Ne.

Le Jesus wet

(Mt. 27:45-56; Lc. 23:44‑49; Jn. 19:28-30)

33Or ne rwen ngbiz, waknkeb ydendxee gyëzlyu, axtegue beytson wzëë wyenii ste. 34Orke guin wkarëzyaa Jesus, re Ne:

―Eloi, Eloi, ¿lama sabactani? ―Diizree rna: Dëdyuzhe, Dëdyuzhe, ¿penak wboleedx de noo?

35Gwrol men ne ndxin nga, ne won men wkarëz Ne, re men:

―Gugon, profet-Elías rkarëz men.

36Orgueguin noze rzhoon te ke men ne zu nga, wa men wagaz men tebla zhiil kon binaguer; lex wzoob meno xtoo te bëg, wtee meno ruu Jesus chen goo Ne binaguer, lex re men:

―Zeka men, gan pe schiid Elías chiidlit men lo kruz.

37Lex wkarëzyaa Jesus ste, wetgue Ne. 38Orguin wrëznzeli kortin ne ka lenxeydoo Dëdyuzh, gwrooltee wako. 39Ne wii kapitan ne zu ngali lo Jesus ne wet Jesus, re men:

―Nli ne XPee Dëdyuzh nak ménree.

40No ndxin ke tebëd wnaa axtegue nat, rwii men yra neguin ne kayak. Lad yra wnaa guin zu Mli Matlen no zu Salme no le Mli ne nak xnaa Xeb no ne nak ke xnaa Jacob ne windee. 41Yra wnaaree nak ne wrunal Jesus, laa men wun xyudar Ne chene ka Ne lo lyu ne la Galilea; no ndalre wnaa ne wdxinnal Ne Jerusalén zu nga.

Le Jesus wgueedx

(Mt. 27:57-61; Lc. 23:50‑56; Jn. 19:38-42)

42Kom dxe guin nak dxe bisper pask no dxe guin nulyaaz men ne ykyiinen men dxe ne rne men-Israel, por neguin or ne che rzëë, 43wa te mgyeey ne la Xeb lo Pilato. Axtegue wdxedet men wbig men wnab men xkwerp Jesus lo Pilato. Men-Arimatea nak mgyeey guin no men nak te mennon lad xtis-Israel no kambë́z men ne gak ne rkyeen Dëdyuzh. 44Wzee wzak Pilato ne won Pilato ne che wet Jesus. Lex wbëz Pilato kapitan, wnabdiiz Pilato lo men gan pe nli ne che wet Jesus. 45Chene re kapitan nli we, wdee Pilato si walit Xeb Ne lo kruz. 46Orguin wka Xeb te saben, lex wlit Xeb Ne, wtxël Xeb Ne saben guin, lex walu Xeb Ne te lenbaa ne ndeen txugye. Lex wtsëë Xeb rubaa guin kon te gye. 47Wii Mli Matlen yra men Mli xnaa Xeb gan pazh wguu men Ne.

Currently Selected:

MARCOS 15: zpi

Highlight

Copy