Guiꞌch barojp par ree bén Corinto 11

Pab con ree apóstoles bén rusquiee ree

1Yan, ¡Xi nix taandi naj con tioꞌp choon ree da xgab tontan! Per naj rni lojdi gol gudaan naj. 2Naj rënan lëjt ziꞌcgajc rën Dios lëjt. Ziꞌcgajc tijb dad rajp xiꞌndxaꞌp biin ni ma na̱j guxhliaa din chileꞌ guidxinm naya loj xin tiaꞌ laam, zian rënan guidxinëꞌn lëjt loj Cristo naya sin dol. 3Per rdxeban chuꞌ bén gusquiee lëjt ziꞌc basquiee bëël Eva, abiꞌ ad züjntridi xgab guidib luxdoodi xcwent Jesucrist. 4Din chi riꞌt ben ren rüman diidx lojdi xcwent Cristo, per garen guial ziꞌc ma balüün lëjt, o chi riꞌt bén ren rüman diidx lojdi xcwent Sprijt, per ad lasaꞌt xSprijt Dios bén ma nabannëdi, o chi riꞌt ben ren lojdi naman xhienaag din gapidi perdon, per garen guial loj ni ma ranan lojdi, lëjt laa ridxgaꞌ gajquidi laa reeman. 5Per naj rulüü achet ryaadxan delant loj ree bén rëb laa reeman na̱j quijb xi apóstoles Jesús. 6Din majsi achet sirv naj par ganen, per ad ryaadxtan guialrigniaꞌ abiꞌ lëjt ragbee guial diidxlin por gra ni ma baguiaadi baguieenan.

7Per, ¿chuj ni ni malan benan ya guial ad bentan benroꞌ lojdi persi benan gan gojquidi xbejn Cristo, në guial ad baquijxtan lëjt chi basidan lëjt xtiidx Dios? 8Ben renli ree bén na̱j ree xbejn Cristo cwaꞌn xmilia reeman persi beenan naj yudar laꞌtgaj guzun con lëjt persi basidan lëjt xtiidx Dios. 9Abiꞌ chi guzun con lëjt, chi biaadxan xhienin ad gunaabtan lojdi güündi naj yudar, bén Macedonia ree bén rliladx ree Jesucrist laa reeman bidnë ni biaadxan nadxel. Ad goct wanin lojdi guneedi xhienin par naj, ad yuꞌ tëët dxej ganin guial rüjn naguiejn güündi naj yudar. 10Ziꞌc najn xbejn Cristo rnin lojdi ni na̱j diidxli, guial niz Acaya Achutczi zajc gudxoon guial chuꞌ luxdon zagdxe guial guiën ni benan con lëjt. 11Abiꞌ ¿chexc zeel benan zian con lëjt? ¿Guial ad rëntan lëjt ya? Per Dios ragbee guial dád rënan lëjt.

12Abiꞌ gusnuu günan ziꞌc cayünan xt yandxej guial ad zanaabtczan lojdi güündi naj yudar, din chitëë xhie guiniee ree bén ruladx guilies xvalor gajc guial na̱j reeman xbejn Jesús guial ziꞌcgajc cayguieenan cayüjn reeman. 13Din laa reeman rëbzi reeman guial na̱j reeman xi apóstoles Jesús, rusquieezi reeman bejn ree rüjnzi reeman ziꞌc rulüü na̱j reeman xi apóstoles Jesús. 14Per xt niꞌquid radxat loj bejn por zian, din xt xindxab zileꞌ gulüüloj loj bejn ziꞌc tijb xianjl Dios. 15Dxel xt niꞌquid radxat loj bejn guial bén ni cayüjn ree xmandad xindxab rëb reeman guial laa reeman cayüjn xmandad Dios. Per laa reeman zayal reeman casti ni rayal reeman por ni cayüjn reeman.

Tarbajw ni gudëd Pab guial najman xi apóstol Jesucrist

16Yan canin lëjt stijb: Ad naladxidi guial ad nadëdguientan, per bal rüjndi xgab zian gol basaꞌn za naj ganen ziꞌc tijb bén ad nadëdguient din nëgajc naj gales da valoran majsi tibdaꞌnzi. 17Ad nat Dios guial gales da valoran ziꞌc cayünan, per gales da valoran ziꞌc tijb bén ad nadëdguient. 18Ziꞌc yuꞌ zien ree bén rlies xvalor gajc por ni rüjn reeman loj guidxliuj guie, yan ziangajc naj gales da valor gajcan. 19Din guial najdi bén rigniaꞌ ad nawëëgt na̱j taandi bén ad nadëdguient ree. 20Rdaandi bén rniabee ree lëjt rüjn reeman ziꞌctzi rën reeman, rdaandi bén rtiaꞌ ree ni rajpidi, bén rusquiee ree lëjt, o rniee reeman lojdi ganax ree diidx nabë abiꞌ xt rtiëjbidi rëëz reeman roꞌdi. 21Majsi natuꞌn par naj, per naj rni lojdi guial ad bayaꞌptan valor guial naguieennëꞌn lëjt zian.

Per bal rlies xvalor reeman por xhiedxitzinin, nëgajc naj zajc gales da valoran. Canen lojdi ziꞌc tijb bén ad nadëdguient, din ad xnejztan. 22Per bal na reeman guial na̱j reeman bén Hebreo, nëgajc naj na̱j bén Hebreo. Bal na reeman guial na̱j reeman bén Israel, ziangajc naj bén Israel gajc naj. Bal na reeman guial loj xdiaa Abraham zëëd reeman, nëgajc naj zial loj xdiaa Abraham. 23Abiꞌ bal na reeman guial xmandad Cristo cayüjn reeman, naj mazri cayünan xmandadaman. Majsi ziꞌc rniee bén ad nadëdguient rnien chi rnin zian, per diidxli guial naj mazri ma benan xmandad Cristo guial loj reeman. Abiꞌ por zian mazri ma guyun ladxguiib guial loj reeman, mazri ma gudijn ree bejn naj guial loj reeman abiꞌ mazri zien volt ma guzun loj guialgüjt. 24Gaay volt ma gudijn ree bén Israel naj, abiꞌ beegaj gudijn reeman naj ziꞌctiubitap volt rugaz reeman duu ladan. 25Choon volt gudijn reeman naj con yag, abiꞌ tib volt bacaaguiaj reeman naj. Choon volt ma wej barcw lod zaꞌn xan nijsdoo, abiꞌ tibdxej tibguiaal bayaꞌnan loj nijsdoo. 26Guidibczi lod ma wan, gudëëdan loj ree ni nadxeb chi gudëëdan loj ree guiiw, loj ree béngubaan, loj ree bén ladxan bén Israel ree në loj ree bén ad najt bén Israel. Ma gudëëd tëën loj ree ni nadxeb luguiedx ree, dajn ree, loj nijsdoo, në loj ree bén rusquiee na reeman guial na̱j reeman xbejn Cristo. 27Dád ma guzaagdiajn. Dád zien volt ma gulën bacaal, ma gulaanan, ma weꞌcan nijs, abiꞌ ma guyu dxej ni achetczi gudawan. Ma gognajlan, ma biaadx tëë da xaban.

28Abiꞌ ad laatzanan ma guzaꞌcan, zien ree ni ma guzaꞌcan. Abiꞌ guixie guixie rünan xgab por ree xbejn Cristo bén zojb ree niz lod ma wan. 29Bal xhie cazajc tijb ree bén rliladx Jesucrist, cayünan xgab por laaman. Abiꞌ bal cusquiee reeman tijb ree bén rliladx Jesucrist par güünman dol, dád ralenan yuꞌ tëën laaman xgab. 30Bal rüjn naguiejn gales da valor gajcan, tijbzi ni ganin por naj, na̱j por guialrzagdiaj ni ma gudëëdan. 31Abiꞌ Dios xDad Dad Jesucrist, laaman bén rayal respejt guidib tiamp, laaman ragbee guial diidxli na̱j ni canen. 32Tiamp chi canabee rey Aretas, wan luguiedx Damasco dxel gunabee gobernador luguiedx guin biaaw nejz par guiniaaz reeman naj. 33Per guyu ree bén ni badxeꞌ naj lën tijb dxüm abiꞌ gulet reeman naj niz roꞌ ventan ni na̱j roꞌ zeꞌ ni nayaw guiedx guin, zian gulaan loj gobernador guin.

Currently Selected:

Guiꞌch barojp par ree bén Corinto 11: zas

Highlight

Copy