ᒫᑯᓯᐅᑉ ᐊᒡᓚᖏᑦ 12
12
ᐅᐂᓂᓕᒃᓴᒥᒃ ᐱᕈᖅᓰᕕᖕᒥᒃ ᑲᒪᔩᑦ ᐊᑦᔨᐅᑎᑕᐅᓂᖏᑦ
ᒫᑎᐅᓯ 21:33-46; ᓘᑲᓯ 20:9-19
1 #
ᐂᓮᐊᓯ 5:1,2. ᔩᓱᓯᐅᑉ ᐊᔪᕆᖅᑐᖅᐰᑦ ᐊᑦᔨᐅᔪᑎᒍᑦ, ᐅᖃᕐᓗᓂ: “ᑍᑦᓱᒪᓂ ᐊᖑᑎᑕᖃᓚᐅᖅᐳᖅ ᐱᕈᖅᓰᕕᖕᒥᓂ ᐱᕈᖅᓯᐊᒃᓴᓂᒃ ᑲᓐᖓᖅᓱᐃᔪᒥᒃ, ᐃᑎᖅᓴᓕᐅᕐᓗᓂ ᐅᐂᓂᑦ ᐃᑦᓯᔭᖅᑕᐅᕕᒃᓴᖓᓂᒃ, ᑕᕝᕙᓂ ᐃᒡᓗᓕᐅᖅᐳᖅ ᐳᖅᑐᔪᒥᒃ ᖃᐅᔨᓴᕐᕕᒃᓴᒥᒃ, ᐱᕈᖅᓰᕕᒃ ᐊᑐᖅᑕᐅᑎᑉᐹ ᑲᒪᔨᐅᓂᐊᖅᑐᓄᑦ, ᐱᔭᕇᕋᒥ ᓄᓇᐅᑉ ᐊᓯᐊᓄᑦ ᐊᐅᓪᓚᖅᐳᖅ. 2ᐱᕈᖅᑐᓂᒃ ᐅᐂᓂᒃᓴᓂᒃ ᑲᑎᖅᓯᕕᒃ ᓇᓪᓕᐅᑎᖕᒪᑦ, ᐱᔨᒥᓂᒃ ᑎᓕᓯᕗᖅ ᐱᕈᖅᓰᕕᖕᒥᒃ ᑲᒪᔨᐅᑎᑕᒥᓄᑦ, ᑖᓐᓇ ᐂᒃᓯᖁᓪᓗᒍ ᐱᕈᖅᑐᕕᓃᑦ ᐃᓚᖏᓐᓂᒃ ᐱᑎᑕᐅᔪᒪᓪᓗᓂ. 3ᐱᕈᖅᓰᕕᓕᕆᔪᑦ ᑖᓐᓇ ᑎᒍᕚᑦ ᐋᓐᓂᖅᓯᕐᓗᒍᓗ, ᐅᑎᖅᑎᑉᐹᑦ ᓱᓇᒥᒡᓘᓐᓃᑦ ᓇᒃᓴᖅᑎᓐᓇᒍ. 4ᐱᕈᖅᓰᕕᖕᒥᒡᓕ ᐱᖁᑎᓕᒃ ᑎᓕᓯᒃᑲᓐᓂᖅᐳᖅ ᐱᔨᒥᓂᒃ, ᑖᒃᑯᐊ ᐱᕈᖅᓰᕕᓕᕆᔪᑦ ᐋᓐᓂᖅᐹᑦ ᓂᐊᖁᐊᒍᑦ, ᒥᑕᐅᑎᒋᓪᓗᒍ ᐊᐅᓪᓚᖅᑎᑉᐹᑦ. 5ᐱᕈᖅᓰᕕᖁᑎᓕᒃ ᑎᓕᓯᒃᑲᓐᓂᖅᐳᖅ ᐱᔨᒥᒃ ᐊᓯᐊᓂᒃ, ᐱᕈᖅᓰᕕᓕᕆᔪᑦ ᑖᓐᓇ ᑐᖁᑉᐹᑦ; ᐊᓯᖏᓪᓗ ᐊᒥᓱᑦ ᑍᒤᓕᐅᖃᑦᑕᖅᐰᑦ, ᐃᓚᖏᑦ ᐋᓐᓂᖅᓯᕐᓗᒋᑦ ᐃᓚᖏᓪᓗ ᑐᖁᓪᓗᒋᑦ. 6ᐱᕈᖅᓰᕕᖁᑎᓕᒃ ᑎᓕᔭᒃᓴᑐᐊᖃᓕᖅᐳᖅ ᐃᕐᖕᓂᕐᖕᒥᓂᒃ ᓇᒡᓕᒋᒻᒪᕆᒃᑕᒥᓂᒃ; ᑭᖑᓪᓕᖅᐸᐅᑎᓪᓗᒍᓗ ᐃᕐᖕᓂᓂ ᑎᓕᒋᕚ ᑖᒃᑯᓄᖓ, ᐅᖃᕐᓗᓂ, ‘ᐃᕐᖕᓂᕋ ᐃᓕᕋᒋᓂᐊᖅᐹᑦ.’ 7ᐱᕈᖅᓰᕕᓕᕆᔪᑦ ᐃᒻᒥᖕᓄᑦ ᐅᖃᖃᑎᒌᓕᖅᐳᑦ, ‘ᑖᓐᓇ ᑕᕝᕙ ᑭᖑᕐᖑᑦᔨᔪᒃᓴᖅ; ᐊᑏ, ᑐᖁᓚᐅᕐᓚᕗᑦ, ᑖᑦᓱᒪ ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍᑦ.’ 8ᑕᕝᕙ ᑎᒍᕚᑦ ᑐᖁᓪᓗᒍ, ᑎᒥᖓ ᐃᒋᑉᐹᑦ ᐱᕈᖅᓰᕕᐅᑉ ᓯᓚᑖᓄᑦ.
9“ᖃᓄᕐᓕ ᑕᕝᕙ ᐱᕈᖅᓰᕕᖁᑎᓕᒃ ᐱᓛᓕᖅᐸ? ᑎᑭᑦᓱᒫᖅᐳᖅ ᐱᕈᖅᓰᕕᓕᕆᔩᑦ ᑐᖁᑦᓴᖅᑐᕐᓗᒋᑦ, ᐱᕈᖅᓰᕕᒃ ᐊᓯᖏᓐᓄᑦ ᑲᒪᒋᔭᐅᖁᓕᕈᒫᖅᐹ. 10#ᐃᓐᖏᕈᑦ 118:22,23.ᐅᓇ ᐅᖃᓕᒫᖅᓯᒪᓐᖏᓚᓯᐅᒃ ᒎᑎᐅᑉ ᐅᖃᐅᓯᖏᓐᓂ?
‘ᐅᔭᕋᒃ ᐃᒡᓗᓕᐅᖅᑎᓂᑦ ᓇᕐᕈᒋᔭᐅᔪᖅ,
ᑖᓐᓇ ᐱᓪᓚᕆᐅᓂᖅᐸᐅᓪᓗᓂ ᑎᕆᖅᑰᓕᖅᐳᖅ;
11ᑕᒪᓐᓇ ᐊᑕᓂᐅᑉ ᐱᓂᐊᓚᐅᖅᐹ,
ᓴᖅᑭᔮᕐᖕᓂᖓ ᐅᕙᑦᑎᓐᓄᑦ ᑕᑯᒥᓇᖅᑐᕐᔫᕗᖅ!’”
12ᑖᒃᑯᐊ ᔩᓱᓯ ᑎᒍᔪᒪᒐᓗᐊᖅᐹᑦ, ᐃᓄᒐᓴᒡᔪᐊᓂᒡᓕ ᑲᑉᐱᐊᓱᒃᐳᑦ, ᒪᓗᒍᓱᓕᕋᒥᒃ ᑕᒪᑐᒧᖓ ᐊᑦᔨᐅᔪᒧᑦ ᐅᖃᐅᓯᐅᓂᕐᖕᒥᖕᓂᒃ; ᑍᒤᒻᒪᑦ ᕿᒪᒃᐰᑦ ᐊᓯᐊᓄᐊᓕᕐᓗᑎᒃ.
ᐊᐱᖅᑯᓯᖅ ᑖᒃᓰᔭᕆᐊᖃᕐᖕᒪᖔᕐᖕᒥᒃ
ᒫᑎᐅᓯ 22:15-22; ᓘᑲᓯ 20:20-26
13ᐹᕆᓯᑦ ᐃᓚᖏᑦ ᐃᕉᑕᓯᐅᓪᓗ ᒪᓕᒃᑎᖏᑕ ᐃᓚᖏᑦ ᔩᓱᓯᒧᐊᖁᔭᐅᕗᑦ, ᐊᐱᖅᓱᕐᓗᒍ ᓇᓗᓕᖅᑎᓐᓇᓱᐊᕈᒪᓪᓗᒍ. 14ᑖᒃᑯᐊ ᔩᓱᓯᒧᐊᕋᒥᒃ ᐅᖃᖅᐳᑦ, “ᐊᔪᕆᖅᑐᐃᔩ ᖃᐅᔨᒪᒐᑦᑕ ᓱᓕᔪᒥᒃ ᐅᖃᖃᑦᑕᕋᕕᑦ, ᐃᓄᐃᑦ ᐃᓱᒪᖏᑦ ᓯᕘᕋᒋᓇᒋᑦ ᓱᓕᑦᓯᐊᖅᑐᒥᒃ ᐅᖃᖅᐸᒃᑲᕕᑦ; ᐃᓄᐃᑦ ᖃᓄᐃᑦᑑᓂᖏᓐᓂᒃ ᑲᒪᒋᖏᓐᓇᕕᒋᑦ, ᐊᔪᕆᖅᑐᖃᑦᑕᕋᕕᒋᑦ ᓱᓕᔪᒥᒃ ᒎᑎᐅᑉ ᐱᓂᐊᖅᑕᐅᖁᔭᖏᓐᓂᒃ. ᐅᖃᐅᑎᓚᐅᖅᑎᒍᑦ, ᐱᖁᔭᑦᑎᓐᓄᑦ ᐊᑭᕋᖅᑐᖅᐹᑦ, ᑖᒃᓰᔭᕈᑎᓂᒃ ᑐᓂᓯᖃᑦᑕᕈᑦᑕ ᓰᓴᕆᒧᑦ ᐅᕝᕙᓗ ᑐᓂᓯᖃᑦᑕᕆᐊᖃᓐᖏᓚᒍᑦ?”
15ᔩᓱᓯᐅᑉ ᐱᖏᑦᓯᖅᓱᕋᓱᐊᕐᖕᓂᖏᑦ ᖃᐅᔨᒪᒐᒥᒋᑦ ᐅᖃᐅᑎᕔᑦ, “ᓱᖕᒫᑦ ᐅᕙᓐᓂᒃ ᐆᒃᑐᕋᓱᐊᖅᐱᓰ? ᑮᓇᐅᔭᖅ ᕾᑕᐅᓚᐅᕐᓕ, ᑕᑯᓚᐅᕐᓚᒍ.”
16ᑮᓇᐅᔭᒥᒃ ᑐᓂᓯᕕᒋᕚᑦ. ᔩᓱᓯᐅᑉ ᐊᐱᕆᕔᑦ, “ᑭᓇᐅᑉ ᑮᓇᓐᖑᐊᖓ, ᑭᐊᓗ ᐊᑎᖓ?”
ᑖᒃᑯᐊ ᑭᐅᕚᑦ, “ᐊᖓᔪᖅᑳᕐᔪᐊᑉ ᓰᓴᕆᐅᑉ.”
17ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᖅ ᓰᓴᕆ ᑐᓂᓯᕕᒋᓯᐅᒃ, ᐱᖏᓐᓂᒃ, ᒎᑎᓗ ᑐᓂᓯᕕᒋᓗᒍ ᐱᖏᓐᓂᒃ.”
ᑖᒃᑯᐊ ᔩᓱᓯᐅᑉ ᑭᐅᑦᔪᑎᖓᓂᒃ ᑲᒪᕕᒃᔪᐊᖅᐳᑦ.
ᑐᖁᖓᔪᓂᑦ ᒪᑭᓐᓂᐅᒐᔭᖅᑐᒥᒃ ᐊᐱᖅᓲᑏᑦ
ᒫᑎᐅᓯ 22:23-33; ᓘᑲᓯ 20:27-40
18 #
ᐋᐴᓯᑕᓖᑦ 23:8. ᑭᖑᓂᖓᒍᑦ ᓵᑦᔪᓰᑦ ᐅᐸᒃᐹᑦ, ᑖᒃᑯᐊ ᐃᓄᖕᓂᒃ ᑐᖁᖓᔪᓂᑦ ᒪᑭᕝᕕᒃᓴᖃᖏᓐᓂᕅᕙᒃᑐᑦ, ᔩᓱᓯᒧᐊᖅᐳᑦ ᐊᐱᕆᓪᓗᒍ ᐅᖃᖅᐳᑦ, 19#ᒨᓯᓯ ᑕᓪᓕᒪᖏᑦ 25:5.“ᐊᔪᕆᖅᑐᐃᔩ, ᒨᓯᓯᐅᑉ ᐱᖁᔭᖅᑖᖅᑎᓚᐅᖅᐹᑎᒍᑦ, ‘ᐊᖑᑦ ᓄᓕᐊᓕᒃ ᑐᖁᒃᐸᑦ ᕿᑐᕐᖓᖅᑖᓚᐅᕋᓂ, ᑕᕝᕙ ᓄᑲᖓᑕ ᐅᐃᒡᒐᕐᖕᓂᖅ ᓄᓕᐊᖅᑖᕆᔭᒃᓴᕆᕚ ᑖᒃᑯᐊᒃ ᕿᑐᕐᖓᖅᑖᖁᓪᓗᒋᒃ, ᕿᑐᕐᖓᖏᑦ ᑐᖁᓚᐅᖅᑐᒧᑦ ᕿᑐᕐᖓᕆᔭᐅᓂᕋᖅᑕᐅᖁᓪᓗᒋᑦ.’ 20ᑍᑦᓱᒪᓂ ᓄᑲᕇᒃᑕᖃᓚᐅᖅᐳᖅ ᐊᖑᑎᓂᒃ 7ᓂᒃ; ᐊᖓᔪᒃᖠᖅᐹᖅ ᓄᓕᐊᓂᒃᐳᖅ, ᕿᑐᕐᖓᖅᑖᓚᐅᕋᓂᓗ ᑐᖁᕗᖅ. 21ᑕᕝᕙ ᓄᑲᖓᑕ ᐊᕐᖕᓇᖅ ᓄᓕᐊᖅᑖᕆᕚ, ᑖᓐᓇᑦᑕᐅᖅ ᑐᖁᒋᕗᖅ ᕿᑐᕐᖓᖅᑖᓚᐅᕋᓂ; ᓄᑲᖓᑕ ᐱᖓᔪᖓᑦ ᑍᒫᑦᓮᓐᓇᖅ ᐱᒋᕗᖅ. 22ᑖᒃᑯᐊ ᓄᑲᕇᑦ 7 ᑖᑦᓱᒥᖓ ᐊᕐᖕᓇᒥᒃ ᓄᓕᐊᓂᓚᐅᖅᐳᑦ, ᑕᒪᕐᖕᒥᒃ ᕿᑐᕐᖓᖅᑖᓚᐅᕋᑎᒃ ᑐᖁᓚᐅᖅᐳᑦ. ᑭᖑᓪᓕᖅᐸᐅᓪᓗᓂᓕ ᐊᕐᖕᓇᖅ ᑐᖁᒋᕗᖅ. 23ᑐᖁᖓᔪᑦ ᒪᑭᑉᐸᑕ ᒪᑭᕝᕕᒃᓴᐅᔪᒫᖅᑐᒥ, ᓇᓪᓕᐊᑦᑕ ᑖᓐᓇ ᐊᕐᖕᓇᖅ ᓄᓕᐊᕆᓛᖅᐸᐅᒃ? ᑖᒃᑯᐊ ᖃᑕᓐᖑᑎᒌᑦ 7 ᑕᒪᕐᖕᒥᒃ ᓄᓕᐊᕆᓚᐅᕐᒪᑦᔪᒃ.”
24ᔩᓱᓯᐅᑉ ᐅᖃᐅᑎᕔᑦ, “ᐃᒫᒃ ᐱᑦᔪᑎᖃᖅᖢᓯ ᑕᒻᒪᕋᑦᓯ, ᒎᑎᐅᑉ ᐅᖃᐅᓯᖏᑦ ᖃᐅᔨᒪᖏᓐᓇᑦᓯᐅᒃ ᐊᒻᒪᓗ ᒎᑎᐅᑉ ᐱᔪᓐᓇᕐᖕᓂᖓ ᖃᐅᔨᒪᓇᒍ. 25ᑐᖁᖓᔪᓪᓕ ᒪᑭᒃᑯᑎᒃ, ᓄᓕᐊᓂᒃᐸᒍᒫᓐᖏᓚᑦ ᐅᐃᓂᒃᐸᖏᓪᓗᑎᒡᓗ, ᐂᖏᓖᑎᑐᑦ ᕿᓚᖕᒦᑦᑐᑎᑐᑦ ᑍᒤᑦᓱᒫᖅᐳᑦ. 26#ᒨᓯᓯ ᐂᑉᐸᖏᑦ 3:6.ᑐᖁᖓᔪᑦ ᒪᑭᑎᑕᐅᓂᖓᓂᒃ ᐅᖃᖅᓯᒪᔪᓂᒃ ᐊᒡᓚᖕᓂ ᐊᑐᐊᖅᓯᓚᐅᖅᓯᒪᓐᖏᓚᓰ ᒨᓯᓯᐅᑉ ᐊᒡᓚᖏᓐᓂ ᐅᖃᐅᓯᖃᖅᑐᓂᒃ ᐅᖅᐱᒐᕐᖕᒥᒃ ᐃᑯᐊᓚᔪᒥᒃ, ᑕᕝᕙᓂ ᐅᓂᒃᑲᐅᓯᕐᖕᒥ ᒎᑎᐅᑉ ᒨᓯᓯ ᐅᖃᐅᑎᓚᐅᕐᖕᒪᒍ, ‘ᐅᕙᖓ ᐂᑉᕋᕼᐋᒻ ᒎᑎᖓ, ᐂᓴᑭᐅᓪᓗ ᒎᑎᖓ, ᔧᑰᓪᓗ ᒎᑎᖓ?’ 27ᒎᑎ ᐃᓅᔪᓄᑦ ᒎᑎᐅᕗᖅ, ᑐᖁᖓᔪᓪᓕ ᒎᑎᒋᓐᖏᓛᑦ; ᑍᒤᒻᒪᑦ ᑕᒻᒪᖅᓯᒪᓪᓚᕆᒃᐳᓯ.”
ᐱᖁᔭᖅ ᐱᓪᓚᕆᐅᓂᖅᐸᐅᔪᖅ
ᒫᑎᐅᓯ 22:34-40; ᓘᑲᓯ 10:25-28
28ᐱᖁᔭᓂᒃ ᐃᓕᓮᔩᑦ ᐃᓚᖓᑦ ᑕᒪᑐᒥᖓ ᐅᖃᖃᑎᒌᒃᑎᓪᓗᒋᑦ ᑐᓵᕗᖅ, ᑕᑯᒐᒥ ᔩᓱᓯᐅᑉ ᓵᑦᔪᓰᑦ ᑭᐅᑦᓯᐊᕐᖕᒪᒋᑦ, ᑍᒤᒻᒪᑦ ᔩᓱᓯᒧᐊᖅᐳᖅ ᐊᐱᕆᓪᓗᒍ, “ᓇᓪᓕᐊᑦ ᐱᖁᔭᓂᑦ ᑕᒤᓐᓂᑦ ᓯᕗᓪᓕᖅᐸᐅᔭᕆᐊᖃᖅᐸ?”
29 #
ᒨᓯᓯ ᑕᓪᓕᒪᖏᑦ 6:4,5. ᔩᓱᓯᐅᑉ ᑭᐅᕚ, “ᐅᓇ ᑕᕝᕙ ᓯᕗᓪᓕᖅᐸᐅᔪᖅ ᐱᖁᔭᓂᑦ, ‘ᐃᓴᕆᐊᓕᒥᐅᖑᔪᓯ ᑐᓴᕆᑦᓯ! ᐊᑕᓂᖅ ᒎᑎᕗᑦ, ᑖᓐᓇ ᐊᑕᓂᑑᕗᖅ. 30ᐊᑕᓂᖅ ᒎᑎᓯ ᓇᒡᓕᒋᔭᒃᓴᕆᕙᓯ ᐆᒻᒪᑎᑦᓯᓐᓄᑦ ᑕᒤᓐᓄᑦ, ᑕᕐᖕᓂᑦᓯᓐᓄᓪᓗ ᑕᒤᓐᓄᑦ, ᐃᓱᒪᑦᓯᓐᓄᓪᓗ ᑕᒤᓐᓄᑦ, ᐱᔪᓐᓇᕐᖕᓂᑦᓯᓐᓄᓪᓗ ᑕᒤᓐᓄᑦ.’ 31#ᒨᓯᓯ ᐱᖓᔪᖏᑦ 19:18.ᐂᑉᐸᖓᓗ ᐃᒤᓕᕗᖅ, ‘ᐃᓅᖃᑎᓯ ᓇᒡᓕᒋᔭᒃᓴᕆᕙᓯ ᓇᖕᒥᓂᖅ ᓇᒡᓕᒋᓂᖅᑐᑦ.’ ᐊᓯᖏᓐᓂᒃ ᑖᒃᑯᓇᖓᑦ ᐱᓪᓚᕆᐅᓂᖅᓴᓂᒃ ᐱᖁᔭᖅᑕᖃᓐᖏᓚᖅ.”
32 #
ᒨᓯᓯ ᑕᓪᓕᒪᖏᑦ 4:35. ᐱᖁᔭᓂᒃ ᐃᓕᓮᔨ ᔩᓱᓯᒧᑦ ᐅᖃᖅᐳᖅ, “ᐊᔪᕆᖅᑐᐃᔩ, ᓱᓕᑦᓯᐊᖅᐳᑎᑦ; ᑕᒪᓐᓇ ᓱᓕᖕᒪᑦ ᓲᕐᓗ ᐅᖃᕋᕕᑦ, ᐊᑕᓂᖅ ᑭᓯᒥ ᐊᑕᐅᓯᐅᖕᒪᑦ, ᑖᑦᓱᒪ ᐊᓯᐊᓂᒃ ᒎᑎᑕᖃᓐᖏᓚᖅ, ᑖᓐᓇᑐᐊᖅ ᑭᓯᐊᓂ. 33#ᕼᐆᓯᐊ 6:6.ᐃᓄᒃ ᒎᑎᒥᒃ ᓇᒡᓕᒍᓱᒃᑐᒃᓴᐅᖕᒪᑦ ᐆᒻᒪᑎᒥᓄᑦ ᑕᒤᓐᓄᑦ, ᐃᓱᒪᒥᓄᓪᓗ ᑕᒤᓐᓄᑦ, ᐱᔪᓐᓇᕐᖕᓂᕐᖕᒥᓄᓪᓗ ᑕᒤᓐᓄᑦ, ᐃᓅᖃᑎᒥᓂᒡᓗ ᓇᒡᓕᒍᓱᒃᑐᒃᓴᐅᓪᓗᓂ ᐃᒻᒥᓂᒃ ᓇᒡᓕᒋᓂᕐᖕᒥᑐᑦ, ᑖᒃᑯᐊᒃ ᐱᓪᓚᕆᐅᓂᖅᓴᐅᕘᒃ ᑐᓂᕐᕈᑕᐅᖁᔭᐅᔪᓂᑦ ᐆᒪᔪᕕᓂᕐᖕᓂᒃ ᑐᓂᕐᕈᓯᕐᕕᒥ, ᑐᓂᕐᕈᑕᐅᖁᔭᐅᓯᒪᔪᓂᓪᓗ ᑕᒤᓐᓂᑦ.”
34 #
ᓘᑲᓯ 10:25-28. ᔩᓱᓯᐅᑉ ᖃᐅᔨᒐᒥᐅᒃ ᑭᒡᒍᓯᖓ ᓯᓚᑐᔪᒻᒪᕆᐅᖕᒪᑦ, ᐅᖃᐅᑎᕚ, “ᒎᑎᐅᑉ ᐊᑕᓂᐅᕕᖓᓄᑦ ᐅᖓᓯᒍᓐᓃᖅᐳᑎᑦ.”
ᑕᒪᑐᒪ ᑭᖑᓂᖓᒍᑦ ᑭᓇᒧᓪᓘᓐᓃᑦ ᔩᓱᓯ ᐊᐱᕆᔭᐅᔪᒪᔪᓐᓃᖅᐳᖅ.
ᒥᓮᐊᓯᐅᑉ ᒥᒃᓵᓄᑦ ᐊᐱᖅᑯᓯᖅ
ᒫᑎᐅᓯ 22:41-46; ᓘᑲᓯ 20:41-44
35ᔩᓱᓯ ᑐᒃᓯᐊᕐᕕᒡᔪᐊᕐᖕᒥ ᐊᔪᕆᖅᑐᐃᓪᓗᓂ, ᐅᖃᖅᐳᖅ, “ᓱᖕᒪᓂᒃᑯᐊ ᐱᖁᔭᓂᒃ ᐃᓕᓮᔩᑦ ᐅᖃᖅᐸᑦ ᙭ᔅᑑᓯ ᑍᕕᑎᒧᑦ ᑭᖑᕚᕆᔭᐅᓂᐊᕐᖕᓂᕋᖅᖢᒍ? 36#ᐃᓐᖏᕈᑦ 110:1.ᑍᕕᑎ ᐊᓂᕐᖕᓂᕐᖕᒧᑦ ᐃᑦᔪᕐᖕᓁᑦᑐᒧᑦ ᐃᓱᒪᑖᖅᑎᑕᐅᓪᓗᓂ ᐅᖃᓚᐅᖅᐳᖅ:
‘ᐊᑕᓂᖅ ᐊᑕᓂᓐᓄᑦ ᐅᖃᖅᐳᖅ, “ᐅᕙᓂ ᑕᓕᖅᐱᓐᓂ ᐃᒃᓯᕙᒋᑦ, ᐊᑭᕋᖅᑐᖅᑎᖕᓂᒃ ᐃᓕᓯᖅᑳᖅᑎᓐᓇᖓ ᐃᑎᒐᕕᑦ ᐊᑖᓄᑦ.”’
37“ᑍᕕᑎᐅᑉ ᐊᑕᓂᕐᖕᒥᓂᒃ ᑍᖕᒪᒍ; ᖃᓄᖅ ᑕᕝᕙ ᙭ᔅᑑᓯ ᑍᕕᑎᐅᑉ ᑭᖑᕚᕆᒐᔭᖅᐸᐅᒃ?”
ᐃᓄᒐᓴᒡᔪᐊᑦ ᐊᒥᓱᑦ ᔩᓱᓯᒥᒃ ᓈᓚᒃᐳᑦ ᖁᕕᐊᓱᒡᓗᑎᒃ.
ᔩᓱᓯᐅᑉ ᐃᒃᐱᒍᓱᑦᓯᐊᖁᔨᓂᖓ ᐱᖁᔭᓂᒃ ᐃᓕᓮᔨᓂᒃ
ᒫᑎᐅᓯ 23:1-36; ᓘᑲᓯ 20:45-47
38ᐊᔪᕆᖅᑐᕐᓗᒋᑦ ᐃᒫᒃ ᐅᖃᖅᐳᖅ, “ᖃᐅᔨᓴᑦᓯᐊᕆᑦᓯ ᐱᖁᔭᓂᒃ ᐃᓕᓮᔨᓂᒃ, ᐱᓱᑲᑕᒍᒪᕙᖕᒪᑕ ᐊᓐᓄᕌᖅᓯᒪᓗᑎᒃ ᑕᑭᔪᓂᒃ ᐅᓕᒡᔪᐊᓂᒃ, ᐃᒃᐱᒋᔭᐅᑦᓯᐊᕐᓗᑎᒃ ᓂᓪᓕᐅᑦᔭᐅᔪᒪᕙᒃᓗᑎᒃ ᓂᐅᕕᕐᕕᖕᓂ. 39ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓂ ᐱᐅᓂᖅᐹᓂ ᐃᒃᓯᕙᐅᑕᖃᕈᒪᕗᑦ, ᐅᐱᓐᓇᕐᖕᓂᖅᐹᓂᓗ ᐃᓂᖃᕈᒪᕙᒃᓗᑎᒃ ᓂᕆᕕᒃᔪᐊᖅᑐᖃᖅᑎᓪᓗᒍ. 40ᐅᐃᒡᒐᕐᖕᓃᑦ ᓴᖐᑦᑐᕐᖕᓂᐊᒐᕆᓪᓗᒋᑦ ᐱᖁᑎᖏᓐᓂᒃ ᐋᑎᕆᕙᒃᐳᑦ#12:40 ᐊᖅᓵᖅᓯᕙᒃᐳᑦ ᐊᖏᕐᕋᖏᓐᓂᑦ, ᑭᖑᓂᖓᒍᑦ ᑕᑯᓐᓇᖅᑕᐅᔪᒪᓪᓗᑎᒃ ᑕᑭᔪᓂᒃ ᑐᒃᓯᐅᑎᖃᑦᑕᖅᐰᑦ. ᑍᒤᒻᒪᑦ ᓱᒋᐊᖅᑕᐅᓂᒃᓴᖏᑦ ᐊᖏᓂᒃᓴᐅᔪᒫᖅᐳᑦ.”
ᐅᐃᒡᒐᕐᖕᓂᐅᑉ ᑐᓂᕐᕈᓯᕐᖕᓂᖓ
ᓘᑲᓯ 21:1-4
41ᔩᓱᓯ ᑐᒃᓯᐊᕐᕕᒡᔪᐊᑉ ᑮᓇᐅᔧᕐᕕᖓᑕ ᖃᓂᒋᔮᓄᑦ ᐃᖏᑉᐳᖅ, ᑕᑯᓐᓈᓕᕐᓗᓂ ᐃᓄᖕᓂᒃ ᑮᓇᐅᔧᕐᕕᖕᒧᑦ ᐃᓕᐅᖅᑬᔪᓂᒃ. ᐊᒥᓱᑦ ᐊᔪᖅᓴᖏᑦᑐᑦ ᑐᓂᓯᕗᑦ ᑮᓇᐅᔭᓂᒃ ᐊᒥᓱᓂᒃ. 42ᑭᖑᕐᖓᒍᓪᓕ ᐅᐃᒡᒐᕐᖕᓂᖅ ᐊᔪᖅᓴᖅᑐᖅ ᑕᒪᐅᓐᖓᕆᕗᖅ, ᐃᓕᓯᓪᓗᓂ ᑮᓇᐅᔮᖕᓂᒃ ᒪᕐᕉᖕᓂᒃ ᒥᑭᔪᑯᓘᖕᓂᒃ. 43ᐃᓕᓐᓂᐊᖅᑎᓂ ᕾᖁᓪᓗᒋᑦ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᑖᓐᓇ ᐅᐃᒡᒐᕐᖕᓂᖅ ᐊᔪᖅᓴᖅᑐᖅ ᑐᓂᓯᕗᖅ ᐊᖏᓂᖅᐹᒥᒃ ᐊᓯᓕᒫᒥᓂᑦ. 44ᐊᓯᖏᑦ ᑐᓂᓯᕗᑦ ᐊᑐᕐᖕᓂᐊᖏᑕᒥᖕᓂᒃ ᐊᔪᖅᓴᖏᑦᑑᒐᒥᒃ; ᐅᓇᓕ ᐊᕐᖕᓇᖅ ᐊᔪᖅᓴᖅᑑᓪᓗᓂ ᑐᓂᓯᕗᖅ ᐱᒋᔭᑐᐊᒥᓂᒃ, ᐃᓅᑦᔪᑎᒃᓴᑐᐊᒥᓂᒡᓗ.”
Currently Selected:
ᒫᑯᓯᐅᑉ ᐊᒡᓚᖏᑦ 12: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
