ᓘᑲᓯᐅᑉ ᐊᒡᓚᖏᑦ 21

ᐅᐃᒡᒐᕐᓂᐅᑉ ᑐᓂᓯᓂᖓ

ᒫᑯᓯ 12:41-44

1ᔩᓱᓯ ᑕᑯᓴᕋᒥ ᐊᔪᕐᓴᖏᑦᑐᓂᒃ ᑕᑯᕗᖅ ᑐᓂᕐᕈᑎᒥᖕᓂᒃ ᐴᕐᓯᖃᑦᑕᕐᑐᓂᒃ ᑐᒃᓯᐊᕐᕕᒡᔪᐊᑉ ᑐᓂᕐᕈᓯᕐᕕᖓᓄᑦ; 2ᐊᒻᒪ ᑕᑯᒋᕗᖅ ᐅᐃᒡᒐᕐᓂᕐᒥᒃ ᐊᔪᕐᓴᕐᑐᒥᒃ ᑐᓂᓯᔪᒥᒃ ᑮᓇᐅᔮᑯᓘᖕᓂᒃ ᑲᓐᓄᔮᖕᓂᒃ ᒪᕐᕉᖕᓂᒃ. 3ᔩᓱᓯ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᐅᓇ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑐᓂᓯᓂᕐᓴᐅᕗᖅ ᐊᓯᓕᒫᒥᓂᑦ; 4ᐊᓯᖏᑦ ᑐᓂᓯᖕᒪᑕ ᐊᑐᕐᓂᐊᖏᑕᒥᖕᓂᒃ; ᐅᓇᓕ ᐊᕐᓇᖅ ᐊᔪᕐᓴᕐᑑᒐᓗᐊᕐᓗᓂ ᐱᑦᔪᑎᒃᓴᑐᐊᒥᓂᒃ ᑕᒤᓐᓂᒃ ᑐᓂᓯᕗᖅ.”

ᔩᓱᓯᐅᑉ ᐅᖃᐅᓯᖃᕐᓂᖓ ᑐᒃᓯᐊᕐᕕᒡᔪᐊᑉ ᓯᖁᑦᑎᕐᑕᐅᔪᒫᕐᓂᖓᓂᒃ

ᒫᑎᐅᓯ 24:1-2; ᒫᑯᓯ 13:1-2

5ᐃᓕᓐᓂᐊᕐᑎᖏᑕ ᐃᓚᖏᑦ ᐅᖃᖃᑎᒌᒍᑎᖃᓚᐅᕐᐳᑦ ᑐᒃᓯᐊᕐᕕᒡᔪᐊᕐᒥᒃ, ᑕᑯᒥᓇᕐᓂᖓ ᐅᖃᐅᓯᕆᓪᓗᒍ, ᐅᔭᕅᓪᓗ ᓴᓇᓯᒪᑦᓯᐊᕐᓂᖏᓐᓂᒃ, ᒎᑎᒧᑦ ᑐᓂᕐᕈᑎᒋᔭᐅᕙᒃᑐᑦ ᐱᓪᓗᒋᑦ, ᔩᓱᓯᓕ ᐅᖃᕐᐳᖅ, 6“ᑕᑯᔭᓯ ᑕᒪᒃᑯᐊ, ᐅᓪᓗᓂ ᓇᓪᓕᐅᑎᔪᒫᕐᑐᓂ ᐅᔭᕋᓕᒫᑦᓯᐊᑦ ᐊᑕᐅᓯᕐᒥᒡᓘᓐᓃᑦ ᐃᓂᒋᔭᒥᓂ ᐃᓕᓯᒪᔪᖃᕈᓐᓃᕈᒫᕐᐳᑦ ᐅᕐᕉᑎᑕᐅᔪᒫᕐᒪᑕ.”

ᑲᑉᐱᐊᓇᕐᑐᑦ ᐊᑭᕋᕐᑐᕐᑕᐅᓂᕐᓗ

ᒫᑎᐅᓯ 24:3-14; ᒫᑯᓯ 13:3-13

7ᐃᓕᓐᓂᐊᕐᑎᖏᑕ ᐊᐱᕆᕚᑦ, “ᐊᔪᕆᕐᑐᐃᔩ, ᖃᖓ ᑕᒪᒃᑯᐊ ᑍᒤᑦᓱᒫᕐᐸᑦ? ᖃᓄᖅ ᓇᓗᓁᒃᑯᑕᖃᕈᒫᕐᐸᑦ ᐱᒋᐊᓕᕈᑎᒃ?”

8ᔩᓱᓯ ᐅᖃᕐᐳᖅ, “ᖃᐅᔨᓴᕆᑦᓯ ᓯᓔᕐᕆᔭᐅᖁᓇᓯ; ᐊᒥᓱᑦ ᑎᑭᑦᓱᒫᕐᒪᑕ ᐅᕙᓐᓄᑦ ᐱᔨᐅᓂᕋᕐᑐᑦ, ᐅᖃᕐᓗᑎᒃ, ‘ᑖᓐᓇᐅᕗᖓ ᙭ᔅᑑᓯ!’ ᐊᒻᒪᓗ, ‘ᒫᓐᓇ ᐱᕕᒃᓴᖓ ᓇᓪᓕᐅᑎᕗᖅ!’ ᑖᒃᑯᐊ ᒪᓕᖕᓂᐊᕋᓯᐅᒃ. 9ᐅᓇᑕᕐᑐᓂᒃ ᑐᓴᕈᑦᓯ ᓵᓚᒋᖃᑦᑕᐅᑎᓇᓱᒃᑐᓂᒃ, ᓯᕘᕋᓂᐊᕋᓯ; ᑕᒪᒃᑯᐊ ᓯᕗᓪᓕᐅᔭᕆᐊᖃᕐᒪᑕ, ᓯᓚᕐᔫᓪᓕ ᐃᓱᐊ ᓱᓕ ᓇᓪᓕᐅᑎᓐᖏᓚᖅ.”

10ᔩᓱᓯ ᑕᕝᕙ ᐅᖃᓕᕐᐳᖅ, “ᐃᓅᖃᑎᒌᒡᔪᐊᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ ᐅᓇᑕᕈᒫᕐᐳᑦ, ᐊᖓᔪᖅᑳᕐᔪᐊᖃᕐᕖᑦ ᐊᓯᒥᖕᓄᑦ ᐊᖓᔪᖅᑳᕐᔪᐊᖃᕐᕕᖕᓄᑦ ᐅᓇᑕᕈᒫᕐᐳᑦ; 11ᓄᓇ ᐊᖏᔪᒥᒃ ᓴᔪᒃᐱᓗᖃᑦᑕᕈᒫᕐᐳᖅ ᓇᐅᒃᑯᑐᐃᓐᓇᖅ, ᑳᖕᓇᕐᑐᐊᓘᖃᑦᑕᕐᓗᓂ ᓇᓂᑐᐃᓐᓇᖅ ᐋᓐᓂᐊᓇᕐᑐᖃᕐᐸᒡᓗᓂᓗ; ᑲᑉᐱᐊᓇᕐᑐᓂᒃ ᖃᐅᔨᔭᕆᐅᕐᓇᕐᑐᓂᒃ ᓴᖅᑭᑦᑐᖃᕈᒫᕐᐳᖅ ᕿᓚᖕᒥᑦ. 12ᑕᒪᒃᑯᐊ ᐱᓚᐅᖅᑳᕐᑎᓐᓇᒋᑦ ᑎᒍᔭᐅᔪᒫᕐᐳᓯ, ᐊᑭᕋᕐᑐᕐᑕᐅᓗᓯ, ᐋᑕᐅᔪᒫᕐᐳᓯ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᑦ ᑎᒍᔭᐅᓯᒪᕕᖕᒧᐊᕐᑕᐅᔪᒫᕐᐳᓯᓗ, ᐊᖓᔪᖅᑳᕐᔪᐊᓄᑦ ᐊᐅᓚᑦᓯᔨᓄᓪᓗ ᐱᑎᑕᐅᔪᒫᕐᐳᓯ ᐅᕙᖓ ᐱᑦᔪᑎᒋᓗᖓ. 13ᑍᒤᑕᐅᓕᕐᑎᓪᓗᓯ ᐱᕕᒃᓴᖃᕈᒫᕐᐳᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕈᓐᓇᕐᓗᓯ. 14#ᓘᑲᓯ 12:11,12.ᐃᓱᒪᔮᕐᓂᐊᕋᓯ, ᖃᓄᖅ ᐅᖃᐅᓯᒃᓴᖃᕐᓂᐊᕐᒪᖔᑦᓯ; 15ᐅᕙᖓ ᐅᖃᐅᓯᒃᓴᖃᕐᑎᑦᓱᒫᕐᐸᑦᓯ ᓯᓚᑐᓂᖃᕐᑎᓪᓗᓯᓗ, ᐊᑭᕋᕐᑐᕐᑎᑦᓯᓐᓂᓪᓘᓐᓃᑦ ᐊᑭᕋᕐᑐᕐᑕᐅᔪᓐᓇᕈᒫᓐᖏᓚᓯ ᑭᒡᒍᓯᒃᓮᕈᑦᔨᔪᒫᕐᐳᓯᓕ ᑖᒃᑯᓂᖓ. 16ᑎᒍᔭᐅᑎᑕᐅᔪᒫᕐᐳᓯ ᐊᖓᔪᖅᑳᑦᓯᓐᓂᑦ, ᖃᑕᓐᖑᑎᑦᓯᓐᓂᓪᓗ, ᐃᓚᑦᓯᓐᓂᓪᓗ ᓇᖕᒥᓂᑦᓯᓐᓂᑦ, ᐃᓚᓐᓈᕆᔭᑦᓯᓐᓂᓪᓗ, ᐃᓚᖏᑦ ᐃᓚᓯ ᑐᖁᑕᐅᔪᒫᕐᐳᑦ. 17ᑕᒤᓐᓄᑦ ᐆᒥᒋᔭᐅᔪᒫᕐᐳᓯ ᐅᕙᖓ ᐱᑦᔪᑎᒋᓗᖓ, 18ᓂᐊᖁᑦᓯᓐᓂ ᐊᑕᐅᓯᕐᒥᒃᓘᓃᑦ ᓄᔭᒥᒃ ᐊᓯᐅᔪᖃᕐᓂᐊᓐᖏᓚᖅ. 19ᕿᓄᐃᓵᕐᓂᑦᓯᓐᓄᑦ ᑭᓯᐊᓂ ᐃᓕᑦᓯᓐᓂᒃ ᐱᐅᓕᔪᒫᕐᐳᓯ.”

ᔩᓱᓯᐅᑉ ᐅᖃᐅᓯᖃᕐᓂᖓ ᔨᕉᓴᓕᐅᑉ ᓯᖁᑦᑎᕐᑕᐅᔪᒫᕐᓂᖓᓂᒃ

ᒫᑎᐅᓯ 24:15-21; ᒫᑯᓯ 13:14-19

20“ᔨᕉᓴᓕᒻ ᑕᑯᒍᑦᓯᐅᒃ ᐅᓇᑕᕐᑐᒃᓴᓄᑦ ᐃᓗᒪᔭᐅᔪᖅ, ᖃᐅᔨᔪᒫᕐᐳᓯ ᑕᕝᕙ ᓯᖁᑦᑎᕐᑕᐅᕕᒃᓴᖓ ᖃᒡᓕᖕᒪᑦ. 21ᑕᕝᕙ ᑍᒤᓕᕐᐸᑦ ᔫᑎᐊᒥ ᓄᓇᖃᕐᑐᑦ ᖃᖅᑲᓄᑦ ᕿᒫᔭᕆᐊᖃᓕᕈᒫᕐᐳᑦ, ᐃᒡᓗᒐᓴᒡᔪᐊᓂᓗ ᓄᓇᖃᕐᑐᑦ ᐊᐅᓪᓚᕆᐊᖃᓕᕐᓗᑎᒃ, ᐃᒡᓗᒐᓴᒡᔪᐊᑦ ᐊᓯᐊᓂ ᓄᓇᖃᕐᑐᑦ ᐃᒡᓗᒐᓴᒡᔪᐊᓄᑦ ᐃᑎᕋᓱᐊᕐᑐᒃᓴᐅᓐᖏᓚᑦ. 22#ᕼᐆᓯᐊ 9:7.ᑖᒃᑯᐊ ᐅᓪᓗᐃᑦ ᓱᒋᐊᕐᑕᐅᕕᐅᖕᒪᑕ, ᐊᒡᓚᖕᓂ ᐅᖃᐅᓯᐅᓯᒪᔪᓕᒫᑦ ᓇᓚᐅᓯᖁᓪᓗᒋᑦ. 23ᐊᖏᔪᒥᒃ ᑲᑉᐱᐊᓇᕈᒫᕐᐳᖅ ᑖᒃᑯᓇᓂ ᐅᓪᓗᓂ ᐊᕐᓇᓄᑦ ᓄᑕᕋᒃᓴᖃᕐᑐᓄᑦ, ᓄᑕᕋᓛᖃᕐᑐᓄᓪᓗ! ᓄᓇᕐᔪᐊᕐᒥ ᑲᑉᐱᐊᓇᕐᑐᖃᕈᒫᕐᒪᑦ ᐊᖏᔪᒥᒃ ᒎᑎᐅᓪᓗ ᓂᓐᖓᐅᓯᖓ ᑎᑭᐅᑎᔪᒫᕐᒪᑦ ᐃᓄᖕᓄᑦ ᑖᒃᑯᓄᖓ. 24ᐃᓚᖏᑦ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ, ᐃᓚᖏᓪᓗ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ ᔫᑎᐅᓐᖏᑦᑐᓄᑦ; ᔨᕉᓴᓕᒻᓗ ᑐᓪᓕᕋᕐᓴᐅᔪᒫᕐᐳᖅ ᔫᑎᐅᓐᖏᑦᑐᓄᑦ, ᐱᕕᒃᓴᖓᑦ ᐃᓱᓕᓚᐅᖏᓐᓂᖓᓂ.”

ᐃᓅᑉ ᐃᕐᓂᖓᑕ ᑎᑭᓐᓂᒃᓴᖓ

ᒫᑎᐅᓯ 24:29-31; ᒫᑯᓯ 13:24-27

25 # ᐂᓮᐊᓯ 13:10; ᐃᓯᑭᐊᓕ 32:7; ᔪᐃᓕ 2:31; ᑕᑯᑎ 6:12,13. “ᑲᒪᓇᕐᑐᖃᕈᒫᕐᐳᖅ ᓯᕿᓂᕐᒥ ᑕᖅᑭᕐᒥᓗ ᐅᓪᓗᕆᐊᓂᓗ, ᓄᓇᕐᔪᐊᕐᒥᓗ ᐃᓅᖃᑎᒌᒡᔪᐊᓕᒫᑦ ᓇᓗᓕᕐᓇᕐᑐᒦᑦᓱᒫᕐᐳᑦ ᑲᑉᐱᐊᓱᒻᒪᕆᒡᓗᑎᒡᓗ ᐃᒪᕐᔪᐊᑉ ᐃᒃᑑᓕᔮᕐᓂᖓᓄᑦ ᐃᖏᐅᓕᐊᓗᖕᓄᓪᓗ. 26ᐃᓄᐃᑦ ᓄᑭᖃᕈᓐᓃᕈᒫᕐᐳᑦ ᑲᑉᐱᐊᓱᖕᓂᕐᒧᑦ ᐅᑕᖅᑭᓂᕐᒧᓪᓗ ᓄᓇᕐᔪᐊᕐᒧᑦ ᑎᑭᑉᐸᓪᓕᐊᔪᑦ ᐱᓪᓗᒋᑦ; ᕿᓚᐅᑉ ᐱᔪᓐᓇᕐᓂᖏᑦ ᐊᐅᓚᑕᐅᔪᒫᕐᒪᑕ. 27#ᑖᓂᐊᓕ 7:13; ᑕᑯᑎ 1:7.ᑕᕝᕙ ᐃᓅᑉ ᐃᕐᓂᖓ ᑕᑯᔪᒫᕐᐹᑦ ᓄᕗᔭᑎᒍᑦ ᕾᔪᖅ ᐱᔪᓐᓇᕐᓂᕐᔪᐊᖃᕐᑐᖅ ᓂᕐᑐᕐᓇᕐᓂᕐᔪᐊᖃᕐᓗᓂᓗ. 28ᑕᒪᒃᑯᐊ ᐱᕙᓪᓕᐊᓕᕐᐸᑕ, ᖁᒻᒧᑦ ᑕᑯᓴᓕᕆᑦᓯ, ᐱᐅᓕᔭᐅᕕᒃᓴᓯ ᖃᒡᓕᖕᒪᑦ.”

ᓇᐹᕐᑑᑉ ᐸᐅᕐᖓᓕᐅᑉ ᐃᓕᓐᓂᐊᕈᑎᒃᓴᐅᓂᖓ

ᒫᑎᐅᓯ 24:32-35; ᒫᑯᓯ 13:28-31

29ᔩᓱᓯᐅᑉ ᐊᑦᔨᐅᔪᒥᒃ ᐅᖃᐅᑎᕔᑦ, “ᓇᐹᕐᑐᖅ ᐸᐅᕐᖓᓕᒃ ᐃᓱᒪᒋᓕᕐᓯᐅᒃ, ᓇᐹᕐᑐᓕᒫᓪᓗ ᐊᓯᖏᑦ. 30ᐅᖃᐅᔭᖏᑦ ᐱᕈᓕᕐᐸᑕ, ᖃᐅᔨᒪᕙᒃᐳᓯ ᐊᐅᔭᓪᓚᕆᓐᖑᕐᓂᐊᕐᑐᖅ ᖃᓂᑦᑑᓕᕐᒪᑦ. 31ᑍᒫᒃᑕᐅᖅ, ᑕᒪᒃᑯᐊ ᐱᕙᓪᓕᐊᔪᑦ ᑕᑯᓕᕈᑦᓯᐅᒃ, ᖃᐅᔨᒪᑦᔪᑎᒋᓂᐊᕐᐸᓯ ᒎᑎᐅᑉ ᐊᑕᓂᐅᕕᖓᑕ ᖃᓂᑦᑑᓕᕐᓂᖓᓂᒃ.

32“ᓱᓕᔪᒥᒃ ᐅᖃᐅᑎᕙᑦᓯ, ᑕᒪᒃᑯᐊᓕᒫᑦ ᓇᓪᓕᐅᑎᔪᒫᕐᐳᑦ ᐃᓄᐃᑦ ᒫᓐᓇ ᐃᓅᔪᑦ ᑐᖁᔪᐃᓐᓇᐅᓚᐅᖅᑳᕐᑎᓐᓇᒋᑦ. 33ᕿᓚᒡᓗ ᓄᓇᓗ ᓄᖑᔪᒫᕐᐴᒃ, ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”

ᖃᐅᔨᓴᑦᓯᐊᕆᐊᖃᕐᓂᖅ

34“ᖃᐅᔨᓴᑦᓯᐊᕆᑦᓯ ᐃᓕᑦᓯᓐᓂᒃ ᐆᒻᒪᑎᑦᓯᒍᑦ ᐅᖁᒤᓕᑎᑕᐅᖁᓇᓯ ᓂᕆᓗᐊᕐᓂᕐᒧᑦ ᐃᒥᓗᐊᕐᓂᕐᒧᓪᓗ ᐃᓅᓯᕐᒧᓪᓗ ᐃᓱᒪᔮᓇᕐᑐᑕᖃᕐᓂᖓᓄᑦ, ᐅᓪᓗᒧᑦ ᑍᑦᓱᒧᖓ ᐅᐸᓗᐃᔭᐅᖁᓇᓯ ᓂᒐᕐᑎᑕᐅᔪᑎᑐᑦ. 35ᑕᒪᓐᓇ ᑎᑭᑦᓱᒫᕐᒪᑦ ᐃᓄᓕᒫᓄᑦ ᓄᓇᕐᔪᐊᕐᒦᑦᑐᓄᑦ. 36ᑍᒪᓐᖓᑦ ᖃᐅᔨᓴᑦᓮᓐᓇᕆᑦᓯ, ᑐᒃᓯᐊᖃᑦᑕᕐᓗᓯ ᐱᔪᓐᓇᕐᓂᖃᕐᑎᑕᐅᖁᓪᓗᓯ ᐊᓂᒍᐃᔪᓐᓇᖁᓪᓗᓯ ᑕᒪᒃᑯᐊ ᐱᔪᒫᕐᑐᑦ ᐊᑐᓕᕐᐸᑕ, ᓇᖏᕈᓐᓇᖁᓪᓗᓯᓗ ᐃᓅᑉ ᐃᕐᓂᖓᑕ ᓵᖓᓂ.”

37 # ᓘᑲᓯ 19:47. ᖃᐅᑕᒫᑦ ᔩᓱᓯ ᐊᔪᕆᕐᑐᐃᖃᑦᑕᕐᐳᖅ ᑐᒃᓯᐊᕐᕕᒡᔪᐊᕐᒥ, ᐅᓐᓄᒑᖓᓪᓕ ᐊᓂᕙᒃᓗᓂ ᐅᓐᓄᐊᓕᒫᖅ ᖃᖅᑲᒦᑉᐸᒃᓗᓂ ᓇᐹᕐᑐᓕᖕᒥ ᐸᐅᕐᖓᖃᕐᐸᒃᑐᓂᒃ ᐅᕐᓱᒃᓴᐅᔪᓐᓇᕐᑐᓂᒃ. 38ᖃᐅᑕᒫᑦ ᐅᓪᓛᕌᕐᔪᒃᑯᑦ ᐃᓄᓕᒫᑦ ᑐᒃᓯᐊᕐᕕᒡᔪᐊᕐᒧᐊᖃᑦᑕᕐᐳᑦ ᑐᓵᔭᕐᑐᕐᓗᑎᒃ ᑖᑦᓱᒥᖓ.

Currently Selected:

ᓘᑲᓯᐅᑉ ᐊᒡᓚᖏᑦ 21: EAIB

Highlight

Copy