ᓘᑲᓯᐅᑉ ᐊᒡᓚᖏᑦ 19

ᔩᓱᓯᓗ ᓴᑭᐊᓯᓗ

1ᔩᓱᓯ ᔨᕆᑰᒧᑦ ᑎᑭᓐᓇᒥ ᐊᖅᑯᓵᑐᐃᓐᓇᕐᐹ. 2ᑕᕝᕙᓂ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖓᑦᑕ ᐊᖓᔪᖅᑳᖓᑦ ᑕᕝᕙᓃᑉᐳᖅ, ᓴᑭᐊᓯᒥᒃ ᐊᑎᓕᒃ, ᑖᓐᓇ ᐊᔪᕐᓴᕐᖏᑦᑑᕗᖅ. 3ᑖᑦᓱᒪ ᔩᓱᓯ ᑕᑯᓇᓱᐊᕐᐹ ᖃᓄᐃᑦᑑᖕᒪᖔᑦ, ᐃᓄᒋᐊᒃᑐᓄᓪᓕ ᑕᑯᔪᓐᓇᓐᖏᓚᖅ ᒥᑭᔫᒐᒥ. 4ᑕᕝᕙ ᓯᕗᓂᖓᓐᓄᑦ ᐅᓪᓚᒃᐳᖅ ᓇᐹᕐᑐᒧᑦ ᓯᑲᒧᐊᒥᒃ ᑍᔭᐅᔪᒧᑦ ᒪᔪᕋᕐᐳᖅ ᔩᓱᓯᒥᒃ ᑕᑯᑦᑎᐊᕈᒪᑦᓗᓂ, ᑕᒪᐅᓇ ᐊᖅᑯᓵᕐᓂᐊᕐᒪᑦ. 5ᔩᓱᓯ ᑕᕝᕗᓐᖓᕋᒥ, ᖁᒻᒧᑦ ᑕᑯᓴᕐᐳᖅ ᐅᖃᐅᑎᓪᓗᒍ, “ᓴᑭᐊᓰ ᑐᐊᕕᕐᓗᑎᑦ ᐊᖅᑲᕆᑦ; ᐅᓪᓗᒥ ᐃᒡᓗᖕᓃᒋᐊᖃᕋᒪ.”

6ᓴᑭᐊᓯ ᑐᐊᕕᕐᓗᓂ ᐊᖅᑲᕐᐳᖅ, ᔩᓱᓯ ᖁᕕᐊᓱᒡᓗᓂ ᐃᒡᓗᒥᓄᑦ ᑐᓐᖓᓱᒃᑎᑉᐹ. 7ᐃᓄᐃᑦ ᑕᑯᒐᒥᒃ ᐅᖃᒪᔭᐅᑎᒋᓕᕐᐹᑦ ᐅᖃᕐᓗᑎᒃ, “ᐅᓇ ᐊᖑᑦ ᐊᔪᕐᑐᓕᔫᑉ ᐃᒡᓗᖓᓄᑦ ᑐᔪᕐᒥᔭᕐᑐᕐᑐᖅ!”

8ᓴᑭᐊᓯ ᓂᑯᕕᓪᓗᓂ ᐊᑕᓂᕐᒧᑦ ᐅᖃᕐᐳᖅ, “ᑕᑯᒋᑦ ᐊᑕᓃᖅ, ᐱᖁᑎᒪ ᐊᕝᕙᖏᑦ#19:8 ᓇᑉᐸᖏᑦ ᑐᓂᓂᐊᕐᐸᒃᑲ ᐊᒃᖢᔪᓄᑦ; ᓴᒡᓗᕿᑦᓯᓯᒪᓐᓂᕈᒪᓗ ᓇᓪᓕᐊᓐᓂᑐᐃᓐᓇᖅ ᐅᑎᕐᑎᑦᓯᕕᒋᓂᐊᕐᐸᕋ ᓯᑕᒤᕐᓱᓪᓗᐊᕐᑐᒥᒃ.”#19:8 ᓯᑕᒪᕕᓪᓗᐊᕐᑐᒥᒃ

9ᔩᓱᓯᐅᑉ ᐅᖃᐅᑎᕙ, “ᐅᓪᓗᒥ ᐱᐅᓕᔭᐅᓂᖅ ᐃᒡᓗᒧᑦ ᐅᕗᖓ ᑎᑭᑉᐳᖅ, ᐅᓇᑦᑕᐅᖅ ᐂᑉᕋᕼᐋᒻ ᑭᖑᕚᕆᖕᒪᒍ. 10#ᒫᑎᐅᓯ 18:11.ᐃᓅᑉ ᐃᕐᓂᖓ ᑎᑭᓯᒪᖕᒪᑦ ᐊᓯᐅᓯᒪᔪᑦ ᕿᓂᕆᐊᕐᓗᒋᑦ ᐱᐅᓕᔭᕐᑐᕐᓗᒋᓪᓗ.”

ᐊᑦᔨᐅᔪᖅ ᑮᓇᐅᔧᑦ ᒎᓗᐃᑦ

ᒫᑎᐅᓯ 25:14-30

11ᐃᓄᐃᑦ ᑕᒪᑐᒥᖓ ᓈᓚᒃᑎᓪᓗᒋᑦ, ᔩᓱᓯᐅᑉ ᐅᓂᒃᑲᐅᑎᕔᑦ ᐊᑦᔨᐅᔪᒥᒃ, ᔨᕉᓴᓕᒻᒧᑦ ᖃᒡᓕᒐᒥᒃ, ᐃᓄᐃᑦ ᐃᓱᒪᖕᒪᑕ ᒎᑎᐅᑉ ᐊᑕᓂᐅᕕᖓ ᒫᓐᓇᒃᑯᑦ ᓴᖅᑭᑦᓴᐅᑎᒋᓂᐊᕋᓱᒋᓕᕐᓗᒍ. 12ᑍᒤᒻᒪᑦ ᐅᖃᕐᐳᖅ, “ᐊᖑᑎᑕᖃᓚᐅᕐᐳᖅ ᐊᖓᔪᖅᑳᒥᒃ ᓄᓇᒧᑦ ᐅᖓᓯᒃᑐᒧᑦ ᐊᐅᓪᓚᓚᐅᕐᑐᒥ ᐊᖓᔪᖅᑳᕐᔪᐊᓐᖑᕐᑎᑕᐅᔭᕐᑐᕐᓗᓂ ᐱᔭᕇᕈᓂ ᐊᖏᕐᕋᒥᓄᑦ ᐅᑎᓛᕐᓗᓂ. 13ᐊᐅᓪᓚᓚᐅᖏᓐᓂᕐᒥᓂ ᐱᔨᓂ ᖁᓕᑦ ᕾᖁᕔᑦ, ᑮᓇᐅᔭᒥᒃ ᒎᓗᒥ ᐊᑕᐅᓯᕐᒥᒃ ᐊᑐᓂᑦ ᑐᓂᓯᕕᒋᕔᑦ ᐅᖃᐅᑎᓪᓗᒋᑦ, ‘ᐅᑯᐊ ᓂᐅᕐᕈᑎᒋᓯᐅᒃ ᑮᓇᐅᔭᕐᑖᒃᑲᓐᓂᕈᑎᒋᓇᓱᐊᕐᓗᒋᑦ ᐅᑎᓚᐅᖏᓐᓂᓐᓂ.’ 14ᓄᓇᖃᑎᖏᑕ ᑖᓐᓇ ᐊᖓᔪᖅᑳᖅ ᐆᒥᒋᒐᒥᑦᔪᒃ, ᑎᓕᓯᕗᑦ ᐅᖃᕆᐊᕐᑐᕐᑐᓂᒃ, ‘ᐅᓇ ᐊᖓᔪᖅᑳᕐᔪᐊᕐᑖᕆᔪᒪᓐᖏᑕᕗᑦ.’

15“ᑖᓐᓇ ᐊᖓᔪᖅᑳᕐᔪᐊᓐᖑᕐᑎᑕᐅᒐᒥ ᐊᖏᕐᕋᒥᓄᑦ ᐅᑎᕐᐳᖅ. ᐱᔨᓂ ᑮᓇᐅᔭᓂᒃ ᐂᑦᑐᓚᐅᕐᑕᓂ ᕾᖁᕔᑦ, ᖃᐅᔨᔪᒪᓪᓗᓂ ᖃᑦᓯᓂᒃ ᐃᓚᒃᑲᓐᓂᕐᓂᕐᒪᖔᑦᔪᒃ. 16ᓯᕗᓪᓕᕐᐹᖅ ᕾᒐᒥ ᐅᖃᕐᐳᖅ, ‘ᐊᖓᔪᖅᑳᒃ, ᑮᓇᐅᔧᑦ ᐊᑕᐅᓯᖅ ᕾᓚᐅᕐᑍᑦ, ᖁᓕᓂᒃ ᐃᓚᒃᑲᓐᓂᓚᐅᕐᐳᖅ.’ 17ᐊᖓᔪᖅᑳᖓᑕ ᐅᖃᐅᑎᕚ, ‘ᐱᓇᓱᐊᑦᓯᐊᕐᑐᑎᑦ, ᐱᔨᑦᓯᐊᕙᐅᓪᓗᑎᑦ! ᑲᒪᑦᓯᐊᓚᐅᕋᕕᑦ ᒥᑭᔪᓂᒃ, ᐊᖓᔪᖅᑳᖑᓂᐊᓕᕐᐳᑎᑦ ᓄᓇᓕᖕᓄᑦ ᖁᓕᓄᑦ.’ 18ᐂᑉᐸᖓ ᕾᒋᕗᖅ, ᐅᖃᕐᓗᓂ ‘ᐊᖓᔪᖅᑳᒃ, ᑮᓇᐅᔧᑦ ᐊᑕᐅᓯᖅ ᕾᓚᐅᕐᑍᑦ ᑕᓪᓕᒪᓂᒃ ᐃᓚᒃᑲᓐᓂᓚᐅᕐᐳᖅ!’ 19ᐊᖓᔪᖅᑳᖓᑕ ᐅᖃᐅᑎᕚ, ‘ᐃᕝᕕᑦᑕᐅᖅ ᐊᐅᓚᑦᓯᔨᐅᓂᐊᓕᕐᐳᑎᑦ ᓄᓇᓕᖕᓄᑦ ᑕᓪᓕᒪᓄᑦ.’ 20ᓱᓕ ᐱᔨᖓᑕ ᐃᓚᖓᑦ ᕾᒋᕗᖅ ᐅᖃᕐᓗᓂ, ‘ᐊᖓᔪᖅᑳᒃ ᐅᕝᕙᐅᓇ ᑮᓇᐅᔧᑦ ᑲᒃᑭᐅᑎᒃᓴᔭᒧᑦ ᐃᒻᒧᓯᓚᐅᕐᑕᕋ ᐃᔨᕐᓯᒪᓪᓗᒍ. 21ᐃᓕᖕᓂᒃ ᐃᓕᕋᓱᓚᐅᕋᒪ, ᓂᑲᒍᓱᖃᖏᓐᓇᕕᑦ; ᐃᓕᓚᐅᓐᖏᑕᕐᓂᒃ ᑎᒍᓯᓲᖑᒐᕕᑦ, ᑲᓐᖓᕐᓱᓚᐅᖏᑕᑎᓪᓗ ᑲᑎᕐᓱᕐᐸᑎᑦ.’ 22ᐊᖓᔪᖅᑳᖓᑕ ᑭᐅᕚ, ‘ᐃᖅᑲᕐᑐᕐᓂᐊᕐᐸᒋᑦ ᐅᖃᐅᓯᕐᑎᑦ ᒪᓕᒡᓗᒋᑦ, ᐱᔨᑦᓯᐊᕙᐅᖏᑦᑐᑎᑦ! ᖃᐅᔨᒪᒐᕕᑦ ᓂᑲᒍᓱᖃᖏᑦᑐᖓ, ᐃᓕᓚᐅᖏᑕᒃᑲᓗ ᑎᒍᒐᒃᑭᑦ, ᑲᓐᖓᕐᓲᑎᒋᓚᐅᓐᖏᑕᒃᑲᓗ ᑲᑎᕐᓱᕋᒃᑭᑦ. 23ᓱᖕᒪᓪᓕ ᑮᓇᐅᔭᕋ ᑮᓇᐅᔭᒃᑯᕕᖕᒧᐊᓚᐅᖏᑉᐱᐅᒃ? ᐅᑎᕈᒪ ᐃᓚᒃᑲᓐᓂᕐᓯᒪᓕᕐᑎᓪᓗᒍ ᐱᒐᔭᓚᐅᕐᐸᕋ.’ 24ᑕᕝᕙᓃᑦᑐᑦ ᐅᖃᐅᑎᕔᑦ, ‘ᑮᓇᐅᔭᖅ ᒎᓗ ᑖᑦᓱᒪᖓᑦ ᑎᒍᓯᐅᒃ, ᑐᓂᓗᒍ ᖁᓕᓂᒃ ᑮᓇᐅᔭᓕᖕᒧᑦ.’ 25ᑖᒃᑯᐊ ᐅᖃᐅᑎᕚᑦ, ‘ᐊᖓᔪᖅᑳᖅ, ᑖᓐᓇ ᖁᓕᓂᒃ ᑮᓇᐅᔭᖃᓕᕇᕐᐳᖅ!’ 26#ᒫᑎᐅᓯ 13:12; ᒫᑯᓯ 4:25; ᓘᑲᓯ 8:18.ᑖᑦᓱᒪ ᑭᐅᕔᑦ, ‘ᐅᖃᐅᑎᕙᑦᓯ, ᐱᖃᕐᑐᓕᒫᑦ ᑐᓂᓯᕕᐅᒃᑲᓐᓂᕐᓂᐊᕐᐳᑦ; ᐱᖃᖏᑦᑐᓪᓕ ᒥᑭᔪᒥᒃ ᐱᖃᕋᓗᐊᕐᐸᑕ ᐊᕐᓵᕐᑕᐅᓂᐊᕐᐳᑦ. 27#ᒫᑎᐅᓯ 25:14-30.ᑍᒃᑯᐊ ᐅᕙᓐᓂᒃ ᐊᑭᕋᕐᑐᕐᑐᑦ, ᐅᕙᓐᓂᒃ ᐊᖓᔪᖅᑳᕐᔪᐊᖑᖁᔨᖏᑦᑐᑦ, ᕾᑎᓯᐅᒃ ᑕᑯᓐᓇᕐᑎᓪᓗᖓ ᑐᖁᓪᓗᒋᑦ.’”

ᔩᓱᓯᐅᑉ ᔨᕉᓴᓕᒻᒧᐊᕐᓂᖓ ᑭᖑᓪᓕᕐᐹᒥᒃ

ᒫᑎᐅᓯ 21:1-11; ᒫᑯᓯ 11:1-11; ᔪᐊᓇᓯ 12:12-19

28ᔩᓱᓯ ᑍᒫᒃ ᐅᖃᕇᕋᒥ, ᓯᕗᓪᓕᕐᐸᐅᓪᓗᓂ ᔨᕉᓴᓕᒻᒧᑦ ᐂᓕᕐᐳᖅ. 29ᐱᑦᐰᒋ ᐱᑕᓂᓗ ᖃᒡᓕᒐᒥᒋᒃ, ᖃᖅᑲᖅ ᓇᐹᕐᑐᓕᒃ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᖅ ᑎᑭᓐᓇᒥᐅᒃ, ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ ᑎᓕᓯᕗᖅ, 30ᐅᖃᐅᑎᓪᓗᒋᒃ, “ᓯᕗᓂᑦᑎᓐᓃᑦᑐᓄᑦ ᓄᓇᓕᖕᓄᑦ ᐂᒋᑦᓯᒃ, ᑍᑯᓐᖓᕈᑦᓯᒃ ᑕᑯᓂᐊᕐᐳᓯᒃ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐱᑐᒃᓯᒪᔪᒥᒃ, ᓱᓕ ᐃᑭᒪᕕᐅᓚᐅᕐᓯᒪᖏᑦᑐᒥᒃ; ᑖᓐᓇ ᐱᑐᐃᑦᔮᕐᓗᒍ ᕾᑦᔪᑎᓯᒃᑯᒃ. 31ᐊᐱᕆᔭᐅᒍᑦᓯᒃ ‘ᓱᖕᒪᑦ ᐱᑐᐃᑦᔮᕐᐱᓯᐅᒃ?’ ᑭᐅᓂᐊᕐᐳᓯᒃ, ‘ᐊᑕᓂᐅᑉ ᐊᑐᕈᒪᖕᒪᒍ.’”

32ᑎᓕᔭᐅᔪᒃ ᑍᑯᓐᖓᕋᒥᒃ ᔩᓱᓯᐅᑉ ᐅᖃᐅᓯᕆᖅᑲᐅᔭᖏᑦ ᑍᒫᑦᓯᐊᖅ ᓇᓚᐅᑦᓯᕗᑦ. 33ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐲᕐᓯᓇᓱᓕᕐᑎᓪᓗᒋᒃ, ᐃᓄᐊᑕ ᐊᐱᕆᕚᒃ, “ᓱᖕᒪᓄᓇ ᐱᑐᐃᑦᔮᕋᓱᐊᕐᐱᓯᐅᒃ?”

34ᑖᒃᑯᐊᒃ ᑭᐅᕘᒃ, “ᐊᑕᓂᐅᑉ ᐊᑐᕈᒪᖕᒪᒍ.” 35ᓯᐅᑎᖅᑯᕐᑐᔫᑉ ᓄᕐᕋᖓ ᔩᓱᓯᒧᐊᕈᑎᕚᒃ, ᐊᓐᓄᕌᑎᒃ ᓯᐅᑎᖅᑯᑐᔫᑉ ᓄᕐᕋᖓᑕ ᖄᖓᓄᑦ ᐃᓕᕔᑦ, ᔩᓱᓯ ᐃᑭᑎᑉᐹᑦ. 36ᔩᓱᓯᓗ ᐃᑭᒪᓪᓗᓂ ᐃᖏᕐᕋᓕᕐᑎᓪᓗᒍ, ᐃᓄᐃᑦ ᐊᓐᓄᕌᑎᒃ ᐊᖅᑯᑎᒋᓂᐊᕐᑕᖓᓄᑦ ᐃᓯᕕᑎᕐᐰᑦ.

37ᔨᕉᓴᓕᒻᒧᑦ ᖃᒡᓕᒐᒥᒃ, ᖃᖅᑲᖅ ᓇᐹᕐᑐᓕᒃ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᑉ ᐊᖅᑯᑖᓄᐊᕐᐳᑦ, ᒪᓕᒃᑎᖏᑦ ᐅᓄᕐᑐᐊᓗᐃᑦ ᖁᕕᐊᓱᕐᒪᕆᓕᕐᐳᑦ ᒎᑎ ᓂᕐᑐᕐᐹᑦ ᓂᐱᖅᑯᕐᑐᓪᓗᑎᒃ; ᔩᓱᓯᐅᑉ ᑲᒪᓇᕐᑐᓕᓂᖏᑦ ᑕᑯᓯᒪᔭᑎᒃ ᐱᑦᔪᑎᒋᓪᓗᒋᑦ. 38#ᐃᓐᖏᕈᑦ 118:26.ᐅᖃᕐᓗᑎᒃ, “ᒎᑎᐅᑉ ᓮᒻᒪᕐᓕᐅᒃ, ᐊᖓᔪᖅᑳᕐᔪᐊᖅ ᐊᑕᓂᐅᑉ ᐊᑎᖓᓂ ᑎᑭᑦᑐᖅ! ᕿᓚᖕᒥ ᖁᕕᐊᓇᕐᑐᖃᕐᓕ ᖁᑦᓯᖕᓂᕐᐹᖑᔪᕐᓗ ᓂᕐᑐᕐᑕᐅᓕ!” 39ᐹᕆᓯᓪᓕ ᐃᓚᖏᑦ ᐃᓄᒋᐊᒃᑐᑦ ᐊᑯᕐᖓᓐᓃᑦᑐᑦ ᔩᓱᓯᒧᑦ ᐅᖃᕐᐳᑦ, “ᐊᔪᕆᕐᑐᐃᔩ, ᐃᓕᓐᓂᐊᕐᑎᑎᑦ ᓂᐸᖏᖁᓚᐅᒃᑭᑦ.”

40ᔩᓱᓯᐅᑉ ᑭᐅᕔᑦ, “ᐅᖃᐅᑎᕙᑦᓯ, ᑖᒃᑯᐊ ᓂᐸᖏᕋᓗᐊᕐᐸᑕ, ᒪᒃᑯᐊ ᐅᔭᕅᑦ ᕾᒐᓛᓕᕐᓂᐊᕐᐳᑦ.”

ᔩᓱᓯᐅᑉ ᖁᕝᕕᐅᕈᑎᖃᕐᓂᖓ ᔨᕉᓴᓕᒻᒥᒃ

41ᔨᕉᓴᓕᒻ ᖃᒡᓕᓪᓗᒍ ᑕᑯᓐᓇᓕᕋᒥᐅᒃ ᖁᕝᕕᐅᕈᑎᒋᕚ, 42ᐅᖃᕐᓗᓂ, “ᖃᐅᔨᓚᐅᕐᓯᐅᒃᑐᖅ ᐊᑭᕋᕐᑑᑎᖏᑦᔪᑎᒃᓴᖅ! ᒫᓐᓇᓕ ᑭᓯᐊᓂ ᑐᑭᓯᔪᓐᓇᓐᖏᓚᓯ! 43ᐅᓪᓗᖅ ᓇᓪᓕᐅᑎᔪᒫᕐᐳᖅ, ᐊᑭᕋᕐᑐᕐᑎᑦᓯᓐᓂᑦ ᐃᓗᒪᔭᐅᕕᒃᓴᓯ ᐊᕙᑎᓕᒫᑦᓯᓐᓂᑦ, ᐃᓗᔭᐅᓗᓯ ᑎᑭᑕᐅᔪᒫᕐᕕᒃᓴᓯ. 44ᐊᓯᕈᕐᑕᐅᔪᒫᕐᐳᓯ ᐊᕙᓗᕐᔪᐊᑦ ᐃᓗᐊᓃᑦᑐᓕᒫᑦ ᓄᖑᑕᐅᓗᓯ ᕿᑐᕐᖓᓕᒫᓯᓗ, ᐅᔭᕅᓪᓗ ᓴᓇᓯᒪᔪᑦ ᐊᑕᐅᓯᕐᒥᒡᓘᓐᓃᑦ ᖃᓕᕇᒃᑐᖃᕈᓐᓃᕈᒫᕐᐳᑦ; ᒎᑎᐅᑉ ᓴᐳᑦᔨᔭᕐᑐᕐᓂᖓ ᐃᓕᑦᓯᓐᓂᒃ ᑲᒪᒋᓚᐅᖏᓐᓇᑦᓯᐅᒃ.”

ᔩᓱᓯᐅᑉ ᑐᒃᓯᐊᕐᕕᒡᔪᐊᒧᐊᕐᓂᖓ

ᒫᑎᐅᓯ 21:12-17; ᒫᑯᓯ 11:15-19; ᔪᐊᓇᓯ 2:13-22

45ᔩᓱᓯ ᑐᒃᓯᐊᕐᕕᒡᔪᐊᕐᒧᐊᕋᒥ ᓂᐅᕕᕐᑎᑦᓯᔪᑦ ᑕᕝᕙᓃᑦᑐᑦ ᐊᓂᑎᓕᕐᐰᑦ; 46#ᐂᓮᐊᓯ 56:7; ᔨᕆᒤᐊ 7:11.ᐅᖃᐅᑎᓪᓗᒋᑦ, “ᑎᑎᕋᕐᓯᒪᕗᖅ, ‘ᐃᒡᓗᒐ ᑐᒃᓯᐊᕐᕕᐅᔪᒫᕐᐳᖅ’; ᐃᓕᑦᓯᓕ ᑎᒡᓕᒃᑎᓄᑦ ᐃᓂᒋᔭᐅᑎᓕᕐᐸᓯ.”

47 # ᓘᑲᓯ 21:37. ᖃᐅᑕᒫᑦ ᔩᓱᓯ ᐊᔪᕆᕐᑐᐃᖃᑦᑕᕐᐳᖅ ᑐᒃᓯᐊᕐᕕᒡᔪᐊᕐᒥ. ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᐃᓄᐃᓪᓗ ᐊᐅᓚᑦᓯᔨᖏᑕ ᑐᖁᑦᓱᒪᒐᓗᐊᕐᐹᑦ; 48ᑐᖁᑦᑎᕕᒋᒐᔭᕐᑕᒥᖕᓂᓕ ᓇᓂᓯᔪᓐᓇᓚᐅᓐᖏᓚᑦ, ᐃᓄᖕᓄᑦ ᐱᕕᒃᓴᖃᕐᑎᑕᐅᓚᐅᖏᓐᓇᒥᒃ, ᐃᓄᐃᑦ ᑐᓵᔪᒪᕕᒃᔪᐊᓚᐅᕐᒪᑕ ᐅᖃᐅᓯᕆᔭᖏᒃᓂᒃ.

Currently Selected:

ᓘᑲᓯᐅᑉ ᐊᒡᓚᖏᑦ 19: EAIB

Highlight

Copy