ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 5
5
ᑐᒃᓯᐊᕐᖕᓂᖅ ᓂᑲᒋᔭᐅᔪᒪᓂᕐᖕᒧᑦ
1ᐊᑕᓃᖅ ᐃᖅᑲᐅᒪᓚᐅᒃᑭᑦ ᖃᓄᐃᑕᐅᓂᕆᓯᒪᔭᕗᑦ,
ᐅᑦᔨᕆᓚᐅᖅᑎᒍᑦ ᓇᕐᕈᓇᕐᖕᓂᕗᑦ ᑕᑯᓗᒍ.
2ᑭᖑᕐᖑᑎᔭᕗᑦ ᑕᑯᓕᒪᓇᖏᑦᑐᓄᑦ ᐱᓯᒪᔭᐅᓕᕐᖕᒪᑕ,
ᐊᖏᕐᕋᕆᓚᐅᖅᑕᕗᓪᓗ ᐃᓂᒋᔭᐅᓕᖅᓗᑎᒃ ᑕᑯᓕᒪᓇᖏᑦᑐᓄᑦ.
3ᐃᓕᐊᕐᔫᓕᖅᐳᒍᑦ ᐊᑖᑕᖃᕈᓐᓃᖅᐳᒍᑦ ᐊᓈᓇᕗᑦ ᐅᐃᒡᒐᕐᖕᓂᐅᓕᖅᐳᑦ.
4ᐃᒥᖅᑖᖅᐸᓕᖅᐳᒍᑦ ᐊᑭᓖᓪᓗᑕ,
ᓂᐅᕕᖅᓗᑕᓗ ᑭᓯᐊᓂ ᕿᔪᒃᓴᖃᕈᓐᓇᓕᖅᓗᑕ.
5ᖁᖓᓯᑦᑎᒍᑦ ᓇᖕᒪᐅᓯᖅᓗᑕ ᐊᐅᓚᑉᐹᑎᒍᑦ,
ᐱᓇᓱᐊᕋᓗᐊᕋᑦᑕ ᑕᕾᖅᓯᕐᕕᖃᓐᖏᓚᒍᑦ.
6ᐄᑦᔨᑉᑎᒥᐅᓂᒃ ᐊᓯᕆᐊᒥᐅᓂᒡᓗ ᐊᖏᖃᑎᖃᖅᓯᒪᕗᒍᑦ,
ᓂᕿᓂᒃ ᓈᒻᒪᑐᐃᓐᓇᖅᑐᓂᒃ ᐱᔪᓐᓇᕈᒪᓪᓗᑕ.
7ᓯᕗᓕᕗᑦ ᐊᔪᖅᑐᓕᓚᐅᕐᖕᒪᑕ, ᐱᑕᖃᕈᓐᓃᖅᐳᑦ,
ᐊᔪᖅᑐᓕᓂᖏᓪᓕ ᐊᒃᓱᕈᕐᖕᓇᖅᑐᒦᑦᔪᑎᒋᕙᕗᑦ.
8ᐊᐅᓚᑕᐅᕗᒍᑦ ᓯᐊᓛᓂᑦ ᐱᐅᓂᖅᓴᐅᖏᑦᑐᓂᑦ,
ᑖᒃᑯᐊᓗ ᐊᐅᓚᑦᓯᓂᖓᓐᓂᑦ ᓴᐳᑦᔨᔨᒃᓴᖃᕋᑕ.
9ᑐᖁᕅᔩᑦ ᓇᓂᑐᐃᓐᓈᓕᕐᖕᒪᑕ,
ᑐᖁᑕᐅᑐᐃᓐᓇᕆᐊᖃᖅᓗᑕ ᓂᕿᒃᓴᖅᓯᐅᕋᓱᐊᖅᐸᒃᐳᒍᑦ.
10ᑳᓗᐊᕐᖕᓂᑯᒧᑦ ᐆᑎᕐᖕᓇᖅᓯᖃᑦᑕᖅᐳᒍᑦ ᐅᕕᓂᕗᑦ ᐆᑎᕐᖕᓇᕐᖕᓂᑯᒧᑦ
ᐃᒐᕕᒃᑎᑐᑦ ᐆᓇᖅᑎᒋᕙᒃᐳᑦ.
11ᓄᓕᐊᕗᑦ ᖁᓄᔪᕐᖕᓂᐊᖅᑕᐅᖃᑦᑕᖅᓯᒪᕗᑦ ᓮᐅᓂᒥ,
ᐅᐃᒡᒐᓱᐃᓪᓗ ᔫᑕᐅᑉ ᓄᓇᓕᖁᑎᖏᓐᓃᑦᑐᑦ.
12ᐊᖓᔪᖅᑳᕐᔪᐊᓪᓗ ᐃᕐᖕᓂᖏᑦ ᓂᕕᓐᖓᖅᑕᐅᖃᑦᑕᖅᐳᑦ ᐊᒡᒊᓐᓇᖏᑎᒍᑦ,
ᐃᓄᑐᖃᕆᔭᕗᓪᓗ ᐅᐱᒋᔭᐅᓂᖃᓐᖏᓚᑦ.
13ᐃᓅᓱᒃᑐᖁᑎᕗᓪᓗ ᓯᖃᓪᓕᓯᕕᖕᒥ ᓂᐊᖂᔭᒃᓴᓂᒃ ᓯᐊᓛᕆᔭᐅᑐᐃᓐᓇᖅᐳᑦ;
ᓄᑲᑉᐱᐊᓪᓗ ᕿᔪᒃᓴᓂᒃ ᐊᒡᔭᖅᑐᖅᑎᐅᔪᑦ ᐅᖁᒤᒃᓴᖅᑎᑕᐅᓗᐊᕐᖕᓂᕐᖕᒧᑦ
ᐅᕐᕈᔮᖅᓗᑎᒃ ᐊᒡᔭᖅᑐᖃᑦᑕᖅᐳᑦ.
14ᐃᓄᑐᖃᐅᔪᑦ ᐃᑎᖅᑕᕐᕕᖕᓂᒃ ᑲᑎᒪᖃᑦᑕᕐᕕᖕᒥᖕᓂᒃ ᕿᒤᕗᑦ,
ᐃᓅᓱᒃᑐᓪᓗ ᐃᓐᖏᖃᑦᑕᖅᑐᑦ ᑐᓴᖅᓴᐅᔪᓐᓃᖅᓗᑎᒃ.
15ᐆᒻᒪᑎᑦᑕ ᖁᕕᐊᓱᖕᓂᖏᑦ ᓄᖅᑲᖅᐳᑦ,
ᑖᓂᓯᕐᖕᓂᕗᑦ ᒧᒥᒃᐳᖅ ᕿᒃᓵᖕᓂᕐᖕᒧᑦ.
16ᓂᐊᖂᑏᑦ ᓂᐊᖁᑦᑎᓐᓂᑦ ᑲᑕᒃᓯᒪᕗᑦ,
ᑲᑉᐱᐊᓐᓇᒦᒃ ᐊᔪᖅᑐᓕᓚᐅᕋᑦᑕ!
17ᑍᒤᒻᒪᑦ ᐆᒻᒪᑎᕗᑦ ᖃᓂᒪᕗᑦ,
ᐃᔨᕗᓪᓗ ᑕᐅᑐᑦᓯᐊᕈᓐᓃᖅᓗᑎᒃ.
18ᓮᐅᓂ ᓱᓇᖃᕈᓐᓃᕐᖕᒪᑦ ᐃᑭᐊᓐᖑᓇᖅᓯᕗᖅ,
ᐊᒪᕈᖓᔪᓄᑦ ᓇᔪᒐᑐᐃᓐᓇᐅᓕᕐᖕᒪᑦ.
19ᐊᑕᓃᕐᓕ ᐊᖓᔪᖅᑳᕐᔪᐊᖑᓃᑦ ᐃᓱᖃᖏᑦᑑᕗᖅ,
ᐊᐅᓚᑦᓯᓂᕾᓐᓇᕐᖕᓂᐊᖅᓗᑎᓪᓗ ᑭᖑᕚᕇᓂᑦ ᑭᖑᕚᕇᓄᑦ.
20ᓱᖕᒪᑦ ᐳᐃᒍᖅᐱᑎᒍᑦ ᐃᓱᖃᖏᑦᑐᒧᑦ?
ᐊᓚᐅᒪᓪᓗᑕᓗ ᐊᑯᓂᐊᓗᒃ?
21ᐊᑕᓃᖅ ᐃᓕᖕᓄᑦ ᐅᑎᖅᑎᓚᐅᖅᑎᒍᑦ ᐋᖅᑭᒃᑕᐅᖁᓪᓗᑕ,
ᐅᓪᓗᕗᑦ ᓄᑖᓐᖑᖅᑎᒃᑭᑦ ᑍᑦᓱᒪᓂᐅᓚᐅᖅᑐᑎᑐᑦ.
22ᐅᕝᕙᓗ ᑖᕗᖓᓕᒫᖅ ᓇᕐᕈᒋᓕᖅᐱᑎᒎᑦ?
ᓂᓐᖓᐅᒪᕕᒋᕕᑎᒎᑦ ᐋᖅᑭᒐᒃᓴᐅᖏᑦᑐᒥᒃ?
Currently Selected:
ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.