ᔪᐊᓇᓯᐅᑉ ᐊᒡᓚᖏᑦ 19
19
1ᑕᕝᕙ ᐰᓛᑑᓯᐅᑉ ᔩᓱᓯ ᑎᒍᔭᐅᖁᕚ, ᑏᒐᕐᑐᕐᑕᐅᖁᓪᓗᒍᓗ. 2ᐅᓇᑕᕐᑐᒃᓮᑦ ᓂᐊᖂᑎᒃᓴᓕᐅᕐᐳᑦ ᑲᑭᓪᓚᐅᑎᓕᖕᓂᒃ ᐅᕐᐱᐅᔮᕐᑐᓂᒃ ᐱᕐᕅᓪᓗᑎᒃ, ᔩᓱᓯᐅᓪᓗ ᓂᐊᖁᐊᓄᑦ ᐃᓕᕚᑦ, ᐊᓐᓄᕌᒥᒡᓗ ᐊᐅᐸᓪᓚᕆᒃᑐᒥᒃ ᐊᑎᑎᓪᓗᒍ; 3ᐅᐸᒡᓗᒍᓗ ᐅᖃᐅᑎᕚᑦ, “ᓂᕐᑐᕐᑕᐅᓕ, ᔫᑎᑦ ᐊᖓᔪᖅᑳᕐᔪᐊᖓᑦ!” ᑮᓇᖓᒍᓪᓗ ᐸᑎᒃᐹᑦ.
4ᐰᓛᑑᓯ ᐊᓂᖕᒥᒐᒥ, ᐃᓄᒐᓴᒡᔪᐊᓄᑦ ᐅᖃᕐᐳᖅ, “ᑕᑯᒋᑦ, ᐅᓇ ᐊᓂᑎᑉᐸᕋ, ᑕᑯᖁᓪᓗᓯ ᑖᑦᓱᒪ ᓱᒋᐊᕐᑕᐅᑦᔪᑎᒃᓴᖓᓂᒃ ᓇᓂᓯᖏᓐᓇᒪ.” 5ᑕᕝᕙ ᔩᓱᓯ ᐊᓂᕗᖅ, ᓂᐊᖂᓯᔭᕐᓗᓂ ᑲᑭᓪᓚᐅᑎᓕᖕᓂᒃ ᐅᓕᒡᔪᐊᖃᕐᓗᓂᓗ ᐊᐅᐸᓪᓚᕆᒃᑐᒥᒃ. ᐰᓛᑑᓯ ᐃᓄᖕᓄᑦ ᐅᖃᕐᐳᖅ, “ᑕᑯᓕᕐᓯᐅᒃ ᐊᖑᑦ ᐅᓇ!”
6ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ ᑐᒃᓯᐊᕐᕕᒡᔪᐊᓪᓗ ᖃᐅᔨᓴᕐᑎᖏᑦ ᑕᑯᒐᒥᒃ ᔩᓱᓯᒥᒃ ᕾᒐᓛᓕᕐᐳᑦ, “ᑭᑭᐊᒃᑐᕐᑕᐅᓕ! ᑭᑭᐊᒃᑐᕐᑕᐅᓕ!”
ᑕᕝᕙ ᐰᓛᑑᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᐱᓕᕐᓯᐅᒃ, ᑭᑭᐊᒃᑐᕐᓗᒍᓗ, ᐅᕙᖓᓕ ᓱᒋᐊᕐᑕᐅᑦᔪᑎᒃᓴᖓᓂᒃ ᓇᓂᓯᓐᖏᓚᖓ.”
7ᑕᕝᕙ ᔫᑎᑦ ᑭᐅᕚᑦ, “ᐱᖁᔭᖃᕐᐳᒍᑦ, ᐱᖁᔧᑦ ᒪᓕᒡᓗᒋᑦ ᑖᓐᓇ ᑐᖁᑕᐅᔪᒃᓴᐅᕗᖅ, ᐃᒻᒥᓂᒃ ᐃᕐᓂᐅᑎᒻᒪᑦ ᒎᑎᒧᑦ.”
8ᐰᓛᑑᓯᐅᓪᓕ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᓯᕘᕋᓂᕐᓴᐅᓕᕐᐳᖅ. 9ᐃᒡᓗᕐᔪᐊᕐᒧᓪᓗ ᐃᑎᕐᒥᒐᒥ ᔩᓱᓯ ᐊᐱᕆᕚ, “ᓇᑭᓐᖔᕐᓯᒪᕖᑦ?”
ᔩᓱᓯᓕ ᑭᐅᓐᖏᓚᖅ. 10ᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᐅᕙᓐᓄᑦ ᑭᐅᑦᑍᓕᒪᕖᑦ? ᖃᐅᔨᒪᓐᖏᓚᑏᑦ ᐱᔪᓐᓇᕐᓂᖃᕋᒪ ᐊᓂᑎᑦᓱᓐᓇᕐᓗᑎᑦ, ᑭᑭᐊᒃᑐᕐᑕᐅᑎᓪᓗᑎᓪᓘᓐᓃᑦ?”
11ᔩᓱᓯᐅᑉ ᑭᐅᕚ, “ᐅᕙᓐᓄᑦ ᐱᔪᓐᓇᕐᓂᖃᕋᔭᓐᖏᓚᑎᑦ ᑐᓂᓯᕕᐅᖏᒃᑯᕕᑦ ᑕᑉᐹᓐᖓᑦ; ᑍᒤᒻᒪᑦ ᐅᕙᓐᓂᒃ ᐱᔭᐅᑎᑦᓯᔪᖅ ᐃᓕᖕᓄᑦ ᐊᔪᕐᓂᖃᕐᓂᕐᓴᐅᕗᖅ ᐃᓕᖕᓂᑦ.”
12ᐰᓛᑑᓯᓕ ᕿᓂᕋᓱᐊᕋᓗᐊᕐᐳᖅ ᔩᓱᓯᐅᑉ ᐊᓂᑎᑕᐅᑦᔪᑎᒃᓴᖓᓂᒃ, ᔫᑎᓪᓕ ᕾᒐᓛᓕᕐᐳᑦ, “ᐅᓇ ᐊᓂᑎᓐᓂᐊᕈᕕᐅᒃ, ᐊᖓᔪᖅᑳᕐᔪᐊᑉ ᓰᓴᕆᐅᑉ ᐃᓚᓐᓈᕆᓂᐊᓐᖏᓛᑎᑦ; ᐃᒻᒥᓂᒃ ᐊᖓᔪᖅᑳᕐᔪᐊᖑᓂᕋᕐᑐᖅ ᐊᑭᕋᕐᑐᕐᒪᑦ ᐊᖓᔪᖅᑳᔪᐊᕐᒥᒃ ᓰᓴᕆᒥᒃ.”
13ᐰᓛᑑᓯᐅᓪᓕ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᔩᓱᓯ ᐊᓂᑎᑉᐹ ᐃᖏᓪᓗᓂ ᐃᖅᑲᕐᑐᐃᕕᐅᑉ ᐃᒃᓯᕙᐅᑕᖓᓄᑦ ᑍᔭᐅᔪᒧᑦ ᐅᔭᕋᖕᓂᒃ ᓇᑎᓕᐅᕐᓯᒪᔪᒥᒃ, ᐄᑉᕉᑎᑐᑦ ᐊᑎᖃᕐᑐᒧᑦ ᒐᐸᑕᒥᒃ. 14ᑍᒤᓕᐅᕐᑎᓪᓗᒋᑦ ᑕᕝᕙᓂ ᐅᓪᓗᖅ ᕿᑎᕋᓕᑲᓴᓕᕐᐳᖅ; ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᐅᑉ ᐅᐸᓗᖕᒊᔭᕐᕕᖓ ᓇᓪᓕᐅᑎᑎᓪᓗᒍ. ᑕᕝᕙ ᔫᑎᓄᑦ ᐅᖃᕐᐳᖅ, “ᑕᑯᒋᑦ ᑕᕝᕙ ᐊᖓᔪᖅᑳᕐᔪᐊᓯ!”
15ᕾᒐᓛᓕᕐᐳᓪᓕ, “ᑕᒫᓃᓇᓂ, ᑕᒫᓃᓇᓂ, ᑭᑭᐊᒃᑐᕐᑕᐅᓕ!”
ᐰᓛᑑᓯᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᓯ ᑭᑭᐊᒃᑐᒐᒃᓴᕆᕙᕌ?”
ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᑭᐅᕗᑦ, “ᐊᖓᔪᖅᑳᕐᔪᐊᖃᓐᖏᓚᒍᑦ ᓰᓴᕆᐅᑉ ᐊᓯᐊᓂᒃ!”
16aᑕᕝᕙ ᐰᓛᑑᓯᐅᑉ ᔩᓱᓯ ᐂᑦᑑᑎᒋᓕᕐᐹ ᑖᒃᑯᓄᖓ ᑭᑭᐊᒃᑐᕐᑕᐅᖁᓪᓗᒍ.
ᔩᓱᓯᐅᑉ ᑭᑭᐊᒃᑐᕐᑕᐅᓂᖓ
ᒫᑎᐅᓯ 27:32-44; ᒫᑯᓯ 15:21-32; ᓘᑲᓯ 23:26-43
16bᔩᓱᓯ ᑕᕝᕙ ᑎᒍᕚᑦ, 17ᔩᓱᓯ ᐊᓂᕗᖅ, ᓴᓐᓂᖓᔪᓕᒃᓴᓂᓗ ᐃᕐᓱᒃᐹ, ᓂᐊᖁᕕᓂᕐᑕᓕᖕᒧᑦ, ᐄᑉᕉᑎᑐᑦ ᐊᑎᖃᕐᑐᒧᑦ ᒎᓪᒑᑕᒥᒃ. 18ᑕᕝᕙᓂ ᔩᓱᓯ ᑭᑭᐊᒃᑐᕐᐹᑦ ᓴᓐᓂᖓᔪᓕᖕᒧᑦ, ᐊᓯᖏᖕᓂᒃᑕᐅᖅ ᒪᕐᕉᖕᓂᒃ ᑭᑭᐊᒃᑐᐃᒋᕗᑦ, ᐊᕙᑖᓄᐊᕐᓗᒋᒃ ᓴᐅᒥᐊᓄᑦ ᑕᓕᕐᐱᐊᓄᓪᓗ, ᔩᓱᓯᓕ ᐊᑯᓪᓕᕐᐸᐅᓪᓗᒍ. 19ᐰᓛᑑᓯ ᑎᑎᖅᑲᓂᒃ ᓂᐊᖁᐊᑕ ᖁᓛᓃᑦᑐᒃᓴᓂᒃ ᑎᑎᕋᕐᐳᖅ ᐃᓕᓪᓗᒋᓪᓗ ᓴᓐᓂᖓᔪᓕᖕᒧᑦ; ᐃᒫᒃ ᐅᖃᕐᓯᒪᔪᓂᒃ: “ᔩᓱᓯ ᓈᓴᕇᑎᒥᐅᖅ, ᔫᑎᑦ ᐊᖓᔪᖅᑳᕐᔪᐊᖓᑦ.” 20ᔫᑎᑦ ᐊᒥᓱᑦ ᑖᒃᑯᐊ ᑎᑎᕋᕐᓯᒪᔪᑦ ᐅᖃᓕᒫᕐᐰᑦ, ᔩᓱᓯᐅᑉ ᑭᑭᐊᒃᑐᕐᑕᐅᕕᒋᔭᖓ ᐅᖓᓯᖏᒻᒪᑦ ᐃᒡᓗᒐᓴᖕᓂᑦ; ᑖᒃᑯᐊ ᑎᑎᕋᕐᓯᒪᕗᑦ ᐄᑉᕉᑎᑐᑦ, ᓛᑎᓂᑎᑐᓪᓗ, ᒍᕇᑭᑎᑐᓪᓗ. 21ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐰᓛᑑᓯᒧᑦ ᐅᖃᕐᐳᑦ, “ᑎᑎᕋᕐᓯᒪᔭᕆᐊᖃᓐᖏᓚᖅ ‘ᔫᑎᑦ ᐊᖓᔪᖅᑳᕐᔪᐊᖓᓐᓂᒃ,’ ᐃᒫᒃᓕ: ‘ᐊᖑᑦ ᐅᓇ ᐅᖃᓚᐅᕐᑐᖅ, ᔫᑎᑦ ᐊᖓᔪᖅᑳᕐᔪᐊᕆᕚᖓ.’”
22ᐰᓛᑑᓯᐅᑉ ᑭᐅᕔᑦ, “ᑎᑎᕋᕐᑕᒃᑲ ᑍᒫᒃ ᑎᑎᕋᕐᓯᒤᓐᓇᕐᓂᐊᕐᐳᑦ.”
23ᐅᓇᑕᕐᑐᒃᓮᑦ ᔩᓱᓯᒥᒃ ᑭᑭᐊᒃᑐᐃᔭᕇᕋᒥᒃ ᐊᓐᓄᕌᖏᓐᓂᒃ ᐊᒡᒍᐃᕗᑦ ᓯᑕᒪᐅᓕᓪᓗᒋᑦ, ᐊᑐᓂᑦ ᐊᑕᐅᓯᕐᒥᒃ ᐱᑖᕐᓗᑎᒃ; ᐅᓕᒡᔪᐊᖓᓕ ᑎᒍᒋᕚᑦ, ᑖᓐᓇ ᑭᓗᖃᕋᓂ ᓴᓇᓯᒪᓚᐅᕐᐳᖅ. 24#ᐃᓐᖏᕈᑦ 22:18.ᑕᕝᕙ ᐅᓇᑕᕐᑐᒃᓮᑦ ᐃᒻᒥᖕᓄᑦ ᐅᖃᖃᑦᑕᐅᑎᕗᑦ, “ᑖᓐᓇ ᐊᕕᒍᓐᓁᕐᓚᕗᑦ; ᓇᓚᐅᑦᓵᕐᓗᑕᓕ ᒪᑭᑦᓯᒋᐊᖃᑦᑕᓕᕐᑕ ᓇᓪᓕᐊᑦᑕ ᐱᓂᐊᕐᒪᖔᒍ.” ᑕᒪᓐᓇ ᐊᑐᕐᑕᐅᓚᐅᕐᐳᖅ ᐊᒡᓔᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ,
“ᐊᓐᓄᕌᒃᑲ ᐃᒻᒥᖕᓄᑦ ᐊᑐᓂᑦ ᐊᒡᒍᓚᐅᕐᐰᑦ,
ᐅᓕᒡᔪᐊᕋᓗ ᓇᓚᐅᑦᓵᕈᑎᒋᓚᐅᕐᐹᑦ.”
ᑕᕝᕙ ᐅᓇᑕᕐᑐᒃᓮᑦ ᑍᒤᓕᐅᓚᐅᕐᐳᑦ.
25ᔩᓱᓯᐅᑉ ᓴᓐᓂᖓᔪᓕᖓᑕ ᖃᓂᒋᔮᓂ ᐅᑯᐊ ᓇᖏᓚᐅᕐᐳᑦ, ᔩᓱᓯᐅᑉ ᐊᓈᓇᖓ, ᐊᓈᓇᖓᑕᓗ ᖃᑕᓐᖑᑖ, ᒥᐊᕆᓗ ᒃᓗᐹᓯᐅᑉ ᓄᓕᐊᖓ, ᒥᐊᕆᓗ ᒫᒃᑕᓖᓂ. 26ᔩᓱᓯᐅᓪᓕ ᐊᓈᓇᓂ ᑕᑯᒐᒥᐅᒃ, ᐃᓕᓐᓂᐊᕐᑎᓗ ᓇᒡᓕᒋᔭᓂ ᑕᕝᕙᓂ ᓇᖏᖃᑕᐅᔪᖅ; ᐊᓈᓇᒥᓄᑦ ᐅᖃᕐᐳᖅ, “ᐊᕐᓈᖅ, ᑕᑯᒋᑦ, ᑕᕝᕙ ᐃᕐᓃᑦ!”
27ᑕᕝᕙ ᐃᓕᓐᓂᐊᕐᑎ ᐅᖃᐅᑎᕚ, “ᑕᑯᒋᑦ, ᑕᕝᕙ ᐊᓈᓁᑦ!” ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᓂ ᐃᓕᓐᓂᐊᕐᑎᐅᑉ ᓇᔪᕐᑎᒋᓕᕐᐹ ᐊᖏᕐᕋᒥᓂ.
ᔩᓱᓯᐅᑉ ᑐᖁᓂᖓ
ᒫᑎᐅᓯ 27:45-56; ᒫᑯᓯ 15:33-41; ᓘᑲᓯ 23:44-49
28 #
ᐃᓐᖏᕈᑦ 69:21; 22:15. ᔩᓱᓯ ᖃᐅᔨᒪᓕᕋᒥ ᓱᓇᓕᒫᑦ ᐱᔭᕇᕐᒪᑕ, ᐊᒡᓔᑦ ᓇᓚᐅᑦᓯᖁᓪᓗᒋᑦ, ᐅᖃᕐᐳᖅ, “ᖀᓕᕐᐳᖓ.”
29ᑕᕝᕙᓂ ᐃᒥᖃᐅᑎᑕᖃᕐᐳᖅ ᖃᓯᓕᓇᕐᑐᒥᒃ ᐃᒪᓕᖕᒥᒃ; ᑖᒃᑯᐊᓕ ᐳᕙᐅᔭᒥᒃ ᖃᓯᓕᓇᕐᑐᒧᑦ ᒥᓱᖅᑳᕐᓗᒍ ᐱᕈᕐᑐᕕᓂᕐᓗ ᕼᐃᓴᑉᒥᒃ ᐊᑎᓖᑦ ᑲᐳᒻᒥᑖᕐᓗᒍ ᔩᓱᓯᐅᑉ ᖃᓂᖓᓄᑦ ᒪᓂᕚᑦ. 30ᔩᓱᓯ ᖃᓯᓕᓇᕐᑐᒥᒃ ᐃᒥᕋᒥ ᐅᖃᕐᐳᖅ, “ᐱᔭᕇᕐᐳᖅ”; ᐅᑯᓪᓗᓂᓗ ᐊᓂᕐᓇᖏᕐᐳᖅ.
ᔩᓱᓯᐅᑉ ᑲᐱᔭᐅᓂᖓ ᓴᓂᕋᖓᒍᑦ
31ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᐅᑎᓪᓗᒍ ᑎᒥᓂᒃ ᓂᕕᖓᖁᔨᓇᑎᒃ ᓴᓐᓂᖓᔪᓕᖕᒥ, ᐅᓪᓗᖅ ᑖᓐᓇ ᐃᑦᔪᕐᓁᒻᒪᑦ, ᔫᑎᑦ ᐊᖓᔪᖅᑳᖏᑦ ᐰᓛᑑᓯᒧᑦ ᐊᐱᕆᔭᕐᑐᕐᐳᑦ ᑭᑭᐊᒃᑐᕐᑕᐅᓯᒪᔪᑦ ᓂᐅᖏᑦ ᓇᑲᑎᕐᑕᐅᖁᓪᓗᒋᑦ, ᓴᓐᓂᖓᔪᓕᖕᒥᑦ ᐲᕐᑕᐅᔪᓐᓇᕐᓯᖁᓪᓗᒋᑦ. 32ᑕᕝᕙ ᐅᓇᑕᕐᑐᒃᓮᑦ ᑕᕝᕗᓐᖓᕋᒥᒃ ᓴᓐᓂᖓᔪᓕᖕᒦᑦᑑᑉ ᓯᕗᓪᓕᕐᐹᖓᑦᑕ ᓂᐅᖏᒃ ᓇᒡᒍᕐᐰᑦ, ᐂᑉᐸᖓᑕᓗ ᓂᐅᖏᒃ ᓇᒡᒍᕆᕔᑦ. 33ᔩᓱᓯᒧᓪᓕ ᑎᑭᓐᓇᒥᒃ ᑕᑯᒐᒥᒃ ᑐᖁᔭᕇᕐᒪᑦ, ᓂᐅᖏᒃ ᓇᒡᒍᓐᖏᓛᒃ. 34ᐅᓇᑕᕐᑐᒃᓮᓪᓕ ᐃᓚᖓᑦᑕ ᖃᓗᒋᐊᕐᔪᐊᕐᒧᑦ ᔩᓱᓯ ᓴᓂᕋᖓᒍᑦ ᑲᐱᕚ, ᑕᕝᕔᓐᓇᕐᓗ ᐊᐅᒃ ᐃᒥᕐᓗ ᑯᕕᓕᕐᐴᒃ. 35ᔩᓱᓯ ᑍᒤᓕᔭᐅᑎᓪᓗᒍ ᑕᑯᓐᓈᓚᐅᕐᑑᑉ ᑖᓐᓇ ᐅᖃᐅᑎᒋᕚ, ᐅᖃᐅᓯᕆᔭᖓᓗ ᓱᓕᕗᖅ, ᖃᐅᔨᒪᓪᓗᓂᓗ ᓱᓕᔪᒥᒃ ᐅᖃᕋᒥ, ᐃᓕᑦᓯᑦᑕᐅᖅ ᐅᒃᐱᓕᖁᓪᓗᓯ. 36#ᒨᓯᓯ ᐂᑉᐸᖏᑦ 12:46; ᒨᓯᓯ ᓯᑕᒪᖏᑦ 9:12; ᐃᓐᖏᕈᑦ 34:20.ᑕᒪᒃᑯᐊ ᐱᓂᐊᕐᓂᐅᓚᐅᕐᐳᑦ ᐊᒡᓔᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᑖᑦᓱᒪ ᓴᐅᓂᖏᑦ ᓇᒡᒍᕐᑕᐅᔪᒃᓴᐅᓐᖏᓚᑦ.” 37#ᓴᑲᕅᐊ 12:10; ᑕᑯᑎ 1:7.ᐊᒡᓔᑦᑕᐅᖅ ᐊᓯᖏᑦ ᐅᖃᕐᓯᒪᒃᑲᓐᓂᕆᕗᑦ, “ᑕᑯᔪᒫᕐᐳᑦ ᑲᐱᓚᐅᕐᑕᒥᖕᓂᒃ.”
ᔩᓱᓯᐅᑉ ᐃᓗᕕᕐᑕᐅᓂᖓ
ᒫᑎᐅᓯ 27:57-61; ᒫᑯᓯ 15:42-47; ᓘᑲᓯ 23:50-56
38ᑕᒪᑐᒪᓕ ᑭᖑᕐᖓᒍᑦ ᔫᓯᐱ ᐊᕆᒪᑎᐊᒥᐅᖅ, ᔩᓱᓯᒧᑦ ᐃᓕᓐᓂᐊᕐᑎᐅᒐᒥ ᖃᐅᔨᔭᐅᑦᑍᓕᓪᓗᓂ, ᔫᑎᓂᒃ ᓯᕘᕋᒐᒥ, ᐰᓛᑑᓯᒧᑦ ᐊᐱᕆᔭᕐᑐᕐᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᕐᑎᑕᐅᔪᒪᓪᓗᓂ, ᐰᓛᑑᓯᐅᑉ ᐱᔪᓐᓇᕐᑎᑉᐹ. ᑕᕝᕙ ᔫᓯᐱᐅᑉ ᔩᓱᓯᐅᑉ ᑎᒥᖓ ᐅᐸᒃᓗᒍ ᐊᖅᑲᕐᑎᑉᐹ. 39#ᔪᐊᓇᓯ 3:1,2.ᓂᑯᑎᒨᓯᑦᑕᐅᖅ, ᑕᕝᕗᓐᖓᕆᕗᖅ ᐅᓐᓄᐊᖑᑎᓪᓗᒍ ᔩᓱᓯᒧᐊᓚᐅᕐᓯᒪᔪᖅ, ᓇᒃᓴᕐᓗᓂ ᑎᐱᑦᓯᐊᕆᒃᑐᒥᒃ ᒪᕐᒥᒃ ᐋᓗᔅᒥᒡᓗ ᑲᑎᓯᒪᔪᒥᒃ, ᐅᖁᒤᓐᓂᖃᕐᑐᒥᒃ 100ᐸᐅᓐ ᖃᓂᒋᔮᓂ. 40ᑕᕝᕙ ᔩᓱᓯᐅᑉ ᑎᒥᖓ ᑎᒍᕚᒃ, ᐃᒻᒧᓯᕐᓗᒍᓗ ᖃᓪᓗᓈᕐᑕᒥᒃ ᓵᑦᑐᒥᒃ ᐃᒻᒧᑎᒃᓴᔭᒥᒃ ᑎᐱᑦᓯᐊᕆᒃᑐᒧᓪᓗ ᒥᖑᐊᕐᐹᒃ, ᔫᑎᑦ ᐃᓗᕕᕐᓯᓪᓗᑎᒃ ᐱᐅᓯᕆᕙᒃᑕᖓᑐᑦ. 41ᔩᓱᓯᐅᑉ ᑭᑭᐊᒃᑐᕐᑕᐅᕕᒋᔭᖓᓂ ᐱᕈᕐᓰᕕᒃᑕᖃᕐᐳᖅ, ᑕᕝᕙᓂ ᐱᕈᕐᓰᕕᖕᒥ ᐃᓗᕕᒃᓴᕐᑕᖃᕐᐳᖅ ᓄᑖᒥᒃ ᐃᓕᓯᕕᐅᓚᐅᕐᓯᒪᖏᑦᑐᒥᒃ ᓱᓕ. 42ᐅᓪᓗᖅ ᔫᑎᑦ ᐅᐸᓗᖕᒊᔭᕐᕕᒋᖕᒪᒍ, ᑕᕝᕙᓂ ᖃᓂᑦᑐᒥ ᐃᓗᕕᒃᓴᕐᑕᖃᕐᒪᑦ, ᑕᕝᕗᖓ ᔩᓱᓯᐅᑉ ᑎᒥᖓ ᐃᓕᕚᑦ.
Currently Selected:
ᔪᐊᓇᓯᐅᑉ ᐊᒡᓚᖏᑦ 19: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
