ᕼᐆᓯᐊᑉ ᐊᒡᓚᖏᑦ 4
4
ᐊᑕᓂᐅᑉ ᓈᒻᒪᒃᓴᖏᓐᓂᖓ ᐃᓴᕆᐊᓕᒥᐅᓂᒃ
1ᐊᑕᓂᐅᑉ ᐅᖃᐅᓯᖓᓂᒃ ᑐᓴᕆᑦᓯ, ᐃᓴᕆᐊᓕᒥᐅᖑᔪᓯ: “ᐊᑕᓂᖅ ᓈᒻᒪᒃᓴᖏᒻᒪᑦ ᐃᓄᖕᓂᒃ ᑕᒫᓂ ᓄᓇᖃᖅᑐᓂᒃ. ᐅᒃᐱᕐᖕᓇᖅᑐᖃᕈᓐᓃᕐᖕᒪᑦ ᓂᑲᒍᓱᖕᓂᖃᕈᓐᓃᖅᓗᓂᓗ, ᖃᐅᔨᒪᔪᖃᕈᓐᓃᖅᓗᓂᓗ ᒎᑎᒥᒃ ᑕᒫᓂ ᓄᓇᒥ; 2ᐅᖃᕕᒃᓗᑎᒃ ᐊᖏᒻᒪᕆᒃᐸᒃᑲᓗᐊᖅᐳᑦ, ᓴᒡᓗᖃᑦᑕᖅᐳᑦ, ᑐᖁᕅᕗᑦ, ᑎᒡᓕᒐᖅᐳᑦ, ᐊᓯᓐᓂᐊᖅᓗᑎᒡᓗ; ᐱᕋᔭᖕᓃᓪᓗ ᑭᒡᓕᖃᕈᓐᓃᖅᐳᑦ, ᑐᖁᕅᑐᐃᓐᓇᓕᖅᐳᑦ ᑐᖓᓕᕇᒥᒃ. 3ᑍᒤᒻᒪᑦ ᓄᓇ ᕿᒃᓵᓕᖅᐳᖅ, ᑕᒫᓂᓗ ᐃᓂᖃᖅᑐᓕᒫᑦ ᓂᐹᓕᖅᐳᑦ, ᐆᒪᔪᐃᓪᓗ ᓇᑎᕐᖕᓇᒦᑦᑐᑦ, ᑎᖕᒥᐊᓪᓗ ᖃᖓᑕᕙᒃᑐᑦ; ᐃᖃᓗᐃᓪᓗ ᐊᒡᓛᑦ ᓄᖑᑕᐅᓕᖅᐳᑦ.”
ᐊᑕᓂᐅᑉ ᓈᒻᒪᒃᓴᖏᓐᓂᖓ ᑐᓂᕐᕈᓯᖅᑎᑦᓯᔨᓂᒃ
4ᐊᑕᓂᖅ ᐅᖃᖅᐳᖅ, “ᑭᓇᓘᓐᓃᑦ ᐃᓄᖕᓂᒃ ᐸᓯᒃᓯᖅᑍᓕᓕ, ᐅᕝᕙᓗ ᐅᖃᐅᑦᔭᐅᒋᐊᖅᑍᓕᓕ, ᐃᓱᐊᖅᓴᓐᖏᓚᖓᓕ ᐃᓕᑦᓯᓐᓂᒃ ᑐᓂᕐᕈᓯᖅᑎᑦᓯᔨᓂᒃ. 5ᐅᓪᓗᒃᑯᑦ ᐹᓪᓚᒍᒫᖅᐳᓯ, ᐱᔪᖃᓛᖅᑐᒥᒡᓗ ᐅᖃᖅᑏᑦ ᐅᓐᓄᒃᑯᑦ ᐹᓪᓚᒍᒫᕆᕗᑦ; ᐊᓈᓇᓯᓗ ᐃᓴᕆᐊᓕ ᐊᓯᕈᕐᖕᓂᐊᖅᐸᕋ. 6ᐃᓄᖁᑎᒃᑲ ᐊᓯᕈᓕᖅᐳᑦ ᐅᕙᓐᓂᒃ ᖃᐅᔨᒪᖏᓐᓂᕐᖕᒧᑦ; ᐃᓕᑦᓯ ᑐᓂᕐᕈᓯᖅᑎᓯᔨᐅᔪᓯ ᖃᐅᔨᔪᒪᓚᐅᖏᓐᓇᑦᓯ, ᑍᒤᒻᒪᑦᑕᐅᖅ ᓇᕐᕈᒋᓕᖅᐸᑦᓯ ᑐᓂᕐᕈᓯᖅᑎᑦᓯᔨᐅᓂᐊᕈᓐᓃᖅᐳᓯ ᐅᕙᓐᓄᑦ. ᒎᑎᑦᓯ ᐱᖁᔭᖏᓐᓂᒃ ᐃᓱᒪᔪᓐᓃᓚᐅᕋᑦᓯ, ᕿᑐᕐᖓᓯᑦᑕᐅᖅ ᐃᓱᒪᒋᓂᐊᕈᓐᓃᕆᕙᒃᑲ.
7“ᑐᓂᕐᕈᓯᖅᑎᓯᔩᑦ ᐅᓄᕐᖕᓂᖅᓴᐅᓕᑐᐊᕐᖕᒪᑕ, ᐊᔪᖅᑐᓕᓂᖏᑦ ᐅᕙᓐᓄᑦ ᐊᖏᓂᖅᓴᐅᕗᑦ; ᑍᒤᒻᒪᑦ ᐅᐱᓐᓇᕐᖕᓂᓯ ᑲᓐᖑᓇᖅᓯᑎᓐᓂᐊᖅᐸᕋ. 8ᐊᒃᓱᐃᓕᕗᓯ ᐃᓄᖁᑎᒪ ᐊᔪᕐᖕᓂᖏᓐᓄᑦ; ᑖᒃᑯᐊᓗ ᑲᔪᖏᓛᖅᐳᑦ ᐊᔪᖅᑐᓕᓂᕐᖕᒧᑦ. 9ᐃᓕᑦᓯᑦᑕᐅᖅ ᐊᒃᓱᕈᕐᖕᓇᖅᑐᒃᑰᕐᖕᓂᐊᖅᐳᓯ ᐃᓄᐃᑦ ᓱᒋᐊᖅᑕᐅᓂᖏᑎᑐᑦ ᓱᒋᐊᖅᑕᐅᓗᓯ, ᐊᑭᓕᖅᑕᐅᓂᐊᖅᐳᓯᓗ ᐊᔪᖅᑐᓕᓂᓯ ᐱᓪᓗᒋᑦ. 10ᓂᕆᓂᐊᖅᐳᑦ, ᐊᕿᐊᑦᑐᕐᖕᓂᐊᓐᖏᓚᓪᓕ; ᐊᓯᓐᓂᐊᕐᖕᓂᐊᖅᐳᑦ, ᕿᑐᕐᖓᖅᑖᕐᖕᓂᐊᓐᖏᓚᓪᓕ; ᐊᑕᓂᕐᖕᒥᒃ ᕿᒤᓯᒪᖕᒪᑕ ᐊᓯᓐᓂᐊᕐᖕᓂᖅ ᒎᑎᓐᖑᐊᓄᑦ ᐱᑦᔪᑎᒋᓪᓗᒍ.”
ᐊᑕᓂᐅᑉ ᐃᓂᖅᑎᕆᓂᖓ ᒎᑎᓐᖑᐊᓄᑦ ᑐᒃᓯᐊᖃᑦᑕᖁᔨᓇᓂ
11“ᐃᓄᖁᑎᒃᑲ ᕔᓂᒧᑦ ᓄᑕᐅᖏᑦᑐᓄᑦ ᓄᑖᓄᓪᓗ, ᑐᑭᓯᔪᓐᓇᕐᖕᓂᖏᑦ ᐊᓯᕈᖅᑕᐅᓕᖅᐳᑦ. 12ᐃᓄᖁᑎᒃᑲ ᖃᐅᔨᑎᑕᐅᔪᒪᕙᒃᐳᑦ ᕿᔪᖕᒧᑦ, ᐊᔭᐅᑉᐱᐊᓄᓪᓗ ᖃᐅᔨᔪᒪᔭᖏᓐᓂᒃ ᖃᐅᔨᑎᑕᐅᕙᒃᓱᑎᒃ. ᐊᓯᓐᓂᐊᕐᖕᓂᕐᖕᒧᑦ ᐊᑐᒐᐅᓕᖅᑑᑉ ᐊᓂᕐᖕᓂᖓᓄᑦ ᑕᒻᒪᖅᑎᑕᐅᕗᑦ, ᒎᑎᒥᖕᓂᒃ ᕿᒤᕗᑦ ᐊᓯᓐᓂᐊᕐᖕᓂᕐᖕᒧᑦ. 13ᑐᓂᕐᕈᓯᖃᑦᑕᖅᐳᑦ ᐃᑯᐊᓚᑦᓯᓪᓗᑎᒃ ᖃᖅᑲᐅᑉ ᖄᖏᓐᓂ, ᐱᖑᐃᓪᓗ ᖄᖏᓐᓂ ᐃᑭᑦᓯᕙᒡᓗᑎᒃ ᑎᐱᑦᓯᐊᕆᒃᑐᓂᒃ, ᓇᐹᖅᑑᑉ ᐆᒃᒥᒃ ᐊᑎᓕᐅᑉ ᓯᑕᒃᑕᐅᑉ ᐊᑖᓂ, ᑖᓪᓕᓂᖏᓐᓂ, ᓴᓂᕋᖏᑦᑕ ᐱᐅᓂᖏᑦ ᐱᑦᔪᑎᒋᓪᓗᒋᑦ.
“ᑍᒤᒻᒪᑦ ᐸᓂᓯ ᐊᑐᒐᐅᓕᖅᐳᑦ ᐊᑭᓕᖅᑐᖅᑕᐅᓪᓗᑎᒃ, ᐅᑯᐊᓯᓗ ᐊᓯᓐᓂᐊᖅᐸᓕᖅᓱᑎᒃ.
14“ᑍᒤᒃᑲᓗᐊᖅᑎᓪᓗᒋᑦ ᐸᓂᓯ ᓱᒋᐊᕐᖕᓂᐊᓐᖏᓚᒃᑲ, ᐅᑯᐊᓯᓗ ᐊᓯᓐᓂᐊᖃᑦᑕᕐᖕᓂᖏᑦ ᓱᒋᐊᕐᖕᓂᐊᖏᓐᓂᕙᒃᑲ; ᐊᖑᑎᑦ ᐃᒻᒥᖕᓂᒃ ᐂᑦᑑᑎᒋᖃᑦᑕᕐᖕᒪᑕ ᐊᑐᒐᕐᖕᓄᑦ, ᑐᓂᕐᕈᓯᖃᑦᑕᖅᓗᑎᒡᓗ ᒎᑎᓐᖑᐊᓖᑦ ᐊᑐᒐᖁᑎᖏᓐᓄᑦ, ᐃᓄᐃᓪᓗ ᑐᑭᓯᓯᒪᖏᑦᑐᑦ ᐊᓯᕈᖅᑕᐅᔪᒫᖅᐳᑦ.
15“ᐃᓴᕆᐊᓕᒥᐅᖑᔪᓯ ᐊᑐᒐᕐᖕᓄᑦ ᐊᓯᓐᓂᐊᖅᓯᒪᒐᓗᐊᖅᑎᓪᓗᓯ, ᔫᑕᒃᑯᑦ ᐸᓯᔭᒃᓴᐅᓕᖅᑍᓕᓕᑦ ᐃᓕᑦᓯᑐᑦ. ᑐᒃᓯᐊᖅᑍᓕᒋᑦᓯ ᒋᐅᓪᒐᐅᓪᒥ, ᐅᕝᕙᓗ ᐱᑦᐂᕕᓐᒧᐊᖅᑍᓕᒋᑦᓯ, ᐅᖃᕕᒡᓗᓯᓗ ᐊᖏᖅᑍᓕᒋᑦᓯ, ‘ᐊᑕᓂᐅᑉ ᐆᒪᔫᑉ ᐊᑎᖓᓂ.’ 16ᐃᓴᕆᐊᓕᒥᐅᑦ ᓯᐅᑎᖁᖅᑐᔪᑎᑐᑦ ᐱᔭᕐᖕᓃᑦᑑᑎᒋᕗᑦ; ᖃᓄᕐᓕ ᐊᑕᓂᕐᖕᒧᑦ ᓂᕆᑎᑕᐅᔪᓐᓇᖅᐸᑦ ᓰᐲᑦ ᓄᕐᕋᖏᑎᑐᑦ ᓂᕿᒃᓴᓕᖕᒦᑦᑐᑎᑐᑦ? 17ᐃᕗᕅᒥᐅᑦ ᒎᑎᓐᖑᐊᓂᒃ ᒎᑎᖃᓕᖅᐳᑦ, ᐃᓱᒪᖅᓱᓕᖅᓕᑦ. 18ᐃᒥᓗᐊᓚᐅᖅᓗᑎᒃ ᕔᓂᒥᒃ, ᐃᒻᒥᖕᓂᒃ ᐂᑦᑑᑎᒋᕗᑦ ᐊᑐᒐᕐᖕᓄᑦ; ᐱᓇᓱᐊᕈᒪᓂᖅᓴᐅᕗᑦ ᑲᓐᖑᓇᖅᑐᓂᒃ ᐅᐱᓐᓇᕐᖕᓂᖅ ᐱᔪᒪᓇᒍ. 19ᐊᐅᓪᓚᐅᑦᔭᐅᕗᑦ ᐊᓄᕆᒧᑦ ᐅᓕᒃᑕᐅᓪᓗᑎᒃ, ᑲᓐᖑᓲᑎᖃᓕᕈᒫᖅᐳᑦ ᑐᓂᕐᕈᓯᖃᑦᑕᓚᐅᕐᖕᓂᕐᖕᒥᖕᓂᒃ ᒎᑎᓐᖑᐊᓄᑦ.”
Currently Selected:
ᕼᐆᓯᐊᑉ ᐊᒡᓚᖏᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
