ᒨᓯᓯ ᓯᕗᓪᓖᑦ 50
50
1ᑕᕝᕙ ᔫᓯᐱ ᐊᑖᑕᖓᑕ ᑮᓇᖓᓄᑦ ᐳᓪᓗᓂ, ᕿᐊᕕᒋᓕᕐᐹ, ᑯᓂᒃᓗᒍᓗ. 2ᔫᓯᐱᓗ ᐱᔨᒥᓂᒃ ᐋᓐᓂᐊᓯᐅᑎᓂᒃ ᑎᓕᓯᕗᖅ ᑐᖁᖓᔪᕐᓯᐅᑎᒥᒃ ᐊᑖᑕᓂ ᒥᖑᐊᕐᑕᐅᖁᓪᓗᓂᐅᒃ. ᑕᕝᕙ ᐋᓐᓂᐊᓯᐅᑏᑦ ᐃᓴᕆᐊᓕ ᑐᖁᖓᔪᕐᓯᐅᑎᒥᒃ ᒥᖑᐊᕐᐹᑦ; 3ᐅᓪᓗᓂᒃ 40ᓂᒃ ᐅᑕᖅᑭᔭᕆᐊᖃᓚᐅᕐᐳᑦ, ᑕᒪᒃᑯᐊ ᑐᖁᖓᔪᕐᓯᐅᑎᒥᒃ ᒥᖑᐊᕐᑕᐅᔪᑦ ᐅᓪᓗᓂᒃ ᑍᒤᓪᓗᐊᕐᑐᓂᒃ ᐅᑕᖅᑭᔭᕆᐊᖃᕐᐸᖕᒪᑕ. ᐄᑦᔨᑉᑎᒥᐅᓪᓗ ᕿᒃᓵᒍᑎᒋᕚᑦ ᐅᓪᓗᓂᒃ 70ᓂᒃ.
4ᐅᓪᓗᐃᓪᓕ ᕿᒃᓵᒡᕕᐅᔪᑦ ᐃᓱᓕᒻᒪᑕ, ᔫᓯᐱ ᐰᕉᑉ ᐊᖓᔪᖅᑳᖁᑎᖏᓐᓄᑦ ᐅᖃᕐᐳᖅ, “ᐃᓕᑦᓯᓐᓄᑦ ᖁᕕᐊᒋᔭᐅᒍᒪ, ᐊᖓᔪᖅᑳᑦᑎᓐᓄᑦ ᐰᕉᒧᑦ ᐅᖃᕆᐊᕐᑐᕆᑦᓯ, ᐅᖃᐅᑎᓗᒍᓗ, 5#ᒨᓯᓯ ᓯᕗᓪᓖᑦ 47:29-31.ᐊᑖᑕᒪ ᐊᖏᒻᒪᕆᒃᑎᓚᐅᕐᒪᖓ, ᐅᖃᐅᑎᓪᓗᓂᖓ, ‘ᑐᖁᔭᕆᐊᒃᓯᒐᒪ: ᐃᓗᕕᕐᑕᐅᔪᒪᔪᖓ ᐃᓗᕕᖃᕐᕕᓕᐊᕆᓯᒪᔭᓐᓂ ᓄᓇᒥ ᑬᓇᓂᒥ, ᑍᑲᓂ ᐃᓗᕕᕐᑕᒃᓴᕆᕙᕐᒪ.’ ᒫᓐᓇ ᑍᒤᒻᒪᑦ ᐱᔪᓐᓇᕐᑎᓚᐅᓐᖓ, ᑕᑉᐸᐅᖓ ᐊᑖᑕᒐ ᐃᓗᕕᕆᐊᕐᑐᕐᓂᐊᕋᒃᑯ; ᑕᒪᐅᖓᓗ ᐅᑎᓛᕆᕗᖓ.”
6ᐰᕉᑉ ᑭᐅᕚ, “ᑕᑉᐸᐅᖓ ᒪᔪᐊᓕᕆᑦ, ᐊᑖᑍᑦ ᐃᓗᕕᕆᐊᕐᑐᕐᓗᒍ, ᑍᒫᒃ ᐊᖏᒻᒪᕆᒃᑎᓯᒪᖕᒪᑎᑦ.”
7ᑕᕝᕙ ᔫᓯᐱ ᒪᔪᐊᓕᕐᐳᖅ ᐊᑖᑕᓂ ᐃᓗᕕᕆᐊᕐᑐᕐᓗᒍ; ᐃᓚᖃᓚᐅᕐᐳᕐᓗ ᐰᕉᑉ ᐱᔨᖏᓐᓂᒃ ᑕᒤᓐᓂᒃ, ᐊᖓᔪᖅᑳᖁᑎᖏᓐᓂᒡᓗ ᐃᒡᓗᒥᐅᑕᖏᓐᓂᒃ, ᐄᑦᔨᑉᑎᐅᓪᓗ ᓄᓇᖓᑕ ᐊᖓᔪᖅᑳᖁᑎᓕᒫᖏᓐᓂᒃ ᑕᒤᓐᓂᒃ, 8ᔫᓯᐱᐅᓪᓗ ᐃᒡᓗᒥᐅᖃᑎᓕᒫᖏᑦ ᑕᒪᕐᒥᒃ, ᖃᑕᓐᖑᑎᖏᓪᓗ, ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᑦ ᐱᖃᑕᐅᓚᐅᕐᐳᑦ; ᕿᑐᕐᖓᖏᑕᓕ ᒥᑭᔫᑕᐅᓂᖏᑦ, ᓰᐱᖁᑎᖏᓪᓗ, ᐆᒪᔪᖁᑎᖏᓪᓗ ᕿᒪᒃᑕᐅᓚᐅᕐᐳᑦ ᓄᓇᒧᑦ ᒎᓯᓂᒧᑦ. 9ᑕᑉᐸᐅᖓ ᒪᔪᐊᖃᑕᐅᓚᐅᕆᕗᑦ ᐊᖓᔪᖅᑳᕐᓯᐅᑏᑦ ᐊᒃᓴᓗᐊᓖᑦ ᕿᒻᒥᕐᔪᐊᕐᒦᑦᑐᓪᓗ; ᐃᖏᕐᕋᖃᑎᓕᒫᖏᑦ ᑲᑎᓪᓗᒋᑦ ᐃᓄᒐᓴᒡᔪᐊᖑᓚᐅᕐᐳᑦ.
10ᓇᑎᕐᓇᒧᓪᓕ ᑎᑭᓐᓇᒥᒃ ᑍᔭᐅᔪᒧᑦ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂᒃ, ᔪᐊᕐᑕᓂᐅᑉ ᐅᖓᑖᓃᑦᑐᒧᑦ, ᑕᕝᕙᓂ ᕿᐊᔪᐊᓘᕗᑦ ᕿᒃᓵᖕᓂᕐᒧᓪᓗ ᐅᒡᒍᐊᕐᑐᐊᓘᓪᓗᑎᒃ; ᑕᕝᕙᓂᓗ ᔫᓯᐱ ᐅᓪᓗᓂᒃ 7ᓂᒃ ᓄᖅᑲᖓᑎᑦᓯᓚᐅᕐᐳᖅ ᕿᒃᓵᒍᑎᖃᕐᓗᑎᒃ ᐊᑖᑕᒥᖕᓂᒃ. 11ᑬᓇᓂᒥᐅᓪᓕ ᓄᓇᖃᕐᑐᑦ, ᑕᑯᒐᒥᒃ ᕿᒃᓵᒃᑐᓂᒃ ᓇᑎᕐᓇᒥ ᑍᔭᐅᔪᒥ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂ, ᐅᖃᕐᐳᑦ, “ᑕᕝᕙᓂ ᐄᑦᔨᑉᑎᒥᐅᓄᑦ ᕿᒃᓵᕕᒡᔪᐊᕐᕕᐅᕗᖅ.” ᑍᒤᒻᒪᑦ ᓄᓇ ᐊᑦᓯᕐᑕᐅᕗᖅ ᐊᐱᐅᓪ-ᒥᔅᕅᒥᒥᒃ; ᑖᓐᓇ ᔪᐊᕐᑕᓂᐅᑉ ᐅᖓᑖᓃᑦᑐᖅ.
12ᑕᕝᕙᓂ ᔧᑰᑉ ᐃᕐᓂᖏᑦ ᐱᓇᓱᐊᓚᐅᕐᐳᑦ ᐊᑖᑕᖓᑕ ᐱᓇᓱᐊᕐᑕᐅᖁᓚᐅᕐᑕᖏᓐᓂᒃ ᑖᑦᓱᒧᖓ; 13#ᐋᐴᓯᑕᓖᑦ 7:16.ᐃᕐᓂᖏᑕᓗ ᐊᒡᔭᕐᐹᑦ ᓄᓇᒧᑦ ᑬᓇᓂᒧᑦ, ᐃᓗᕕᕐᓗᒍᓗ ᕾᕈᓱᖕᒧᑦ ᓇᑎᕐᓇᒥ ᒪᒃ-ᐲᓚᒦᑦᑐᒧᑦ, ᒪᒻᕆᐅᑉ ᐅᖓᑖᓃᑦᑐᒧᑦ, ᑖᓐᓇ ᐂᑉᕋᕼᐋᒻ ᓂᐅᕕᐊᕆᓚᐅᕐᑕᖓ ᐱᕈᕐᓰᕕᒃ ᐱᖃᓯᐅᑎᓪᓗᒍ ᐃᐸᕋᓐᒥᑦ ᕼᐃᑍᑎᒥᐅᑕᕐᒥᑦ, ᐃᓗᕕᕐᓯᕕᒃᓴᐅᖁᓪᓗᒍ. 14ᔫᓯᐱᐅᑉ ᐊᑖᑕᓂ ᐃᓗᕕᕇᕋᒥᐅᒃ, ᐅᑎᓚᐅᕐᐳᖅ ᐄᑦᔨᑉᑎᒧᑦ ᖃᑕᓐᖑᑎᓂ ᐃᓚᒋᓪᓗᒋᑦ ᑕᒪᕐᒥᒡᓗ ᐃᓗᕕᕐᓯᔭᕐᑐᕐᑎᓪᓗᒋᑦ ᐊᑖᑕᒥᓂᒃ ᒪᓕᓚᐅᕐᑐᓕᒫᑦ ᐃᓚᒋᓪᓗᒋᑦ.
ᔫᓯᐱᐅᑉ ᖃᑕᓐᖑᑎᒥᓂᒃ ᐃᓱᒫᓗᖁᔨᖏᓐᓂᖓ
15ᔫᓯᐱᐅᓪᓕ ᖃᑕᓐᖑᑎᖏᑦ ᖃᐅᔨᒪᓕᕋᒥᒃ ᐊᑖᑕᖓ ᑐᖁᖓᓕᕐᒪᑦ, ᐅᖃᕐᐳᑦ, “ᔫᓯᐱᐅᑉ ᐆᒥᒋᓂᐊᓕᕐᐹᑎᒍᑦ ᐊᑭᒋᐊᕐᓂᐊᓕᕐᐹᑎᒍᓪᓗ ᐱᐅᖏᑦᑐᒥᒃ ᐱᓂᐊᕐᓂᕆᓚᐅᕐᑕᕗᑦ ᒪᓕᒡᓗᒍ.” 16ᑍᒤᒻᒪᑦ ᔫᓯᐱᒧᑦ ᑎᓕᓯᓚᐅᕐᐳᑦ ᐅᖃᐅᑦᔭᐅᖁᓪᓗᒍ, ᐅᖃᕐᓗᑎᒃ, “ᐊᑖᑕᕕᑦ ᑐᖁᓚᐅᖅᑳᕋᓂ ᐱᖁᓚᐅᕐᐹᑎᒍᑦ, ᐅᖃᕐᓗᓂ, 17‘ᔫᓯᐱ ᐅᖃᐅᑦᔭᐅᔪᒫᕐᐳᖅ, ᕿᓄᕕᒋᕙᒋᑦ ᐃᓱᒪᒋᔪᓐᓁᕕᖃᖁᓪᓗᑎᑦ ᐊᖓᔪᕕᑦ ᐊᔪᕐᑐᓕᓂᕆᓚᐅᕐᑕᖏᓐᓂᒃ, ᐃᓕᖕᓄᑦ ᐱᐅᖏᑦᑐᒥᒃ ᐱᓇᓱᐊᓚᐅᕐᒪᑕ.’ ᒫᓐᓇᓗ ᕿᓄᕕᒋᕙᑦᑎᒋᑦ, ᐃᓱᒪᒋᔪᓐᓁᕐᕕᒋᓚᐅᒃᑭᑦ ᐊᔪᕐᑐᓕᓂᕆᓚᐅᕐᑕᖏᓐᓂᒃ ᐊᑖᑕᕕᑦ ᒎᑎᖓᑕ ᐱᔨᖏᑦ.” ᔫᓯᐱᓗ ᕿᐊᕗᖅ ᑖᑦᓱᒧᖓ ᐅᖃᓪᓚᒃᑎᓪᓗᒋᑦ.
18ᐊᖓᔪᖏᑕᑦᑕᐅᖅ ᐅᐸᒃᓗᒍ ᓵᖓᓄᑦ ᐹᒻᒪᒡᕕᒋᕚᑦ, ᐅᖃᕐᓗᑎᒡᓗ, “ᑕᑯᒋᑦ ᐃᓕᖕᓄᑦ ᐱᔨᐅᕗᒍᑦ.”
19ᔫᓯᐱᐅᓪᓕ ᐅᖃᐅᑎᕔᑦ, “ᓯᕘᕋᖏᓪᓗᓯ ᐅᕙᓐᓂᒃ, ᒎᑎᐅᑉ ᐃᓂᖓᓃᓐᖏᓐᓇᒪ, 20ᐃᓕᑦᓯᓕ ᐃᓱᒪᖃᓚᐅᕋᓗᐊᕐᐳᓯ ᐱᐅᖏᑦᑐᒥᒃ ᐅᕙᓐᓄᑦ ᐱᓇᓱᐊᕈᒪᓪᓗᓯ; ᒎᑎᐅᓪᓕ ᑕᒪᓐᓇ ᐱᐅᔪᒧᑦ ᐋᖅᑭᒃᓯᒪᓚᐅᕐᐹ, ᐃᓄᐃᑦ ᐅᓄᕐᑐᕐᔪᐊᑦ ᐃᓅᑎᑕᐅᖁᓪᓗᒋᑦ, ᓲᕐᓗ ᐅᓪᓗᒥ ᑍᒤᒻᒪᑦ. 21ᑍᒤᒻᒪᑦ, ᓯᕘᕋᖏᓪᓗᓯ; ᐅᕙᖓ ᓂᕿᒃᓴᖃᕐᑎᓐᓂᐊᕐᐸᑦᓯ ᕿᑐᕐᖓᓯᓗ.” ᑍᒤᓕᐅᕐᓗᓂ ᑐᓐᖓᓇᕐᑐᒥᒃ ᐅᖃᐅᑎᒃᑲᓐᓂᕐᐰᑦ ᒪᓂᒍᕐᑎᓪᓗᒋᓪᓗ.
ᔫᓯᐱᐅᑉ ᑐᖁᓂᖓ
22ᔫᓯᐱ ᐄᑦᔨᑉᑎᒦᖏᓐᓇᓚᐅᕐᐳᖅ, ᐃᓚᓂ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ; ᔫᓯᐱᓗ ᐊᕐᕌᒍᓂᒃ 110ᓂᒃ ᐃᓅᓚᐅᕐᐳᖅ. 23ᔫᓯᐱᓗ ᑕᑯᓚᐅᕐᐳᖅ ᐃᕗᕅᒥᐅᑉ ᕿᑐᕐᖓᖏᓐᓂᒃ ᐃᕐᖑᑕᒥᓂᒃ; ᒫᓇᓯᐅᓪᓗ ᐃᕐᓂᖓᑕ ᒪᑬᕆᐅᑉ ᕿᑐᕐᖓᖏᓐᓂᒃ ᐃᕐᓂᐊᖑᑎᓪᓗᒋᑦ ᑕᑯᓚᐅᕆᕗᖅ. 24ᔫᓯᐱᓗ ᖃᑕᓐᖑᑎᒥᓄᑦ ᐅᖃᕐᐳᖅ, “ᑐᖁᔭᕆᐊᒃᓯᒐᒪ; ᒎᑎᐅᓪᓕ ᑎᑭᕝᕕᒋᔪᒫᕐᐹᓯ, ᑕᕝᕙᓐᖓᓪᓗ ᓄᓇᒥᑦ ᐊᐅᓪᓚᕐᑎᑦᓱᒫᕐᐹᓯ ᓄᓇᒧᑦ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ ᐊᖏᕈᑎᒋᓚᐅᕐᑕᖓᓂ ᓄᓇᑖᖁᓪᓗᓯ.” 25#ᒨᓯᓯ ᐂᑉᐸᖏᑦ 13:19; ᔮᓱᐊ 24:32; ᐄᑉᕈᐃᓄᑦ 11:22.ᑕᕝᕙ ᔫᓯᐱ ᐅᖃᕕᖁᔨᕗᖅ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᐅᖃᕐᓗᓂ, “ᒎᑎᐅᑉ ᑎᑭᕝᕕᒋᔪᒫᕐᒪᓯ, ᑕᕝᕙ ᓴᐅᓂᒃᑲ ᓇᒃᓴᕆᐊᖃᕈᒫᕐᐸᓯ ᑕᒫᓐᖓᑦ ᐊᐅᓪᓚᓕᕈᑦᓯ.” 26ᑕᕝᕙ ᔫᓯᐱ ᑐᖁᕗᖅ, ᐊᕐᕌᒍᖃᓕᕐᓗᓂ 110ᓂᒃ; ᑐᖁᖓᔪᕐᓯᐅᑎᒧᓪᓗ ᒥᖑᐊᕐᐹᑦ, ᐃᒃᓕᕐᕕᖕᒧᓪᓗ ᐃᓕᓪᓗᒍ ᐄᑦᔨᑉᑎᒥ.
Currently Selected:
ᒨᓯᓯ ᓯᕗᓪᓖᑦ 50: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
