ᒨᓯᓯ ᓯᕗᓪᓖᑦ 38
38
ᔫᑕᓗ ᑕᒫᕆᓗ
1ᑍᑦᓱᒪᓂᐅᑎᓪᓗᒍᓕ ᔫᑕ ᖃᑕᓐᖑᑎᒥᓂᒃ ᕿᒤᕗᖅ, ᐊᑑᓚᒤᑎᓯᐅᒧᓪᓗ ᐳᓛᕆᐊᕐᓗᓂ, ᕼᐂᕋᒥᒃ ᐊᑎᖃᕐᑐᒧᑦ. 2ᑕᕝᕙᓂᓗ ᔫᑕ ᑲᑎᓯᕗᖅ ᑬᓇᓂᒥᐅᑕᐅᑉ ᓱᐊᑉ ᐸᓂᖓᓂᒃ; ᓄᓕᐊᕐᑖᕆᒐᒥᐅᒡᓗ ᐃᓐᓇᖓᖃᑎᒋᕚ, 3ᑖᓐᓇᓗ ᓄᑕᕋᒃᓴᕐᑖᕐᐳᖅ, ᐃᕐᓂᕐᑖᕐᓗᓂᓗ, ᐊᑦᓯᕐᐹᓗ ᐃᕆᒥᒃ. 4ᐊᒻᒪ ᑭᖑᓂᖓᒍᑦ ᓄᑕᕋᒃᓴᕐᑖᕐᒥᒐᒥ ᐃᕐᓂᕐᑖᕆᕗᖅ, ᑖᓐᓇᓗ ᐊᑦᓯᕐᐹᓗ ᐅᓇᓐᒥᒃ. 5ᐊᒻᒪ ᐃᕐᓂᕐᑖᒃᑲᓐᓂᕆᕗᖅ, ᑖᓐᓇᓗ ᐊᑦᓯᕐᐹᑦ ᓰᓚᒥᒃ. ᑍᑦᓱᒪᓂᐅᑎᓪᓗᒍ ᓄᓇᒥ ᓯᔨᐱᒦᓚᐅᕋᒥ ᐃᕐᓂᐊᕆᓪᓗᓂᐅᒃ.
6ᔫᑕᐅᓪᓗ ᐃᕐᓂᓂ ᐃᕆ ᐊᖓᔪᒃᓯᕐᐹᖁᑎᓂ ᓄᓕᐊᕐᑖᕐᑎᑉᐹ, ᑕᒫᕆᒥᒃ ᐊᑎᓕᖕᒥᒃ. 7ᐃᕆᓕ, ᔫᑕᐅᑉ ᐊᖓᔪᒃᓯᕐᐹᖁᑎᖓ, ᐊᑕᓂᐅᑉ ᓵᖓᓂ ᐱᐅᖏᑦᑑᓚᐅᕐᐳᖅ; ᐊᑕᓂᐅᓪᓗ ᑐᖁᑎᓚᐅᕐᐹ. 8ᑕᕝᕙ ᔫᑕ ᐅᓇᓐᒧᑦ ᐅᖃᕐᐳᖅ, “ᐊᖓᔪᕕᑦ ᓄᓕᐊᖓᓄᐊᓕᕆᑦ, ᓄᓕᐊᕐᑖᕆᓗᒍ ᖃᑕᓐᖑᑍᕐᑑᓪᓗ ᐱᔭᒃᓴᕆᔭᖓᓂᒃ ᐊᑐᕐᕕᒋᓕᕈᒃ, ᐊᖓᔪᕕᑦ ᑭᖑᕚᖏᓐᓂᒃ ᐱᕈᕐᓮᖁᓪᓗᑎᑦ.” 9ᐅᓇᓐᓕ ᖃᐅᔨᒪᒐᒥ ᑭᖑᕚᒃᓴᓕᐅᕈᓂ ᓇᖕᒥᓂᕆᓂᐊᖏᓐᓇᒥᒋᑦ; ᐊᖓᔪᐊᑕ ᓄᓕᐊᖓᓄᐊᕐᐳᖅ, ᐃᓐᓇᖓᖃᑎᒋᓕᕌᖓᒥᐅᒡᓕ ᑕᒪᐅᖓᑐᐃᓐᓇᖅ ᖃᐰᖃᑦᑕᕐᐳᖅ, ᐊᖓᔪᒥᓂᒃ ᑭᖑᕚᒃᓴᓕᐅᕈᒪᓇᓂ. 10ᐱᓂᐊᕐᓂᕆᔭᖓᓕ ᐊᑕᓂᐅᑉ ᓵᒥᓂ ᖁᕕᐊᒋᓚᐅᓐᖏᓚᖅ, ᑍᒤᒻᒪᑦ ᑐᖁᒃᑭᕚ. 11ᑕᕝᕙ ᔫᑕ ᐅᑯᐊᒥᓄᑦ ᑕᒫᕆᒧᑦ ᐅᖃᕐᐳᖅ, “ᐅᐃᒡᒐᕐᓂᐅᑐᐃᓐᓇᓕᕆ ᐊᑖᑕᕕᑦ ᐃᒡᓗᖓᓃᓪᓗᑎᑦ, ᐃᕐᓂᕋ ᓰᓚ ᐱᕈᕋᓱᐊᕐᓂᖓᓂ.” ᓯᕘᕋᓕᕋᒥ ᑐᖁᓂᐊᕋᓱᒋᒋᓪᓗᒍ ᐊᖓᔪᖏᑎᑐᑦ. ᑍᒤᒻᒪᑦ ᑕᒫᕆ ᐊᑖᑕᒥ ᐊᖏᕐᕋᖓᓄᑦ ᓄᒃᑎᓚᐅᕐᐳᖅ ᑕᕝᕙᓃᓕᕐᓗᓂᓗ.
12ᑕᒪᑐᒪᓕ ᑭᖑᕐᖓᒍᑦ ᔫᑕᐅᑉ ᓄᓕᐊᖓ, ᓱᐊᑉ ᐸᓂᖓ ᑐᖁᕗᖅ; ᔫᑕᐅᓪᓗ ᕿᒃᓵᖕᓂᖏᑕ ᐅᓪᓗᖏᑦ ᓈᖕᒪᑕ ᑭᖑᓂᖓᒍᑦ, ᑎᒻᓇᒧᐊᕈᒪᓕᕐᐳᖅ ᐃᓚᓐᓇᕆᔭᓂ ᕼᐂᕋ ᐊᑑᓚᒤᑎᒥᐅᑕᖅ ᐃᓚᒋᓪᓗᒍ, ᓰᐱᖁᑎᒥᓂᒃ ᓴᓕᓯᔨᖁᑎᒥᓄᑦ. 13ᑕᒫᕆᓕ ᐅᖃᐅᑦᔭᐅᕗᖅ, “ᓴᑮᑦ ᑎᒻᓇᒧᐊᕈᒪᓕᕐᐳᖅ ᓰᐱᖁᑎᒥᓂᒃ ᓴᓕᓯᔭᕐᑐᕐᓗᓂ,” 14ᑕᕝᕙ ᐊᓐᓄᕌᒥᓂᒃ ᐅᐃᒡᒐᕐᓂᓯᐅᑏᑦ ᐲᕐᓱᒋᑦ, ᑮᓇᓂᓗ ᒪᑐᐊᕐᓗᓂᐅᒃ ᐅᓕᒃᓱᓂᓗ, ᐃᓁᒻ ᐃᑎᕐᑕᕐᕕᖓᓂ ᐃᒃᓯᕚᓕᕐᐳᖅ, ᑎᒻᓇᒧᐊᕆᐊᑉ ᐊᖅᑯᑎᖓᓃᒻᒪᑦ; ᖃᐅᔨᒪᒐᒥ ᓰᓚ ᐱᕈᕇᕐᓯᒪᓕᕋᓗᐊᕐᒪᑦ, ᑖᑦᓱᒧᖓᓕ ᓱᓕ ᑐᓂᔭᐅᓚᐅᖏᓐᓇᒥ ᓄᓕᐊᕐᑖᕆᖁᔭᐅᓗᓂ.
15ᔫᑕᐅᓪᓕ ᑕᑯᒐᒥᐅᒃ, ᐊᖑᓐᓂᐊᕐᑎᐅᓇᓱᒋᕚ, ᑮᓇᒥᓂᒃ ᒪᑐᐊᕐᓯᓯᒪᖕᒪᑦ. 16ᑕᕝᕙ ᐅᐸᒃᐹ ᐊᖅᑯᑎᐅᑉ ᓴᓂᐊᓄᑦ, ᐅᖃᐅᑎᓪᓗᒍᓗ, “ᐃᓐᓇᖓᖃᑎᒋᓚᐅᕐᓚᒋᑦ,” ᐅᑯᐊᕆᖕᒪᖔᕐᒥᐅᒃ ᖃᐅᔨᒪᖏᓐᓇᒥ.
ᑖᑦᓱᒪ ᐅᖃᐅᑎᕚ, “ᓱᓇᒥᒃ ᑐᓂᓯᓂᐊᕋᕕᑦ, ᐃᓐᓇᖓᖃᑎᒋᒍᕕᖓ?”
17ᑖᑦᓱᒪ ᑭᐅᕚ, “ᒎᑦᓯᖁᑎᒪ ᓄᕐᕋᖓᓂᒃ ᑐᓂᓯᕕᐅᑎᓐᓂᐊᕐᐸᒋᑦ.”
ᑖᓐᓇ ᑭᐅᕗᖅ, “ᑐᓂᓯᓚᐅᖏᓐᓂᕐᓂ ᓇᓗᓁᒃᑯᑕᒃᓴᒥᒃ ᑐᓂᓯᕕᒋᔪᓐᓇᕐᐱᖔ?”
18ᑖᑦᓱᒪ ᐊᐱᕆᕚ, “ᖃᓄᐃᑦᑐᒥᒃ ᓇᓗᓁᒃᑯᑕᒥᒃ ᑐᓂᓯᕕᒋᒐᔭᕋᒃᑭᑦ?”
ᑖᓐᓇ ᑭᐅᕗᖅ, “ᓇᓗᓁᒃᑯᑕᕕᑦ ᓇᕿᑦᓯᑦᔪᑎᖓᓂᒃ ᐃᐱᐅᑕᖓᓂᒡᓗ, ᐊᔭᐅᑉᐱᐊᕐᓂᒡᓗ ᑎᒍᒥᐊᕐᑕᕐᓂᒃ.” ᑕᕝᕙ ᑖᒃᑯᐊ ᑐᓂᕔᑦ ᑖᑦᓱᒧᖓ, ᐃᓐᓇᖓᖃᑎᒋᓪᓗᒍᓗ, ᐊᕐᓇᕐᓗ ᓄᑕᕋᒃᓴᕐᑖᕐᐳᖅ ᑖᑦᓱᒪᓐᖓᑦ. 19ᐊᕐᓇᕐᓕ ᑕᕝᕙᓐᖓᑦ ᒪᑭᓐᓇᒥ ᐊᓯᐊᓄᐊᕐᐳᖅ, ᒪᑐᐊᓂᓗ ᐲᕐᓗᓂᐅᒃ ᐊᓐᓄᕌᒥᓂᒃ ᐅᐃᒡᒐᕐᓂᓯᐅᑎᓂᒃ ᐊᑎᒋᕗᖅ.
20ᔫᑕᐅᓪᓕ ᒎᑦᓯᐅᑉ ᓄᕐᕋᖓ ᐃᓚᓐᓇᕆᔭᒥᓄᑦ ᐊᑑᓚᒤᑎᒥᐅᑕᕐᒧᑦ ᓇᒃᓴᕐᑕᐅᑎᑉᐹ, ᐊᕐᓇᒧᑦ ᐊᑭᓕᐅᑎᒃᓴᖓ ᓇᓗᓁᒃᑯᓯᐅᑎᓚᐅᕐᑕᓂ ᐊᕐᓇᒥᑦ ᐱᔪᒪᓪᓗᓂᒋᑦ, ᑖᑦᓱᒪᓕ ᑎᓕᔭᖓᑕ ᐊᕐᓇᖅ ᓇᓂᔪᓐᓇᓐᖏᓛ. 21ᑕᕝᕙ ᐊᖑᑎᓂᒃ ᑕᕝᕙᓃᑦᑐᓂᒃ ᐊᐱᕐᓱᓕᕐᐳᖅ, “ᓇᐅᒡᓕ ᐊᖑᓐᓂᐊᕐᑎ ᐃᓁᒥᐅᑉ ᐊᖅᑯᑎᖓᑕ ᓴᓂᐊᓂ ᐃᒃᓯᕙᓚᐅᕐᑐᖅ?”
ᑖᒃᑯᐊ ᑭᐅᕚᑦ, “ᐊᖑᓐᓂᐊᕐᑎᒥᒃ ᑕᒫᓃᑦᑐᖃᓚᐅᓐᖏᓚᖅ.”
22ᑕᕝᕙ ᔫᑕᒧᑦ ᐅᑎᕐᐳᖅ, ᐅᖃᕐᓗᓂᓗ, “ᐊᕐᓇᖅ ᓇᓂᓐᖏᓚᕋ; ᐊᖑᑎᓪᓗ ᑕᕝᕙᓃᑦᑐᑦ ᐅᖃᕐᓗᑎᒃ, ‘ᐊᖑᓐᓂᐊᕐᑎᒥᒃ ᑕᒫᓃᑦᑐᖃᓚᐅᓐᖏᓚᖅ.’”
23ᑕᕝᕙ ᔫᑕ ᑭᐅᕗᖅ, “ᑍᒃᑯᐊ ᑐᓂᓚᐅᕐᑕᒃᑲ ᓇᖕᒥᓂᕐᑖᕆᓕᕐᓕᒋᑦ, ᐃᓄᖕᓂᑦ ᒥᑕᐅᑎᒋᔭᐅᖁᓇᓄᒃ; ᒎᑦᓯᐅᑉ ᓄᕐᕋᖓ ᓇᒃᓯᐅᑎᒋᐊᕋᓗᐊᕋᒃᑯ, ᐊᕐᓇᖅ ᓇᓂᔪᓐᓇᓚᐅᓐᖏᓚᑦ.” 24ᑕᖅᑮᓪᓕ ᐱᖓᓱᐸᓗᐃᑦ ᓈᓯᒪᓕᕐᑎᓪᓗᒋᑦ ᔫᑕ ᐅᖃᐅᑦᔭᐅᕗᖅ, “ᑕᒫᕆ ᐅᑯᐊᑦ ᐊᖑᓐᓂᐊᕐᑎᐅᓐᖑᐊᕐᑐᕕᓂᐅᕗᖅ; ᓄᑕᕋᒃᓴᕐᑖᕐᑐᕕᓂᐅᓪᓗᓂᓗ ᐊᖑᓐᓂᐊᕐᓂᒃᑯᑦ.”
ᑕᕝᕙ ᔫᑕ ᐅᖃᕐᐳᖅ, “ᕾᑎᑕᐅᓗᓂ, ᐃᑯᐊᓪᓚᒃᑎᑕᐅᓕ.”
25ᑖᓐᓇᓕ ᑕᕝᕗᖓ ᕾᑎᑕᐅᓕᕐᑎᓪᓗᒍ, ᓴᑭᒥᓂᒃ ᐅᖃᐅᑦᔭᐅᖁᔨᕗᖅ, “ᐊᖑᒻᒧᑦ ᐅᑯᓂᖓ ᐱᖁᑎᓕᖕᒧᑦ, ᓄᑕᕋᒃᓴᖃᕐᑎᑕᐅᕗᖓ.” ᐅᖃᕐᓗᓂᓗ, “ᓇᓗᓁᕐᓯᓕᕆᑦ, ᕿᓄᕕᒋᕙᒋᑦ ᐅᑯᐊ ᑭᐊ ᐱᖏᑦ, ᓇᓗᓁᒃᑯᑕᖅ ᓇᕿᑦᑎᑦᔪᑎ, ᐃᐱᐅᑕᖓᓗ ᐊᔭᐅᑉᐱᐊᕐᓗ.”
26ᔫᑕᐅᓪᓕ ᑖᒃᑯᐊ ᐱᒋᓂᕋᕐᓱᒋᑦ ᐅᖃᕐᐳᖅ, “ᑖᓐᓇ ᐅᕙᓐᓂᑦ ᓱᓕᓂᕐᓴᐅᕗᖅ, ᐃᕐᓂᓐᓄᑦ ᓰᓚᒧᑦ ᑐᓂᓚᐅᖏᓐᓇᒃᑯ ᓄᓕᐊᕐᑖᕆᔭᐅᖁᓪᓗᒍ.” ᔫᑕᐅᓪᓕ ᑕᒪᑐᒪ ᑭᖑᓂᖓᒍᑦ ᐃᓐᓇᖓᖃᑎᒋᒃᑲᓐᓂᓚᐅᕈᓐᓂᕐᐹ.
27ᐃᕐᓂᕕᒃᓴᖓᓕ ᓇᓪᓕᐅᑎᖕᒪᑦ, ᖃᐅᔨᔭᐅᓕᕐᐳᖅ ᒪᕐᕈᓕᐊᖕᓂᒃ ᓈᖓᓃᑦᑐᖃᕐᒪᑦ. 28ᐃᕐᓂᓱᓕᕐᒪᓪᓗ, ᓄᑕᕋᐅᑉ ᑕᓕᖓ ᓄᐃᕗᖅ; ᐃᕐᓂᓱᒃᓰᔫᓪᓗ ᐊᐅᐸᓪᓚᓇᕆᒃᑐᒥᒃ ᐃᕙᓗᒃᓴᔭᒥᒃ ᕿᓚᒃᓯᕕᒋᕚ ᐊᒡᒐᐅᑎᖓᒍᑦ ᐅᖃᕐᓗᓂᓗ, “ᐅᓇ ᓯᕗᓪᓕᐅᕗᖅ.” 29ᕿᓚᒃᓯᕕᒋᔭᖓᑕᓕ ᑕᓕᓂ ᐅᑎᕐᑎᒻᒪᒍ, ᐂᑉᐸᖓ ᓯᕗᓪᓕᐅᖔᓕᕐᓗᓂ ᐊᓂᕗᖅ; ᐃᕐᓂᓱᒃᓰᔪᖅ ᐅᖃᓕᕐᐳᖅ, “ᑍᒫᒃ ᑕᕝᕙ ᐊᓂᖅᑳᕈᒪᕗᑎᑦ!” ᑖᓐᓇ ᐊᑦᓯᕐᐹᑦ ᐱᕆᔾᒥᒃ. 30ᑭᖑᓂᖓᒍᑦ ᓄᑲᖓ ᐊᓂᓕᕆᕗᖅ ᐊᒡᒐᐅᑎᖓᒍᑦ ᐊᐅᐸᓪᓚᕆᒃᑐᒥᒃ ᐃᕙᓗᒃᓴᒥᒃ ᕿᓚᒃᓯᕕᒋᓯᒪᓪᓗᓂ; ᑖᓐᓇᓕ ᐊᑦᓯᕐᐹᑦ ᔨᕋᒥᒃ.
Currently Selected:
ᒨᓯᓯ ᓯᕗᓪᓖᑦ 38: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
