ᒨᓯᓯ ᓯᕗᓪᓖᑦ 34
34
ᑍᓇᐅᑉ ᖁᓄᔪᕐᓂᐊᕐᑕᐅᓂᖓ
1ᑍᓇᓕ, ᔧᑰᑉ ᓕᐊᓪᓗ ᐸᓂᖓ, ᐳᓛᕆᐊᓚᐅᕐᐳᖅ ᓄᓇᐅᑉ ᓇᔪᕐᑕᖓᑦᑕ ᐊᕐᓇᖏᓐᓄᑦ; 2ᓯᑭᒻᒥᐅᓪᓕ ᕼᐊᒧᕆᐅᑉ ᐃᕐᓂᖓᑕ ᕼᐃᕔᑎᒥᐅᑕᐅᑉ, ᑕᕝᕙᓂ ᐊᖓᔪᖅᑳᖑᔫᑉ, ᑕᑯᒐᒥᐅᒃ ᑎᒍᕚ ᖁᓄᑎᓪᓗᒍᓗ ᐃᓐᓇᖓᖃᑎᒋᕚ, 3ᑕᕝᕙ ᐃᓗᒥᒍᑦ ᐅᖓᓕᕐᐳᖅ ᑍᓇᒧᑦ ᔧᑰᑉ ᐸᓂᖓᓄᑦ; ᐅᐃᒡᒐᓱᒃ ᓇᒡᓕᒋᒐᒥᐅᒃ ᐃᓚᓐᓂᕐᓴᕐᓗᒍ ᐅᖄᕕᒋᓕᕐᐹ. 4ᓯᑭᒻᒥᐅᓪᓕ ᐊᑖᑕᓂ ᕼᐊᒧᕆ ᐅᖃᐅᑎᕚ, “ᐅᐃᒡᒐᓱᖕᒥᒃ ᐆᒥᖓ ᓄᓕᐊᕐᑖᕐᑎᓚᐅᓐᖓ.”
5ᔧᑯᓗ ᑐᓴᕐᐳᖅ ᐸᓂᖓᑕ ᑍᓇᐅᑉ ᓴᓗᒤᓕᑎᑕᐅᓂᖓᓂᒃ, ᐃᕐᓂᖏᑦ ᐱᕈᕐᓰᕕᖕᒦᒻᒪᑕ ᐆᒪᔪᖁᑎᖏᓐᓂᒃ ᑲᒪᓪᓗᑎᒃ, ᖃᓄᐃᓕᒋᐊᓚᐅᓐᖏᓚᖅ ᐃᕐᓂᖏᑦ ᐅᑎᓚᐅᖏᓐᓂᖏᓐᓂ. 6ᓯᑭᒻᒥᐅᓪᓗ ᐊᑖᑕᖓᑕ ᕼᐊᒧᕆᐅᑉ ᔧᑯ ᐅᐸᒃᓗᒍ ᐅᖃᖃᑎᒋᔭᕐᑐᕐᐹ, 7ᔧᑰᓪᓕ ᐃᕐᓂᖏᑦ ᐱᕈᕐᓰᕕᖕᒥᓐᖔᕐᓗᑎᒃ ᑕᕝᕗᓐᖓᕋᒥᒃ ᑕᒪᑐᒥᖓᓗ ᑐᓴᓕᕋᒥᒃ; ᐃᓗᐃᓪᓕᕐᐳᑦ ᓂᓐᖓᒻᒪᕆᒃᓗᑎᒡᓗ, ᓯᑭᒥ ᑍᒤᓕᐅᕐᓯᒪᖕᒪᑦ ᓈᒻᒪᖏᑦᑐᒥᒃ ᐃᓴᕆᐊᓕᒥᐅᓂᒡᓗ ᒥᑕᐅᑎᖃᕐᓗᓂ ᔧᑰᑉ ᐸᓂᖓᓂᒃ ᐃᓐᓇᖓᖃᑎᖃᕐᓂᕐᒥᓄᑦ, ᑍᒤᓕᐅᕐᑐᖃᕆᐊᖃᕐᑎᓐᓇᒍ. 8ᕼᐊᒧᕆᐅᓪᓕ ᐅᖃᕐᕕᒋᓪᓗᒋᑦ, ᐅᖃᕐᐳᖅ, “ᐃᕐᓂᕋ ᓯᑭᒻ ᐸᓂᖕᓂᒃ ᐅᖓᓕᕐᒪᑦ; ᑐᒃᓯᕋᕐᕕᒋᓕᕐᐸᒋᑦ, ᓄᓕᐊᕐᑖᕐᑎᓚᐅᕈᒃ ᑖᑦᓱᒥᖓ. 9ᓄᓕᐊᓂᖃᑦᑕᐅᑎᔪᓐᓇᕐᓯᓚᐅᕐᑕ; ᐸᓂᓯ ᐅᕙᑦᑎᓐᓄᑦ ᑐᓂᓕᕐᓯᐅᒃ, ᐸᓂᕗᓪᓗ ᐱᓂᐊᕆᕙᓯ. 10ᑕᒫᓂ ᓄᓇᖅᑲᑎᒌᖕᓂᐊᕋᑦᑕ, ᓇᓂᑐᐃᓐᓇᑦᓯᐊᕐᓗ ᑕᒫᓂ ᓄᓇᒋᔪᒪᔭᑦᓯᓐᓂ ᓄᓇᖃᕈᓐᓇᕐᓂᐊᕐᐳᓯ; ᐃᓂᖃᕐᓗᓯ ᑕᐅᕐᓰᑦᔪᑎᕙᒡᓗᓯᓗ, ᓄᓇᖁᑎᑖᕐᐸᒡᓗᓯᓗ.”
11ᑕᕝᕙ ᓯᑭᒻ ᐅᖃᓕᕐᐳᖅ ᑍᓇᐅᑉ ᐊᑖᑕᖓᓄᑦ ᐊᓂᖏᓐᓄᓪᓗ, “ᖁᕕᐊᒋᔭᐅᔪᒪᔪᖓ ᐃᓕᑦᓯᓐᓄᑦ, ᓱᓇᑐᐃᓐᓇᑦᓯᐊᒥᒃ ᐱᔪᒪᑐᐊᕈᑦᓯ ᑕᕝᕙ ᑐᓂᓯᔪᓐᓇᕐᐳᖓ. 12ᑐᒃᓯᕋᓚᐅᕆᑦᓯ ᓱᓇᒥᒃ ᐊᑭᓕᕐᑕᐅᔪᒪᖕᒪᖔᑦᓯ, ᓄᓕᐊᒃᓴᒧᑦ, ᑐᓂᕐᕈᑕᐅᖁᔭᑦᓯᓐᓂᒡᓘᓐᓃᑦ ᑐᓂᔭᕆᐊᖃᕐᑕᓐᓂᒃ ᐱᔪᒪᔭᑦᓯᓐᓂᒃ, ᑕᕝᕙ ᑐᓂᓯᕕᒋᓂᐊᕐᐸᑦᓯ ᖃᓄᑐᐃᓐᓇᖅ ᐅᖃᑐᐊᕈᑦᓯ ᐅᕙᓐᓄᑦ; ᑖᑦᓱᒥᖓ ᓄᓕᐊᕐᑖᕈᓐᓇᕐᑎᑕᐅᑦᓴᓚᐅᕈᒪ.”
13ᔧᑰᑉ ᐃᕐᓂᖏᑦ ᑭᐅᓕᕐᐳᑦ ᓯᓔᕐᕆᒃᓯᕐᓗᑎᒃ ᓯᑭᒻᒥᒃ ᐊᑖᑕᖓᓂᒡᓗ ᕼᐊᒧᕆᒥᒃ, ᓇᕐᕈᓇᕐᓯᑎᑦᓯᓚᐅᕐᓂᖓᓄᑦ ᓇᔭᖓᓐᓂᒃ ᑍᓇᒥᒃ. 14ᐅᖃᐅᑎᓪᓗᒋᓪᓗ, “ᑍᒤᓕᐅᕈᓐᓇᓐᖏᓚᒍᑦ, ᓇᔭᕗᑦ ᓄᓕᐊᕐᑖᖑᑎᑦᓱᓐᓇᓐᖏᓐᓇᑦᑎᒍ ᐊᖑᒻᒧᑦ ᑭᐱᔭᐅᓯᒪᖏᑦᑐᒧᑦ; ᑕᒪᓐᓇ ᐅᕙᑦᑎᓐᓄᑦ ᑲᓐᖑᓲᑎᒃᓴᐅᒐᔭᕐᒪᑦ. 15ᐃᒤᓕᐅᕈᑦᓯ ᑭᓯᐊᓂ ᐊᖏᕈᓐᓇᕐᑐᒍᑦ, ᐅᕙᑦᑎᓐᓂᒃ ᐊᑦᔨᖃᓕᕈᑦᓯ ᑭᐱᔭᐅᓯᒪᓕᕐᓗᓯ ᐊᖑᑎᓕᒫᑦ. 16ᑕᕝᕙ ᐸᓂᕗᑦ ᑐᓂᔪᓐᓇᓕᕋᔭᕐᐸᕗᑦ ᐃᓕᑦᓯᓐᓄᑦ, ᐸᓂᑦᓯᓐᓂᒡᓗ ᓄᓕᐊᕐᑖᕈᓐᓇᕐᓯᓗᑕ. ᐃᓕᑦᓯᓐᓂᒃ ᓄᓇᖅᑲᑎᖃᓕᕐᓗᑕ ᐊᑕᐅᓯᐅᖃᑎᒌᓕᕐᓗᑕᓗ. 17ᑕᒪᓐᓇᓕ ᐱᐅᓯᐅᖁᔭᕗᑦ ᐊᖏᖏᒃᑯᑦᓯᐅᒃ ᑭᐱᔭᐅᓂᐊᖏᒃᑯᑦᓯᓗ, ᐅᓇ ᓇᔭᕗᑦ ᑎᒍᓗᒍ, ᐊᐅᓪᓚᕐᓂᐊᕐᐳᒍ.”
18ᑖᒃᑯᐊᓗ ᐅᖃᐅᓰᑦ ᕼᐊᒧᕆᐅᑉ ᓈᒻᒪᒋᕔᑦ ᐃᕐᓂᖓᑕᓗ ᓯᑭᒻᒥᐅᑉ. 19ᑖᓐᓇᓗ ᐊᖑᑦ ᐃᓅᓱᒃᑐᖅ ᐱᒋᐊᑦᓴᐅᑎᒋᓚᐅᕐᐳᖅ ᐃᓱᒪᓕᐅᕈᑕᐅᔪᒥᒃ, ᐅᖓᓕᕋᒥ ᔧᑰᑉ ᐸᓂᖓᓂᒃ. ᐅᐱᒋᔭᐅᓂᕐᐹᐅᓕᕐᓗᓂᓗ ᐃᓚᒥᓂᑦ.
20ᕼᐊᒧᕆᓗ ᐃᕐᓂᖓᓗ ᓯᑭᒻᒥ ᑲᑎᕕᐅᕙᒃᑐᓄᐊᕐᓗᑎᒃ ᐃᒡᓗᒐᓮᑦ ᐃᑎᕐᑕᕐᕕᖓᓄᑦ; ᐅᖃᓪᓚᓕᕐᐳᑦ ᓄᓇᖃᑎᒥᖕᓄᑦ: 21“ᐅᑯᐊ ᐃᓄᐃᑦ ᐃᓚᒋᔭᒃᓴᑦᓯᐊᑦ ᐅᕙᑦᑎᓐᓄᑦ; ᑕᒫᓂ ᓄᓇᖃᓚᐅᕐᓕᑦ ᑕᐅᕐᓰᖃᑦᑕᕈᓐᓇᕐᓗᑎᒡᓗ ᑕᒫᓂ. ᑕᒪᓐᓇᓗ ᓄᓇ ᑖᒃᑯᓄᖓ ᐊᖏᓂᖓ ᓈᒻᒪᒡᓗᓂ; ᐸᓂᖏᓐᓂᒃ ᓄᓕᐊᓂᒍᓐᓇᓚᐅᕐᑕ ᐅᕙᒍᓪᓗ ᐸᓂᑦᑎᓐᓂᒃ ᓄᓕᐊᕐᑖᖑᑎᑦᓯᓗᑕ ᑖᒃᑯᓄᖓ. 22ᐅᑯᐊ ᐊᖑᑎᑦ ᐃᒤᓕᐅᕈᑦᑕ ᑭᓯᐊᓂ ᐊᖏᕈᓐᓇᕐᑐᑦ ᓄᓇᖅᑲᑎᖃᕈᒪᓗᑎᒃ ᐅᕙᑦᑎᓐᓂᒃ, ᐃᓅᖃᑎᒌᒍᑎᒃᓴᑦᑎᓐᓂᒃ ᐊᑕᐅᓯᐅᓗᑕ; ᐊᖑᑎᓕᒫᑦ ᓄᓇᖃᑎᕗᑦ ᑭᐱᔭᐅᓂᐊᕐᐸᑕ ᑭᓯᐊᓂ, ᑖᒃᑯᐊ ᑭᐱᔭᐅᓯᒪᖕᒪᑕ. 23ᐃᒻᒧᒃᓯᐅᒐᖁᑎᖏᑦ ᓄᓇᖁᑎᖏᓪᓗ ᐆᒪᔪᖁᑎᓕᒫᖏᓪᓗ ᐱᒋᓕᕐᓂᐊᓐᖏᓚᕘᑦ? ᐊᖏᖃᑎᒋᒍᑦᑎᒍ ᑭᓯᐊᓂ, ᓄᓇᖅᑲᑎᒋᓕᕐᓂᐊᕋᑦᑎᒍ.” 24ᐃᒡᓗᒐᓴᖕᒥᐅᑦ ᐃᑎᕐᑕᕐᕕᒃᑯᑦ ᐊᓂᔪᓕᒫᑦ ᐊᖏᖃᑕᐅᕗᑦ ᕼᐊᒧᕆᐅᑉ ᐃᕐᓂᖓᑕᓗ ᓯᑭᒻᒥᐅᑉ ᐅᖃᐅᓯᖏᓐᓂᒃ; ᐊᖑᑎᓪᓗ ᑕᒪᕐᒥᒃ ᑭᐱᔭᐅᕗᑦ, ᐊᓂᕙᒃᑐᓕᒫᑦ ᐃᓗᒐᓮᑦ ᐃᑎᕐᑕᕐᕕᖓᒍᑦ.
25ᐅᓪᓗᐃᓪᓕ ᐱᖓᓱᑦ ᐊᓂᒍᕐᑎᓪᓗᒋᑦ, ᐊᖑᑎᑦ ᓱᓕ ᐋᓐᓂᐊᑎᓪᓗᒋᑦ ᑭᐱᔭᐅᓂᕕᓂᕐᒥᖕᓄᑦ, ᔧᑰᑉ ᐃᕐᓂᖏᒃ ᒪᕐᕉᒃ, ᓯᒥᐅᓂᓗ ᓕᕔᓗ, ᑍᓇᐅᑉ ᐊᓂᖏᒃ, ᓴᕕᒡᔪᐊᒡᒋᕐᓗᑎᒃ ᐃᒡᓗᒐᓴᖕᓃᑦᑐᑦ ᑎᓪᓕᓐᖏᓈᕐᓗᒋᑦ, ᐊᖑᑎᓕᒫᑦ ᑐᖁᕋᕐᐰᑦ, 26ᕼᐊᒧᕆ ᐃᕐᓂᖓᓗ ᓯᑭᒻᒥ ᓴᕕᒡᔪᐊᒧᑦ ᑐᖁᑉᐹᒃ, ᑍᓇᓗ ᑎᒍᓪᓗᒍ ᓯᑭᒻᒥᐅᑉ ᐃᒡᓗᖓᓂᑦ, ᑕᕝᕙᓐᖓᓪᓗ ᐊᓂᓪᓗᑎᒃ. 27ᔧᑰᓪᓕ ᐃᕐᓂᖏᑦ ᑐᖁᑕᐅᓯᒪᔪᓄᐊᕐᐳᑦ, ᑎᒎᖅᑬᕕᒋᓪᓗᒋᓪᓗ ᐃᒡᓗᒐᓴᒡᔪᐊᕐᒥᐅᑦ, ᓇᔭᖓᑦᑕ ᓇᕐᕈᓇᕐᓯᑎᑕᐅᓯᒪᓂᖓᓄᑦ. 28ᓰᐱᖁᑎᖏᓂᒃ ᐱᕗᑦ, ᐃᒻᒧᒃᓯᐅᒐᖁᑎᖏᓐᓂᒡᓗ, ᓯᐅᑎᖅᑯᕐᑐᔪᓂᒡᓗ ᓱᓇᓕᒫᓂᒡᓗ ᐃᒡᓗᒐᓴᖕᓃᑦᑐᓂᒃ ᐱᕗᑦ ᐱᕈᕐᓰᕕᖕᓃᑦᑐᓂᒡᓗ. 29ᐊᔪᕐᓴᖏᑦᔪᑎᓕᒫᖏᓐᓂᒃ ᐱᕗᑦ, ᕿᑐᕐᖓᖏᑦ ᓄᓕᐊᖏᓪᓗ ᑎᒍᕔᑦ, ᐃᒡᓗᒥᐅᑕᓕᒫᖏᓪᓗ ᐱᑖᕆᓪᓗᒋᑦ.
30ᔧᑯᓗ ᐅᖃᕐᐳᖅ ᓯᒥᐅᓂᒧᑦ ᓕᕔᒧᓪᓗ, “ᐊᑲᐅᖏᑦᔪᑎᒃᓴᕐᑖᕐᑎᑉᐸᑦᓯᓐᖓ; ᐆᒥᓇᕐᓯᑎᑦᓱᖓᓗ ᑕᒫᓂ ᓄᓇᖃᕐᑐᓄᑦ ᑬᓇᓂᒥᐅᓄᑦ, ᐱᕆᔧᑎᓄᓪᓗ; ᐅᓄᕐᑐᓂᒃ ᐃᓄᖁᑎᖃᖏᓐᓇᒪ; ᑕᒪᒃᑯᐊᓕ ᑲᑎᓪᓗᑎᒃ ᐅᕙᓐᓄᑦ ᐅᓇᑕᕆᐊᓕᕐᐸᑕ, ᐃᓚᓕᒫᑦᓯᐊᒃᑲ ᑕᒪᕐᒥᒃ ᓄᖑᑕᐅᒐᔭᕐᐳᑦ ᐃᒡᓗᒥᐅᖃᑎᒃᑲᓗ.”
31ᑖᒃᑯᐊᒡᓕ ᑭᐅᕗᒃ, “ᓇᔭᕗᑦ ᓄᓕᐊᒐᑐᐃᓐᓇᕐᑎᑐᑦ ᑍᒤᑕᐅᔭᕆᐊᖃᕐᐹ?”
Currently Selected:
ᒨᓯᓯ ᓯᕗᓪᓖᑦ 34: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
