ᒨᓯᓯ ᓯᕗᓪᓖᑦ 30
30
1ᕅᒋᓕᓕ ᕿᑐᕐᖓᕐᑖᕐᓚᐅᓐᒋᓚᖅ ᔧᑯᒥᑦ, ᑭᖑᓂᖓᒍᓪᓗ ᐊᖓᔪᓂ ᓯᒡᒐᑎᓕᕐᐹ ᔧᑯᒧᓪᓗ ᐅᖃᕐᓗᓂ, “ᕿᑐᕐᖓᕐᑖᕐᑎᓚᐅᓐᖓ, ᕿᑐᕐᖓᕐᑖᖏᒃᑯᒪ ᑐᖁᑐᐃᓐᓇᖔᕈᒪᓕᕐᐳᖓ.”
2ᔧᑯᓗ ᓂᓐᖓᒃᐳᖅ ᕅᒋᓕᒧᑦ ᐅᖃᕐᓗᓂᓗ, “ᒎᑎᐅᑉ ᐃᓂᖓᓃᑉᐳᖔ? ᑖᑦᓱᒪ ᑭᓯᒥ ᕿᑐᕐᖓᕐᑖᕐᑎᑦᓯᒪᓐᖏᓛᑎᑦ?”
3ᕅᒋᓕᓗ ᐅᖃᕐᐳᖅ, “ᐅᓇ ᐱᔨᒐ ᐱᓪᕼᐊ; ᑐᑎᓚᐅᕈᒃ, ᐅᕙᓐᓂᒃ ᕿᑐᕐᖓᕐᑖᕐᑎᑦᓯᔪᓐᓇᖁᓪᓗᒍ, ᑕᕝᕙ ᕿᑐᕐᖓᕐᑖᕐᓂᐊᕐᐳᖓ ᑖᑦᓱᒨᓇ.” 4ᑍᒤᒻᒪᑦ ᐱᔨᓂ ᐱᓪᕼᐊ ᑐᓂᕚ ᐅᐃᒥᓄᑦ ᓄᓕᐊᕆᔭᐅᖁᓪᓗᒍ; ᔧᑰᓪᓗ ᐃᓐᓇᖓᖃᑎᒋᕚ. 5ᐱᓪᕼᐊᓗ ᓯᖎᓕᕐᐳᖅ ᔧᑯᒥᑦ ᐃᕐᓂᕐᑖᕐᓗᓂᓗ. 6ᕅᒋᓕᓗ ᐅᖃᕐᐳᖅ, “ᒎᑎᐅᑉ ᓈᒻᒪᒋᔭᓐᓂᒃ ᐱᓂᐊᕐᕕᒋᕚᖓ; ᑐᒃᓯᐊᕐᓂᓐᓂᒡᓗ ᑐᓴᕐᓯᒪᕚᖓ ᐃᕐᓂᕐᑖᕐᑎᓪᓗᓂᖓᓗ”; ᑍᒤᒻᒪᑦ ᐊᑦᓯᕐᐹ ᑖᓐᒥᒃ. 7ᕅᒋᓕᐅᓪᓗ ᐱᔨᖓ ᐱᓪᕼᐊ ᓯᖎᓕᒃᑲᓐᓂᕐᐳᖅ ᔧᑯᒥᑦ ᐃᕐᓂᕐᑖᒃᑲᓐᓂᕐᓗᓂᓗ, 8ᕅᒋᓕᓗ ᐅᖃᕐᐳᖅ, “ᐊᒃᓱᕈᒻᒪᕆᒃᓗᖓ ᐊᖓᔪᓐᓂᒃ ᐅᓇᑕᕆᐊᖃᓚᐅᕋᒪ, ᒫᓐᓇᓕ ᓵᓚᖃᕐᐳᖓ”; ᑍᒤᒻᒪᑦ ᐊᑦᓯᕐᐹ ᓈᑉᑕᓕᒥᒃ.
9ᓕᐊᓕ ᖃᐅᔨᓕᕋᒥ ᕿᑐᕐᖓᕐᑖᒃᑲᓐᓂᕈᓐᓃᕐᓂᕐᒥᓂᒃ, ᐱᔨᓂ ᔨᐅᓪᐸ ᑐᓂᕚ ᔧᑯᒧᑦ ᓄᓕᐊᕆᔭᐅᖁᓪᓗᒍ. 10ᑕᕝᕙ ᓕᐊᑉ ᐱᔨᖓ ᔨᐅᓪᐸ ᐃᕐᓂᕐᑖᕐᐳᖅ ᔧᑯᒥᑦ. 11ᓕᐊᓗ ᐅᖃᕐᐳᖅ, “ᐅᐱᓐᓇᕐᑐᒥᒃ ᐱᕗᖓ”; ᑍᒤᒻᒪᑦ ᐊᑦᓯᕐᐹ ᒑᑎᒥᒃ. 12ᓕᐊᓪᓗ ᐱᔨᖓ ᔨᐅᓪᐸ ᐃᕐᓂᕐᑖᒃᑲᓐᓂᕐᐳᖅ ᔧᑯᒥᑦ, 13ᓕᐊᓗ ᐅᖃᕐᐳᖅ, “ᐊᒃᓱᒻᒪᕆᐊᓗᒃ ᖁᕕᐊᓱᒃᐳᖓ! ᒫᓐᓇᒥᑦ ᐊᕐᓇᓂᑦ ᑍᔭᐅᕙᖕᓂᐊᓕᕐᐳᖓ ᖁᕕᐊᓱᒃᑐᒥᒃ”; ᑍᒤᒻᒪᑦ ᐊᑦᓯᕐᐹ ᐋᓱᕆᒥᒃ.
14ᓂᐊᖂᔭᒃᓴᓂᒡᓕ ᑲᑎᕐᓱᐃᑎᓪᓗᒋᑦ ᕉᐱᓂ ᐱᕈᕐᓰᕕᖕᒧᐊᕋᒥ ᓇᓂᓯᕗᖅ ᒫᓐᑐᕅᒃᓯᒥᒃ#30:14 ᒫᓐᑐᕅᒃᓯ ᑕᒪᒃᑯᐊ ᐱᕈᕐᑐᕕᓃᑦ ᐃᓱᒪᒋᔭᐅᔪᑦ ᕿᑐᕐᖓᕐᑖᕐᓇᕐᑑᓇᓱᒋᔭᐅᓪᓗᑎᒃ ᑍᒤᒻᒪᑦ ᐊᑐᕐᑕᐅᕙᓚᐅᕐᐳᑦ ᕿᑐᕐᖓᕐᑖᕈᒪᔪᓄᑦ ᑖᑦᓱᒪᓗ ᐊᓈᓇᒥᓄᐊᕈᑎᕚ ᓕᐊᒧᑦ. ᕅᒋᓕᓗ ᓕᐊᒧᑦ ᐅᖃᕐᐳᖅ, “ᑕᕝᕙᓐᖓᑦ ᐃᕐᓂᕐᐱᑦ ᓇᓂᔭᖓᑕ ᐃᓚᖓᓐᓂᒃ ᕾᑦᓯᓚᐅᕆᑦ ᒫᓐᑐᕅᒃᓯᒥᒃ.”
15ᓕᐊᑉ ᑭᐅᕚ, “ᐅᐃᓐᓂᒃ ᐊᕐᓵᕐᓯᒪᒐᕕᖓ ᑕᒪᓐᓇᓕ ᓈᒻᒪᓐᖏᓛᖅ? ᒫᓐᓇᓕ ᐃᕐᓂᕐᒪ ᒫᓐᑐᕅᒃᓯ ᓇᓂᔭᖓ ᐊᕐᓵᓯᑦᔪᑎᒋᓇᓱᐊᓕᕆᕙᑦ.”
ᕅᒋᓕᓗ ᐅᖃᕐᐳᖅ, “ᐃᕐᓂᕐᐱᑦ ᓇᓂᔭᖓ ᒫᓐᑐᕅᒃᓯ ᐅᕙᓐᓄᐊᕐᓂᐊᕈᕕᐅᒃ, ᐅᓐᓄᒃ ᔧᑯ ᓯᓂᖃᑎᒋᔪᓐᓇᕐᓂᐊᕐᐸᑦ.”
16ᔧᑯᓕ ᐅᓐᓄᒃᑎᓪᓗᒍ ᑎᑭᓕᕐᒪᑦ ᐱᕈᕐᓰᕕᖕᒥᓐᖔᕐᓗᓂ, ᓕᐊᑉ ᐸᕐᕆᐊᕐᐹ ᐅᖃᐅᑎᓪᓗᒍᓗ, “ᐅᓐᓄᒃ ᓯᓂᖃᑎᒋᓂᐊᕋᒃᑭᑦ, ᐊᑭᓕᐅᑎᖃᖅᑲᐅᒐᒪ ᐃᕐᓂᕐᒪ ᓇᓂᔭᕕᓂᖓᓂᒃ ᒫᓐᑐᕅᒃᓯᒥᒃ.” ᑍᒤᒻᒪᑦ ᑕᒪᑐᒪᓂ ᐅᓐᓄᒥ ᔧᑰᑉ ᐃᓐᓇᖓᖃᑎᒋᕚ.
17ᒎᑎᐅᓪᓗ ᓕᐊᑉ ᑐᒃᓯᐊᕐᓂᖓ ᑭᐅᕚ, ᓯᖎᓕᕐᓗᓂᓗ ᔧᑯᒥᓪᓗ ᐃᕐᓂᕐᑖᕐᐳᖅ ᑕᓪᓕᒪᖓᓐᓂᒃ. 18ᓕᐊᓗ ᐅᖃᕐᐳᖅ, “ᒎᑎᐅᑉ ᐊᑭᓕᕐᓯᒪᕚᖓ, ᐊᕐᓇᖅ ᐱᔨᒐ ᑐᓂᓯᒪᓚᐅᕋᒃᑯ ᐅᐃᓐᓄᑦ”; ᑍᒤᒻᒪᑦ ᐃᕐᓂᓂ ᐊᑦᓯᕐᐹ ᐃᓴᑳᕆᒥᒃ. 19ᓕᐊᓗ ᑭᖑᓂᖓᒍᑦ ᓱᓕ ᓯᖎᓕᒃᑲᓐᓂᕐᐳᖅ ᔧᑯᒥᑦ ᐃᕐᓂᕐᑖᒃᑲᓐᓂᕐᐳᕐᓗ ᐱᖓᓲᔪᕐᑐᒋᓕᕐᑕᖓᓂᒃ. 20ᓕᐊᓗ ᐅᖃᕐᐳᖅ, “ᒎᑎᐅᑉ ᑐᓂᕐᕈᑎᑦᓯᐊᕚᓗᖕᒥᒃ ᑐᓂᓯᕕᒋᕚᖓ; ᒫᓐᓇᓕ ᐅᐃᒪ ᐃᓚᓕᐅᕐᓂᐊᓕᕐᐹᖓ, ᐃᕐᓂᕐᑖᕐᑎᓯᒪᓕᕋᒃᑯ ᐱᖓᓲᔪᕐᑐᓂᒃ”; ᑍᒤᒻᒪᑦ ᐃᕐᓂᓂ ᐊᑦᓯᕐᐹ ᓯᐳᓗᓂᒥᒃ. 21ᑭᖑᓂᖓᒍᑦ ᐸᓂᒃᑖᕐᐳᖅ, ᑖᓐᓇᓗ ᐊᑦᓯᕐᐹ ᑍᓇᒥᒃ.
22ᒎᑎᐅᓪᓗ ᕅᒋᓕ ᐃᖅᑲᐅᒪᒐᒥᐅᒃ; ᑐᒃᓯᐊᕐᓂᖓ ᑭᐅᓪᓗᒍ ᕿᑐᕐᖓᕐᑖᕈᓐᓇᕐᓯᑎᑉᐹ. 23ᕅᒋᓕᓗ ᓯᖎᓕᕐᐳᖅ ᐃᕐᓂᕐᑖᕐᓗᓂᓗ, ᐅᖃᕐᐳᕐᓗ, “ᒎᑎᐅᑉ ᑲᓐᖑᓲᑎᒃᓴᕋ ᐲᕐᐹ ᐃᕐᓂᕐᑖᕐᑎᒻᒪᖓ. 24ᐊᑕᓂᐅᑉ ᐃᕐᓂᕐᑖᕐᑎᒃᑲᓐᓂᕐᓂᐊᕐᐹᖓ”; ᑍᒤᒻᒪᑦ ᐊᑦᓯᕐᐹ ᔫᓯᐱᒥᒃ.
ᔧᑰᑉ ᐊᖏᕐᑕᐅᓇᓱᖕᓂᖓ ᓔᐸᓂᒧᑦ
25ᕅᒋᓕᐅᑉ ᔫᓯᐱᒥᒃ ᕿᑐᕐᖓᕐᑖᕐᓂᖓᑕ ᑭᖑᓂᖓᓂ, ᔧᑯ ᐅᖃᓕᕐᐳᖅ ᓔᐸᓂᒧᑦ, “ᐊᐅᓪᓚᕈᓐᓇᕐᑎᓚᐅᓐᖓ, ᓇᖕᒥᓂᖅ ᐊᖏᕐᕋᓐᓄᑦ ᓄᓇᓐᓄᓪᓗ ᐅᑎᕐᓂᐊᕋᒪ. 26ᓄᓕᐊᒃᑲ ᐅᕙᓐᓄᑦ ᑐᓂᓚᐅᒃᑭᑦ ᕿᑐᕐᖓᒃᑲᓗ ᑖᒃᑯᐊ ᐃᓕᖕᓄᑦ ᐱᓇᓱᐊᕐᑎᐅᓂᒃᑯᑦ ᐊᑭᓕᕐᑕᐅᑦᔪᑎᒋᓯᒪᒐᒃᑭᑦ, ᐊᐅᓪᓚᕐᑎᓪᓗᖓᓗ; ᖃᐅᔨᒪᒐᕕᑦ ᖃᓄᖅ ᐱᔨᑦᓯᑦᓯᐊᕐᓯᒪᓂᓐᓂᒃ ᐃᓕᖕᓄᑦ.”
27ᓔᐸᓂᐅᓪᓗ ᐅᖃᐅᑎᕚ, “ᐃᒫᒃ ᐅᖃᓚᐅᕐᓚᖓ: ᖃᐅᔨᓯᒪᕗᖓ ᓇᓗᓇᕐᑐᒃᑯᑦ ᐃᒫᒃ ᐊᑕᓂᐅᑉ ᓮᒻᒪᕐᑎᓯᒪᖕᒪᖓ ᐃᕝᕕᑦ ᐱᑦᔪᑎᒋᓪᓗᑎᑦ. 28ᐊᑭᓕᕐᑕᐅᑦᔪᑎᒋᔪᒪᔭᕐᓂᒃ ᐅᖃᓚᐅᕆᑦ, ᑕᕝᕙ ᑐᓂᓂᐊᕐᐸᒋᑦ.”
29ᔧᑰᑉ ᐅᖃᐅᑎᕚ, “ᐃᕝᕕᑦ ᓇᖕᒥᓂᖅ ᖃᐅᔨᒪᕗᑎᑦ ᐃᓕᖕᓂᒃ ᐱᔨᑦᓯᓚᐅᕋᒪ ᖃᓄᕐᓗ ᐆᒪᔪᖁᑎᖕᓂᒃ ᑲᒪᑦᓯᐊᓚᐅᕐᓂᓐᓂᒃ. 30ᐅᓄᖏᑦᑐᓂᒃ ᐱᖃᓚᐅᕐᐳᑎᑦ ᑎᑭᓚᐅᕐᑎᓐᓇᖓ, ᒫᓐᓇᓕ ᐅᓄᕐᑐᕐᔪᐊᕌᓗᓐᖑᕐᓯᒪᕗᑦ; ᖃᓄᑐᐃᓐᓇᕐᓗ ᐱᓕᕆᑐᐊᕌᖓᒪ ᐊᑕᓂᐅᑉ ᓮᒻᒪᕐᑎᓯᒪᕚᑎᑦ. ᒫᓐᓇᓕ ᓇᖕᒥᓂᖅ ᐱᓇᓱᐊᕈᒪᔭᓐᓄᑦ ᐱᓕᕆᕙᓪᓕᐊᔪᒃᓴᐅᓕᕐᐳᖓ ᐃᓚᒃᑲ ᐱᓪᓗᒋᑦ?”
31ᓔᐸᓂᐅᑉ ᐊᐱᕆᕚ, “ᓱᓇᒥᒃ ᑐᓂᓯᕕᒋᔪᓐᓇᕐᐱᒌᑦ?”
ᔧᑰᑉ ᑭᐅᕚ, “ᓱᓇᒥᒃ ᑐᓂᓯᕕᒋᔭᕆᐊᖃᓐᖏᓚᕐᒪ; ᐱᔪᒪᔭᕋᓕ ᒪᓕᖕᓂᐊᕈᕕᐅᒃ, ᓱᓕ ᐆᒪᔪᖁᑎᑎᑦ ᓂᕆᑎᑦᓱᒪᕙᒃᑲ ᑲᒪᒋᑦᓯᐊᕐᓗᒋᓪᓗ: 32ᐅᓪᓗᒥ ᓰᐱᖁᑎᓕᒫᑎᑦ ᕿᒥᕐᕈᐊᓚᐅᕐᓚᒃᑲ, ᐲᔭᕐᓗᒋᓪᓗ ᑕᒪᕐᒥᒃ ᑕᕐᓴᒐᓛᖃᕐᑐᑦ ᐅᑭᓕᕆᐊᓪᓗ ᓰᐲᑦ ᓰᐱᐅᓪᓗ ᓄᕐᕋᖏᑦ ᕿᕐᓃᑦ, ᒎᑦᓰᓪᓗ ᐅᑭᓕᕆᐊᑦ ᑕᕐᓴᒐᓛᖃᕐᑐᓪᓗ; ᑕᒪᒃᑯᐊ ᑕᕝᕙ ᐊᑭᓕᕐᑕᐅᑦᔪᑎᒋᔪᒪᔭᑐᐊᒃᑲ. 33ᓯᕗᓂᑦᑎᓐᓂ ᑕᒪᓐᓇ ᖃᐅᔨᒐᔭᕐᐸᑦ ᓱᓕᑦᓯᐊᕐᓗᖓ ᐱᓕᕆᓐᓂᕐᒪᖔᕐᒪ, ᑕᒪᒃᑯᐊᓗ ᐊᑭᓕᕐᑕᐅᑦᔪᑎᒋᔭᒃᑲ ᕿᒥᕐᕈᐊᓕᕈᕕᒋᑦ, ᒎᑦᓯᖁᑎᖃᕈᒪ ᑕᕐᓴᒐᓛᖃᖏᑦᑐᒥᒃ ᐅᕝᕙᓗ ᐅᑭᓕᕆᐊᖏᑦᑐᒥᒃ ᐅᕝᕙᓘᓐᓃᑦ ᓰᐱᒥᒃ ᓇᓪᓕᐊᓐᓂᑐᐃᓐᓇᖅ ᕿᕐᓂᐅᖏᑦᑐᒥᒃ, ᑕᕝᕙ ᖃᐅᔨᒐᔭᕐᐳᑎᑦ ᑎᒡᓕᒐᕕᓂᐅᓂᖓᓂᒃ.”
34ᓔᐸᓂᐅᑉ ᑭᐅᕚ, “ᐊᖏᖃᑎᒋᕙᒋᑦ, ᑍᒤᓕᐅᕐᓂᐊᓕᕐᐳᒍᑦ ᑕᒪᑐᒥᖓ ᐅᖃᐅᓯᕆᔭᕐᓂᒃ.” 35ᑕᕝᕙᓐᖓᑦ ᐅᓪᓗᒥᑦ ᐱᒋᐊᕐᓗᓂ ᓔᐸᓂᐅᑉ ᒎᑦᓰᑦ ᐊᖑᓴᓪᓗᐃᑦ ᐊᕕᑎᑉᐰᑦ ᑕᕐᓴᓖᑦ ᐅᑭᓕᕆᐊᖑᔪᓪᓗ ᐊᕐᓇᓪᓗᐃᓪᓗ ᑕᒪᕐᒥᒃ ᑕᕐᓴᒐᓛᒃᑐᑦ ᐅᑭᓕᕆᐊᓪᓗ ᖃᐅᓪᓗᕐᑕᖃᕐᑐᓪᓗ; ᓰᐲᑦᑕᐅᖅ ᓄᕐᕋᖏᑦ ᕿᕐᓃᑦ ᐊᕝᕗᑎᑎᒃᑭᕔᑦ, ᐃᕐᓂᓂᓗ ᑖᒃᑯᓄᖓ ᐰᕐᓯᔨᓐᖑᕐᑎᓪᓗᒋᑦ, 36ᑕᕝᕙᓐᖓᓪᓗ ᐊᐅᓪᓚᕐᐳᖅ ᔧᑯᒥᑦ ᕿᒪᕉᑎᓇᓱᐊᕐᓗᓂ ᐃᖏᕐᕋᓪᓗᓂ ᐅᓪᓗᓂᒃ ᐱᖓᓱᓂᒃ; ᔧᑰᓪᓗ ᓔᐸᓂᐅᑉ ᓰᐱᖁᑎᖏᑕ ᐊᒥᐊᒃᑯᖏᑦ ᒥᐊᓂᕆᕔᑦ.
37ᔧᑯᓗ ᓇᐹᕐᑑᑉ ᐊᑎᖃᕐᑑᑉ ᐹᑉᓚᓂᒃ ᐊᕙᓚᖓᔪᖏᓐᓂᒃ ᐆᒻᒪᐅᑦᓯᐊᕐᑐᓂᒃ ᐱᕗᖅ, ᐋᓪᒧᓂᒡᓗ, ᐊᒻᒪ ᓇᐹᕐᑐᑐᐃᓐᓁᑦ ᐊᕙᓚᖓᔪᖏᓐᓂᒃ; ᑖᒃᑯᐊᓗ ᖄᖏᑦ ᐲᕐᓯᕕᒋᕔᑦ ᖃᐅᓪᓗᕐᑕᐅᓂᖃᓕᖁᓪᓗᒋᑦ. 38ᐃᓕᕔᓪᓗ ᐆᒪᔪᖁᑎᖏᑕ ᐃᒥᕐᕕᖏᑕ ᓵᖏᓐᓄᑦ, ᑕᕝᕗᓐᖓᕐᐰᑦ, ᐆᒪᔪᖁᑎᖏᑦ ᑕᕝᕙᓂ ᐃᒥᕐᕕᒥᖕᓂ ᓄᓕᐊᖃᑦᑕᕐᒪᑕ. 39ᑖᒃᑯᐊᓗ ᒎᑦᓰᑦ ᓄᓕᐊᓕᕌᖓᒥᒃ ᐃᒥᕐᑕᕐᕕᐅᑉ ᓵᖓᓂ, ᕿᑐᕐᖓᕐᑖᖃᑦᑕᕐᐳᑦ ᖃᐅᓪᓗᕐᑕᐅᓂᖃᕐᑐᓂᒃ, ᑕᕐᓴᒐᓛᒃᑐᓂᒡᓗ, ᐅᑭᓕᕆᐊᖑᔪᓂᒡᓗ.
40ᔧᑰᓪᓗ ᓄᕐᕅᑦ ᓇᖕᒥᓂᖅ ᐃᓂᖃᕐᑎᑉᐰᑦ, ᐆᒪᔪᐃᓪᓗ ᑮᓇᖏᑦ ᓵᓐᖓᑎᓪᓗᒋᑦ ᓰᐱᓄᑦ ᑕᕐᓴᖃᕐᑐᓄᑦ ᕿᕐᓂᕐᓄᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ; ᓇᖕᒥᓂᖅ ᐆᒪᔪᖁᑎᓂ ᑲᑎᒪᔭᐅᑎᓐᖏᓔᑦ, ᐃᓚᓕᐅᑎᓇᒋᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ.
41ᐆᒪᔪᐃᓪᓗ ᖃᓄᐃᖏᑦᓯᐊᕐᑐᑦ ᓄᓕᐊᓕᕌᖓᑕ, ᔧᑰᑉ ᑖᒃᑯᐊ ᓇᐹᕐᑐᕕᓂᕐᓂᒃ ᐃᒥᕐᕕᖏᓐᓂ ᐃᓕᓯᒪᔪᓂᒃ ᑕᑯᓐᓇᕐᑎᖃᑦᑕᕐᐰᑦ, ᓇᐹᕐᑐᕕᓃᑦ ᐊᑯᓐᓂᖏᓐᓂ ᓄᓕᐊᖁᓪᓗᒋᑦ. 42ᐆᒪᔪᐃᓪᓕ ᓴᓐᖏᔫᖏᓐᓂᕐᓴᐅᔪᑦ ᓇᐹᕐᑐᕕᓂᕐᓂᒃ ᐃᓕᓯᕕᒋᕙᖕᓇᒋᑦ; ᑍᒫᒡᓗ ᑕᕝᕙ ᓔᐸᓂ ᐆᒪᔪᖁᑎᖃᓕᓚᐅᕐᐳᖅ ᓴᓐᖏᔫᑕᐅᖏᓐᓂᕐᓴᓂᒃ, ᔧᑯᓕ ᐆᒪᔪᖁᑎᖃᓕᓚᐅᕐᐳᖅ ᖃᓄᐃᕈᔪᖏᑦᓯᐊᕐᑐᓂᒃ ᓴᓐᖏᔫᑦᓯᐊᕐᑐᓂᒡᓗ. 43ᑍᒤᓕᐅᕐᓗᓂᓗ ᔧᑯ ᐊᔪᕐᓴᖏᑦᑐᐊᓘᓕᓚᐅᕐᐳᖅ, ᐆᒪᔪᖁᑎᖃᓕᓚᐅᕐᐳᖅ ᐅᓄᕐᑐᓂᒃ, ᐱᔨᖃᓕᕐᓗᓂᒡᓗ ᐊᖑᑎᓂᒃ ᐊᕐᓇᓂᒡᓗ, ᑳᒥᓕᖁᑎᖃᕐᓗᓂᒡᓗ,#30:43 ᑳᒥᓕᒃ ᐅᕝᕙᓗ ᐱᑯᓕᒃ ᕿᒻᒥᕐᔪᐊᕆᔭᐅᕙᒃᑐᑦ ᐃᓄᖃᖏᑦᑐᒥ ᕿᑎᒥᒍᑦ ᐱᑯᓖᑦ ᓯᐅᑎᖅᑯᕐᑐᔪᖁᑎᖃᕐᓗᓂᒡᓗ.
Currently Selected:
ᒨᓯᓯ ᓯᕗᓪᓖᑦ 30: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
