ᒨᓯᓯ ᓯᕗᓪᓖᑦ 13
13
ᐂᑉᕋᒻᓗ ᓘᑎᐅᓪᓗ ᐊᕕᓐᓂᖏᒃ
1ᐂᑉᕋᒻᓗ ᐄᑦᔨᑉᑎᒥᑦ ᐊᐅᓪᓚᖅᐳᖅ, ᓄᓕᐊᓂ ᐱᖁᑎᓕᒫᓂᓗ ᑕᒪᕐᖕᒥᒃ ᓇᒃᓴᖅᓗᒋᑦ, ᓘᑎᓗ ᐃᓚᒋᓪᓗᒍ, ᓯᕿᓂᐅᑉ ᓇᓛᓄᑦ ᓂᒋᑉᒧᑦ. 2ᐂᑉᕋᒻᓗ ᐊᔪᖅᓴᖏᑦᑐᐊᓘᓚᐅᖅᐳᖅ ᐆᒪᔪᖁᑎᖃᖅᓗᓂ, ᓯᐅᓪᕕᕆᓂᒡᓗ, ᒎᓗᓂᒡᓗ. 3ᐃᖏᕐᕋᓚᐅᖅᐳᕐᓗ ᓯᕿᓂᐅᑉ ᓇᓛᓂᑦ ᓂᒋᑉᒥᑦ ᐱᑎᓕ ᑎᑭᓪᓗᒍ, ᑕᕝᕗᖓ ᑕᖕᒫᖅᓯᒪᕕᒋᓚᐅᖅᑕᒥᓄᑦ, ᓄᓇᐅᑉ ᐱᑎᓕᐅᑉ ᐂᓪᓗ ᐊᑯᓐᓂᖓᓄᑦ. 4ᓄᓇᒧᑦ ᑐᓂᕐᕈᓯᕐᕕᖕᒥᒃ ᓴᓇᕕᒋᓚᐅᖅᑕᒥᓄᑦ ᓯᕗᓪᓕᕐᖕᒥᒃ; ᑕᕝᕙᓂᓗ ᐂᑉᕋᒻ ᐊᑕᓂᖅ ᑐᒃᓯᐊᕐᕕᒋᕚ.
5ᓘᑎᓕ ᐂᑉᕋᒻ ᐃᖏᕐᕋᖃᑎᖓ, ᑖᓐᓇ ᓰᐱᖁᑎᖃᓚᐅᕆᕗᖅ ᐆᒪᔪᖁᑎᖃᖅᓗᓂ ᑐᐱᖃᐅᕆᓪᓗᓂᓗ. 6ᑍᒤᒻᒪᑦ ᓄᓇ ᑕᒪᓐᓇ ᓂᕿᒃᓴᑭᓗᐊᓚᐅᕐᖕᒪᑦ ᑖᒃᑯᖕᓄᖓ ᑲᑎᓐᖓᓗᑎᒃ; ᐊᑐᓂᑦ ᐱᖁᑎᖃᓚᐅᕐᖕᒪᑎᒃ ᐅᓄᖅᑐᐊᓗᖕᓂᒃ ᑲᑎᓐᖓᔪᓐᓁᓪᓕᓚᐅᖅᐴᒃ. 7ᑍᑦᓱᒪᓂ ᐂᑉᕋᐅᑉ ᐆᒪᔪᓂᒃ ᑲᒪᔨᖏᑦ ᓘᑎᐅᓪᓗ ᐆᒪᔪᖁᑎᖏᑕ ᑲᒪᔨᖏᑦ ᐃᒻᒥᖕᓄᑦ ᐊᑭᕋᖅᑑᑎᓕᓚᐅᖅᐳᑦ. ᑍᑦᓱᒪᓂᐅᑎᓪᓗᒍ ᑖᒃᑯᐊ ᑬᓇᓂᒥᐅᑦ ᐱᕆᔧᑎᒥᐅᓪᓗ ᓱᓕ ᓄᓇᖃᓚᐅᕐᖕᒪᑕ ᑕᒫᓂ.
8ᑕᕝᕙ ᐂᑉᕋᒻ ᐅᖃᓕᖅᐳᖅ ᓘᑎᒧᑦ, “ᐃᓄᖁᑎᑎᑦ ᐃᓄᖁᑎᒃᑲᓗ ᐃᒻᒥᖕᓄᑦ ᐊᑭᕋᖅᑐᖅᑎᒌᒃᑐᒃᓴᐅᓐᖏᓚᑦ, ᐆᒪᔪᓕᕆᔨᖁᑎᑎᑦ ᐆᒪᔪᓕᕆᔨᖁᑎᒃᑲᓗ; ᐃᓚᒌᒃᑲᓐᓄᒃ. 9ᓄᓇᑭᒃᓴᖏᑦᑐᐊᓘᕗᒍᒃ ᑍᒤᒻᒪᑦ ᐊᕕᓚᐅᖅᓗᒃ. ᓴᐅᒥᖕᒧᐊᕈᕕᑦ, ᑕᓕᖅᐱᒧᐊᕐᖕᓂᐊᖅᐳᖓ; ᑕᓕᖅᐱᖕᒧᐊᕈᕕᑦ, ᓴᐅᒥᖕᒧᐊᕐᖕᓂᐊᖅᐳᖓ.”
10 #
ᒨᓯᓯ ᓯᕗᓪᓖᑦ 2:10. ᓘᑎᓗ ᐊᕙᒻᒧᑦ ᑕᑯᓴᕋᒥ, ᑕᑯᕗᖅ ᔪᐊᕐᑕᓂᐅᑉ ᓇᖅᓴᖓᓂᒃ ᐃᒪᖃᑦᓯᐊᖅᑐᒥᒃ, ᐊᑕᓂᐅᑉ ᐱᕈᖅᓰᕕᖁᑎᖓᑎᑐᑦ, ᐄᑦᔨᑉᑎᐅᓪᓗ ᓄᓇᖓᑎᑐᑦ ᑍᒤᑦᑑᔮᖅᑐᒥᒃ. ᓄᓇᐅᑉ ᔪᐊᕆᐅᑉ ᓇᓛᓄᑦ; ᑍᒤᑦᑑᓚᐅᖅᐳᖅ ᑕᒪᓐᓇ ᐊᑕᓂᐅᑉ ᓱᑑᒪ ᒍᒨᕋᓗ ᐊᓯᕈᓚᐅᖅᑎᓐᓇᓂᒋᒃ. 11ᑍᒤᒻᒪᑦ ᓘᑎᐅᑉ ᔪᐊᕐᑕᓂᐅᑉ ᓇᖅᓴᓕᒫᖓ ᓂᕈᐊᖅᐹ, ᐊᐅᓪᓚᖅᐳᕐᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᐊᖅᓗᓂ; ᑍᒫᒃ ᑕᕝᕙ ᐱᓂᐊᕐᖕᓂᖃᖅᓗᑎᒃ ᐊᕕᓚᐅᖅᐴᒃ. 12ᐂᑉᕋᒻᓕ ᓄᓇᖃᓚᐅᖅᐳᖅ ᑬᓇᓂᒥ, ᓘᑎᓕ ᓄᓇᑖᓚᐅᖅᐳᖅ ᐃᒡᓗᒐᓴᖕᓂ ᓇᖅᓴᒦᑦᑐᓂ ᑐᐱᖅᓗᓂᓗ ᓱᑑᒪᒧᑦ ᑎᑭᓯᒪᔪᓂᒃ, 13ᓱᑑᒪᐅᓪᓗ ᐃᓄᖏᑦ ᐱᐅᖏᑦᑐᓕᔨᐊᓘᓚᐅᖅᐳᑦ, ᐊᔪᖅᑐᓕᔪᕐᔪᐊᖑᓪᓗᑎᒡᓗ ᐊᑕᓂᕐᖕᒧᑦ.
ᐂᑉᕋᐅᑉ ᕼᐃᑉᐸᕋᓐᒧᑦ ᓄᒃᑎᕐᖕᓂᖓ
14ᐊᑕᓂᖅ ᐅᖃᖅᐳᖅ ᐂᑉᕋᒻᒧᑦ, ᓘᑎ ᐊᐅᓪᓚᖅᓯᒪᓕᖅᑎᓪᓗᒍ, “ᑕᕝᕙᓐᖓᑦ ᓇᔪᖅᑕᕐᖕᓂᑦ ᐊᕙᒻᒧᑦ ᕿᒥᕐᕈᓚᐅᕆᑦ, ᐅᓐᓄᐊᑉ ᓇᓛᓄᑦ ᐅᓪᓘᓪᓗ ᓇᓛᓄᑦ ᖃᐅᓕᕐᕕᐅᑉ ᓇᓛᓄᑦ ᓂᐱᕕᐅᓪᓗ ᓇᓛᓄᑦ; 15#ᐋᐴᓯᑕᓖᑦ 7:5.ᑕᒪᓐᓇ ᓄᓇ ᑕᑯᔧᑦ ᑕᒪᕐᖕᒥᒃ ᑐᓂᓂᐊᖅᐸᕋ ᐃᓕᖕᓄᑦ ᑭᖑᕚᕐᖕᓄᓪᓗ, ᑕᒪᓐᓇᓗ ᐱᒋᔪᒫᖅᐸᑦ ᐃᓱᖃᖏᑦᑐᒧᑦ. 16ᑭᖑᕚᒃᓴᖃᖅᑎᑦᓱᒫᖅᐸᒋᓪᓗ ᐅᓄᖅᑐᕐᔪᐊᕌᓗᖕᓂᒃ ᓄᓇᒥ ᐳᔪᕋᖅᑎᑐᑦ ᐅᓄᖅᑎᒋᔪᓂᒃ; ᓄᓇᐅᑉ ᐳᔪᕋᖏᑦ ᓈᓴᖅᑕᐅᔪᓐᓇᖅᐸᑕ, ᑕᕝᕙ ᑭᖑᕚᒃᓴᑎᑦᑕᐅᖅ ᓈᓴᖅᑕᐅᔪᓐᓇᕋᔭᕆᕗᑦ! 17ᒫᓐᓇᓕ, ᒪᑭᓪᓗᑎᑦ ᐃᖏᕐᕋᓕᕆᑦ ᓄᓇᐅᑉ ᑕᑭᓂᖓ ᐃᓱᓕᓪᓗᒍ ᓯᓕᖕᓂᖓᓗ ᐃᓱᓕᓪᓗᒍ, ᑕᒪᓐᓇ ᑕᒪᕐᖕᒥᒃ ᐃᓕᖕᓄᑦ ᑐᓂᓂᐊᕋᒃᑯ.” 18ᑕᕝᕙ ᐂᑉᕋᒻ ᑕᕝᕙᓐᖓᑦ ᓅᓪᓗᓂ, ᓄᓇᑖᖅᐳᖅ ᓇᐹᖅᑐᓕᖕᒥ ᐆᒃᓂᒃ ᐊᑎᖃᖅᑐᓂᒃ ᒪᒻᕆᒦᑦᑐᒥ ᕼᐃᐸᕋᓐᓂᒥ; ᑕᕝᕙᓂᓗ ᑐᓂᕐᕈᓯᕐᕕᓕᐅᖅᐳᖅ ᐊᑕᓂᕐᖕᒧᑦ.
Currently Selected:
ᒨᓯᓯ ᓯᕗᓪᓖᑦ 13: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
