ᒨᓯᓯ ᐂᑉᐸᖏᑦ 6

ᒎᑎᐅᑉ ᕾᖁᔨᓂᖓ ᒨᓯᓯᒥᒃ

1ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ, “ᒫᓐᓇ ᑕᑯᓂᐊᕐᐳᑎᑦ ᐰᕉᒧᑦ ᖃᓄᐃᓕᐅᕐᓂᕆᓂᐊᕐᑕᓐᓂᒃ; ᐱᔪᓐᓇᕐᓂᕐᔪᐊᒥᓄᑦ ᐃᓄᖁᑎᒃᑲ ᐊᐅᓪᓚᕐᑎᓐᓂᐊᕐᐰᑦ, ᐱᔪᓐᓇᕐᓂᕐᔪᐊᒥᓄᑦ ᓄᓇᒥᓂᑦ ᐊᐅᓪᓚᕐᑎᓐᓂᐊᕐᐰᑦ.” 2#ᒨᓯᓯ ᓯᕗᓪᓖᑦ 17:1; 28:3; 35:11; ᒨᓯᓯ ᐂᑉᐸᖏᑦ 3:13-15.ᒎᑎᓗ ᐅᖃᕐᐳᖅ ᒨᓯᓯᒧᑦ, “ᐅᕙᖓ ᐊᑕᓂᐅᕗᖓ. 3ᓴᖅᑭᓚᐅᕐᐳᖓᓗ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ, ᐊᔪᒐᖃᖏᑦᑑᓪᓗᖓ ᒎᑎᐅᒐᒪ, ᑭᓯᐊᓂᓕ ᐊᑕᓂᕐᒥᒃ ᐊᑎᖃᕐᓂᓐᓂᒃ ᐊᑎᕐᒪᓗ ᐃᑦᔪᕐᓁᓐᓂᖓᓂᒡᓗ ᓇᓗᓁᕐᓯᓚᐅᓐᖏᓚᖓ ᑖᒃᑯᓄᖓ. 4ᑖᒃᑯᓄᖓᓗ ᐊᖏᕈᑎᖃᓚᐅᕐᐳᖓ, ᓄᓇᒥᒃ ᑬᓇᓂᒥᒃ ᑐᓂᓯᕕᒋᔪᒪᓪᓗᒋᑦ, ᑕᒪᑐᒥᖓ ᓄᓇᒥᒃ ᓂᐅᕐᕈᐊᖑᓪᓗᑎᒃ ᓇᔪᓚᐅᕐᑕᖓᓐᓂᒃ. 5ᒫᓐᓇᓗ ᐃᓴᕆᐊᓕᒥᐅᑦ ᑲᑉᐱᐊᓱᐊᑎᑕᐅᓂᕐᒧᑦ ᐃᓗᖏᕐᓱᐊᓂᕆᔭᖏᑕ ᓂᐱᖏᑦ ᑐᓴᕐᓯᒪᕙᒃᑲ, ᐄᑦᔨᑉᑎᒥᐅᑦ ᓱᒃᑯᔨᐊᕆᓪᓗᒋᑦ ᓯᐊᓛᖃᕐᓂᖏᓐᓄᑦ; ᐊᖏᕈᑎᒋᓯᒪᔭᕋᓗ ᐃᖅᑲᐅᒪᓕᕐᐸᕋ. 6ᑍᒤᒻᒪᑦ ᐃᓴᕆᐊᓕᒥᐅᓄᑦ ᐅᖃᓚᐅᕆᑦ ᐅᖃᕐᑕᐅᖁᔭᓐᓂᒃ, ‘ᐅᕙᖓ ᐊᑕᓂᐅᕗᖓ, ᐄᑦᔨᑉᑎᒥᐅᓪᓗ ᐅᖁᒤᒃᓴᕐᑎᑦᓯᓂᖏᓐᓂᑦ ᐊᐅᓪᓚᕐᑎᑦᓱᒪᕙᑦᓯ, ᓴᐳᑎᔪᒪᕙᑦᓯᓗ ᓯᐊᓛᕆᔭᐅᓂᑦᓯᓐᓂᑦ, ᐱᐅᓕᔪᒪᕙᑦᓯᓗ ᑕᓕᕐᒧᑦ ᐱᔪᓐᓇᕐᓂᕐᔪᐊᖃᕐᑐᒧᑦ ᓱᒋᐊᕐᓯᓂᕐᒧᓪᓗ#6:6 ᓱᒋᐊᕐᓯᓂᕐᒧᓪᓗ ᐅᕝᕙᓗ ᐃᖅᑲᕐᑐᐃᓂᕐᒧᓪᓗ ᓴᓐᖏᔪᕐᔪᐊᒧᑦ, 7ᐃᓄᖁᑎᑖᕆᓂᐊᕐᐸᑦᓯᓗ, ᐃᓕᑦᓯᓐᓄᓪᓗ ᒎᑎᒋᔭᐅᓂᐊᕐᐳᖓ; ᖃᐅᔨᓕᖁᓪᓗᓯ ᐅᕙᖓ ᐊᑕᓂᐅᒐᒪ ᒎᑎᒋᔭᓯ, ᐊᐅᓪᓚᕐᑎᑦᓯᔨᒋᓚᐅᕐᑕᓯ ᐄᑦᔨᑉᑎᒥᐅᑦ ᐅᖁᒤᒃᓴᕐᑎᑦᓯᓂᖏᓐᓂᑦ. 8ᓄᓇᒧᓪᓗ ᑎᑭᑎᑦᓱᒪᕙᑦᓯ ᐊᖏᕈᑎᒋᓯᒪᓚᐅᕐᑕᓐᓄᑦ ᑐᓂᔪᒪᓪᓗᒍ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ; ᑕᒪᓐᓇᓗ ᐃᓕᑦᓯᓐᓄᑦ ᑐᓂᓂᐊᕐᐸᕋ ᓄᓇᑖᕆᔭᐅᖁᓪᓗᒍ ᐃᓕᑦᓯᓐᓄᑦ. ᐅᕙᖓ ᐊᑕᓂᐅᒐᒪ.’” 9ᒨᓯᓯᓗ ᑕᒪᑐᒥᖓ ᐅᖃᐅᓯᖃᕐᐳᖅ ᐃᓴᕆᐊᓕᒥᐅᓄᑦ; ᑖᒃᑯᐊᓕ ᒨᓯᓯᒥᒃ ᓈᓚᓚᐅᓐᖏᓚᑦ, ᐊᓂᕐᓂᕐᒥᒍᑦ ᓯᖁᒥᑕᐅᓯᒪᓂᕐᒧᑦ ᓱᒃᑯᔨᐊᖑᓪᓗᑎᒃ ᐋᓐᓂᕐᓯᕐᑕᐅᖃᑦᑕᕐᓂᕐᒧᑦ.

10ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 11“ᐰᕉᒧᑦ ᐅᐸᒍᑎᓕᕆᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐅᖃᐅᑎᓗᒍᓗ ᑖᑦᓱᒪ ᓄᓇᖓᓂᑦ ᐃᓴᕆᐊᓕᒥᐅᑦ ᐊᐅᓪᓚᕐᑎᑕᐅᖁᓪᓗᒋᑦ.”

12ᒨᓯᓯᓕ ᐅᖃᕐᐳᖅ ᐊᑕᓂᕐᒧᑦ, “ᑕᑯᒋᑦ, ᐃᓴᕆᐊᓕᒥᐅᓄᑦ ᓈᓚᒃᑕᐅᓯᒪᓐᖏᓚᖓ; ᖃᓄᕐᓕ ᑕᕝᕙ ᐰᕉᒧᑦ ᓈᓚᒃᑕᐅᔪᓐᓇᕋᔭᕐᐳᖔ? ᐅᖃᓪᓚᑦᓯᐊᕈᓐᓇᖏᑦᑑᒐᒪ.”

13ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, ᐱᔪᓐᓇᕐᓂᕐᒥᒡᓗ ᑐᓂᓯᕕᒋᓪᓗᒋᒃ ᐃᓴᕆᐊᓕᒥᐅᓄᑦ ᐰᕉᒧᓪᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᓯᖁᓪᓗᒋᒃ ᐄᑦᔨᑉᑎᐅᑉ ᓄᓇᖓᓂᑦ.

ᒨᓯᓯᐅᑉ ᐂᕉᓂᐅᓪᓗ ᐃᓚᖏᑕ ᓇᓗᓁᕐᓯᒪᓂᖏᑦ

14ᐅᑯᐊ ᑕᕝᕙ ᑭᖑᕚᕇᖑᔪᑦ ᓇᓗᓁᕐᓯᒪᓂᖏᑦ: ᕉᐱᓂᐅᑉ ᐃᕐᓂᖏᑦ ᐃᓴᕆᐊᓕᐅᑉ ᐊᖓᔪᒃᓯᕐᐹᖁᑎᖓᑕ ᐅᑯᐊᖑᕗᑦ: ᕼᐊᓅᒃ, ᐸᓪᓗ, ᕼᐃᔅᕋᓐ, ᑳᕐᒥᓗ; ᑖᒃᑯᐊ ᑕᕝᕙ ᕉᐱᓂᐅᑉ ᕿᑐᕐᖓᖏᑦ. 15ᓯᒥᐅᓂᐅᓪᓕ ᐅᑯᐊ ᐃᕐᓂᕆᕔᑦ: ᔨᒧᐃᐅᓪ, ᔭᒥᓐ, ᐅᕼᐋᑦ, ᔭᑭᓐ, ᔪᕼᐊᕆ, ᓴᕼᐊᐅᓗ, ᐃᕐᓂᕐᑖᕆᓚᐅᕐᑕᖏᑦ ᐊᕐᓇᒥᑦ ᑬᓇᓂᒥᐅᑕᕐᒥᑦ; ᑖᒃᑯᐊ ᑕᕝᕙ ᓯᒥᐅᓂᐅᑉ ᕿᑐᕐᖓᕆᔭᖏᑦ. 16#ᒨᓯᓯ ᓯᑕᒪᖏᑦ 3:17-20; 26:57,58; ᑯᕉᓂᑲ ᓯᕗᓪᓖᑦ 6:16-19.ᐅᑯᐊᓕ ᓕᕔᑉ ᐃᕐᓂᖏᑕ ᐊᑎᖏᑦ ᑭᖑᕚᕇᒃᐸᓪᓕᐊᓯᒪᓂᖏᑦ ᒪᓕᒡᓗᒋᑦ: ᒌᕐᓲᓐ, ᑯᕼᐋᑦ, ᒥᕋᕆᓗ, ᓕᕔᓗ ᐊᕐᕌᒍᓂᒃ 137ᓂᒃ ᐃᓅᓚᐅᕐᐳᖅ. 17ᐅᑯᐊᓕ ᒌᕐᓲᓂᐅᑉ ᐃᕐᓂᕆᕔᑦ: ᓕᑉᓂᓗ ᓯᒥᐂᓗ, ᑭᖑᕚᖃᕐᓗᑎᒡᓗ ᐅᓄᕐᑐᓂᒃ. 18ᐅᑯᐊᓕ ᑯᕼᐊᑦᑎᐅᑉ ᐃᕐᓂᕆᕔᑦ: ᐊᒪᕌᒻ, ᐃᔾᕼᐊᕆ, ᕼᐃᐸᕋᓐ, ᐊᑦᔧᐅᓪ, ᑯᕼᐋᑦᑎᓗ ᐃᓅᓚᐅᕐᐳᖅ ᐊᕐᕌᒍᓂᒃ 133ᓂᒃ. 19ᐅᑯᐊᓕ ᒥᕋᕆᐅᑉ ᐃᕐᓂᕆᕔᑦ: ᒪᕼᐊᓔᓗ ᒧᓮᓗ. ᑖᒃᑯᐊ ᑕᕝᕙ ᓕᕔᑉ ᑭᖑᕚᕆᓚᐅᕐᐰᑦ.

20ᐊᒪᕌᒻᓗ ᓄᓕᐊᕐᑖᓚᐅᕐᐳᖅ ᐊᑖᑕᖓᑕ ᓇᔭᖓᓂᒃ ᔫᑭᐱᑎᒥᒃ ᑖᑦᓱᒨᓇᓗ ᕿᑐᕐᖓᕐᑖᓚᐅᕐᐳᖅ ᐂᕉᓂᒥᒃ ᒨᓯᓯᒥᒡᓗ, ᐊᒻᒪᕋᒻᓗ ᐃᓅᓚᐅᕐᐳᖅ ᐊᕐᕌᒍᓂᒃ 137ᓂᒃ. 21ᐅᑯᐊᓕ ᐃᔾᕼᐊᕆᐅᑉ ᐃᕐᓂᕆᕔᑦ; ᑰᕋ, ᓂᑉᕼᐃᒡ, ᔨᒃᕆᓗ. 22ᐅᑯᐊᓕ ᐊᑦᔧᐆᑉ ᐃᕐᓂᕆᕔᑦ; ᒥᓮᐅᓪ, ᐃᐅᓪᓴᕚᓐ, ᓯᑎᕆᓗ.

23ᐂᕉᓂᓗ ᓄᓕᐊᓂᒃᐳᖅ ᐃᓕᓯᐸᒥᒃ, ᐊᒥᓇᑕᐱᐅᑉ ᐸᓂᖓᓂᒃ ᓈᓲᓂᐅᑉ ᓇᔭᖓᓂᒃ; ᑖᒃᑯᐊᒡᓗ ᕿᑐᕐᖓᕐᑖᓚᐅᕐᐳᒃ ᐅᑯᓂᖓ, ᓁᑖᑉ, ᐊᐱᕼᐅ, ᐃᓕᓯᕆ, ᐃᑕᒫᕐᓗ. 24ᑰᕋᐅᓪᓕ ᐃᕐᓂᖏᑦ ᐅᑯᐊᖑᕗᑦ; ᐊᓯᕆ, ᐃᐅᓪᑳᓇ, ᐊᐰᐊᓴᐸᓗ; ᑖᒃᑯᐊ ᑕᕝᕙ ᑰᕋᐅᑉ ᑭᖑᕚᕆᓚᐅᕐᑕᖏᑦ. 25ᐃᓕᓯᕆᓕ ᐂᕉᓂᐅᑉ ᐃᕐᓂᖓ ᓄᓕᐊᓂᓚᐅᕐᐳᖅ ᐳᑎᐅᓕᐅᑉ ᐸᓂᖏᑕ ᐃᓚᖓᓐᓂᒃ; ᑖᒃᑯᐊᒡᓗ ᕿᑐᕐᖓᕐᑖᓚᐅᕐᐳᒃ ᐱᓂᕼᐋᓯᒥᒃ. ᑖᒃᑯᐊ ᑕᕝᕙ ᐃᓚᒌᖑᔪᓄᑦ ᓂᐊᖁᕆᔭᐅᓚᐅᕐᑐᑦ ᑭᖑᕚᕆᔭᐅᓪᓗᑎᒡᓗ ᓕᕔᑎᓄᑦ.

26ᑖᒃᑯᖕᓄᖓ ᑕᕝᕙ ᐂᕉᓂᒧᑦ ᒨᓯᓯᒧᓪᓗ ᐊᑕᓂᖅ ᐅᖃᓚᐅᕐᐳᖅ: “ᐃᓴᕆᐊᓕᒥᐅᑦ ᐃᓅᖃᑎᒌᑦ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᓯᒋᒃ.” 27ᑖᒃᑯᐊᒡᓗ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᕆᐊᕐᑐᓚᐅᕐᐴᒃ ᐃᓴᕆᐊᓕᒥᐅᑦ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᖁᓪᓗᒋᑦ.

ᐊᑕᓂᐅᑉ ᐊᑐᕐᑕᐅᖁᔭᒥᓂᒃ ᐅᖃᐅᑦᔨᓂᖓ ᒨᓯᓯᒥᒃ ᐂᕉᓂᒥᒡᓗ

28ᐊᑕᓂᐅᑉ ᒨᓯᓯ ᐅᖃᕐᕕᒋᒐᒥᐅᒃ ᐄᑦᔨᑉᑎᐅᑉ ᓄᓇᖓᓂ, 29ᒨᓯᓯᒧᑦ ᐅᖃᓚᐅᕐᐳᖅ ᐃᒫᒃ, “ᐅᕙᖓ ᐊᑕᓂᐅᕗᖓ, ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓᑦ ᐅᖃᐅᑎᒍᒃ ᐅᖃᐅᓯᕆᓚᐅᕐᑕᓕᒫᓐᓂᒃ ᐃᓕᖕᓄᑦ.” 30ᒨᓯᓯᓕ ᐊᑕᓂᕐᒧᑦ ᑭᐅᕗᖅ, “ᖃᐅᔨᒪᕗᑎᑦ ᐅᖃᕈᓐᓇᑦᓯᐊᖏᓐᓂᓐᓂᒃ, ᐊᖓᔪᖅᑳᕐᔪᐊᖅ ᐅᖃᐅᓯᕆᔭᓐᓂᒃ ᓈᓚᒃᑲᔭᕋᓗᐊᕐᒫᑦ?”

Currently Selected:

ᒨᓯᓯ ᐂᑉᐸᖏᑦ 6: EAIB

Highlight

Copy