ᒨᓯᓯ ᐂᑉᐸᖏᑦ 4
4
ᒎᑎᐅᑉ ᒨᓯᓯ ᐱᔪᓐᓇᕐᓂᕐᒥᒃ ᐊᖏᔪᒥᒃ ᑐᓂᓯᕕᒋᕚ
1ᑕᕝᕙ ᒨᓯᓯ ᑭᐅᕗᖅ ᐅᖃᕐᓗᓂᓗ, “ᑕᑯᒋᑦ ᑍᒃᑯᐊ ᐅᕙᓐᓂᒃ ᐅᒃᐱᕈᓱᖕᓂᐊᓐᖏᓚᑦ, ᓂᐱᒐᓗ ᓈᓚᒍᒪᑦᔮᓐᖏᓛᑦ, ᐅᖃᕋᔭᕐᐳᓪᓕ, ‘ᐊᑕᓂᖅ ᓴᖅᑭᓚᐅᓐᖏᓚᖅ ᐃᓕᖕᓄᑦ.’”
2ᑕᕝᕙ ᐊᑕᓂᐅᑉ ᐅᖃᐅᑎᕚ, “ᓱᓇᒥᒃ ᑎᒍᒥᐊᕐᐲᑦ?”
ᒨᓯᓯᐅᑉ ᑭᐅᕚ, “ᐊᔭᐅᑉᐱᐊᒥᒃ.”
3ᐊᑕᓂᐅᑉ ᐅᖃᐅᑎᕚ, “ᓄᓇᒧᑦ ᐃᒋᓚᐅᕈᒃ.” ᑕᕝᕙ ᓄᓇᒧᑦ ᐃᒋᑉᐹ, ᖁᒡᓗᒋᐊᓐᖑᕐᐳᕐᓗ; ᒨᓯᓯᓗ ᕿᒪᒃᓯᕗᖅ ᑖᑦᓱᒥᖓ. 4ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ, “ᐃᓴᒡᓗᑎᑦ, ᐸᒥᐅᖓᒍᑦ ᑎᒍᓚᐅᕈᒃ” ᑕᕝᕙ ᐃᓴᒡᓗᓂ ᐸᒥᐅᖓᒍᑦ ᑎᒍᕚ, ᑖᓐᓇᓗ ᐊᔭᐅᑉᐱᐊᓐᖑᕆᕗᖅ ᑎᒍᖕᒪᒍ. 5ᑕᕝᕙ ᐊᑕᓂᖅ ᐅᖃᕐᐳᖅ, “ᑕᒪᓐᓇ ᐱᑦᔪᑎᒋᓗᒍ ᐅᒃᐱᕈᓱᓕᕈᒫᕐᐳᑦ ᐊᑕᓂᕐᒥᒃ, ᓯᕗᓕᕕᓂᖏᑦᑕ ᒎᑎᖓᑕ, ᐂᑉᕋᕼᐋᒻ, ᐂᓴᑭᐅᓪᓗ, ᔧᑰᓪᓗ ᒎᑎᖓᑕ, ᑖᑦᓱᒪ ᓴᖅᑭᕝᕕᒋᓚᐅᕐᒪᑎᑦ.”
6ᐊᑕᓂᐅᓪᓗ ᓱᓕ ᐅᖃᐅᑎᒃᑲᓐᓂᕐᐹ: “ᐊᒡᒐᑎᑦ ᐅᓕᒡᔪᐊᕕᑦ ᐃᑭᐊᖓᓄᐊᕐᑎᒃᑭᑦ.” ᑕᕝᕙ ᐊᒡᒐᓂ ᐅᓕᒡᔪᐊᒥ ᐃᑭᐊᖓᓄᐊᕐᑎᑉᐰᑦ, ᐊᒧᒐᒥᒋᓪᓗ, ᑕᕝᕙ ᖃᑯᕐᓯᓯᒪᕗᑦ ᐸᕐᑎᕐᑐᑎᑐᑦ ᐊᐳᑎᑐᑦ ᖃᑯᕐᑎᒋᓕᕐᓗᑎᒃ. 7ᑕᕝᕙ ᒎᑎ ᐅᖃᕐᐳᖅ, “ᐊᒡᒐᑎᑦ ᐅᓕᒡᔪᐊᕐᓄᑦ ᐅᑎᕐᑎᓚᐅᕐᒥᒃᑭᑦ.” ᑕᕝᕙ ᐊᒡᒐᓂ ᐅᓕᒡᔪᐊᒥ ᐃᑭᐊᖓᓄᑦ ᐅᑎᕐᑎᒃᑭᕔᑦ, ᐊᒧᒐᒥᒋᓪᓗ, ᑕᑯᒋᑦ ᑕᕝᕙ ᐅᕕᓂᖕᒥᓄᑦ ᐅᑎᑦᓯᐊᕆᕗᑦ. 8ᒎᑎᓗ ᐅᖃᕐᐳᖅ, “ᑕᕝᕙ ᐅᒃᐱᕆᖏᑉᐸᑎᑦ, ᑲᒪᓇᕐᑐᕐᓗ ᑕᒪᓐᓇ ᓯᕗᓪᓕᐅᔪᖅ ᐃᒃᐱᒋᔭᐅᖏᑉᐸᑦ, ᑭᖑᓪᓕᕐᒧᑦ ᓇᓗᓁᒃᑯᑕᕐᒧᑦ ᐅᒃᐱᕈᓱᓕᕋᔭᕐᐳᑦ. 9ᑖᒃᑯᐊᒡᓕ ᓇᓗᓁᒃᑯᑖᒃ ᒪᕐᕉᒃ ᓱᓕ ᐅᒃᐱᕆᖏᑉᐸᒋᑦ ᐅᕝᕙᓗ ᐅᖃᐅᓯᕐᓂᒃ ᓈᓚᖏᑉᐸᑕ, ᑕᕝᕙ ᑰᖕᒥᒃ ᓁᐅᓪᒥᑦ ᖃᓗᓯᓗᑎᑦ ᓄᓇᒧᑦ ᐸᓂᕐᑐᒧᑦ ᑯᕕᓯᓕᕆᑦ; ᑕᕝᕙ ᑕᒪᓐᓇ ᐃᒥᖅ ᖃᓗᓚᐅᕐᑍᑦ ᑰᖕᒥᑦ ᓁᐅᓪᒥᑦ ᐊᐅᓐᖑᕐᓂᐊᕐᐳᖅ ᓄᓇᒥ ᑕᒫᓂ ᐸᓂᕐᑐᒥ.”
10ᒨᓯᓯᓕ ᐅᖃᕐᐳᖅ ᐊᑕᓂᕐᒧᑦ, “ᑕᑯᒋᑦ ᐊᑕᓃᖅ, ᐅᖃᓪᓚᑦᓯᐊᕈᓐᓇᖏᑦᑐᖓ, ᐊᒡᓛᓪᓗ ᐃᓕᖕᓄᑦ ᐅᖃᓪᓚᒡᕕᐅᓂᕐᒪ ᑭᖑᓂᖓᓂ ᓱᓕ ᐅᖃᓪᓚᒍᓐᓇᑦᓯᐊᓐᖏᓚᖓ, ᐅᖃᕈᓐᓁᓪᓕᖅᑲᑦᑕᓲᖑᒐᒪ ᐅᖃᕋᓗ ᐃᖃᓕᕐᐸᒃᓗᓂ.”
11ᐊᑕᓂᐅᓪᓕ ᐅᖃᐅᑎᕚ, “ᑭᐊᓕ ᐃᓅᑉ ᖃᓂᖓ ᓴᓇᓚᐅᕐᐸᐅᒃ? ᑭᐊᓗ ᐅᖃᕈᓐᓇᕈᓐᓃᕐᑎᑉᐸᐅᒃ, ᐅᕝᕙᓗ ᑭᐊ ᑐᓵᔪᓐᓃᕐᑎᑉᐸᐅᒃ, ᑭᐊᓗ ᑕᑯᔪᓐᓇᕐᑎᑉᐸᐅᒃ, ᑕᐅᑐᒍᓐᓃᕐᑎᓪᓗᓂᐅᒡᓘ? ᐅᕙᖓ ᐊᑕᓂᐅᔪᖓ ᑖᒃᑯᓂᖓ ᓴᓇᓚᐅᓐᖏᓚᖔ? 12ᑍᒤᒻᒪᑦ ᑍᑯᓐᖓᓕᕆᑦ, ᐅᕙᖓ ᐅᖃᐅᓯᑎᑦ ᐃᓚᒋᓂᐊᕐᐸᒃᑲ ᐊᔪᕆᕐᑐᕐᓂᐊᕐᐸᒋᓪᓗ ᖃᓄᖅ ᐅᖃᕐᑐᒃᓴᐅᖕᒪᖔᕐᐱᑦ.”
13ᒨᓯᓯᓕ ᐅᖃᕐᐳᖅ, “ᐊᑕᓃᖅ, ᐊᓯᓐᓂᒃ ᑎᓕᓯᖔᓚᐅᕆᑦ.”
14ᑕᕝᕙ ᐊᑕᓂᖅ ᓂᓐᖓᓕᕐᐳᖅ ᒨᓯᓯᒧᑦ ᐅᖃᕐᓗᓂᓗ, “ᐂᕉᓂᒥᒃ ᐊᖓᔪᖃᓐᖏᓚᑏᑦ ᓕᕔᑎᒥᐅᑕᕐᒥᒃ? ᑖᓐᓇ ᖃᐅᔨᒪᕙᕋ ᐅᖃᓪᓚᑦᓯᐊᕈᓐᓇᕐᒪᑦ; ᑕᑯᒋᓪᓗ ᐃᓕᖕᓄᐊᓕᕐᐳᖅ ᐸᕐᕆᐊᕐᓗᑎᑦ, ᑕᑯᒍᓂᑎᓪᓗ ᐃᓗᒥᒍᑦ ᖁᕕᐊᓱᖕᓂᐊᕐᐳᖅ. 15ᑖᑦᓱᒧᖓᓗ ᐅᖃᓪᓚᒃᑐᒃᓴᐅᕗᑎᑦ, ᑖᓐᓇ ᐅᖃᐅᓯᖃᕈᓐᓇᖁᓪᓗᒍ ᐅᖃᐅᓯᕆᔭᐅᖁᔭᕐᓂᒃ; ᐅᕙᖓ ᐅᖃᐅᓯᑎᑦ ᐃᓚᒋᓂᐊᕐᐸᒃᑲ, ᑖᑦᓱᒪᓗᑦᑕᐅᖅ ᐅᖃᐅᓯᖏᑦ ᐃᓚᒋᓂᐊᕆᕙᒃᑲ, ᐊᔪᕆᕐᑐᕐᓂᐊᕐᐸᒋᓪᓗ ᖃᓄᐃᓕᐅᕐᑐᒃᓴᐅᖕᒪᖔᕐᐱᑦ. 16ᑖᓐᓇᓗ ᐃᓕᖕᓂᒃ ᐃᓇᖐᓗᓂ ᐃᓄᖕᓄᑦ ᐅᖃᓪᓚᖃᑦᑕᕐᓂᐊᕐᐳᖅ; ᑖᓐᓇᓗ ᐃᓕᖕᓄᑦ ᖃᓂᕆᔭᐅᔪᑎᑐᑦ ᑍᒤᓐᓂᐊᕐᐳᖅ, ᑖᑦᓱᒧᖓᓗ ᒎᑎᒋᔭᐅᔪᑎᑐᑦ ᑍᒤᓐᓂᐊᕐᐳᑎᑦ. 17ᐊᔭᐅᑉᐱᐊᕐᓗ ᑕᒪᓐᓇ ᑎᒍᒥᐊᒐᒃᓴᕆᕙᑦ, ᑕᒪᑐᒨᓇ ᓇᓗᓁᒃᑯᑕᕐᓂᒃ ᐱᓇᓱᐊᕆᐊᖃᓛᕋᕕᑦ.”
ᒨᓯᓯᐅᑉ ᐅᑎᕐᓂᖓ ᐄᑦᔨᑉᑎᒧᑦ
18ᒨᓯᓯᓗ ᐅᑎᕐᐳᖅ ᔨᑐᕉᒧᑦ ᓴᑭᒥᓄᑦ, ᐅᖃᐅᑎᓪᓗᓂᐅᒡᓗ, “ᐅᑎᕈᓐᓇᕐᑎᓚᐅᓐᖓᑐᖅ ᐃᓚᓐᓄᑦ ᐄᑦᔨᑉᑎᒦᑦᑐᓄᑦ, ᑕᑯᔭᕐᑐᕐᓗᖓ ᓱᓕ ᐃᓅᖕᒪᖔᑕ.” ᔨᑐᕉᓗ ᐅᖃᕐᐳᖅ ᒨᓯᓯᒧᑦ, “ᐃᓱᒫᓗᖏᓪᓗᑎᑦ ᐊᐅᓪᓚᓕᕆᑦ.”
19ᐊᑕᓂᕐᓗ ᐅᖃᓚᐅᕆᕗᖅ ᒨᓯᓯᒧᑦ ᒥᑎᐊᓂᒦᑎᓪᓗᒍ, “ᐄᑦᔨᑉᑎᒧᑦ ᐅᑎᓕᕆᑦ; ᐃᓕᖕᓂᒃ ᑐᖁᑦᓯᔪᒪᓚᐅᕐᑐᓕᒫᑦ ᑐᖁᖓᓕᕐᒪᑕ.” 20ᑍᒤᒻᒪᑦ ᑕᕝᕙ ᒨᓯᓯᐅᑉ ᓄᓕᐊᓂ ᐃᕐᓂᓂᓗ ᐸᕐᓇᒃᑎᓕᕐᐰᑦ ᓯᐅᑎᖅᑯᕐᑐᔫᓪᓗ ᖄᖓᓄᑦ ᐃᑭᑎᓪᓗᒋᑦ, ᐄᑦᔨᑉᑎᒧᓪᓗ ᐅᑎᓕᕐᐳᖅ; ᐊᔭᐅᑉᐱᐊᕐᓗ ᒎᑎᐅᑉ ᐊᔭᐅᑉᐱᐊᖁᑎᖓ ᒨᓯᓯᐅᑉ ᓇᒃᓴᕐᐹ.
21ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐄᑦᔨᑉᑎᒧᑦ ᐅᑎᕈᕕᑦ, ᑲᒪᑦᓯᐊᕐᓂᐊᕐᐳᑎᑦ ᐱᓇᓱᐊᕐᑐᒃᓴᐅᒐᕕᑦ ᐰᕉᑉ ᓵᖓᓂ ᑕᒤᓐᓂᒃ ᑲᒪᓇᕐᑐᓕᓂᕐᓂᒃ ᑐᓂᓚᐅᕐᑕᓐᓂᒃ ᐃᓕᖕᓄᑦ, ᐰᕉᓕ ᓯᑎᔫᑎᓐᓂᐊᕐᐸᕋ, ᐃᓄᒋᐊᒃᑐᕐᔪᐊᓂᒃ ᐊᐅᓪᓚᖁᔨᖁᓇᒍ. 22ᐰᕉᒧᓪᓕ ᐅᖃᕐᑐᒃᓴᐅᕗᑎᑦ, ‘ᐊᑕᓂᖅ ᐅᖃᕐᐳᖅ ᐃᒫᒃ, ᐃᓴᕆᐊᓕ ᐊᖓᔪᒃᓯᕐᐹᖁᑎᒋᕙᕋ ᐃᕐᓂᓐᓂᑦ, 23#ᒨᓯᓯ ᐂᑉᐸᖏᑦ 12:29.ᐅᖃᐅᑎᕙᒋᓪᓗ, ᐃᕐᓂᕋ ᐊᐅᓪᓚᕈᓐᓇᕐᑎᓚᐅᕈᒃ ᐱᔨᑦᓯᕈᓐᓇᖁᓪᓗᒍ ᐅᕙᓐᓂᒃ. ᐊᐅᓪᓚᖁᓂᐊᖏᒃᑯᕕᐅᒃ, ᑕᕝᕙ ᐊᖓᔪᒃᓯᕐᐹᖁᑏᑦ ᐃᕐᓃᑦ ᑐᖁᑎᓐᓂᐊᕐᐸᕋ.’”
24ᓯᓂᒃᑕᕐᕕᒋᔭᖓᓂᓕ ᐄᑦᔨᑉᑎᒧᐊᕐᐸᓪᓕᐊᓕᕐᑎᓪᓗᒋᑦ, ᐊᑕᓂᐅᑉ ᒨᓯᓯ ᐅᐸᒃᐹ ᑐᖁᓐᓇᓱᐊᕈᒪᓪᓗᒍ. 25ᑕᕝᕙ ᓯᐴᕋ ᓴᕕᖕᒥᒃ ᐃᐱᒃᑐᒥᒃ ᑎᒍᓯᕗᖅ, ᐃᕐᓂᕐᒥᓗ ᐅᓱᐊᑕ ᓄᕗᐊ ᑭᐱᕚ, ᑭᐱᓂᑯᐊᓗ ᒨᓯᓯᐅᑉ ᐃᑎᒐᖏᓐᓄᑦ ᐊᒃᑐᕐᑎᓪᓗᒍ, ᐅᖃᕐᐳᖅ, “ᖁᓚᕐᓇᖏᑦᑐᒥᒃ ᐊᐅᖃᕐᓗᑎᑦ ᐅᐃᒋᕙᒋᑦ!” 26ᑕᕝᕙ ᐊᑕᓂᐅᑉ ᒨᓯᓯ ᓱᖁᑎᒋᔪᓐᓃᕐᐹ. ᑕᒪᓐᓇ ᑕᕝᕙ ᐱᑦᔪᑎᒋᓪᓗᒍ ᓯᐴᕋ ᐅᖃᓚᐅᕐᐳᖅ, “ᖁᓚᕐᓇᖏᑦᑐᒥᒃ ᐊᐅᖃᕐᓗᑎᑦ ᐅᐃᒋᕙᒋᑦ,” ᑭᐱᔭᐅᓂᖅ ᐱᑦᔪᑎᒋᓪᓗᒍ.
27ᐊᑕᓂᕐᓗ ᐅᖃᕐᐳᖅ ᐂᕉᓂᒧᑦ, “ᐃᓄᖃᖏᑦᑐᒧᐊᓕᕆᑦ ᒨᓯᓯ ᐸᕐᕆᐊᕐᓗᒍ.” ᑕᕝᕙ ᑖᕗᓐᖓᓕᕐᐳᖅ, ᑲᑎᕚᓗ ᒎᑎᐅᑉ ᖃᖅᑲᖁᑎᖓᓂ, ᑲᑎᒐᒥᐅᒡᓗ ᑯᓂᒃᐹ. 28ᒨᓯᓯᐅᓪᓗ ᐂᕉᓂ ᐅᓂᒃᑲᐅᑎᕚ ᑕᒤᓐᓂᒃ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ ᑎᓕᔭᐅᓯᒪᓂᕐᒥᓂᒡᓗ, ᓇᓗᓁᒃᑯᑕᕐᓂᒡᓗ ᐊᑐᖁᔭᐅᓂᕆᔭᒥᓂᒃ ᑕᒤᓐᓂᒃ. 29ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐄᑦᔨᑉᑎᒧᐊᕐᐴᒃ, ᑕᕝᕗᓐᖓᕋᒥᒡᓗ ᐃᓴᕆᐊᓕᒥᐅᑦ ᐊᖓᔪᖅᑳᓕᒫᖏᑦ ᑲᑎᒪᖃᑎᒋᕔᑦ. 30ᐂᕉᓂᓗ ᐅᓂᒃᑳᕐᐳᖅ ᑕᒤᓐᓂᒃ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ ᒨᓯᓯᒧᑦ, ᓇᓗᓁᒃᑯᑕᕐᓂᒡᓗ ᐱᓇᓱᐊᕐᓗᓂ ᐃᓄᐃᑦ ᓵᖏᓐᓂ. 31ᐃᓄᐃᓪᓗ ᐅᒃᐱᕈᓱᓕᕐᐳᑦ; ᑐᓴᕋᒥᒡᓗ ᐊᑕᓂᐅᑉ ᐅᐸᒍᑎᓂᕕᓂᖓᓂᒃ ᐃᓴᕆᐊᓕᒥᐅᓄᑦ ᐅᖁᒤᒃᓴᕐᑎᑕᐅᓂᖏᓐᓂᒡᓗ ᑕᑯᓯᒪᓂᖓᓂᒃ ᖃᐅᔨᒐᒥᒃ, ᐅᑯᓪᓗᑎᒃ ᑐᒃᓯᐊᓕᕐᐳᑦ.
Currently Selected:
ᒨᓯᓯ ᐂᑉᐸᖏᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
