ᒨᓯᓯ ᐂᑉᐸᖏᑦ 2
2
ᒨᓯᓯᐅᑉ ᐃᕐᓂᐊᖑᓂᖓ
1ᑕᒪᓐᓇᓕ ᓇᓪᓕᐅᑎᓯᒪᓕᕐᑎᓪᓗᒍ, ᐊᖑᑦ ᓕᕔᒃᑯᑦ ᐃᓚᖏᓐᓂᓐᖔᕐᓯᒪᔪᖅ ᓄᓕᐊᓂᓚᐅᕐᐳᖅ ᐊᕐᓇᒥᒃ ᐃᓅᖃᑎᓪᓚᕆᖕᒥᓂᒃ. 2#ᐋᐴᓯᑕᓖᑦ 7:20; ᐄᑉᕈᐃᓄᑦ 11:23.ᓄᓕᐊᖓᓗ ᓄᑕᕋᒃᓴᖃᓕᕋᒥ ᐃᕐᓂᕐᑖᕐᐳᖅ; ᐊᕐᓇᕐᓗ ᖃᐅᔨᓕᕋᒥ ᕿᑐᕐᖓᕐᑖᕆᔭᒥ ᓄᑕᕋᑦᓯᐊᕙᐅᓂᖓᓂᒃ, ᐃᔨᕋᕐᑐᐊᕆᓕᕐᐹ ᑕᖅᑭᓂᒃ ᐱᖓᓱᓂᒃ. 3ᐃᔨᕐᓯᒪᔪᓐᓁᓪᓕᓕᕋᒥᐅᒡᓕ, ᐃᕕᐅᔭᕐᒥᒃ ᐴᓕᐊᕆᓯᒪᔪᒥᒃ ᐱᕗᖅ ᓯᓚᑖ ᐃᒻᒪᒌᒃᑯᑎᒥᒃ ᒥᖑᐊᕐᓗᒍ ᐃᒻᒪᑦᔧᕐᐹ. ᓄᑕᕋᓂᓗ ᐃᓗᐊᓄᐊᕐᓗᒍ ᑰᑉ ᓯᓈᓄᐊᕐᐹ ᑕᑭᔫᑎᓂᒃ ᐃᕕᒃᓱᒐᖃᕐᓂᖓᓄᑦ. 4ᑖᑦᓱᒪᓗ ᓄᑕᕋᑯᓘᑉ ᓇᔭᖓ ᐅᖓᓯᒃᑐᒥ ᖃᐅᔨᓴᕐᐳᖅ ᖃᓄᐃᓕᓂᐊᕐᒪᖔᑦ ᖃᐅᔨᓴᕐᓗᓂ.
5ᐊᖓᔪᖅᑳᕐᔪᐊᓪᓗ ᐸᓂᖓ ᑰᖕᒧᓐᖓᐅᕗᖅ ᑎᒥᒥᓂᒃ ᐅᐊᓴᕆᐊᕐᑐᕐᓗᓂ, ᐊᕐᓁᓪᓕ ᐱᔨᖏᑦ ᑰᑉ ᓯᓈᒍᑦ ᐱᓱᒃᐳᑦ. ᑕᑯᕗᓪᓗ ᐃᕕᐅᔭᕐᒥᒃ ᐃᕕᑦᓱᒊᑦ ᑕᑭᔪᑎᐅᓂᖏᓐᓃᑦᑐᒥᒃ ᐱᔨᑲᑖᒥᓗ ᐃᓚᖓᓐᓄᑦ ᐂᔭᐅᒃᑲᕐᐹ. 6ᐊᖓᔪᖅᑳᕐᔪᐊᓪᓗ ᐸᓂᖓᑕ ᐃᕕᐅᔭᖅ ᒪᑐᐃᕋᒥᐅᒃ ᓄᑕᕋᑯᓗᖕᒥᒃ ᐊᖑᒻᒥᒃ ᑕᒃᑯᕗᖅ, ᓄᑕᕋᑯᓗᒡᓗ ᕿᐊᓕᕐᒪᑦ ᓇᒡᓕᒋᓕᕐᐹ, ᐅᖃᕐᓗᓂᓗ, ᐄᑉᕉᒥᐅᓄᓇ ᓄᑕᕋᑯᓗᐊ.
7ᓄᑕᕋᑯᓘᓪᓗ ᓇᔭᖓᑕ ᐊᐱᕆᕚ, “ᐄᑉᕉᒥᐅᑦ ᐊᕐᓇᖏᓐᓂᑦ ᕾᖁᔨᓚᖔ? ᑲᒪᔨᒋᓂᐊᕐᑕᖓᓂᒃ.”
8ᑖᓐᓇᓗ ᑭᐅᕗᖅ, “ᐊᑏ.” ᑖᑦᓱᒪᓗ ᓂᕕᐊᕐᓯᐊᑉ ᓄᑕᕋᐅᑉ ᐊᓈᓇᖓ ᕾᑦᔪᑎᕚ. 9ᐊᖓᔪᖅᑳᕐᔪᐊᓪᓗ ᐸᓂᖓᑕ ᐊᕐᓇᖅ ᐅᖃᐅᑎᕚ, “ᐅᓇ ᓄᑕᕋᑯᓗᒃ ᑲᒪᒋᓚᐅᕈᒃ ᐊᑭᓕᕐᓱᕐᓂᐊᕐᐸᒋᑦ.” ᐊᓱᐃᓛᒃ ᓄᑕᕋᑯᓗᒃ ᐊᕐᓇᐅᑉ ᐱᓪᓗᓂᐅᒃ ᑲᒪᒋᓕᕐᐹ. 10#ᐋᐴᓯᑕᓖᑦ 7:21.ᑭᖑᓂᖓᒎᓕᕐᑐᖅ, ᓄᑕᕋᑯᓗᒃ ᐊᖏᒡᓕᖕᒪᑦ ᐊᖓᔪᖅᑳᕐᔪᐊᑉ ᐸᓂᖓᓄᓐᖓᐅᑎᕚ, ᑖᑦᓱᒪᓗ ᑎᒍᐊᕐᑖᕆᕚ ᓇᖕᒥᓂᕐᒥᑐᑦ ᐱᓪᓗᒍ. ᐊᖓᔪᖅᑳᕐᔪᐊᓪᓗ ᐸᓂᖓ ᐅᖃᕐᐳᖅ, “ᑰᖕᒥᑦ ᖃᑭᓚᐅᕋᒃᑯ ᐊᑎᖃᕐᑎᓐᓂᐊᓕᕐᐸᕋ ᒨᓯᓯᒥᒃ.”
ᒨᓯᓯᐅᑉ ᕿᒫᓂᖓ ᒥᑎᐊᓂᒧᑦ
11 #
ᐋᐴᓯᑕᓖᑦ 7:23-28. #
ᐄᑉᕈᐃᓄᑦ 11:24. ᒨᓯᓯᓗ ᐃᓐᓇᕈᕋᒥ, ᐃᓅᖃᑎᓂ ᐄᑉᕉᒥᐅᑦ ᑕᑯᔭᕐᑐᕐᐰᑦ, ᖃᐅᔨᓕᕐᐰᓪᓗ ᐊᒃᓱᕈᕐᓇᕐᑐᒥᒃ ᓴᓇᑎᑕᐅᓂᖏᓐᓂᒃ. ᑕᑯᓪᓗᓂᓗ ᐄᑦᔨᑉᑎᒥᐅᑕᖅ ᑐᖁᑦᓯᑎᓪᓗᒍ ᐄᑉᕉᒥᐅᑕᕐᒥᒃ ᒨᓯᓯᐅᑉ ᐃᓅᖃᑎᖏᑕ ᐃᓚᖓᓐᓂᒃ. 12ᒨᓯᓯᓗ ᐊᕙᒻᒧᑦ ᕿᓂᕐᐳᖅ ᑕᐅᑐᒃᑕᐅᖕᒪᖔᕐᒥ ᖃᐅᔨᓴᕐᓗᓂ, ᑕᐅᑐᒃᑕᐅᖏᓐᓇᒥ ᐄᑦᔨᑉᑎᒥᐅᑕᖅ ᑐᖁᑉᐹ ᑎᒥᖓᓗ ᓯᐅᕋᕐᒧᑦ ᓴᐅᓪᓗᓂᐅᒃ. 13ᖃᐅᑎᓪᓗᒍ ᒨᓯᓯ ᐅᑎᕐᒥᒐᒥ ᑕᑯᓕᕐᐳᖅ ᐄᑉᕉᒥᐅᑕᐅᖃᑎᒌᖕᓂᒃ ᓂᓐᖓᐅᑎᔫᖕᓂᒃ, ᓂᓐᖓᐅᑦᔨᓂᕐᓴᕐᓗ ᐅᖃᐅᑎᕚ, “ᖃᓄᐃᒻᒪᑦ ᐄᑉᕉᒥᐅᑕᐅᖃᑎᖕᓄᑦ ᓂᓐᖓᒃᐲᑦ?”
14ᑖᑦᓱᒪᓗ ᑭᐅᕚ, “ᑭᐊ ᐅᕙᑦᑎᓐᓄᑦ ᐊᖓᔪᖅᑳᓐᖑᕐᑎᑉᐹᑏᑦ ᐃᖅᑲᕐᑐᐃᖁᓪᓗᑎᑦ, ᑐᖁᓐᓂᐊᓕᕆᕕᖔ ᑍᑦᓱᑐᓇᖅ ᐄᑦᔨᑉᑎᒥᐅᑕᕐᑐᑦ ᑐᖁᓚᐅᕐᑕᕐᑐᑦ?” ᒨᓯᓯᓗ ᓯᕘᕋᓕᕐᐳᖅ ᐃᓱᒪᓕᕐᓗᓂᓗ, “ᐃᓄᖕᓂᑦ ᖃᐅᔨᔭᐅᓐᓂᕐᐳᖓ ᖃᓄᐃᓕᐅᕐᓂᕆᓚᐅᕐᑕᓐᓂᒃ.” 15#ᐋᐴᓯᑕᓖᑦ 7:29; ᐄᑉᕈᐃᓄᑦ 11:27.ᐊᖓᔪᖅᑳᕐᔪᐊᖅ ᖃᐅᔨᓕᕋᒥ ᖃᓄᐃᑦᑐᖃᕐᓂᕕᓂᖓᓂᒃ, ᒨᓯᓯ ᑐᖁᑕᐅᑎᒐᓱᒃᑲᓗᐊᕐᐹ, ᒨᓯᓯᓕ ᕿᒫᕗᖅ ᓄᓇᑖᕐᓗᓂᓗ ᒥᑎᐊᓂᐅᑉ ᓄᓇᖓᓂ.
16ᐅᓪᓗᓪᓕ ᐃᓚᖓᓐᓂ ᒨᓯᓯ ᐃᒃᓯᕙᑎᓪᓗᒍ ᐃᒥᕐᑕᕐᕕᖕᒥ ᔩᑕᓘᑉ ᑐᓂᕐᕈᓯᕐᑎᑦᓯᔨᐅᔫᑉ ᒥᑎᐊᓂᒥ, ᐸᓂᖏᑦ 7 ᑎᑭᑉᐳᑦ ᐆᒪᔪᖁᑎᖏᑕ ᐃᒪᖃᐅᑎᖏᓐᓂᒃ ᐃᒻᒥᕐᓯᔭᕐᑐᕐᓗᑎᒃ. 17ᓰᐱᓕᕆᔩᓪᓕ ᑕᕝᕗᓐᖓᕋᒥᒃ ᔩᑕᓘᑉ ᐸᓂᖏᑦ ᐊᐅᓪᓚᕐᑎᑕᐅᕗᑦ; ᒨᓯᓯᐅᓪᓗ ᑕᑉᐱᕐᓗᒋᑦ ᐃᑲᔪᕐᐰᑦ ᐆᒪᔪᖁᑎᖏᓪᓗ ᐃᒥᕐᑎᓕᕐᓗᓂᒋᑦ. 18ᐊᑖᑕᒥᖕᓄᓪᓕ ᕆᐅᓕᒧᑦ ᐅᑎᕐᒪᑕ ᐊᑖᑕᖓᑦᑕ ᐊᐱᕆᕔᑦ, “ᖃᓄᐃᒻᒪᑦ ᐅᑎᕐᓵᓕᕕᓰ ᐅᓪᓗᒥ?”
19ᑖᒃᑯᐊ ᑭᐅᕗᑦ, “ᐄᑦᔨᑉᑎᒥᐅᑕᕐᒧᑦ ᓴᐳᑎᔭᐅᖅᑲᐅᒐᑦᑕ ᓰᐱᓕᕆᔨᓂᑦ, ᐅᕙᑦᑎᓐᓂᒃ ᐊᒡᓛᑦ ᐃᒥᕐᑕᐅᑦᔨᖅᑲᐅᕗᖅ ᐆᒪᔪᖁᑎᕗᓪᓗ ᐃᒥᕐᑎᓪᓗᓂᒋᑦ.”
20ᐸᓂᓂᓗ ᐊᐱᕆᕔᑦ, “ᓇᐅᒃ ᑍᒪ? ᖃᓄᐃᒻᒪᑦ ᕿᒤᓐᓇᕐᐱᓯᐅᒃ ᑖᕗᖓ, ᕾᖁᔭᕐᑐᕐᓯᐅᒃ ᓂᕆᖃᑎᒋᓂᐊᕋᑦᑎᒍ.”
21ᒨᓯᓯᓗ ᑕᒫᓂ ᓄᓇᖃᖃᑕᐅᔪᓐᓇᕐᓂᕋᕐᐳᖅ, ᔩᑕᓘᓪᓗ ᐸᓂᖕᒥᓂᒃ ᓯᐴᕋᒥᒃ ᓄᓕᐊᕐᑖᕐᑎᑉᐹ. 22ᑖᒃᑯᐊᒡᓗ ᐃᕐᓂᕐᑖᕐᐴᒃ, ᒨᓯᓯᓗ ᐅᖃᕐᐳᖅ, “ᑕᒫᓂᒥᐅᑕᐅᖏᓐᓇᒪ ᓄᓇᒥ ᐊᑎᕐᑖᕐᑎᑉᐸᕋ ᒌᕐᓲᒥᒃ.”
23ᐊᕐᕌᒍᐃᓪᓗ ᐅᓄᕐᑐᑦ ᐊᓂᒍᕐᓯᒪᓕᕐᑎᓪᓗᒋᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᑐᖁᕗᖅ. ᑭᓯᐊᓂᓕ ᓱᓕ ᐃᓴᕆᐊᓕᒥᐅᑦ ᐃᓖᔭᕆᔭᐅᓂᕐᒥᖕᓂᒃ ᓂᓪᓕᐊᑦᔪᑎᒌᓐᓇᓚᐅᕐᐹᑦ ᐃᑲᔪᕐᑕᐅᔪᒪᓪᓗᑎᒃ, ᕿᓄᓂᖓᓪᓗ ᒎᑎᒧᑦ ᑐᓴᕐᑕᐅᕗᖅ. 24#ᒨᓯᓯ ᓯᕗᓪᓖᑦ 15:13,14.ᓂᓪᓕᐊᓂᖓᑦ ᐃᓖᔭᕆᔭᐅᓂᕐᒧᑦ ᒎᑎᐅᑉ ᑐᓴᕋᒥᐅᑉ ᐊᖏᖃᑎᒌᒍᑎᒋᓚᐅᕐᑕᓂ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ ᐃᖅᑲᕐᐹ. 25ᐃᓴᕆᐊᓕᒥᐅᓪᓗ ᐃᓖᔭᕆᔭᐅᓂᖏᑦ ᒎᑎᐅᑉ ᑕᑯᒐᒥᖏᑦ ᐃᓱᒪᒋᒻᒪᕆᓕᕐᐰᑦ.
Currently Selected:
ᒨᓯᓯ ᐂᑉᐸᖏᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
