ᒨᓯᓯ ᐂᑉᐸᖏᑦ 15

ᒨᓯᓯᐅᑉ ᐃᓐᖏᕈᑎᖓ

1 # ᑕᑯᑎ 15:3. ᑕᕝᕙ ᒨᓯᓯ ᐃᓴᕆᐊᓕᒥᐅᓪᓗ ᐆᒥᖓ ᐃᓐᖏᕈᑎᖃᓚᐅᕐᐳᑦ ᐊᑕᓂᕐᒧᑦ, ᐅᖃᕐᓗᑎᒃ,

“ᐊᑕᓂᕐᒧᑦ ᐃᓐᖏᕐᓂᐊᕐᐳᖓ,

ᓂᕐᑐᕐᓇᕐᑐᕐᔪᐊᒥᒃ ᐱᓂᐊᕐᓂᖃᓚᐅᕐᒪᑦ;

ᕿᒻᒥᕐᔪᐊᑦ ᕿᒻᒥᕐᔪᐊᒥᓗ ᐃᑭᒪᔪᑦ ᐃᒪᕕᖕᒧᑦ ᐃᒋᓚᐅᕐᒪᒋᑦ.

2 # ᐃᓐᖏᕈᑦ 118:14; ᐂᓮᐊᓯ 12:2. ᐊᑕᓂᖅ ᐱᔪᓐᓇᐅᑎᒋᕙᕋ ᐃᓐᖏᕈᑎᒋᓪᓗᒍᓗ,

ᐱᐅᓕᔨᒋᓕᕐᓗᒍᓗ;

ᑖᓐᓇ ᒎᑎᒋᕙᕋ, ᓂᕐᑐᕐᓂᐊᕐᐸᕋᓗ,

ᐊᑖᑕᒪ ᒎᑎᖓ, ᑖᓐᓇ ᐊᖏᔪᕈᕐᑎᓐᓂᐊᕐᐸᕋ.

3ᐊᑕᓂᖅ ᑖᓐᓇ ᐅᓇᑕᕐᑎᐅᕗᖅ;

ᐊᑕᓂᕐᒥᒃ ᐊᑎᖃᕐᐳᖅ.

4ᐰᕉᑉ ᕿᒧᒃᓯᐅᑎᖁᑎᖏᑦ ᖃᒧᑎᓖᑦ

ᐃᓄᖏᓪᓗ ᐃᒫᕐᑎᓚᐅᕐᐰᑦ ᐃᒪᕐᕕᖕᒧᑦ;

ᐊᖓᔪᖅᑳᖁᑎᖏᓪᓗ ᓂᕈᐊᕐᑕᐅᓯᒪᔪᑦ

ᑭᕕᓚᐅᕐᐳᑦ ᐃᒪᕐᒧᑦ ᐊᐅᐸᓗᒃᑕᒧᑦ.

5ᐃᒪᕐᒧᑦ ᐅᓕᒃᑕᐅᕗᑦ;

ᐅᔭᖅᑲᑎᑐᓪᓕ ᑭᕕᕗᑦ ᐃᖅᑲᖓᓄᑦ.

6ᐊᑕᓃᖅ ᐊᒡᒐᑎᑦ ᑕᓕᕐᐲᑦ, ᐱᔪᓐᓇᕐᓂᕐᔪᐊᖃᕐᐳᑦ,

ᐊᑕᓃᖅ ᐊᒡᒐᑎᑦ ᑕᓕᕐᐲᑦ, ᐊᑭᕋᕐᑐᕐᑎᓂᒃ ᓯᖁᒥᑦᑎᕗᑦ.

7ᐱᔪᓐᓇᕐᓂᕐᔪᐊᕕᓪᓗ ᐊᔪᖏᓂᖓᓄᑦ ᐊᑭᕋᕐᑐᕐᑎᑎᑦ ᓵᓚᒋᕙᑎᑦ;

ᓂᓐᖓᐅᒪᓂᕐᓂᒡᓗ ᓴᖅᑭᑎᑦᓯᕕᒋᒐᕕᒋᑦ, ᐃᕕᒐᕐᑎᑐᑦ ᐃᑯᐊᓪᓚᒃᑕᐅᔪᑎᑐᑦ ᑍᒤᑉᐳᑦ.

8ᐃᒪᖅ ᓱᐱᒐᕕᐅᒃ ᐊᕕᒃᐳᖅ ᐊᑭᓐᓇᑎᑐᑦ ᑍᒤᓕᕐᓗᓂ,

ᐃᒪᖅ ᐳᕐᑐᓯᕗᖅ ᐃᓐᓈᕈᕐᑎᑐᑦ;

ᐃᒪᕐᔪᐊᓪᓗ ᐃᑎᓂᖓ ᓯᑎᔪᑎᑐᑦ ᐊᐅᓚᔪᓐᓃᕐᐳᖅ.

9ᐊᑭᕋᕐᑐᑏᑦ ᐅᖃᓚᐅᕐᐳᑦ, ‘ᐅᐸᓗᐃᓗᒋᑦ ᐊᖑᓂᐊᕐᐸᒃᑲ,

ᐱᖁᑎᖏᓪᓗ ᐊᒡᒍᕐᓂᐊᕐᐸᒃᑲ, ᐱᔪᒪᔭᓕᒫᒃᑲᓗ ᐱᓗᒋᑦ.

ᓴᕕᒡᔪᐊᕋᓗ ᐊᒧᓗᒍ, ᑐᖁᓐᓂᐊᕐᐸᒃᑲ.’

10ᐊᑕᓃᖅ ᓱᐱᕕᒋᑐᐊᕋᕕᒋᑦ, ᐃᒪᕐᒧᑦ ᐅᓕᒃᑕᐅᕗᑦ;

ᑭᕕᓪᓗᑎᒡᓗ ᑯᓯᕐᓯᐊᑎᑐᑦ#15:10 ᑯᓯᕐᓯᐊᖅ ᐅᕝᕙᓗ ᐋᖅᑭᒃᓴᖅ, ᓴᕕᕋᔭᒃ ᐊᕿᑦᑐᖅ ᐅᖁᒤᑦᑐᖅ ᐊᐅᒃᓴᕅᑦᑐᖅ ᐃᒪᕐᒧᑦ ᐃᑎᔪᒧᑦ.

11ᐊᑕᓃᖅ, ᒎᑎᒋᔭᐅᔪᓄᑦ ᓇᓪᓕᐊᓐᓄᑦ ᐊᑦᔨᐅᑎᑕᒃᓴᐅᕖᑦ?

ᐃᓕᒃᑐᓪᓗ ᐃᑦᔪᕐᓁᑦᑐᕐᔪᐊᖑᑎᒋᔪᒥᒃ ᐱᑕᖃᕐᐹ?

ᐃᓕᒃᑐᑦ ᐊᔪᖏᑦᑐᕐᔪᐊᖑᑎᒋᔪᒥᒃ ᑲᒪᓇᕐᑐᓕᔪᓐᓇᕐᑐᖃᕐᐹ?

12ᑕᓖᑦ ᑕᓕᕐᐱᒃ ᐃᓵᒃᑲᕕᐅᒃ,

ᑕᕝᕙ ᓄᓇᒧᑦ ᐄᔭᐅᕗᑦ.

13ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ ᑕᓯᐅᓚᐅᕐᐸᑎᑦ

ᐃᓄᖁᑎᑎᑦ ᑖᒃᑯᐊ ᐱᐅᓕᓚᐅᕐᑕᑎᑦ,

ᐱᔪᓐᓇᕐᓂᕐᓄᓪᓗ ᑕᓯᐅᓚᐅᕐᐸᑎᑦ ᓄᓇᒧᑦ ᐃᑦᔪᕐᓁᑦᑐᒧᑦ.

14ᐃᓄᐃᑦ ᑕᒪᑐᒥᖓ ᑐᓴᕋᒥᒃ, ᓴᔪᓕᕐᐳᑦ ᑲᑉᐱᐊᓱᖕᓂᕐᒧᑦ;

ᖁᐊᕐᓵᑲᓪᓚᖕᓂᕐᒧᓪᓗ ᐱᓕᔅᑎᐊᒥᐅᑦ ᕿᒪᒃᓯᓚᐅᕐᐳᑦ.

15ᑕᕝᕙ ᐄᑐᒥᐅᑦ ᐊᖓᔪᖅᑳᖏᑦ ᖁᓚᓕᕐᐳᑦ;

ᒧᐊᐱᒥᐅᓪᓗ ᐱᔪᓐᓇᕐᑐᖁᑎᒋᔭᖏᑦ ᓴᔪᓕᕐᓗᑎᒃ;

ᑬᓇᓂᒥᐅᓪᓗ ᐃᓄᓕᒫᖏᑦ ᓴᐱᓕᑦᓯᐊᕐᐳᑦ.

16ᓯᕘᕋᓂᕐᒧᑦ ᑲᑉᐱᐊᓇᕐᑐᒧᓪᓗ ᑎᑭᑕᐅᕗᑦ;

ᑕᓕᕐᐱᑦ ᐱᔪᓐᓇᕐᓂᕐᔪᐊᖓ ᐱᑦᔪᑎᒋᓪᓗᒍ,

ᐅᔭᖅᑲᑎᑐᑦ ᕿᑲᑐᐃᓐᓇᓕᕐᐳᑦ ᐊᐅᓚᑦᔭᒍᓐᓁᓪᓕᓪᓗᑎᒃ,

ᐃᓄᖁᑎᖕᓄᑦ ᐊᑕᓃᖅ ᓴᓂᖅᑯᑕᐅᓚᐅᖏᓐᓂᕐᒥᖕᓂ

ᑖᒃᑯᓇᓐᖓᑦ ᐃᓄᖁᑎᖕᓂᑦ ᓯᐊᓛᖑᕕᖕᒥᑦ ᐊᓂᑎᓚᐅᕐᑕᕐᓂᑦ.

17ᑕᒪᐅᓐᖓᐅᑎᓚᐅᕐᐸᑎᑦ ᑲᓐᖓᕐᓲᑎᒋᓪᓗᒋᓪᓗ

ᓇᖕᒥᓂᖅ ᖃᖅᑲᖁᑎᖏᓐᓄᑦ,

ᑕᕝᕗᖓ ᐃᓂᒃᓴᒧᑦ ᐃᕝᕕᑦ ᐊᑕᓃᖅ,

ᓂᕈᐊᕐᓯᒪᔭᕐᓄᑦ ᐃᓂᒃᓴᕆᔪᒪᓪᓗᒍ,

ᑐᒃᓯᐊᕐᕕᒡᔪᐊᕐᒧᑦ ᐃᕝᕕᑦ ᓇᖕᒥᓂᖅ ᓴᓇᓚᐅᕐᑕᕐᓄᑦ.

18ᐊᑕᓂᖅ ᐊᖓᔪᖅᑳᕐᔪᐊᖑᓂᐊᕐᐳᖅ

ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.”

ᒥᕆᐊᒻ ᐃᓐᖏᕈᑎᖓ

19ᐰᕉᑉ ᕿᒻᒥᕐᔪᐊᖁᑎᖏᑦ ᖃᒧᑎᓖᓪᓗ ᐃᑭᒪᔪᓪᓗ ᐃᒪᒃᑯᑦ ᐊᕕᒃᓯᒪᔪᒃᑯᑦ ᐃᖏᕐᕋᓚᐅᕐᐳᑦ, ᐊᑕᓂᐅᓪᓕ ᐃᒪᖅ ᐅᑎᕐᑎᒻᒪᒍ ᐃᓂᖓᓄᑦ ᑕᒪᑐᒧᖓ ᐅᓕᒃᑕᐅᕗᑦ; ᐃᓴᕆᐊᓕᒥᐅᓪᓕ ᐃᓄᖏᑦ ᐱᓱᓚᐅᕐᐳᑦ ᓄᓇᒃᑯᑦ ᐸᓂᕐᑐᒃᑯᑦ ᐃᒪᐅᑉ ᕿᑎᖓᒍᑦ.

20ᑕᕝᕙ ᒥᕆᐊᒻ, ᐊᕐᓇᖅ ᒎᑎᒧᑦ ᐅᖃᕐᑎᐅᔪᖅ, ᐂᕉᓂᐅᑉ ᓇᔭᖓ, ᐊᕕᓗᕋᐅᑎᒥᒃ ᑎᒍᓯᓪᓗᓂ; ᐊᕐᓇᓕᒫᓄᑦ ᒪᓕᒃᑕᐅᓪᓗᓂ ᐊᕕᓗᕋᐅᑎᖃᕐᓗᑎᒃ ᑖᓂᓯᓕᕐᐳᑦ.#15:20 ᑖᓂᓯᓕᕐᐳᑦ ᒧᒥᓕᕐᐳᑦ 21ᒥᕆᐊᒻᓗ ᐃᓐᖏᕐᓯᕗᖅ ᑖᒃᑯᓄᖓ:

“ᐊᑕᓂᖅ ᐃᓐᖏᕐᕕᒋᓯᐅᒃ, ᐊᖏᔪᕐᔪᐊᒥᒃ ᓵᓚᖃᕐᑎᑦᓯᖕᒪᑦ;

ᕿᒻᒥᕐᔪᐊᑦ ᐃᑭᒪᔨᐅᓕᒫᖏᓪᓗ ᐃᒫᓄᑦ ᐅᕐᕈᑎᓚᐅᕐᒪᒋᑦ.”

ᐃᒪᐅᑉ ᖃᓯᓕᓇᕐᓯᓂᖓ

22ᑕᕝᕙ ᒨᓯᓯᐅᑉ ᐃᓴᕆᐊᓕᒥᐅᑦ ᓯᕗᓕᓕᕐᐰᑦ ᐃᒪᕐᒥᑦ ᐊᐅᐸᓗᒃᑕᒥᑦ ᐃᖏᕐᕋᓯᓪᓗᑎᒃ, ᑕᒫᓐᖓᑦ ᐱᓪᓗᑎᒃ ᐃᓄᖃᖏᑦᑐᒃᑰᓚᐅᕐᐳᑦ ᐊᑎᖃᕐᑐᒃᑯᑦ ᓲᕆᒥᒃ; ᑕᒪᐅᓈᕐᑎᓪᓗᒋᑦ ᐃᓄᖃᖏᑦᑐᒃᑯᑦ ᐃᓐᖏᕐᕋᓚᐅᕐᐳᑦ ᐅᓪᓗᓂᒃ ᐱᖓᓱᓂᒃ ᐃᒪᕐᓯᐊᓚᐅᕐᓯᒪᓇᑎᒃ. 23ᓄᓇᒧᓪᓕ ᒫᕋᒥᒃ ᐊᑎᓕᖕᒧᑦ ᑎᑭᓐᓇᒥᒃ, ᑖᑦᓱᒪ ᐃᒪᖓᓂᒃ ᐃᒥᕈᓐᓇᓚᐅᓐᖏᓚᑦ ᐃᒪᖓ ᖃᓯᓕᓇᕐᑑᓚᐅᕐᒪᑦ; ᑍᒤᒻᒪᑦ ᑕᕝᕙ ᓄᓇ ᐊᑎᖃᕐᑎᑕᐅᓕᕐᐳᖅ ᒫᕋᒥᒃ.#15:23 ᒫᕋ ᐄᑉᕉᑎᑐᑦ ᑐᑭᖃᕐᑐᖅ ᖃᓯᓕᓇᕐᑐᒥᒃ 24ᐃᓄᐃᓪᓗ ᓈᒻᒪᒃᓴᕋᑎᒃ ᒨᓯᓯᒧᑦ ᐅᖃᓕᕐᐳᑦ, “ᓇᑭᓪᓕ ᐃᒥᕐᓂᐊᓕᕐᐱᑖ?” 25ᒨᓯᓯᓗ ᐊᒃᓱᕈᕐᓗᓂ ᑐᒃᓯᐊᓕᕐᐳᖅ ᐊᑕᓂᕐᒧᑦ; ᐊᑕᓂᐅᓪᓕ ᑕᑯᑎᑉᐹ ᓇᐹᕐᑑᑉ ᐃᓚᖓᓂᒃ, ᑖᓐᓇᓗ ᒨᓯᓯᐅᑉ ᐃᒫᓄᐊᕐᐹ, ᐃᒪᖅ ᑕᕝᕙ ᐃᒥᒐᒃᓴᐅᑦᓯᐊᓕᕐᐳᖅ.

ᑕᕝᕙᓂᓗ ᐊᑕᓂᐅᑉ ᐃᓅᑦᔪᑎᒃᓴᖏᓐᓂᒃ ᒪᓕᒐᒃᓴᓂᒃ ᑐᓂᓯᕕᒋᕔᑦ, ᖁᓚᖏᑦᔪᑎᒃᓴᖏᓐᓂᒡᓗ ᑐᓂᓯᕕᒋᓪᓗᒋᑦ, 26ᐅᖃᕐᓗᓂᓗ, “ᐊᑕᓂᐅᑉ ᒎᑎᕕᑦ ᓂᐱᖓᓂᒃ ᓈᓚᑦᓯᐊᕐᓂᐊᕈᕕᑦ, ᑖᑦᓱᒪᓗ ᓈᒻᒪᒋᔭᖓᓂᒃ ᐱᓇᓱᐊᕐᓂᐊᕈᕕᑦ, ᐱᖁᔨᓂᕆᔭᓕᒫᖏᓪᓗ ᒪᓕᑦᓯᐊᕐᓂᐊᕈᕕᒋᑦ, ᑕᕝᕙ ᖃᓂᒪᓇᕐᑐᓄᑦ ᑎᑭᑕᐅᑎᓐᓂᐊᓐᖏᓚᒋᑦ ᐄᑦᔨᑉᑎᒥᐅᓄᑦ ᑎᑭᑎᓚᐅᕐᑕᒪ ᐊᑦᔨᖏᓐᓄᑦ; ᐅᕙᖓ ᐊᑕᓂᐅᒐᒪ, ᐃᓕᖕᓂᒃ ᐋᖅᑭᒃᓱᐃᔨ.”

27ᑕᕝᕙ ᑭᖑᓂᖓᒍᑦ ᓄᓇᒧᑦ ᑎᑭᑉᐳᑦ ᐃᓕᒻᒥᒃ ᐊᑎᓕᖕᒧᑦ, ᑕᕝᕙᓂ ᓄᓇᐅᑉ ᐃᓗᐊᓂᑦ ᑰᒃᑐᓂᒃ ᑰᒃᑕᖃᕐᐳᖅ 12ᓂᒃ; ᓇᐹᕐᑐᖃᕐᓗᓂᓗ ᐹᒥᓂᒃ 70ᓂᒃ, ᑕᕝᕙᓂᓗ ᐃᒪᐅᑉ ᑭᒡᓕᖓᓂ ᑕᖕᒫᕐᓴᓕᓚᐅᕐᐳᑦ.

Currently Selected:

ᒨᓯᓯ ᐂᑉᐸᖏᑦ 15: EAIB

Highlight

Copy