ᐋᐴᓯᑕᓖᑦ ᐱᓂᐊᕐᖕᓂᖏᑦ 27

ᐸᐅᓗᓯᐅᑉ ᕉᒪᒧᑦ ᐊᐅᓪᓚᕈᑦᔭᐅᓂᖓ ᐅᒥᐊᕐᔪᐊᒃᑯᑦ

1ᐃᑕᓕᒧᑦ ᐊᐅᓪᓚᕐᖕᓂᐊᕐᖕᓂᕗᑦ ᐋᖅᑭᒃᑕᐅᖕᒪᑦ, ᐸᐅᓗᓯ ᑎᒍᔭᐅᓯᒪᔪᓪᓗ ᐊᓯᖏᑦ ᑲᒪᒋᔭᐅᑎᑕᐅᕗᑦ ᔫᓕᐊᓯᒥᒃ ᐊᑎᓕᖕᒧᑦ, ᐅᓇᑕᖅᑐᒃᓴᓄᑦ 100ᓄᑦ ᐊᖓᔪᖅᑳᖑᔪᒧᑦ, ᑖᒃᑯᓄᖓ ᕉᒪᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᖅᑐᒃᓴᖁᑎᖏᓐᓂᒃ ᑍᔭᐅᔪᓄᑦ. 2ᐅᒥᐊᕐᔪᐊᒧᓪᓗ ᐃᑭᕗᒍᑦ ᐊᑐᕋᒤᑎᐊᒥᑦ ᐱᔪᒧᑦ, ᓄᓇᐅᑉ ᐂᓯᐊᑉ ᐅᒥᐊᕐᔪᐊᒃᑯᕕᖏᑎᒍᑦ ᐊᖅᑯᓵᕐᖕᓂᐊᕐᓗᑕ, ᐊᐅᓪᓚᖅᐳᒍᑦ, ᐊᕆᔅᑕᑰᓯᐅᑉ ᐃᓚᒋᕚᑎᒍ, ᑖᓐᓇ ᑎᓴᓗᓁᑲᒥᐅᑕᖅ ᒫᓯᑑᓂᐊᒦᑦᑐᒥ.

3ᖃᐅᑎᓪᓗᒍ ᓮᑐᓂᒧᑦ ᑎᑭᑉᐳᒍᑦ; ᔫᓕᐊᓯ ᐸᐅᓗᓯᒥᒃ ᐱᑦᓯᐊᕋᒥ, ᐃᓚᓐᓈᕆᔭᖏᓐᓄᑦ ᓄᓈᕈᓐᓇᖅᑎᑉᐹ ᑭᓐᖒᒪᔭᖏᓐᓂᒃ ᑐᓂᓯᕕᐅᖁᓪᓗᒍ. 4ᑕᕝᕙᓐᖓᑦ ᐊᐅᓪᓚᕋᑕ ᕿᑭᖅᑕᐅᑉ ᓮᐳᕋᓯᐅᑉ ᐅᖅᑯᐊᒎᖅᐳᒍᑦ, ᐊᒡᒍᕋᖅᑐᐊᓘᒐᑦᑕ. 5ᐃᑳᕋᑦᑕᓗ ᐃᒪᕕᐊᓗᒃᑯᑦ ᓯᓕᓯᐊᑉ ᐸᒻᐱᓕᐊᓪᓗ ᓵᖓᒍᑦ ᒤᕋᒧᑦ ᑎᑭᑉᐳᒍᑦ ᓔᓯᐊᒦᑦᑐᒧᑦ. 6ᑕᕝᕙᓂ ᐅᓇᑕᖅᑐᒃᓴᓄᑦ ᐊᖓᔪᖅᑳᖑᔪᖅ ᑲᑎᓯᒐᒥ ᐅᒥᐊᕐᔪᐊᒥᒃ ᐊᓕᒃᓵᓐᑐᕆᐊᒥᐅᑕᕐᖕᒥᒃ ᐃᑕᓕᒨᖅᐸᓪᓕᐊᔪᒥᒃ, ᑕᕝᕗᖓ ᐃᑭᑎᑉᐹᑎᒍᑦ.

7ᐅᒥᐊᖅᑐᕐᓗᑕ ᓱᒃᑬᑉᐳᒍᑦ ᐊᒡᒍᒧᑦ ᐃᖏᕐᕋᓇᓱᐊᒡᒐᑐᐃᓐᓇᕐᓗᑕ ᐅᓪᓗᓂᒃ ᐊᒥᓱᓂᒃ ᓁᑕᓯᐅᑉ ᖃᓂᒋᔭᖓᓄᑦ ᑎᑭᑍᓐᓇᖅᐳᒍᑦ, ᐊᓄᕆᒧᑦ ᐅᐸᒍᒪᔭᑦᑎᓐᓄᑦ ᑐᕌᖅᑎᑕᐅᔪᓐᓇᖏᓐᓇᑦᑕ ᕿᑭᖅᑕᐅᑉ ᑯᕇᑎᒥᒃ ᐊᑎᓕᐅᑉ ᐅᖅᑯᐊᒍᑦ ᐅᒥᐊᖅᑐᖅᐳᒍᑦ, ᓵᓪᒧᓂᐅᑉ ᓴᓂᐊᒎᕐᓗᑕ. 8ᓄᓇᐅᑉ ᖃᓂᒋᔮᒍᑦ ᓱᒃᑬᑦᑐᒥᒃ ᐃᖏᕐᕋᓇᓱᐊᒡᒐᑐᐃᓐᓇᕐᓗᑕ, ᐅᒥᐊᕐᔪᐊᒃᑯᕕᑦᓯᐊᒥᒃ ᑍᔭᐅᔪᒧᑦ ᑎᑭᑉᐳᒍᑦ, ᓄᓇᓖᑦ ᓚᓯᐊᒥᒃ ᐊᑎᓖᑦ ᖃᓂᒋᔭᖓᓄᑦ.

9ᐊᑯᓂ ᑕᕝᕙᓃᓕᖅᐳᒍᑦ, ᐅᒥᐊᖅᑐᒃᑲᓐᓂᕆᐊᒃᓴᖅ ᐊᒡᓛᑦ ᓇᖏᐊᕐᖕᓇᖅᓯᖕᒪᑦ, ᓂᕆᑦᑍᓕᕕᒃ ᔫᑎᑦ ᓇᓪᓕᐅᓐᓂᖅᓯᐅᕐᕕᖓᑦ#27:9 ᐅᑭᐊᒃᓵᒃᑯᑦ ᓰᑏᐱᕆᒥ ᐆᒃᑑᐱᕆᒥᓗ ᓇᓪᓕᐅᑎᓲᖅ ᖄᖏᖅᓯᒪᓕᕐᖕᒪᑦ, ᐸᐅᓗᓯᐅᑉ ᐅᖃᐅᑎᓕᖅᐰᑦ: 10“ᐃᓕᑦᓯ ᐊᖑᑏᑦ, ᖃᐅᔨᒐᒪ ᐅᒥᐊᖅᑐᕐᖕᓂᕗᑦ ᑕᒪᓐᓇ ᓇᖏᐊᕐᖕᓇᖅᑐᐊᓘᓂᐊᓕᕐᖕᒪᑦ; ᐅᒥᐊᕐᔪᐊᕗᑦ ᐅᓯᖏᑦ ᐊᓯᐅᔨᓂᐊᓕᕋᑦᑎᒍ, ᐃᓅᓯᕗᓪᓘᓐᓃᑦ ᐊᒡᓛᑦ.” 11ᐅᓇᑕᖅᑐᒃᓮᑦ ᐊᖓᔪᖅᑳᖓᑦ ᐸᐅᓗᓯᐅᑉ ᐅᖃᐅᓯᖓᓂᒃ ᓈᓚᓐᖏᓚᖅ, ᐅᒥᐊᕐᔪᐊᑉ ᐊᖁᑎᖓ, ᐅᒥᐊᕐᔪᐊᒥᒃ ᓇᖕᒥᓂᓕᒃ ᓈᓚᖔᕈᒪᓪᓗᒋᒃ. 12ᐅᒥᐊᕐᔪᐊᖃᕐᕕᒃ ᑖᓐᓇ ᐅᑭᐅᒥ ᐊᑲᐅᒐᔭᖏᒻᒪᑦ, ᐅᓄᕐᖕᓂᖅᓮᑦ ᐊᐅᓪᓚᕈᒪᓕᖅᐳᑦ, ᕖᓂᒃᓯᒧᑦ ᑎᑭᓐᓇᓱᐊᕈᒪᓪᓗᑎᒃ, ᐅᑭᐅᖑᓂᖓᓂ ᑍᑲᓃᑦᑐᒪᓪᓗᑎᒃ, ᑖᓐᓇ ᕖᓂᒃᓯ ᐅᒥᐊᕐᔪᐊᒃᑯᕕᒃ ᑯᕇᑎᒥ ᓯᕿᓂᐅᑉ ᓂᐱᕕᐊᓄᑦ ᓵᓐᖓᖕᒪᑦ.

ᐃᒫᓂ ᐊᖅᑯᓇᖅᓯᐅᕐᖕᓂᖓᑦ

13ᐅᓪᓗᓪᓗᐊᑉ ᓇᓛᓂᑦ ᐊᓄᕋᔮᓕᕐᖕᒪᑦ, ᐃᖏᕐᕋᕕᒋᔪᒪᔭᒥᖕᓄᑦ ᓈᒻᒪᓈᖅᓯᒪᓇᓱᒋᓕᖅᐹᑦ, ᑭᓴᐅᑏᑦ ᐊᒧᓪᓗᒋᑦ, ᑯᕇᑎᐅᑉ ᖃᓂᒋᔮᒍᑦ ᐅᒥᐊᖅᑐᓕᖅᐳᒍᑦ. 14ᐊᑯᓂᐅᖏᑦᑐᖅ ᐊᓄᕆ ᓴᓐᖏᔪᐊᓗᒃ ᑎᑭᑉᐳᖅ ᑍᔭᐅᔪᖅ ᓯᕘᕋᓇᕐᖕᓂᖅᐹᒥᒃ#27:14 ᔫᕈᑯᐃᓕᒥᒃ ᑍᔭᐅᔪᖅ, ᒍᕇᑭᑎᑐᑦ ᓛᑎᓂᑎᑐᓪᓗ ᕿᑭᖅᑕᐅᑉ ᑯᕇᑎᐅᑉ ᓇᓛᓂᑦ ᐊᓄᕌᖅᑐᖅ. 15ᐅᒥᐊᕐᔪᐊᖅ ᐊᓄᕆᕐᔪᐊᕐᖕᒧᑦ ᑎᑭᑕᐅᕗᖅ, ᐊᒡᒍᕋᕐᕕᒋᔭᕆᐊᖓ ᓴᐱᕐᖕᓇᖅᓯᖕᒪᑦ, ᐊᓄᕆᒧᑦ ᑎᒃᑕᐅᑐᐃᓐᓇᓕᖅᐳᒍᑦ. 16ᕿᑭᖅᑕᐅᑉ ᒥᑭᔫᑉ ᑲᐅᑕᒥᒃ ᑍᔭᐅᔫᑉ ᐅᖅᑯᐊᒎᕋᑦᑕ, ᐅᒥᐊᑯᓗᖁᑎᑦᑎᓐᓂᒃ ᐱᓯᒪᓇᓱᐊᕐᓗᑕ ᓴᐱᓕᑲᓴᒃᐳᒍᑦ; 17ᐊᖑᑎᓂᓪᓕ ᐊᒧᓕᖅᑕᐅᓪᓗᓂ ᐅᒥᐊᕐᔪᐊᕐᖕᒧᑦ ᐅᓯᓕᐅᑦᔭᐅᕗᖅ, ᐊᒃᖢᓈᓄᑦ ᐅᒥᐊᕐᔪᐊᖅ ᐅᖓᑕᖏᕐᓗᒍ ᓂᒥᖅᐹᑦ ᐊᑦᑕᕐᖕᓁᓕᓇᓱᐊᕐᓗᒍ, ᐃᒃᑲᕐᕈᒧᑦ ᐃᒃᑲᕐᕆᓐᓂᐊᕋᓱᒋᓕᕋᒥᒃ ᓲᕐᑎᓯᒥᒃ ᐊᑎᓕᖕᒧᑦ; ᑎᖏᕐᕋᐅᑕᖅ ᑲᑕᒃᑎᓪᓗᒍ ᐅᒥᐊᕐᔪᐊᖅ ᐊᓄᕆᒧᑦ ᑎᒃᑕᐅᑐᐃᓐᓇᖅᑎᓕᖅᐹᑦ. 18ᐊᒃᓱᒻᒪᕆᐊᓗᒃ ᓱᓕ ᐊᖅᑯᓇᖅᓯᐅᕋᑦᑕ, ᖃᐅᑎᓪᓗᒍ ᐅᒥᐊᕐᔪᐊᑉ ᐅᓯᖏᑦ ᐃᒋᐅᖃᖅᑕᐅᓕᖅᐳᑦ; 19ᐅᓪᓗᐃᑦ ᐱᖓᔪᐊᓐᓂ ᐅᒥᐊᕐᔪᐊᑉ ᐃᓚᒃᓴᖏᑕ ᐃᓚᖏᑦ ᓱᓇᒃᑯᑖᖏᑦ ᐃᒋᐅᖅᑲᖅᑕᐅᓕᕆᕗᑦ. 20ᓯᕿᓂᕐᖕᒥᒃ ᐅᓪᓗᕆᐊᓂᒡᓘᓐᓃᑦ ᑕᑯᓚᐅᖏᓐᓇᑦᑕ ᐅᓪᓗᓂᒃ ᐊᒥᓱᓂᒃ, ᐊᒃᓱᒻᒪᕆᐊᓗᒃ ᓱᓕ ᐊᓄᕋᕐᖕᒪᑦ, ᐃᓅᓂᐊᕆᐊᒃᓴᖅ ᖁᓚᓕᖅᐳᒍᑦ.

21ᐃᓄᖏᑦ ᐊᑯᓂ ᓂᕆᔪᓐᓃᕐᖕᒪᑕ, ᐸᐅᓗᓯ ᓂᑯᕕᓪᓗᓂ ᐅᖃᐅᑎᕔᑦ, “ᐅᖃᐅᓯᒃᑲ ᓈᓚᓚᐅᕈᑦᓯᐅᒃ ᑯᕇᑎᒥᑦ ᐊᐅᓪᓚᕈᒪᑎᓐᓇᖓ ᓇᖏᐊᕐᖕᓇᖅᑐᒧᑦ ᑎᑭᒐᔭᓚᐅᓐᖏᓚᒍᑦ ᓱᓇᑐᐃᓐᓇᑦᑎᓐᓂᒡᓘᓐᓃᑦ ᐊᓯᐅᔨᒐᔭᓚᐅᓐᖏᓚᒍᑦ. 22ᓯᕘᕋᖁᓐᖏᓚᑦᓯᓕ; ᓇᓕᑦᓯᓐᓂᒡᓘᓐᓃᑦ ᐊᓯᐅᔪᖃᕐᖕᓂᐊᖏᒻᒪᑦ, ᐅᒥᐊᕐᔪᐊᖅ ᑭᓯᒥ ᐊᓯᕈᕐᖕᓂᐊᖅᐳᖅ. 23ᐅᓐᓄᐊᖅ ᒎᑎᐅᑉ ᐱᔨᑦᓯᖅᑕᒪ ᐂᖏᓕᖓ ᓴᓂᓐᓂ ᓇᖏᓚᐅᖅᐳᖅ, 24ᐅᖃᕐᓗᓂᓗ, ‘ᐸᐅᓗᓰ ᓯᕘᕋᓇᒃ; ᐊᖓᔪᖅᑳᕐᔪᐊᒻᒪᕆᐅᑉ ᓰᓴᕆᐅᑉ ᓵᖓᓂ ᐃᖅᑲᖅᑐᖅᑕᐅᔭᕆᐊᖃᕋᕕᑦ; ᒎᑎᐅᓪᓗ ᐱᑦᓯᐊᕐᖕᓂᕐᖕᒥᓄᑦ ᐅᒥᐊᖅᑐᖃᑎᕕᑦ ᐃᓅᓯᖏᑦ ᓴᐳᑎᓯᒪᓂᐊᖅᐰᑦ ᐱᓪᓗᑎᑦ.’ 25ᑕᒪᓐᓇ ᐱᓪᓗᒍ ᓇᖏᐊᖅᑍᓕᒋᑦᓯ, ᒎᑎ ᐅᒃᐱᕆᒐᒃᑯ, ᐅᖃᐅᓯᕆᔭᖓ ᓱᓕᓂᐊᕐᖕᒪᑦ. 26ᑭᓯᐊᓂᓕ ᐃᒃᑲᕐᕆᓐᓂᐊᖅᐳᒍᑦ ᕿᑭᖅᑍᑦ ᓇᓪᓕᐊᓐᓄᑐᐃᓐᓇᖅ.”

27ᐅᓐᓄᐊᑦ 14ᒋᓕᖅᐹᑦ ᓱᓕ ᐃᒪᕐᕕᖕᒥ ᒥᑎᑐᕇᓂᐊᒥ ᑎᒃᑕᐅᓪᓗᑕ, ᐅᒥᐊᖅᑐᖅᑏᑦ ᐅᓐᓄᐊᑉ ᕿᑎᖓᓂ ᓄᓇᒧᑦ ᖃᒡᓕᓇᓱᒋᓕᖅᐳᑦ. 28ᐃᖅᑲᖓᓂᒃ ᖃᐅᔨᓴᕋᒥᒃ ᐊᒃᓗᓈᒧᑦ ᖃᐅᔨᕗᑦ 120ᓂᒃ ᐃᑎᒐᖕᓂᒃ ᐃᑎᔫᑎᒋᖕᒪᑦ; ᑭᖑᓂᖓᒍᑦ ᐆᒃᑐᒃᑲᓐᓂᕐᖕᒥᒐᒥᒃ 90ᓂᒃ ᐃᑎᒐᖕᓂ ᐃᑎᓂᖃᓕᖅᐳᖅ. 29ᓯᕘᕋᓕᕋᒥᒃ ᐅᒥᐊᕐᔪᐊᖅ ᐃᒃᑲᕐᕆᓐᓂᐊᕋᓱᒋᓪᓗᒍ ᐅᔭᖅᑲᓄᑦ, ᓯᑕᒪᓂᒃ ᑭᓴᐅᑎᓂᒃ ᓂᖏᑎᑦᓯᕗᑦ ᐅᒥᐊᕐᔪᐊᑉ ᐊᖁᐊᒍᑦ, ᕿᓚᓈᕐᓗᑎᒃ ᐅᓪᓛᒃᑯᑦ ᖃᐅᒻᒪᖕᓂᐊᖅᑐᒥᒃ. 30ᐅᒥᐊᖅᑐᖅᑎᑦ ᐃᓚᖏᑦ ᐅᒥᐊᕐᔪᐊᒥᑦ ᕿᒫᓇᓱᐊᓕᖅᐳᑦ, ᐅᒥᐊᒥᒃ ᒥᑭᔪᒥᒃ ᓂᖏᑎᑦᓯᓪᓗᑎᒃ, ᑭᓴᐅᑎᓂᒃ ᓂᖏᑎᑦᓯᒐᓱᓐᖑᐊᕐᓗᑎᒃ ᐅᒥᐊᕐᔪᐊᑉ ᓯᕗᐊᒍᑦ. 31ᐸᐅᓗᓯ ᐅᖃᓕᖅᐳᖅ ᐅᓇᑕᖅᑐᒃᓮᑦ ᐊᖓᔪᖅᑳᖓᓐᓄᑦ ᐅᓇᑕᖅᑐᒃᓴᓄᓪᓗ, “ᐅᑯᐊ ᐅᒥᐊᖅᑐᖅᑏᑦ ᐅᒥᐊᕐᔪᐊᕐᖕᒦᖏᑉᐸᑕ, ᐃᓕᑦᓯᑦᑕᐅᖅ ᐃᓅᓂᐊᓐᖏᓚᓯ.” 32ᐅᓇᑕᖅᑐᒃᓮᑦ ᐊᒃᖢᓈᑦ ᑭᐱᕔᑦ ᐅᒥᐊᑉ ᒥᑭᔫᑉ ᐱᑐᒃᓯᒪᐅᑎᒋᔭᖏᑦ, ᐅᒥᐊᑯᓗᒃ ᑎᒃᑕᐅᓕᖅᐳᖅ, ᐅᒥᐊᕐᔪᐊᒥᑦ.

33ᐅᓪᓛᒃᑯᑦ ᖃᐅᒻᒪᓚᐅᖅᑎᓐᓇᒍ ᓱᓕ ᐸᐅᓗᓯᐅᑉ ᑕᒪᕐᖕᒥᒃ ᓂᕆᖁᓕᖅᐰᑦ, ᐅᖃᕐᓗᓂ, “ᐅᓪᓗᓂᒃ 14ᓂᒃ, ᖃᓄᐃᓕᖓᓂᐊᕆᐊᒃᓴᖅ ᓇᓗᓁᓐᓇᕐᖕᒪᑦ, ᓱᓇᒥᒡᓘᓐᓃᑦ ᓂᕆᓚᐅᖕᒋᓐᓇᑦᓯ. 34ᒫᓐᓇᓕ ᓂᕆᖁᓕᖅᐸᑦᓯ ᓄᑭᖃᑦᓯᐊᖁᓪᓗᓯ; ᓄᔭᕐᖕᒥᒃ ᐊᑕᐅᓯᕐᖕᒥᒡᓘᓐᓃᑦ ᐊᓯᐅᔪᖃᕐᖕᓂᐊᖏᒻᒪᑦ ᐃᓕᑦᓯᓐᓂᑦ.” 35ᑍᒫᒃ ᐅᖃᕇᕋᒥ ᓂᐊᖂᔭᒥᒃ ᑎᒍᓯᓪᓗᓂ ᒎᑎ ᖁᔭᒋᕚ ᐃᓄᐃᑦ ᑕᒃᑯᐊᓂ, ᐊᕕᒡᓗᒍᓗ ᓂᕆᓕᖅᐳᖅ. 36ᑕᒪᕐᖕᒥᒡᓗ ᓯᕘᕋᔪᓐᓃᕐᓗᑎᒃ, ᓂᕆᓕᖅᐳᑦ. 37ᐅᒥᐊᕐᔪᐊᒥ ᐃᑭᒪᔪᒍᑦ ᑕᒪᑦᑕ ᑲᑎᓪᓗᑕ 276ᐅᓚᐅᖅᐳᒍᑦ. 38ᓂᕆᔭᕇᕋᒥᒃ, ᐅᒥᐊᕐᔪᐊᖅ ᐅᕿᒡᓕᒋᐊᕋᓱᐊᓕᖅᐹᑦ ᓂᐊᖂᔭᒃᓮᑦ ᐃᒫᓄᑦ ᐃᒋᐅᖅᑲᕐᓗᒋᑦ.

ᐅᒦᔭᕐᖕᓂᕗᑦ

39ᖃᐅᒻᒪᒃᑎᓪᓗᒍ, ᐅᒥᐊᖅᑐᖅᑏᑦ ᓄᓇ ᐃᓕᑕᕆᓐᖏᓛᑦ, ᑕᑯᓪᓗᑎᒃ ᑲᖏᖅᓱᖕᒥᒃ ᓯᒡᔭᖓ ᓯᐅᕋᔮᒥᒃ, ᑕᕝᕗᖓ ᐅᒥᐊᕐᔪᐊᖅ ᐃᒃᑲᕐᕆᑎᓐᓇᓱᐊᕈᒪᓕᖅᐹᑦ ᐊᔪᖏᒃᑯᑎᒃ. 40ᑕᕝᕙ ᑭᓴᐅᑏᑦ ᐲᖅᐰᑦ ᐃᐱᕅᓐᓇᕐᓗᒋᑦ ᐃᒫᓄᑦ, ᐊᖂᑎᐅᑉ ᐊᑦᑐᖏᖅᓯᒪᐅᑎᖏᑦ ᕿᓚᕈᑦᔮᖅᐰᑦ; ᑎᖏᕐᕋᐅᑕᖅ ᓯᕗᐊᓃᑦᑐᖅ ᐋᖅᑭᒃᐹᑦ ᓯᒡᔭᖅ ᑐᕌᕋᓱᐊᕐᓗᒍ. 41ᐃᒃᑲᕐᕈᕐᖕᒧᓪᓕ ᑎᑭᐅᑎᒐᒥᒃ ᐃᒃᑲᕐᕆᑉᐳᑦ ᐊᕙᑖ ᐃᑎᔫᓪᓗᓂ; ᐅᒥᐊᕐᔪᐊᑉ ᓯᕗᐊ ᐊᐅᓚᔪᓐᓃᕐᓗᓂ, ᐅᒥᐊᕐᔪᐊᓪᓕ ᐊᖁᐊ ᒪᓖᑦ ᒥᕿᑦᑕᕐᖕᓂᖏᓐᓄᑦ ᓱᕋᒃᑕᐅᓕᖅᐳᖅ. 42ᑕᕝᕙ ᐅᓇᑕᖅᑐᒃᓮᑦ ᑎᒍᔭᐅᓯᒪᔪᓂᒃ ᑐᖁᕅᔪᒪᓕᖅᐳᑦ, ᐳᐃᑦᔭᕐᓗᑎᒃ ᕿᒫᓂᐊᕋᓱᒋᓪᓗᒋᑦ; 43ᐅᓇᑕᖅᑐᒃᓮᓪᓕ ᐊᖓᔪᖅᑳᖓᑦᑕ ᐸᐅᓗᓯ ᑐᖁᑕᐅᖁᖏᓐᓇᒥᐅᒃ ᐃᓂᖅᑎᖅᐰᑦ. ᐳᐃᑦᔭᕈᓐᓇᖅᑐᑦ ᓯᕗᓪᓕᐅᓗᑎᒃ ᐃᒫᓄᑦ ᒥᓯᖁᕔᑦ ᓄᓇᒧᑦ ᐳᐃᑦᔭᖁᓪᓗᒋᑦ, 44ᐃᓚᖏᑦ ᓄᓇᒧᐊᓕᖅᐳᑦ, ᕿᔪᖕᓂᒃ ᐳᒃᑕᑦᔪᑎᖃᕐᓗᑎᒃ ᐅᒥᐊᕐᔪᐊᑉ ᐃᓚᕕᓂᖏᓐᓂᒃ. ᑍᒫᒃ ᑕᕝᕙ ᓄᓈᓚᐅᖅᐳᒍᑦ ᑐᖁᔪᖃᕋᑕ.

Currently Selected:

ᐋᐴᓯᑕᓖᑦ ᐱᓂᐊᕐᖕᓂᖏᑦ 27: EAIB

Highlight

Copy