ᓴᒧᐃᓕ ᐂᑉᐸᖏᑦ 22
22
ᑍᕕᑎᐅᑉ ᐃᓐᖏᕈᑎᖓ ᓵᓚᖃᕐᖕᓂᕐᖕᒧᑦ
ᐃᓐᖏᕈᑦ 18
1ᐊᑕᓂᐅᑉ ᐱᐅᓕᖕᒪᒍ ᓴᐅᓕᒥᑦ ᐊᑭᕋᖅᑐᖅᑎᖏᓐᓂᓪᓗ ᐊᓯᖏᓐᓂᑦ, ᑍᕕᑎ ᐃᓐᖏᓚᐅᖅᐳᖅ ᐃᓐᖏᕈᒻᒥᒃ ᐊᑕᓂᕐᖕᒧᑦ:
2ᐅᖃᖅᓗᓂ,
“ᐊᑕᓂᖅ ᕾᖅᑐᕆᕙᕋ, ᓴᐳᑦᔨᔨᒋᓪᓗᒍᓗ;
ᓱᖑᔫᓪᓗᓂ ᓴᐴᓗᑕᕆᕙᕋ.
3ᒎᑎᒐ ᕾᖅᑐᕆᓪᓗᒍ ᕿᒫᕕᒋᕙᕋ,
ᓴᐴᓗᑕᕆᕙᕋ ᐱᐅᓕᔭᐅᕕᒃᓴᒪᓗ ᓴᒃᑯᒋᖕᒪᒍ,
ᕿᒫᕕᒃᓴᕆᒐᒃᑯ ᓵᓚᐅᓂᐊᖏᑦᑐᖅ,
ᐱᐅᓕᔨᒐ; ᐱᐅᓕᒐᕕᖓ ᑲᑉᐱᐊᓇᖅᑐᓂᑦ.
4ᐊᑕᓂᕐᖕᒧᑦ ᑐᒃᓯᐊᓚᐅᖅᐳᖓ, ᑖᓐᓇ ᓂᖅᑐᒐᒃᓴᐅᖕᒪᑦ,
ᐱᐅᓕᕚᖓᓗ ᐊᑭᕋᖅᑐᖅᑎᓐᓂᑦ.
5ᑐᖁᒧᑦ ᐃᓗᒪᔭᐅᓚᐅᖅᐳᖓ ᐊᕙᑎᓕᒫᓐᓂᑦ;
ᐊᓯᕈᖅᑕᐅᓇᖅᑐᒧᓪᓗ ᐊᕙᓗᔭᐅᓚᐅᖅᐳᖓ.
6ᐃᓗᕕᐅᑉ ᐊᒃᓱᓈᖓᓄᑦ ᓂᒐᕕᑕᐅᓚᐅᖅᐳᖓ,
ᑐᖂᓪᓗ ᓂᒐᖓᓄᑦ ᓯᕗᕐᖏᖅᑕᐅᓚᐅᖅᐳᖓ.
7ᐊᒃᓱᕈᕐᖕᓇᖅᑐᒦᓕᖅᑎᓪᓗᖓ ᐊᑕᓂᕐᖕᒧᑦ ᑐᒃᓯᐊᓚᐅᖅᐳᖓ;
ᒎᑎᓐᓄᑦ ᑐᒃᓯᐊᓚᐅᖅᐳᖓ ᐃᑲᔪᖅᑕᐅᔪᒪᓪᓗᖓ.
ᑐᒃᓯᐊᕐᕕᖁᑎᖕᒥᓂᑦ ᓂᐱᒐ ᑐᓴᓚᐅᖅᐹ;
ᓈᓚᓚᐅᖅᐹᖓᓗ ᐃᑲᔪᖅᑕᐅᔪᒪᓂᕆᔭᓐᓂᒃ.
8ᑕᕝᕙ ᓄᓇ ᓴᔪᓕᖅᐳᖅ ᓴᔪᒃᐱᓪᓚᒡᓗᓂᓗ;
ᕿᓚᐅᓪᓗ ᑐᓐᖓᕕᖓ ᐊᐅᓚᑦᔭᓚᐅᖅᐳᖅ ᓴᔪᓕᖅᓗᓂᓗ,
ᒎᑎ ᓂᓐᖓᓚᐅᕐᖕᒪᑦ.
9ᐳᔪᕐᖕᒥᒃ ᓱᖅᓗᖓᓂᑦ ᓄᐃᔪᖃᓚᐅᖅᐳᖅ,
ᐃᑯᒪᒥᒃ ᐃᑯᐊᓪᓚᒃᑎᑦᓯᔪᒥᒃ
ᐃᑯᒪᔪᓪᓗ ᐊᐅᒫᓗᐃᑦ ᐊᓂᓚᐅᖅᐳᑦ ᖃᓂᖓᓂᑦ.
10ᕿᓔᑦ ᐊᖕᒪᖅᓗᒋᑦ ᐊᖅᑲᓚᐅᖅᐳᖅ,
ᓄᕗᔭ ᑖᖅᑐᖅ ᐃᑎᒐᖏᑕ ᐊᑖᓃᑎᓪᓗᒍ.
11ᐃᖏᕐᕋᓚᐅᖅᐳᖅ ᓱᒃᑲᓕᓪᓗᓂ, ᐃᓴᕈᓕᖕᓄᑦ ᐃᑭᒪᓪᓗᓂ;
ᑕᑯᔭᐅᓚᐅᖅᐳᖅ ᐃᓴᕈᖃᖅᑎᓪᓗᒍ ᐊᓄᕆᒥᒃ.
12ᐃᒻᒥᓂᒃ ᑕᓕᑎᓯᒪᓚᐅᖅᐳᖅ ᑖᖅᑐᒧᑦ;
ᓄᕗᔭᕐᔪᐊᓄᑦ, ᐃᒥᕐᖕᒥᒃ ᑕᑕᑦᑐᓄᑦ ᐊᕙᓗᔭᐅᓯᒪᓚᐅᖅᐳᖅ;
13ᖃᐅᒪᔪᐊᓗᖕᒧᑦ ᑖᑦᓱᒪ ᓵᖓᓃᑦᑐᒧᑦ
ᐃᑯᒪᔪᓂᒃ ᐊᐅᒫᓗᖕᓂᒃ ᓴᖅᑭᑦᑐᖃᖅᐳᖅ.
14ᐊᑕᓂᖅ ᐃᒃᑑᓕᔮᓚᐅᖅᐳᖅ ᕿᓚᖕᒥᑦ,
ᖁᑦᓯᖕᓂᖅᐸᐅᔫᓪᓗ ᓂᐱᖓ ᑐᓴᖅᓴᐅᕗᖅ.
15ᖃᕐᔪᒥᓄᑦ ᐱᓯᒋᐊᕐᖕᒪᑦ, ᐊᑭᕋᖏᑦ ᓯᐊᒻᒪᖅᐳᑦ;
ᑲᓪᓕᕐᖕᒧᑦ ᕿᒪᒃᓯᑎᑉᐰᑦ ᐅᓪᓚᒃᓯᓪᓗᑎᒃ.
16ᑕᕝᕙ ᐃᒪᕕᐅᑉ ᐃᖅᑲᖓ ᑕᑯᔭᐅᓚᐅᖅᐳᑦ,
ᓄᓇᕐᔪᐊᓪᓗ ᑐᓐᖓᕕᖏᑦ ᓴᖅᑭᑉᐳᑦ ᐃᔨᖅᓯᒪᔪᖃᕈᓐᓃᖅᓗᑎᒃ,
ᐊᑕᓂᐅᑉ ᓱᐊᒃᐰᑦ ᐊᑭᕋᓂ,
ᐊᓄᕆᕐᔪᐊᒧᑦ ᓱᖅᓗᖓᓂᓐᖔᖅᑐᒧᑦ.
17ᖁᑦᓯᒃᑐᒥᑦ ᐃᓴᒃᓗᓂ, ᑎᒍᓚᐅᖅᐹᖓ;
ᐊᒧᓚᐅᖅᐹᖓ ᐃᒪᕐᖕᒥᑦ ᐃᑎᔪᒥᑦ.
18ᐱᐅᓕᓚᐅᖅᐹᖓ ᓲᖑᔪᓂᑦ ᐊᑭᕋᓐᓂᑦ,
ᐅᕙᓐᓂᒃ ᐆᒥᓱᒃᑐᓂᑦ;
ᓲᖑᔫᓗᐊᓚᐅᕐᖕᒪᑕ ᐅᕙᓐᓄᑦ.
19ᐅᖁᒤᑦᑐᒦᓕᖅᑎᓪᓗᖓ ᐅᓇᑕᕆᐊᓚᐅᖅᐹᖓ;
ᐊᑕᓂᐅᓪᓕ ᓴᐳᑎᓚᐅᖅᐹᖓ.
20ᐂᑎᓚᐅᖅᐹᖓ ᐃᓂᒃᓴᒧᑦ ᐱᕕᑐᔪᒧᑦ;
ᓴᐳᑎᓪᓗᖓ ᖁᕕᐊᒋᒐᒥᖓ.
21ᐊᑕᓂᐅᑉ ᐊᑭᓕᓚᐅᖅᐹᖓ ᓱᓕᔪᒥᒃ ᐱᓇᓱᐊᕐᖕᓂᕋ ᐱᓪᓗᒍ;
ᓮᒻᒪᖅᑎᑉᐹᖓ ᐱᓂᐊᕐᖕᓂᒃᑯᑦ ᐸᓯᔭᒃᓴᐅᖏᓐᓂᕋ ᐱᓪᓗᒍ.
22ᐊᑕᓂᐅᑉ ᐱᖁᔭᖏᑦ ᓈᓚᓚᐅᖅᐸᒃᑲ;
ᒎᑎᓐᓂᒃ ᕿᒤᓚᐅᖏᓐᓇᒪ ᐱᐅᖏᑦᑐᓕᓂᕐᖕᒧᑦ.
23ᐱᖁᔭᖏᑦ ᖃᐅᔨᓴᑦᓯᐊᖅᓯᒪᕙᒃᑲ;
ᒪᓕᒐᒃᓴᐅᖁᔭᖏᓪᓗ ᑐᓄᓚᐅᓐᖏᓚᒃᑲ.
24ᐸᓯᔭᒃᓴᐅᓂᖃᓚᐅᓐᖏᓚᖓ ᑖᑦᓱᒪ ᓵᖓᓂ,
ᐅᕙᓐᓂᒃ ᐸᓯᔭᒃᓴᓐᖑᖅᑎᑦᑍᓕᒪᓚᐅᕋᒪ.
25ᑍᒤᒻᒪᑦ ᐊᑭᓕᖅᐹᖓ ᐱᑦᓯᐊᕐᖕᓂᕋ ᒪᓕᒡᓗᒍ,
ᖃᐅᔨᒪᒐᒥ ᐸᓯᔭᒃᓴᐅᖏᓐᓂᓐᓂᒃ ᑖᑦᓱᒪ ᓵᖓᓂ.
26ᑲᒪᑦᓯᐊᖅᑐᓄᑦ ᑲᒪᑦᓯᐊᕐᖕᓃᑦ ᓴᖅᑭᑎᑉᐸᑦ,
ᐸᓯᔭᒃᓴᐅᖏᑦᑐᓄᓪᓗ ᐸᓯᔭᒃᓴᐅᖏᓐᓃᑦ ᓴᖅᑭᑎᑉᐸᑦ.
27ᐃᑦᔪᕐᖕᓁᑦᑐᓄᑦ ᐃᑦᔪᕐᖕᓁᓐᓃᑦ ᓴᖅᑭᑎᑉᐸᑦ,
ᐱᐅᖏᑦᑐᓕᔪᓄᓪᓗ ᐃᓕᕋᓇᕐᖕᓃᑦ ᓴᖅᑭᑎᓪᓗᒍ.
28ᒥᑭᒡᓕᑎᖅᓯᒪᔪᑦ ᐃᓄᐃᑦ ᐱᐅᓕᕙᑎᑦ,
ᐱᐅᔪᕆᔪᓪᓕ ᑕᑯᓴᖅᓗᒋᑦ ᒥᑭᒡᓕᑎᑉᐸᑎᑦ.
29ᐊᑕᓃᖅ ᐃᕝᕕᑦ ᖃᐅᒻᒪᖅᑯᑎᒋᕙᒋᑦ,
ᒎᑎᒪᓗ ᑖᖅᑐᒦᓐᓂᕋ ᖃᐅᒻᒪᒃᑎᑉᐹ.
30ᐃᓛᒃ, ᐃᑲᔪᖅᑎᒋᓗᑎᑦ ᐅᓇᑕᖅᑐᒃᓮᑦ ᐅᐸᒃᑐᕈᓐᓇᖅᐸᒃᑲ,
ᒎᑎᒐᓗ ᐂᑉᐸᕆᓗᒍ ᐊᕙᓗᕐᔪᐊᑉ ᐅᖓᑖᓄᑦ ᒥᓯᒍᓐᓇᖅᐳᖓ.
31ᑖᓐᓇ ᒎᑎ-ᐱᓂᐊᕐᖕᓂᖃᖅᐳᖅ ᓈᒻᒪᓈᑦᓯᐊᖅᑐᒥᒃ;
ᐊᑕᓂᐅᑉ ᐊᖏᕈᑎᒋᓯᒪᔭᖏᑕ ᓱᓕᓂᖏᑦ ᓴᖅᑭᑎᑕᐅᕗᑦ;
ᓴᐴᓗᑕᐅᕗᖅ ᕿᒫᔪᓕᒫᓄᑦ ᑖᑦᓱᒧᖓ.
32ᑭᓇ ᒎᑎᐅᕙ? ᐊᑕᓂᖅ ᑖᓐᓇᑐᐊᖅ;
ᑭᓇᓗ ᕾᖅᑑᕙ? ᒎᑎ ᑖᓐᓇᑐᐊᖅ.
33ᒎᑎ ᓲᖑᔫᓪᓗᓂ ᕿᒫᕕᒃᓴᕆᕙᕋ,
ᐊᖅᑯᑎᒋᓂᐊᖅᑕᒃᑲᓗ ᐊᑦᑕᕐᖕᓇᕈᓐᓃᖅᑎᑉᐰᑦ.
34 #
ᕼᐊᐸᑲ 3:19. ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᑉᐰᑦ;
ᖁᐃᑦᓵᖏᑦᓯᐊᖅᑎᓪᓗᖓ ᖃᖅᑲᐅᑉ ᖄᖏᓐᓂ ᐳᖅᑐᔪᓂ.
35ᐃᓕᓴᑎᑉᐹᖓ ᐅᓇᑕᕐᖕᓂᕐᖕᒥᒃ,
ᕿᓗᓯᔪᓐᓇᖁᓪᓗᖓ ᐱᓯᒃᓯᓂᒃ ᑲᓐᓄᔭᓂᒃ.
36ᐊᑕᓃᖅ, ᓴᐳᑎᕙᕐᖕᒪ ᐱᐅᓕᒃᓯᓂᕐᖕᓄᑦ,
ᐃᑲᔪᕐᖕᓂᕐᖕᓄᓪᓗ ᐊᔪᕈᓐᓃᖅᑎᑉᐸᕐᖕᒪ.
37ᓯᓕᒃᑐᒥᒃ ᓇᖏᕐᕕᖃᖅᑎᓐᓇᕕᖓ ᑎᒍᔭᐅᑎᓚᐅᓐᖏᓚᕐᖕᒪ,
ᐃᑎᒐᒃᑲᓗ ᖁᐂᔭᕿᑎᓚᐅᕐᖕᓇᒋᑦ.
38ᐊᑭᕋᖅᑐᖅᑎᒃᑲ ᒪᓕᒡᓗᒋᑦ ᓵᓚᒋᓚᐅᖅᐸᒃᑲ;
ᐅᑎᕆᐊᓚᐅᓐᖏᓚᖓᓗ ᓄᖑᓚᐅᖏᓐᓂᖏᓐᓂ.
39ᓄᖑᓚᐅᖅᐸᒃᑲ; ᑐᓪᓕᕋᖅᓗᒋᑦ, ᒪᑭᑦᓱᓐᓁᓪᓕᖁᓪᓗᒋᑦ;
ᐅᕐᕈᕗᑦ ᓵᓚᐅᓪᓗᑎᒃ ᓵᓐᓂ.
40ᓲᖑᓂᖅᑖᖅᑎᑉᐸᕐᖕᒪ ᐅᓇᑕᕐᖕᓂᕐᖕᒧᑦ;
ᓵᓚᖃᖅᑎᑉᐸᕐᖕᒪᓗ ᐊᑭᕋᖅᑐᖅᑎᓐᓂᒃ.
41ᐊᑭᕋᖅᑐᖅᑎᒃᑲ ᕿᒫᑎᑉᐸᑎᑦ ᐅᕙᓐᓂᒃ,
ᐊᓯᕈᖅᐸᒃᑲᓗ ᐅᕙᓐᓂᒃ ᐆᒥᓱᒃᑐᑦ.
42ᐃᑲᔪᖅᑎᒃᓴᒥᖕᓂᒃ ᕿᓂᕋᓗᐊᖅᐳᑦ, ᐱᐅᓕᔭᐅᔪᓐᓇᓐᖏᓚᓪᓕ;
ᐊᑕᓂᕐᖕᒧᑦ ᑐᒃᓯᐊᕋᓗᐊᖅᐳᑦ, ᑖᑦᓱᒪᓕ ᑭᐅᓐᖏᓔᑦ.
43ᓯᖃᓪᓕᒐᒃᑭᑦ, ᐳᔪᕋᑐᐃᓐᓇᓐᖑᖅᐳᑦ,
ᑐᓪᓕᕋᖅᐸᒃᑲ ᒪᕐᕋᖅᑎᑐᑦ ᐊᖅᑯᑎᒦᑦᑐᑎᑐᑦ.
44ᐱᐅᓕᕙᕐᖕᒪ ᐃᓄᖕᓂᑦ ᐊᑭᕋᖅᑐᖅᑎᓐᓂᑦ;
ᐊᐅᓚᑦᓯᓂᕋ ᑲᔪᓯᑎᑉᐸᑦ ᐃᓅᖃᑎᒋᒡᔪᐊᓄᑦ;
ᐃᓄᐃᑦ ᖃᐅᔨᒪᓚᐅᓐᖏᑕᒃᑲ ᐱᔨᑦᓯᖅᑎᒋᓕᖅᐸᒃᑲ.
45ᐃᓅᖃᑎᒃᓴᔭᕆᓐᖏᑕᒃᑲ ᓵᓐᓄᑦ ᐹᒻᒪᒃᑎᖅᐳᑦ;
ᐅᕙᓐᓂᒃ ᑐᓴᖅᑐᐊᕋᒥᒃ, ᓈᓚᒃᐹᖓ.
46ᐃᓅᖃᑎᒃᓴᔭᕆᓐᖏᑕᕗᑦ ᓴᐱᓕᖃᑦᑕᖅᐳᑦ,
ᓴᔪᓕᖅᓗᑎᒡᓗ ᕾᖃᑦᑕᖅᐳᑦ ᓴᐴᓗᑕᖃᕐᕕᖕᒥᓂᑦ.
47ᐊᑕᓂᖅ ᐃᓅᕗᖅ; ᓂᖅᑐᖅᑕᐅᓕ ᓴᐳᑦᔨᔨᒐ!
ᐊᖏᔪᕈᖅᑎᑕᐅᓕ ᒎᑎᒐ, ᐱᐅᓕᔭᐅᓂᕐᖕᒪ ᕾᖅᑐᖓ!
48ᒎᑎᐅᑉ ᓵᓚᖃᖅᑎᑉᐹᖓ ᐊᑭᕋᖅᑐᖅᑎᓐᓂᒃ;
ᐃᓅᖃᑎᒋᒡᔪᐊᓪᓗ ᓵᓐᓄᑦ ᐱᑎᑉᐰᑦ,
49ᐱᐅᓕᕚᖓ ᐊᑭᕋᖅᑐᖅᑎᓐᓂᑦ;
ᐊᑕᓃᖅ, ᐃᕝᕕᑦ ᓵᓚᖃᖅᑎᑉᐸᕐᖕᒪ ᐊᑭᕋᖅᑐᖅᑎᓐᓂᒃ,
ᓴᐳᑎᕙᕐᖕᒪᓗ ᐃᓄᖕᓂᑦ ᑲᑉᐱᐊᓇᖅᑐᓂᑦ.
50 #
ᕉᒪᒥᐅᓄᑦ 15:9. ᑍᒤᒻᒪᑦ ᐊᖏᒡᓕᑎᑉᐸᒋᑦ ᐊᑕᓃᖅ, ᐃᓅᖃᑎᒌᒡᔪᐊᑦ ᐊᑯᕐᖓᓐᓂ;
ᐃᓐᖏᕐᕕᒋᕙᒋᓪᓗ ᐊᑎᕐᖕᓂᒃ ᓂᖅᑐᐃᑦᔪᑎᓂᒃ.
51ᐊᖏᔪᒥᒃ ᓵᓚᖃᖅᑎᑦᓯᕗᖅ ᐊᖓᔪᖅᑳᕐᔪᐊᖁᑎᒥᓂᒃ;
ᓇᒡᓕᒍᓱᐃᓐᓇᕐᖕᓂᕐᖕᒥᓂᒃ ᓴᖅᑭᑎᑦᓯᕗᖅ ᐅᖅᓱᖅᑎᖅᓯᒪᔭᒥᓄᑦ,
ᑍᕕᑎᒧᑦ, ᑭᖑᕚᖏᓐᓄᓪᓗ ᐃᓱᖃᖏᑦᑐᒧᑦ.”
Currently Selected:
ᓴᒧᐃᓕ ᐂᑉᐸᖏᑦ 22: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
