ᓴᒧᐃᓕ ᐂᑉᐸᖏᑦ 21
21
ᓴᐅᓕᐅᑉ ᑭᖑᕚᖏᑕ ᑐᖁᑕᐅᓂᖏᑦ
1ᑍᕕᑎᐅᑉ ᐊᐅᓚᑦᓯᓂᖓᑕ ᐃᓚᖓᓂ ᑳᖕᓇᖅᑐᕐᔪᐊᖃᓚᐅᖅᐳᖅ ᐊᕐᕌᒍᓂᒃ ᐱᖓᓱᓂᒃ, ᑍᕕᑎᓗ ᐊᑕᓂᕐᖕᒧᑦ ᖃᐅᔨᓇᓱᐊᖃᑦᑕᓚᐅᖅᐳᖅ ᑕᒪᓐᓇ ᐱᓪᓗᒍ, ᐊᑕᓂᕐᓗ ᐅᖃᖅᐳᖅ, “ᓴᐅᓕᒃᑯᑦ ᐃᓚᖏᓪᓗ ᐸᓯᔭᒃᓴᐅᕗᑦ ᑐᖁᑦᓯᓂᕐᖕᒧᑦ; ᒋᐱᐅᓁᑎᒥᐅᑦ ᑐᖁᑕᐅᑎᓚᐅᖅᓯᒪᖕᒪᒋᑦ.” 2#ᔮᓱᐊ 9:3-15.(ᒋᐱᐅᓁᑎᒥᐅᑦ ᐃᓴᕆᐊᓕᒥᐅᑕᐅᖏᒻᒪᑕ; ᐅᓄᖏᑦᑐᑦ ᐊᒧᕅᑎᓂ ᐊᒥᐊᒃᑰᓯᒪᕗᑦ; ᐃᓴᕆᐊᓕᒥᐅᓄᓪᓕ ᐊᖏᕐᕕᐅᓯᒪᓚᐅᖅᐳᑦ ᓴᐳᒻᒥᔭᐅᓂᐊᕐᖕᓂᕋᖅᑕᐅᓪᓗᑎᒃ, ᓴᐅᓕᐅᓪᓕ ᐊᓯᕈᓚᐅᖅᐰᑦ ᐃᓴᕆᐊᓕᒥᐅᓂᒃ ᔫᑕᒥᐅᓂᒡᓗ ᐃᓱᒫᓗᒍᑎᖃᕐᖕᓂᖅᓴᐅᓪᓗᓂ.) 3ᑍᒤᒻᒪᑦ ᑍᕕᑎᐅᑉ ᒋᐱᐅᓁᑎᒥᐅᑦ ᑲᑎᖁᓚᐅᖅᐰᑦ ᐅᖃᐅᑎᓪᓗᒋᓪᓗ, “ᖃᓄᐃᓕᐅᖅᑐᒃᓴᐅᕗᖔ ᐃᓕᑦᓯᓐᓄᑦ? ᖃᓄᕐᓗ ᐋᖅᑮᒋᐊᕈᓐᓇᖅᐳᖓ ᐱᑦᓯᐊᖅᑕᐅᖏᓐᓂᕆᓯᒪᔭᑦᓯᓐᓂᒃ, ᐊᑕᓂᐅᑉ ᐃᓄᖁᑎᖏᓐᓂᒃ ᓮᒻᒪᖅᑎᑦᓯᔪᓐᓇᖁᓪᓗᓯ.”
4ᒋᐱᐅᓁᑎᒥᐅᑦ ᑭᐅᕗᑦ, “ᐊᑭᕋᖅᑑᑎᓂᕗᑦ ᓴᐅᓕᒥᒃ ᐃᓚᖏᓐᓂᒡᓗ ᐊᑭᓕᖅᑕᐅᔪᓐᓇᓐᖏᓚᑦ ᓯᐅᓪᕕᕆᒧᑦ ᒎᓗᒧᓪᓘᓐᓃᑦ, ᓇᓪᓕᐊᓐᓂᒡᓘᓐᓃᑦ ᑐᖁᑦᓯᔪᒪᓐᖏᓚᒍᑦ ᐃᓴᕆᐊᓕᒥᐅᓂᒃ.”
ᑍᕕᑎᓗ ᐅᖃᖅᐳᖅ, “ᖃᓄᕐᓕ ᐅᕙᓐᓂᒃ ᐱᓇᓱᐊᕆᐊᖃᖅᑐᕆᒃᓯᕕᓰ?”
5ᑖᒃᑯᐊ ᑭᐅᕗᑦ, “ᓴᐅᓕᐅᑉ ᓄᖑᓐᓇᓱᓚᐅᖅᐹᑎᒍᑦ ᐊᓯᕈᕋᓱᐊᖅᓗᑕᓗ ᓇᓕᖅᐳᓪᓘᓐᓃᑦ ᐃᓅᖁᓇᒍ ᐃᓴᕆᐊᓕᒥᐅᓂ. 6ᑍᒤᒻᒪᑦ ᐊᖑᑎᓂᒃ 7ᓂᒃ ᑭᖑᕚᖏᓐᓂᑦ ᕾᑦᓯᓚᐅᕆᑦ, ᕿᒥᓐᓂᐊᕋᑦᑎᒍ ᐊᑕᓂᐅᑉ ᓵᖓᓂ ᒋᐱᐊᓐᒥ ᓴᐅᓕᐅᑉ ᓄᓇᖓᓂ, ᐊᑕᓂᐅᑉ ᖃᖅᑲᖁᑎᖓᓂ.”
ᐊᖓᔪᖅᑳᕐᔪᐊᖅ ᑭᐅᕗᖅ, “ᐃᓕᑦᓯᓐᓄᑦ ᑐᓂᓂᐊᖅᐸᒃᑲ.”
7 #
ᓴᒧᐃᓕ ᓯᕗᓪᓖᑦ 20:15-17; ᓴᒧᐃᓕ ᐂᑉᐸᖏᑦ 9:1-7. ᔫᓇᑕᓂᒃᑯᒡᓕ ᐊᖏᖃᑎᒌᒍᑎᒋᓚᐅᖅᓯᒪᔭᖓᓄᑦ ᐃᒻᒥᖕᓄᑦ, ᑍᕕᑎᐅᑉ ᑐᖁᑕᐅᑎᓚᐅᓐᖏᓛ ᔫᓇᑕᓂᐅᑉ ᐃᕐᖕᓂᖓ ᒥᐱᐳᓴᑎ, ᓴᐅᓕᐅᑉ ᐃᕐᖑᑕᖓ. 8#ᓴᒧᐃᓕ ᓯᕗᓪᓖᑦ 18:19.ᐊᕐᒧᓁᓗ ᒥᐱᐳᓴᑎᓗ ᑎᒍᓚᐅᖅᐰᑦ, ᕆᔾᐸᐅᑉ ᐃᕐᖕᓂᖏᒃ ᒪᕐᕉᒃ ᐂᐊᐅᑉ ᐸᓂᖓᒍᑦ ᕿᑐᕐᖓᖅᑖᕆᔭᐅᓯᒪᔪᒃ ᓴᐅᓕᒧᑦ; ᑎᒍᓚᐅᕆᕔᑦᑕᐅᖅ ᓴᐅᓕᐅᑉ ᐸᓂᖓᑕ ᒥᕋᐱᐅᑉ ᐃᕐᖕᓂᖏᑦ ᑕᓪᓕᒪᑦ, ᐃᕐᖕᓂᖅᑖᕆᓯᒪᔭᖏᑦ ᐊᑦᕆᐅᓪᒥᑦ ᐸᕐᔨᓔᑉ ᐃᕐᖕᓂᖓᓂᑦ, ᒥᕼᐅᓚᑍᑎᒥᐅᑕᕐᖕᒥᑦ. 9ᑍᕕᑎᐅᑉ ᑖᒃᑯᐊ ᑐᓂᓚᐅᖅᐰᑦ ᒋᐱᐊᓁᑎᒥᐅᑦ ᐃᓄᖏᓐᓄᑦ, ᑖᒃᑯᓇᓐᖓᑦ ᖃᖅᑲᐅᑉ ᖄᖓᓂ ᕿᒥᑕᐅᓚᐅᖅᐳᑦ ᐊᑕᓂᐅᑉ ᓵᖓᓂ, ᑖᒃᑯᐊᓕᒫᑦ 7 ᐊᑕᐅᑦᓯᒃᑯᑦ ᑐᖁᓚᐅᖅᐳᑦ ᐅᐱᕐᖔᖅ ᐃᓱᓕᒋᐊᕕᒃᑎᓪᓗᒍ, ᓂᐊᖂᔭᒃᓮᑦ ᓄᐊᑕᐅᒋᐊᕐᕕᐊᓂ.
10ᓴᐅᓕᐅᓪᓕ ᓄᓕᐊᖓ ᕆᔾᐸ, ᐂᐊᐅᑉ ᐸᓂᖓ, ᐊᑐᓚᐅᖅᐳᖅ ᐳᑐᖅᓛᒥᒃ, ᐅᓕᒋᓪᓗᒍ ᐅᔭᕋᐅᑉ ᖄᖓᓂ ᑐᖁᖓᔪᑦ ᓇᔪᖅᑕᖓᓂ, ᑍᑲᓃᓚᐅᖅᐳᓪᓗ ᑲᑎᖅᓱᐃᕕᐅᑉ ᐱᒋᐊᕐᖕᓂᖓᓂᑦ ᐅᑭᐊᒃᓵᑉ ᓯᓚᓗᓕᕐᖕᓂᖓ ᑎᑭᓪᓗᒍ; ᐅᓪᓗᒃᑯᑦ ᑎᖕᒥᐊᓂᑦ ᑐᖁᖓᔪᑦ ᓴᐳᑎᓚᐅᖅᐰᑦ, ᐅᓐᓄᒃᑯᓪᓗ ᓴᐳᑎᓚᐅᕆᕔᑦ ᐃᖅᓯᓇᖅᑐᓂᑦ ᐆᒪᔪᓂᑦ.
11ᑍᕕᑎᓕ ᑕᒪᑐᒥᖓ ᑐᓴᕋᒥ ᕆᔾᐸᐅᑉ ᐂᐊᐅᑉ ᐸᓂᖓᑕ ᐱᓂᐊᕐᖕᓂᖓᓂᒃ ᓴᐅᓕᐅᑉ ᓄᓕᐊᒃᑲᓐᓂᖓᑕ, 12#ᓴᒧᐃᓕ ᓯᕗᓪᓖᑦ 31:8-13.ᑍᕕᑎ ᑕᕝᕗᓐᖓᖅᐳᖅ ᓴᐅᓕᐅᓪᓗ ᐃᕐᖕᓂᖓᑕᓗ ᔫᓇᑕᓂᐅᑉ ᓴᐅᓂᖏᑦ ᐂᓪᓗᒋᑦ ᔭᐲᓯ-ᒋᓖᑎᒦᑦᑐᒥᑦ. (ᑖᒃᑯᓇᓐᖓᑦ ᑎᒡᓕᒃᑕᐅᓯᒪᔪᑦ ᐃᓄᒋᐊᑐᒃᑯᕕᖕᒥᑦ ᐱᑦ-ᓵᓂᒥᑦ, ᐱᓕᔅᑍᓂᒥᐅᓂᑦ ᓂᕕᓐᖓᖅᑕᐅᓚᐅᖅᓯᒪᔪᑦ ᑍᑦᓱᒪᓂ ᐅᓪᓗᒥ ᓴᐅᓕᑯᒃ ᑐᖁᑕᐅᑎᓪᓗᒋᒃ ᖃᖅᑲᒥ ᒋᐅᓪᐳᐊᒥ.) 13ᑍᕕᑎᐅᑉ ᓴᐅᓕᒃᑯᒃ ᔫᓇᑕᓂᒃᑯᒃ ᓴᐅᓂᖏᑦ ᐂᓚᐅᖅᐰᑦ; ᕿᒥᑕᐅᓚᐅᖅᑐᓪᓗ ᓴᐅᓂᖏᑦ ᑲᑎᓪᓗᒋᑦ ᓇᒃᓴᓚᐅᕆᕔᑦ. 14ᓴᐅᓕᐅᓪᓗ ᔫᓇᑕᓂᐅᓪᓗ ᓴᐅᓂᖏᑦ ᐃᓗᕕᖅᑕᐅᓚᐅᖅᐳᑦ ᓴᐅᓕᐅᑉ ᐊᑖᑕᖓᑕ ᑭᓯᐅᑉ ᐃᓗᕕᖃᕐᕕᖓᓄᑦ, ᓄᓇᓕᖕᓂ ᔨᓚᒥ ᐱᓐᔭᒥᓂᐅᑉ ᓄᓇᖓᓂ, ᐊᖓᔪᖅᑳᕐᔪᐊᑉ ᑎᓕᓯᑦᔪᑎᒋᔭᖓᓂᒃ ᐊᑐᖅᓗᑎᒃ ᐱᓇᓱᐊᓚᐅᖅᐳᑦ. ᑕᒪᑐᒪ ᑭᖑᓂᐊᒍᑦ ᒎᑎᐅᑉ ᑐᒃᓯᐊᕐᖕᓂᖏᓐᓂᒃ ᑭᐅᓚᐅᖅᐰᑦ ᓄᓇᖓ ᐱᓪᓗᒍ.
ᐅᓇᑕᕐᖕᓃᑦ ᐱᓕᔅᑍᓂᒥᐅᑦ ᐃᓄᒃᐸᖏᓐᓂᒃ
ᑯᕉᓂᑲ ᓯᕗᓪᓖᑦ 20:4-8
15ᐅᓇᑕᕆᐊᓪᓚᓚᐅᕆᕗᑦ ᐱᓕᔅᑍᓂᒥᐅᑦ ᐃᓴᕆᐊᓕᒥᐅᓪᓗ, ᑍᕕᑎᒃᑯᑦ ᐃᓚᖏᓪᓗ ᐅᓇᑕᕆᐊᓚᐅᖅᐳᑦ ᐱᓕᔅᑏᓂᒥᐅᓄᑦ, ᐅᓇᑕᖅᑎᓪᓗᒋᑦ ᐱᓕᔅᑍᓂᒥᐅᓂᒃ; ᑍᕕᑎᓗ ᑕᖃᓚᐅᖅᐳᖅ. 16ᐃᓄᒃᐹᓗᒃ ᐊᑎᓕᒃ ᐃᓯᐱ-ᐱᓈᑉᒥᒃ ᕌᐸᒃᑯᑦ ᑭᖑᕚᖓᓐᓂᒥᐅᖅ, ᑲᓐᓄᔭᒥᒃ ᖃᓗᒋᐊᓕᒃ ᐅᖁᒤᓐᓂᓕᖕᒥᒃ 7ᐸᐅᓐ ᐊᕝᕙᕐᖕᒥᒡᓗ ᓴᕕᒡᔪᐊᒥᒡᓗ ᓄᑖᒥᒃ ᐊᑐᖅᓗᓂ, ᐃᓱᒪᖃᓚᐅᖅᐳᖅ ᑐᖁᑦᓯᔪᓐᓇᕋᓱᒋᓪᓗᓂ ᑍᕕᑎᒥᒃ. 17#ᐊᑕᓃᑦ ᓯᕗᓪᓖᑦ 11:36; ᐃᓐᖏᕈᑦ 132:17.ᐊᐱᓮᓕ ᔨᕈᐃᐊᐅᑉ ᐃᕐᖕᓂᖓ ᑍᕕᑎᒥᒃ ᐃᑲᔪᕆᐊᖅᐳᖅ, ᐃᓄᒃᐹᓗᒃ ᐱᓕᔅᑍᓂᒥᐅᖅ ᐅᓇᑕᓕᖅᓗᒍ ᑐᖁᓪᓗᒍᓗ. ᑕᕝᕙ ᑍᕕᑎᐅᑉ ᐃᓚᖏᑕ ᑍᕕᑎ ᐊᖏᖅᑎᓚᐅᖅᐹᑦ ᐅᓇᑕᕆᐊᒃᑲᓐᓂᖃᑦᑕᖁᔭᐅᔪᓐᓃᖅᓗᓂ ᑖᒃᑯᐊ ᐃᓚᒋᓗᒋᑦ, ᐅᖃᖅᓗᑎᒃ, “ᐃᓴᕆᐊᓕᒥᐅᓄᑦ ᓂᕆᐅᖕᓂᖃᕐᕕᒋᔭᐅᒐᕕᑦ, ᐃᓕᖕᓂᒃ ᐊᓯᐅᔨᔪᒪᓐᖏᓚᒍᑦ.”
18ᑕᒪᑐᒪ ᑭᖑᓂᐊᒍᑦ ᐅᓇᑕᕐᖕᓂᖃᓕᓚᐅᕆᕗᑦ ᐱᓕᔅᑍᓂᒥᐅᓂᒃ ᒑᑉᒥ, ᑍᑦᓱᒪᓂ ᓯᐱᑬ ᕼᐅᓴᑍᑎᒥᐅᑕᖅ ᑐᖁᑦᓯᓚᐅᖅᐳᖅ ᐃᓄᒃᐸᖕᒥᒃ ᓴᑉᐸᒥᒃ ᐊᑎᓕᖕᒥᒃ ᕌᐸᒃᑯᑦ ᑭᖑᕚᖏᓐᓂᒥᐅᑕᕐᖕᒥᒃ.
19ᐅᓇᑕᕐᖕᓂᖃᕆᐊᓪᓚᓚᐅᕆᕗᖅ ᐱᓕᔅᑍᓂᒥᐅᓂᒃ ᒑᑉᒥ, ᐃᐅᓪᕼᐊᓇᓐᓗ ᔮᕆ-ᐅᕆᒡᒋᐅᑉ ᐃᕐᖕᓂᖓ ᐱᑦᓕᐊᒥᐅᑕᖅ ᑐᖁᑦᓯᓚᐅᖅᐳᖅ ᒍᓔᐊᒥᒃ ᒋᑍᑎᒥᐅᑕᒥᒃ, ᑖᓐᓇ ᖃᓗᒋᐊᖃᓚᐅᖅᐳᖅ ᓄᕕᖅᓴᕐᕕᐅᑉ ᐃᑳᖓᔪᐊᑐᑦ ᓯᓕᒃᑎᒋᔪᒥᒃ.
20ᐊᓯᐊᓂ ᐅᓇᑕᕐᖕᓂᖃᕆᐊᓪᓚᓚᐅᕆᕗᖅ ᒑᑎᒥ, ᐃᓄᒃᐸᒃᑕᖃᓚᐅᖅᐳᖅ ᐅᓇᑕᕆᐊᒃᓴᖅ ᐊᓕᐊᓁᒍᓱᒃᑐᒥᒃ 6ᓂᒃ ᐃᓗᒃᑐᑦ ᐊᒡᒐᖏᑦ ᐃᓄᒐᓐᖑᐊᖃᓚᐅᖅᐳᑦ 6ᓂᒡᓗ ᐃᑎᒐᖏᑦ ᐃᒡᓗᒃᑐᑦ ᐃᓄᒐᓐᖑᐊᖃᕆᓪᓗᑎᒃ, ᑲᑎᓪᓗᖏᑦ 24ᓂᒃ ᐃᓄᒐᓐᖑᐊᖃᖅᑐᒥᒃ; ᑖᓐᓇᑦᑕᐅᖅ ᕌᐸᒃᑯᑦ ᑭᖑᕚᖏᓐᓂᒥᐅᑕᒋᕗᖅ. 21ᑖᓐᓇ ᓇᕐᕈᓇᖅᑎᑦᓯᓚᐅᖅᐳᖅ ᐃᓴᕆᐊᓕᒥᐅᓂᒃ, ᔫᓇᑕᓂᐅᓪᓗ ᓯᒥᐊᑉ ᐃᕐᖕᓂᖓᑕ ᑐᖁᓚᐅᖅᐹ, ᑍᕕᑎᐅᑉ ᖃᑕᓐᖑᑎᖓᑕ.
22ᑖᒃᑯᐊ ᓯᑕᒪᑦ ᐃᓄᒃᐸᖕᓄᑦ ᕌᐸᒃᑯᓐᓄᑦ ᒑᑎᒥᐅᓄᑦ ᑭᖑᕚᕆᔭᐅᓚᐅᖅᐳᑦ, ᑖᒃᑯᐊ ᑐᖁᑕᐅᓚᐅᖅᐳᑦ ᑍᕕᑎᒧᑦ ᐃᓚᒋᔭᖏᓐᓄᓪᓗ.
Currently Selected:
ᓴᒧᐃᓕ ᐂᑉᐸᖏᑦ 21: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
