ULUKASI 21

Umnikelo womhlolokazi

(Mk 12:41-44)

1Kwathi uJesu naqalako, wabona iinkhumkani ziletha iminikelwazo ngethempelini. 2Godu wabona nomhlolokazi odududu anikela ngeempaparwana zekoporo ezimbili ezincani khulu. 3Wathi: “Nginitjela iqiniso bona umhlolokazi odududu lo unikele ukwedlula boke abanye. 4Boke abantwaba banikele ngokuthatha emnothwenabo; kodwana yena ebuchakeni bakhe unikele ngakho koke aphila ngakho.”

UJesu ukhuluma ngokugirizwa kwethempeli

(Mt 24:1-2; Mk 13:1-2)

5Abanye babafundi bakhe bebakhuluma ngendlela ithempeli libatjazwa ubuhle ngakhona, basitjho bona liqaleka kuhle kangangani ngamatje walo amahle nezipho ezinikelwe uZimu. Kodwana uJesu wathi: 6“Nakungilokho enikubona laphokhu, kuzokufika isikhathi lapha kungekhe kwasala khona ngitjho nelitje linye phezu kwelinye; elinye nelinye lawo lizokugirizwa.”

Iinhlupheko ezibuhlungu

(Mt 24:3-14; Mk 13:3-13)

7Bambuza uJesu bathi: “Mfundisi, zizokwenzeka nini izintwezo na? Zizokuba yini iimbonakaliso zokobana sele zizokwenzeka na?”

8UJesu waphendula wathi: “Tjhejani bona ningakhohliswa ngombana abanengi bazakuza ebizweni lami bathi, ‘Nginguye!’ begodu, ‘Yeke isikhathi sitjhidele!’ Kodwana ningabalandeli. 9Nanizwa ngezipi nokuvukelana, ningethuki. Izintwezi kumele zenzeke qangi, kodwana isiphetho asizukufika msinyna.”

10Waraga wathi kibo: “Isizwe sizakuvukela isizwe nombuso uvukele umbuso. 11Kuzakuba khona ukusikinyeka kwephasi okukhulu, indlala namatshwenyeko iindawo ngeendawo, kube nezehlakalo ezethusako kanye neembonakaliso ezikulu ezivela ezulwini. 12Kodwana ngaphambi kwakho koke lokho, bazonibamba bese bayanitlhorisa. Bazonisa emasinagogini neenkhungweni begodu nidoselwe phambi kwamakhosi nababusi, koke njalo kube ngebanga lami. 13Ngalokho nizakuba bofakazi kibo. 14Kodwana qedani nemikhumbulwenu bona ningakhathazeki isikhathi singakafiki ngokuthi nizozivikela njani. 15Ngizonipha amezwi nokuhlakanipha okuzakwenza bona kungabikho noyedwa wabajamelani benu ozakukghona ukuphikisana namkha ukuphambana nakho. 16Nizokukhatjhelwa ngitjho nangani babelethi benu, abafowenu, iinhlobo zenu nabangani benu; begodu abanye benu bazakubulawa ngibo. 17Boke bazonihloya ngebanga lami. 18Kodwana akunasihluthu nasinye seenhloko zenu esizakulahleka. 19Ngokubambelela kwenu nizakuzuza ipilo.”

UJesu ukhuluma ngokubhujiswa kweJerusalema

(Mt 24:15-21; Mk 13:14-19)

20“Lokha nanibona iJerusalema iragelelwe mabutho, nizakwazi bona ukubhujiswa kwayo sekutjhidele. 21Yeke akuthi labo abaseJudiya babalekele eentabeni, abangaphakathi kwalo baphume, nalabo abasemaphandleni bangangeni kilo. 22Ngambala lesi kusikhathi sesibetho nokuzaliseka kwakho koke okutloliweko. 23Maye kuzokwesabeka kangangani emihleni leyo ebafazini abazithweleko nabamunyisako! Kuzokubakhona ukutshwenyeka okukhulu enarheni nobukhali phezu kwabantwaba. 24Abanye bazokubulawa ngesabula, abanye benziwe iimbotjhwa kizo zoke izizwe. IJerusalema izakugadangelwa phasi ngabatjhili kufikela lapha isikhathi sabo siphela khona.”

Ukuza kweNdodana yoMuntu

(Mt 24:29-31; Mk 13:24-27)

25“Kuzokuba khona iimbonakaliso elangeni, enyezini neenkwekwezini. Ephasini, izizwe zizakuba sesizini begodu zikhene lokha ilwandle nalihlokomako begodu likhiphizela. 26Abantu bazakuyatha ngevalo ngalokho okuzokwehlela iphasi loke ngombana umkhambathi wezulu uzakunyakaziswa. 27Ngesikhatheso bazakubona iNdodana yoMuntu isiza elifwini ngamandla nangephazimulo ekulu. 28Lokha izintwezi nazithoma ukwenzeka, sikimani niphakamise iinhloko zenu ngombana ukuhlengwa kwenu kutjhidele.”

Ifundiso ngomuthi wamakhiwani

(Mt 24:32-35; Mk 13:28-31)

29Yeke uJesu wabatjela umfanekiso lo: “Qalani umuthi wamakhiwani nayo yoke eminye imithi. 30Lokha nayitlhurha amakari, nani niyazibonela begodu niyazi bonyana ihlobo selitjhidele. 31Ngokunjalo-ke nani nanibona izintwezi zisenzeka, niyazi bona umbuso kaZimu sewutjhidele.

32“Ngiqinisile ngiyanitjela bona isizukulwanesi angeze sadlula kungakenzeki zoke izintwezi. 33Izulu nephasi kuzadlula, kodwana amezwami angekhe adlula.”

Ekufanele ukuyelelwa

34“Yelelani, nakungasinjalo, iinhliziyo zenu zizakudisibezwa kurhiribidela, kudakwa kanye neemfiso zepilo. Ilangelo lizanembatha njengesifu ningakatjheji. 35Lizakwembatha boke abahlala ebusweni bephasi loke. 36Yeke hlalani nilindile, nithandaze njalo ukuze nikghone ukuphunyurha koke okuzokwenzeka nokobana nikghone ukujama phambi kweNdodana yoMuntu.”

37Ilanga nelanga uJesu bekafundisa ethempelini, kuthi njalo nakuhlwako aphume ayokulala entabeni ye-Oliva. 38Njalo ekuseni, boke abantu bephele baye ngethempelini bayomlalela.

Currently Selected:

ULUKASI 21: SND12

Highlight

Copy