UJWANISI 8
8
Umfazi obanjwe ahlobonga
1Khona uJesu waya entabeni ye-Oliva. 2Kwathi ekuseni ngesamarimarima wabuyela ngethempelini lapha abungelelwa khona babantu; nje-ke wahlala phasi bona abafundise. 3Abafundisi bomthetho nabaFarisi baletha kuye umfazi obanjwe ahlobonga, bamjamisa phambi kwabo boke. 4Bathi kuJesu: “Mfundisi, umfazi lo simbambe sele asendimeni yokuhlobonga. 5Emthethweni uMosi wasiyala bona umfazi onjalo simkhande ngamatje. Alo, wena uthini na?” 6Batjho lokhu bathiya uJesu, khona bazakuba nesibambelelo sokummangalela. Kodwana uJesu wakhothama watlola phasi ngomunwakhe.
7Basajame lapho bambuza imibuzo, wathabuluka wathi kibo: “Onganaso isono phakathi kwenu, akabe ngewokuthoma ukumkhanda ngelitje.” 8Wakhothama godu watlola phasi. 9Bathi ukuzwa lokho, bakhamba boke ngamunye ngamunye, abaphathi ntange. UJesu wasala yedwa, nomfazi loyo asolo ajame lapho. 10UJesu wathabuluka godu wathi kuye: “Sifazana, baphi na? Akakho noyedwa okulahlileko na?”
11Waphendula wathi: “Sengitjho namunye, Kosi.” UJesu wathi: “Njeke-ke nami angikulahli ngomlandu, ngalokho khamba kodwana ungabe usona.”
UJesu kukhanya kwephasi
12UJesu wakhuluma ebaFarisini godu wathi: “Mina ngikukhanya kwephasi. Loyo ongilandelako angekhe akhamba ebumnyameni kodwana uzakuba nokukhanya kokuphila.”
13AbaFarisi bathi kuye: “Manjesi khona, uzifakazela wena ngekwakho; nje-ke okutjhoko akutjho ilitho.”
14UJesu waphendula wathi: “Nanyana ngizifakazela ngokwami, ubufakazi bami buqinisile ngombana ngiyazi lapha ngivela khona nalapha ngiyako. Kodwana nina anazi lapha ngibuya khona nalapha ngiyako. 15Nina nigweba ngokwabantu, mina angigwebi muntu. 16Kodwana nangabe bekufanele ngenze njalo, ukugweba kwami bekuzokuba ngokweqiniso ngombana angisingedwa; uBaba ongithumileko unami. 17Angithi kutloliwe emthethweni wekhenu bona ubufakazi bababili buliqiniso. 18Mina ngingozifakazelako noBaba ongithumileko uyangifakazela.”
19Nje-ke bambuza bathi: “Ukuphi uyihlo na?”
UJesu waphendula wathi: “Mina aningazi, noBaba animazi. Nakube beningazi mina noBaba benizomazi naye.”
20Wakhuluma amezwi lawo afundisa ngethempelini lapha bekubekwe iinlulu zomnikelo. Akakho noyedwa owambambako ngombana isikhathi sakhe besingakafiki.
21Godu uJesu wathi kibo: “Ngizakukhamba, nina nizangifuna kodwana nizakufela ezonweni zenu. Angekhe naya lapha ngiyako.”
22Lokhu kwenza amaJuda azibuze athi: “Kghani uzazibulala na? Kungabe libangelo asithi, ‘Lapha ngiya khona angeze nafika’?”
23UJesu waphendula wathi: “Nina ningebephasinapha, mina ngingowaphezulu. Mina angisuye wephaseli. 24Ngithe nizakufela ezonweni zenu ngombana mbala naningakholwako bona nginguye enginguye, nizakufela ezonweni zenu.”
25Bambuza bathi: “Ungubani wena na?”
UJesu waphendula wathi: “Nginguloyo ebe soloko ngizitjho bona nginguye. 26Nginakunengi engingakutjho nenginganigweba ngakho. Kodwana loyo ongithumileko wethembekile begodu lokho engikuzwe kuye ngikutjela iphasi.”
27Azange balemuke bona gade akhuluma kibo ngoYise. 28Nje-ke uJesu wathi: “Nasele niphakamise iNdodana yoMuntu, nizakwazi bona nginguye engizitjho bona nginguye, nokobana angenzi ilitho ngokwami kodwana ngikhuluma lokho uBaba angifundise khona. 29Loyo ongithumileko unami, akakangitjhiyi ngedwa ngombana ngenza njalo okumthokozisako.”
30Asakhuluma lokhu, abanengi bamkholwa.
Iqiniso liyatjhaphulula
31Yeke emaJudeni amkholwako uJesu wathi: “Nanijame efundiswenami, nibafundi bami bamambala. 32Nje-ke nizakwazi iqiniso neqiniso lizanitjhaphulula.”
33Bamphendula bathi: “Siziinzukulwana zaka-Abrahamu, azange khesibe makhoboka wamuntu. Alo-ke utjho ukuthini nawuthi sizakutjhaphululwa na?”
34UJesu wathi kibo: “Kwamambala ngiqinisile ngithi: Woke owonako ulikhoboka lesono. 35Ikhoboka alinayo indawo yesiphelani emndenini, kodwana indodana ingeyomndeni nini nanini. 36Lokha iNdodana nayinitjhaphululako nizabe nitjhaphulukile kwamambala. 37Ngiyazi bona niziinzukulwana zaka-Abrahamu. Kodwana nilinga ukungibulala ngombana ilizwi lami alinandawo kini. 38Nginitjela lokho engikubone kuBaba, kodwana nina nenza lokho uyihlo anitjele khona.”
39Bamphendula bathi: “Ubaba wethu ngu-Abrahamu.”
UJesu wabaphendula wathi: “Nangabe benibantwana baka-Abrahamu, ngabe nenza lokho u-Abrahamu gade akwenza. 40Njengombana nifuna ukungibulala mina muntu onitjele iqiniso engilizwe kuZimu, kodwana u-Abrahamu azange akhe akwenze okufana nalokhu. 41Nenza lokho ubaba wenu akwenzako.”
Bamphendula bathi: “Asisibo abantwana bokonakala, sinoBaba oyedwa, nguZimu ngokwakhe.”
42UJesu wathi kibo: “Nangabe kwamambala uZimu bekanguBaba wenu, benizangithanda ngombana ngibuya kuZimu, nje-ke ngilapha. Angikazizeli ngeyami intando, kodwana yena ungithumile. 43Kubayini ningazwisisi engikutjhoko na? Kungombana aniwuzwa umlayezwami. 44Nibantwana bakayihlo uSathana, nithanda ukwenza iinkanuko zakayihlo. Kusukela ekuthomeni bekambulali, azange akhabe neqiniso ngombana akukho iqiniso kuye. Nakaleya amanga, ukhuluma lokho okuyimvelo yakhe ngombana ungusomalakazi noyise wamanga. 45Kodwana ngombana mina nginitjela iqiniso, aningikholwa. 46Kukhona phakathi kwenu ongafakaza bona nginomlandu wesono na? Alo-ke nangabe nginitjela iqiniso, kubayini ningakholwa na? 47OngewakaZimu ulalela amezwi kaZimu. Isizathu sokobana ningalaleli kungoba anisibo bakaZimu.”
UJesu no-Abrahamu
48AmaJuda amphendula athi: “Utjho bona besingakaqinisi lokha sithi wena umSamariya begodu unedimoni na?”
49UJesu waphendula wathi: “Anginadimoni, ngihlonipha uBaba; kodwana nina niyangilulaza. 50Angizifuneli mina idumo lami, kodwana kukhona olifunako nogwebako. 51Kwamambala ngiqinisile ngithi kini: Olonda ifundiswami angeze afa.”
52Bathi kuye: “Kwanjesi khona sesineqiniso bona unedimoni. U-Abrahamu wafa nabaphorofidi bafa, nanyana kunjalo uthi loyo olonda ifundiswakho angeze ezwa ngitjho ukufa. 53Wena umkhulu kunobaba wethu u-Abrahamu na? Yena walala, ngokunjalo nabaphorofidi. Alo, wena udlumbana bona ungubani na?”
54UJesu waphendula wathi: “Nangabe bengingazidumisa mina, idumo lami lingaba lilize. UBaba, ngitjho loyo enimthatha njengoZimenu, nguye ongidumisako. 55Azange khenimazi, kodwana mina ngiyamazi. Ngathana bengingathi angimazi, bengingaba ngusomanga njengani. Kodwana ngiyamazi, begodu ngiyalihlonipha ilizwi lakhe. 56Uyihlomkhulu u-Abrahamu wakuthabela ukubona ilanga lami, iye, walibona bewathaba.”
57Bathi kuye: “Abe awunayo neminyaka ematjhumi amahlanu. Alo, sewumbone nini u-Abrahamu?”
58UJesu waphendula wathi: “Kwamambala ngithi kini: Angakabikho u-Abrahamu, mina besele ngikhona.”
59Yeke badobha amatje bona bamkhande, kodwana uJesu wazifihla waphuma ngethempelini wakhamba.
Currently Selected:
UJWANISI 8: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.
