Makətūbə̄ yā Soponi 2
2
Ɓārə́n̄ de gə̄ kadə̄ tūrə̄n̄ rɔ̄də́ kə̄ rɔ̄ Kɔ́ɔ̄ɓē tə́
1-2A tə̄ɓān̄sí tītə̄ mu
kə́ gətóo kɔ̄ɔ́ kem
ndɔ̄ kógə̄ḿ beē.
Wōn̄g kə́ ngá̰ý yā
Kɔ́ɔ̄ɓē a əsō dɔsí tə́.
A̰á̰ā̰, ndɔ̄ wōn̄g yān
a reē tām̄ yāsí tə́.
I beé ní, sḭḭ̄ ń rɔ̄sí
sɔl̄sí ndɔ̄ kógə̄ḿ aĺ ní,
ī-gírī yá̰a̰ ō, ə́hɔī rɔ̄sí ō,
kété pá tá kadə̄ yá̰a̰ gə̄ ń
noō malang reē ugə̄n̄ ɓáý.
3Ī-tūrī rɔ̄sí kə̄ rɔ̄ Kɔ́ɔ̄ɓē tə́,
sḭḭ̄ de kə́ kem ɓēé gə̄ ń
sḭḭ̄ i de kə́ najə̄sí gətóo gə̄ ní,
sḭḭ̄ ń oōī tan, adə̄
ī-rāāī yá̰a̰ gə̄ ń ni ədasí ní.
Ī-rāāī yá̰á̰ kə́ gōtə́ ō,
ī-rāāī rɔ̄sí de kə́ dūú gə̄ tə́
ta kum Nə́ɓā tə́ ō.
Na majanī
ā ī-ndiī loo kə́ yá̰a̰
a ɔdə́ rɔ̄sí tū tə́ aĺ tə́,
ndɔ̄ ń Kɔ́ɔ̄ɓē a ɔjəń
wōn̄g yān kə̄ ndágá tə́ ní.
Əlan̄ ɓōĺ kem de kə́ no ɓē tə́ gə̄ tə́
4A əya̰n̄ ɓē kə́ Gaja kɔ̄ɔ́ ō,
a nujən̄ ɓē kə́
Askalon kɔ̄ɔ́ ō.
A tə̄ɓān̄ de kə́ Asdod gə̄
kɔ̄ɔ́ dan kadə ndaá ō,
a nujən̄ ɓē kə́ Ekəron kɔ̄ɔ́ ō.
5I yá̰á̰ kə́ to kum kaȳ aĺ
kə́ ba̰ý beē tām̄ yāsí sḭḭ̄
de kə́ Kapətor gə̄ ń
ī-ndiī kadə̄ bā bo tə́ ní!
Sarya ń Kɔ́ɔ̄ɓē gān̄g
dɔsí tə́ ní n toó:
Ḭ̄ Kanaan, dɔ nang yā Pilistin gə̄,
m-ā m̄-nujiī kɔ̄ɔ́,
m-ā m̄-taā deē yāí gə̄ jīí tə́ kɔ̄ɔ́.
6Dɔ nang yāí ń to kə
gō kadə bā boó ní,
a tél loo kəsa yá̰a̰
yā yá̰a̰ kul̄ gə̄ ō,
loo kə́ ngé ngɔ̄m̄də́ gə̄
a aw̄n̄ sedə́ dɔ mu tə́ tū tə́ ō,
a tél i gong batə̄ gə̄ ō.
7*Juda gə̄ ń a teēn̄ ta yo tə́ ní,
a ndin̄ gō nang ngeé ń noō tə́.
Nin̄ a aw̄n̄ kə yá̰a̰ kul̄
yādə́ gēé loo ń noō tə́,
ba loo tíbí anī, a aw̄n̄ ɓīí
kem kújə gə̄ kə́ Askalon tə́ tə́.
Tɔdɔ̄ Kɔ́ɔ̄ɓē Nə́ɓā
yādə́ a rāā majə sedə́,
adə̄ ni a tūr̄ yá̰á̰ ń
a rāā yā reē kə̄ dɔdə́ tə́ ní.
Əlan̄ ɓōĺ kem de kə́ gír ɓē tə́ gə̄ tə́
8M-ōō tájə̄ ndū
yā Moab gə̄ ō,
m-ōō lur ń Amon gə̄
lurən̄ loo ní ō.
Nin̄ tájə̄n̄ gír
deē yāḿ gə̄ ō,
teēn̄ kem dɔ nang
yādə́ kə̄ gogə́ kə ta kūl̄
taā dɔ nang yā
gír deē yāḿ gə̄ ō.
9I beé ɓáa, mā ń
i Kɔ́ɔ̄ɓē kə́ bo kə́ tɔ́gən i ngá̰ý,
Nə́ɓā yā *Israel ní,
najə̄ ń m-ə́dá wáńg ní n toó:
Tītə̄ ń m̄-ndiń
kə kumḿ rɔ̄kum noó,
Moab a tél yā to tītə̄
ɓē kə́ Sodom ō,
Amon gə̄ a télən̄ yā
to tītə̄ ɓē kə́ Gomor ō.
Dɔ nang yādə́ a tél
loo kə́ túpə kōn̄ gə̄ i tū tə́ ō,
loo kə́ katə̄ i ngá̰ý tū tə́ ō.
A nujən̄ dɔ nang yādə́ ní
i kə́ njɔ́ḿ gə̄ tə́.
De gə̄ kə́ dan gír deē yāḿ gə̄ tə́ ń
a teēn̄ ta yo tə́ ní,
a ɔyn̄ yá̰a̰ kənge yādə́ dɔ gúú tə́ ō,
de kə́ dɔ nang yāḿ tə́ gə̄ ń
a teēn̄ ta yo tə́ ní, a əhɔn̄də́ ō.
10Yá̰á̰ ń nin̄ a əngen̄
tām̄ kɔjə rɔ̄
yādə́ tə́ ní n noó.
A̰á̰ā̰, nin̄ tájə̄n̄ gír
de gə̄ yā Kɔ́ɔ̄ɓē kə́ bo kə́ tɔ́gən i ngá̰ý,
nin̄ teēn̄ kem dɔ nang
yādə́ kə̄ gogə́ kə ta kūl̄
taā dɔ nang yā
gír de gə̄ yā Kɔ́ɔ̄ɓē ō.
11Kɔ́ɔ̄ɓē a to ɓōĺ
ngá̰ý tām̄ yādə́ tə́.
Ni a nujə nə́ɓā gə̄ malang
kə́ dɔ nang tə́ kɔ̄ɔ́.
Loo ń noō tə́ nápar de gə̄ ń
ndin̄ ta kaw̄ kə̄ sa̰y nó
ní gə̄gē, a rɔȳnən̄.
Nin̄ kógə̄ḿ kógə̄ḿ ní,
a rɔȳnən̄ kə̄ dɔ
nang yādə́ gə̄ tə́.
Əlan̄ ɓōĺ kem de gə̄ kə́ dām̄ mbɔ́r ɓē kə́ geleé tə́ ō, kə́ ko̰ó̰ tə́ ō
12Sḭḭ̄ de kə́ *Etiopi gə̄,
m-ā m̄-rāāsí kadə̄ ā óyiī ta rɔ̄ɔ̄ tə́ ō.
13Kɔ́ɔ̄ɓē a rāā yá̰á̰ kógə̄ḿ
kə gō nang kə́ dām̄
mbɔ́r ɓē kə́ ko̰ó̰ tə́,
ni a rāā kadə̄ dɔ nang
kə́ Asiri a tél kɔkərɔ gə̄
kə́ kánə̄n̄də́ dɔ naā tə́ bing.
Ni a nujə ɓē kə́ Ninibə kɔ̄ɔ́,
adə̄ ɓē kə́ Ninibə a tél
loo kə́ tutə tītə̄
loo kə́ dəla loo tə́ beē.
14Ɓūtə̄ yá̰a̰ kul̄ gə̄
a ndin̄ tū tə́ danaá bang.
Dā̰ kə́ tayā tayā gə̄ ō,
kɔȳ múu gə̄ ō, kɔȳ kōrōrōý ō,
a ɓīīn̄ dɔ kāgə̄ nga
dan kújə yān gə̄ tə́ dɔɔ́ ndɔ̄ɔ́ ō,
yel̄ gə̄ a ndin̄ ta ko̰rō̰
kújə gə̄ tə́ yā nōōn̄
kadə̄ deē oō kōōdə́ ō,
ré deē udə kə̄ kemeé anī,
a a̰a̰ i kɔkərɔ kə́ ra
dɔ naā tə́ bing gə̄ ō,
kāgə̄ ta róbə́ kújə gə̄ ń
rāān̄də́ i kə kāgə̄ Sédər ní,
i kə́ ró̰ȳ kɔ̄ɔ́ ō.
15Ninibə ń i ɓē kə́
ɔjə rɔ̄n ngá̰ý ní, a tél
yā to i tītə̄ ń noō.
De kə́ kemeé gə̄ ɔjə̄nə̄ń
na yá̰a̰ na a rāādə́ aĺ ō,
nin̄ gírə̄n̄ yá̰a̰ ədan̄ na
de kə́ tītə̄də́ na gətóo ō.
Adə̄ Ninibə tél
i kɔkərɔ kə́ to
dɔ naā tə́ bing,
tél i loo ɓɔ̄ɔ̄ rɔ̄ yā dā̰ gə̄!
De gə̄ malang ń
mānə̄n̄ kadən tə́ ní,
a əgan̄ kɔŕ kə́ ɔjə kadə̄
yá̰á̰ kə́ to ka̰ā̰ aĺ i noó ō,
a rāān̄ i yá̰á̰ kə́ ɔjə
kadə̄ nin̄ kídə̄n̄ loo ō.
Currently Selected:
Makətūbə̄ yā Soponi 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
