Makətūbə̄ ń Pol ndang adə̄ Pilipə gə̄ ní 1

Pol nin̄ kə Timote rāān̄ ngé kán̄ naā kə́ Pilipə tə́ gə̄ lápə́ya

1Pol nin̄ kə Timote ń i ngé rāā kəla gə̄ yā Jeju *Kərist ní, i nin̄ n ndangən̄ makətūbə̄ ń toō əlan̄neé adə̄n̄ de kə́ Pilipə tə́ gə̄ malang ń télən̄ de gə̄ yā Nə́ɓā kə ta kūl̄ taā kem Jeju Kərist ō, ngé kɔr nodə́ gə̄ ō, ngé rāā kəla nə̄ɓō yá̰a̰ yādə́ gə̄ ō ní. 2Ādə̄ bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.

Pol ndɔ̄ȳ Nə́ɓā tām̄ yā ngé taā kem kə́ Pilipə tə́ gə̄

3Kə dɔ ndɔ̄ gə̄ ń m-ā m̄-gírəń dɔsí tə́ noō, m̄-ndadə̄ m-ādə̄ Nə́ɓā yāḿ tām̄ yāsí tə́ malang. 4Kə dɔ ndɔ̄ȳ gə̄ malang ń m-ā m̄-ndɔ̄yń tām̄ yāsí tə́ noō, m-ā m̄-ndɔ̄ȳ i kə rɔ̄nelēé. 5Tɔdɔ̄ sḭḭ̄ ī-ɓooī naā sejí dɔ kəla kɔjə Najə̄ kə́ Majə tə́. Ə́laī gír i ndɔ̄ kə́ ta kəga dɔ tə́#1.5 K. 5b: Á̰a̰ī Kəla 16.13-15 bátə́ ɓōólaā. 6Yá̰á̰ ń m̄-ger̄ majə ní n toó: Nə́ɓā ń əla gír rāā kəla kə́ majə ń toō kemsí tə́ ní, a rāā kə̄ non tə́ bátə́ yā tɔ̄l̄ ta ndɔ̄ yā Jeju *Kərist tə́. 7I gō tə́ kadə̄ gír̄ kə́ kemḿ tə́ i tītə̄ ń noō tām̄ yāsí tə́ malang. Tām̄ sḭḭ̄ i kemḿ tə́, tɔdɔ̄ kem majə ń Nə́ɓā rāā seḿ ní, sḭḭ̄ malang ə́gaī naā dɔ tə́ seḿ, ká i dan ń mā i dəngáyá tə́ toō, aké i dan ń mā i kɔ́ɔ̄ rɔ̄ḿ á m-ā m̄-rɔ̄ɔń dɔ Najə̄ kə́ Majə tə́ ō, m-ā m̄-rāań kadə̄ Najə̄ kə́ Majə əlań ngəran ngan̄g ō ní. 8m̄-táŕsí malang kə ta kūl̄ tár yā Jeju *Kərist. Nge ń noō ní Nə́ɓā i de kə́ kum tə́ yāḿ loon tə́.

9Ba yá̰á̰ ń m̄-gəde Nə́ɓā kem ndɔ̄ȳ yāḿ tə́ tām̄ yāsí tə́ ní, i kadə̄ tár yāsí i ngá̰ý kum kə̄ kété kété ō, kadə̄ yá̰a̰ ger̄ kə́ rɔ̄kum ō, ger̄ najə̄ ngá̰ý ō, i tū tár yāsí ní tə́, 10kadə̄ ásiīneé gə̄rā yá̰á̰ kə́ majə. Loo ń noō tə́ ndɔ̄ yā *Kərist tə́ anī ā ūnjī njáý njáý ō, sḭḭ̄ i de kə́ kanjə̄ najə̄ dɔsí tə́ gə̄ ō. 11Sḭḭ̄ ā ī-rāāī yá̰á̰ kə́ gō tə́ gə̄ ngá̰ý kə ta kūl̄ Jeju Kərist yā kɔsəń gɔn Nə́ɓā ō, yā ɓōkə́nəń tɔ̄ȳ ō.

Kərist i ndi kə kumuú

12Ngákó̰ó̰ḿ gə̄, m̄-gḛy kadə̄ ī-gerī na yá̰á̰ ń teē dɔḿ tə́ ní, rāā adə̄ Najə̄ kə́ Majə aw̄ kum kə̄ kété ɓáý. 13I beé n áskar gə̄ malang kə́ kem ndogə̄ yā nge ko̰o̰ ɓē tə́ ō, gotə de kə́ rang gə̄ malang ō, gerə̄n̄neé kadə̄ mā i dəngáyá i najə̄ yā *Kərist tə́ ní. 14Ngákó̰ó̰jí gə̄ ń nin̄ i de gə̄ yā Kɔ́ɔ̄ɓē ní, dan ń a̰a̰n̄ kadə̄ mā i dəngáyá ní, ngá̰ý gə̄ dandə́ tə́ ənīn̄ kemdə́ mámák ɔjən̄neé najə̄ kanjə̄ ɓōĺ.

15Kə́ rɔ̄kum tə́ tā anī ngé kə́rēý gə̄ dandə́ tə́ ní, i ngur kɔjə najə̄ ō, i nii kə́ kemdə́ tə́ ō n ɔsə sedə́ ta kɔjə najə̄ ní. Banī kə́ madə̄ gə̄ ɔjən̄ najə̄ yā *Kərist i kə gír̄ kə́ majaá kemdə́ tə́. 16Ngé gə̄ ń toō rāān̄ yá̰a̰ i kə tárá, tɔdɔ̄ nin̄-gerə̄n̄ kadə̄ Nə́ɓā əla kəla rɔ̄ɔ̄ dɔ Najə̄ kə́ Majə tə́ i gír̄ jīḿ mā tə́. 17Ngé gə̄ ń noō nin̄-ɔjən̄ najə̄ yā Kərist i kə nií kemdə́ tə́. Gír̄ kə́ kemdə́ tə́ ń ɔjən̄neé najə̄ ní, i gír̄ kə́ *unjə̄ njáý njáý alé. Nin̄-gírə̄n̄ rāā kadə̄ kə dəngáy yāḿ kə tōr̄ rɔ̄ḿ tɔȳ kə́ kété ɓáý.

18Ba nge ń noō usəm̄ alé! Ká gír̄ yādə́ i gír̄ kə́ majaĺ, aké i gír̄ kə́ rɔ̄kum gə̄gē anī, najə̄ yā *Kərist i kə́ kɔjə adə̄ m̄-rāā rɔ̄nel̄ tāmən tə́ ō, m-ā m̄-na̰y kə̄ loo rāā rɔ̄nel̄ tə́ tāmən tə́ ɓáý ō. 19Tɔdɔ̄ m̄-ger̄ kadə̄ yá̰á̰ ń noō a teē i kajə tām̄ yāḿ tə́ kə ta kūl̄ ndɔ̄ȳ yāsí ō, kə ta kūl̄ rāā ń Ndíĺ Jeju Kərist a rāā kə deē ní ō. 20Tɔdɔ̄ yá̰á̰ ń m̄-ngóō ō, m-ə̄ndā kemḿ dɔ tə́ kə ngangāá ngá̰ý ō ní, i kadə̄ ndɔ̄ń tə́ anī yá̰á̰ kógə̄ḿ adə̄m̄ rɔ̄sɔl̄ alé. Ba nəkɔ́ ń jóó bátə́ ngɔlaā toó ní, m̄-sōl̄ yá̰á̰ kógə̄ḿ alé. I tītə̄ ń noō n kə ta kūl̄ ndiḿ kə kumḿ, aláa kə ta kūl̄ koyḿ, m-ā m-ɔ́jəń kə̄ ndágá kadə̄ *Kərist i de kə́ bo ní. 21Tɔdɔ̄ tām̄ yāḿ mā tə́ ɓáa ndiḿ kə kumḿ i ndi naā tə́ kə *Kərist ō, koyḿ i yá̰a̰ kəndā nja yāḿ ō. 22Ba ré ndiḿ kə kumḿ dɔ nang tə́ laā i kadə̄ m-ə́ngeń ta róbə rāā yá̰á̰ kə́ majanī, yá̰á̰ ń kadə̄ m̄-gə̄rā mandang ní m̄-ger̄ alé. 23Dɔḿ tɔ̄ɔ̄ jōó: Ngur kadə̄ m-óy m-āw̄ m̄-ndi kə Kərist rāām̄, i nge ń noō n m̄-gḛy ngá̰ý ní. 24Banī kə́ majə ngá̰ý tɔȳ i kadə̄ m̄-ndi kə kumḿ tām̄ yāsí tə́. 25Adə̄ m̄-ger̄ kemḿ tə́ majə kadə̄ m-ā m̄-ndi kə kumḿ. M-ā m̄-ndi sesí sḭḭ̄ malang yā rāań sesí kadə̄ āwī kum kə̄ kété kété ō, kadə̄ rɔ̄sí nelə̄ńsí loo taā kem tə́ ō. 26Loo ń ré m-ā m̄-tél yā kaw̄ gogə́ rɔ̄sí tə́ anī, kɔsə gɔn ń ā ə́ngeī loo de gə̄ yā Jeju *Kərist tə́ ní, a tɔȳ kə́ kété ɓáý kə ta kūlə̄ḿ.

27Banī ādī háĺsí ń ī-ndiīneé ní, əhɔ naā kə Najə̄ kə́ Majə yā Kərist, yā kadə̄ ká ré m-āw̄ go̰ō̰sí tə́, aláa m̄-gətóo rɔ̄sí tə́ gə̄gē anī, m-ōō kadə̄ ī-raī ngan̄g ō, gír̄ yāsí i kógə̄ḿ ō, sḭḭ̄ malang ī-rɔ̄ɔ̄ī dɔ taā kem Najə̄ kə́ Majə tə́ kə kem kə́ kógə̄ḿ ō. 28Ngé rɔ̄ɔ̄ sesí gə̄ ní ī-ɓōlíīdə́ tū yá̰á̰ kógə̄ḿ tə́ alé: I nge ń noō n a ɔjədə́ kadə̄ nin̄ a aw̄n̄ i kə̄ kuduú kɔ̄ɔ́ tə́, ba sḭḭ̄ i dɔ róbə kajə tə́ ní. Ba yá̰á̰ ń noō ḭḭ i rɔ̄ Nə́ɓā tə́. 29Tɔdɔ̄ kə́ ɔjə dɔ najə̄ yā *Kərist ní, Nə́ɓā rāā kem majə sesí adə̄ ī-taāī i kem Kərist ngóy alé, banī á̰a̰ī tápə̄ najə̄ yān tə́ ō. 30Ngɔlaā ní sḭḭ̄ údiī dan rɔ̄ɔ̄ ń m̄-rɔ̄ɔ̄ kété á á̰a̰mī loon tə́ ní ō, sḭḭ̄ ī-gerī kadə̄ m-ā m̄-rɔ̄ɔ̄ rɔ̄ɔ̄ ní jīḿ tə́ laā ɓáý ō.

Currently Selected:

Makətūbə̄ ń Pol ndang adə̄ Pilipə gə̄ ní 1: BS

Highlight

Copy