Makətūbə̄ yā Nahum 2
2
1Sḭḭ̄ *Juda gə̄, nge kaw̄ kəla
kə́ nge reē kə najə̄ kə́ majaá ní,
ni i dɔ mbal̄ bo gə̄ tə́.
Ni-əda najə̄ yā lɔm kə́ a to!
Ə̄ndāī dɔ loo rāā nāā yāsí gə̄ danaá.
Míndə́sí ń ə̄nīī ādī Nə́ɓā ní,
ī-raī dɔ tə́.
De kə́ nge núm̄ nujə loo a teē
loosí to̰ aĺ i kə́ bátə́ gə̄ tə́.
Tɔ́gən gətóo kɔ̄ɔ́.
2Ɓē kə́ Ninibə,
ngé rɔ̄ɔ̄ gə̄ aw̄n̄ kənī rɔ̄ɔ̄ tə́.
Sḭḭ̄ áskar gə̄,
ī-ngɔ̄mī ndogə̄ mbal̄ gə̄
kə́ yā rɔ̄ɔ̄ń dɔ ɓē tə́ ō,
ə̄ndāī kumsí gíŕ róbə gə̄ tə́ ō,
ə̄ndāī dɔ rɔ̄sí danaá
tām̄ yā rɔ̄ɔ̄ tə́ ō,
ɔ́siī rɔ̄sí kə̄ naā tə́ ō.
3Ngé gān̄g róbə gə̄ ɔyn̄ yá̰a̰
yā ngé gə̄ ń Jakob ojədə́ ní dɔ gúú tə́.
Kāgə̄ nduú ń toō ní,
nin̄ nujən̄ ta jīn gə̄ kɔ̄ɔ́.
Banī Kɔ́ɔ̄ɓē tél kə kɔjə rɔ̄ yān adə̄n gogə́.
A̰á̰ā̰, ni-tél kə kɔjə rɔ̄ yā *Israel adə̄n gogə́.
Ənīn̄ ɓē kə́ Ninibə rɔ̄ɔ̄ ō ɔyn̄ yá̰á̰ kə́ kemeé dɔ gúú tə́ ō
4Áskar gə̄ yā madə̄ ba̰ā̰ ətōn̄ i der gə̄
kə́ rāān̄ man̄ yá̰á̰ kə́ kəre gidə tə́ gə̄ ō,
kūbə̄ ko̰ō̰də́ gə̄ i kūbə̄ kə́ kərē gə̄ ō.
Púsə rɔ̄ɔ̄ gə̄ ń tə́ndān̄də́
kə ta naá tām̄ yā rɔ̄ɔ̄ tə́ ní,
ndə́lēn̄ pipir tītə̄ ta ndo̰ hor gə̄ beé ō,
nənga gə̄ əlan̄ gíŕ yéȳ ō.
5Púsə rɔ̄ɔ̄ gə̄ ɔrə̄n̄ dɔɔ́ kə ngɔ̄də̄
kə́ ngá̰ý, yā kaw̄ kənī rɔ̄ɔ̄.
Nin̄ mánə̄n̄ i kum róbə kɔsə gə̄ tə́ ō,
ndágə loo gə̄ tə́ ō.
Ton̄ tītə̄ hor ngel̄ gə̄ beé.
Nin̄ a̰ȳn̄ ngɔ̄də̄ láẃ tītə̄ tel̄ man̄ beé.
6Mban̄g kə́ Ninibə ɓāŕ ngol gə̄
kə́ dɔ ngé rɔ̄ɔ̄ yān gə̄ tə́,
banī kemdə́ rāādə́
loo njə̄rā tə́ kum kə̄ kété.
Madə̄ ba̰ā̰ gə̄ a̰ȳn̄ ngɔ̄də̄
kum kə̄ kadə ndogə̄ mbal̄ gə̄
kə́ yā rɔ̄ɔ̄ń dɔ ɓē tə́,
nin̄ déwn̄ gidə yá̰á̰ tə́.
7Ta róbə gə̄ ń deē teē tū tə́
kə̄ ndágá anī a a̰a̰ i bā gə̄ ní,
mbəlōn̄də́ gidə kógə̄ḿ ō,
taān̄ kújə ngol yā mban̄g kɔ̄ɔ́ ō.
8Madə̄ ba̰ā̰ gə̄ unən̄ yá̰á̰
kə́ tɔ́sə̄ kum gotə nə́ɓā kə́ dəyá̰ kɔ̄ɔ́,
ba aw̄n̄ seneé dɔ ɓē kə́ rang tə́ dɔ gúú tə́.
Dəyá̰ kə́ ngé ndɔ̄yn gə̄
nōōn̄ tītə̄ dér dum gə̄ beé.
Nin̄ əndān̄ wurdə́ par par
ɔjənə̄ń kadə̄ rɔ̄də́ nel̄də́ alé.
9Ninibə to i tītə̄ kār̄ kə́ man̄
kə́ kemeé də̄yā̰ kɔ̄ɔ́ malang beé.
Deē kógə̄ḿ əga kɔŕ əda na:
Ī-dəbaī, ī-dəbaī!
Banī dan de gə̄ ń a a̰ȳn̄ naā tə́ ní,
de kə́ mbel gətóo.
10Ɔ́yiī gində̄ arjā̰a̰, ɔ́yiī lɔ́r!
Yá̰a̰ kənge yā Ninibə ní,
ta ngóyn gətóo.
Yá̰á̰ kə́ gātə̄də́ i ngá̰ý gə̄
taān̄ loo kem ɓēé.
11Ɓogən̄ yá̰a̰ malang kɔ̄ɔ́ ō,
tɔ̄ɔ̄n̄ yá̰a̰ malang kɔ̄ɔ́ ō,
rējə̄n̄ yá̰a̰ malang kɔ̄ɔ́ ō.
Jī de gə̄ ur̄ wak kɔ̄ɔ́ ō,
njadə́ udə̄ lagəja ō,
ndewn̄ kə̄ rɔ̄də́ gə̄ tə́ malang ō,
ta kumdə́ tūr̄ kɔ̄ɔ́ ō.
Ninibə to i tītə̄ ɓɔl kə́ tetənən̄ rɔ̄ɔ̄ beé
12Ɓē ń ɓɔl gə̄ ndin̄ tū tə́
kété ní, tél i rí?
Kété ní, ngán ɓɔl gə̄
a əngen̄ yá̰a̰ kəsa
yādə́ i kem ɓē ní tə́.
Dan ń ɓɔl aw̄ sāā yá̰a̰ kəsaá anī,
de kə́ ɔdə rɔ̄ ngánən gə̄ gətóo.
13Ni əhɔ dā̰ ō,
rə́yā̰ dā̰ ní naā tə́ ō
tām̄ yā kó̰o̰ ɓɔl tə́ ō,
ngánən gə̄ tə́ ō.
Dā̰ gə̄ ń ni ndo̰o̰də́ ō,
rə́yā̰də́ naā tə́ ō ní,
kán̄ dā̰də́ kem bəlo
yān gə̄ tə́ adə̄ rosə.
14Kɔ́ɔ̄ɓē kə́ bo kə́ tɔ́gən i ngá̰ý əda na:
Ḭ̄ ɓē kə́ Ninibə, m-ā m̄-rāā yá̰á̰ kə́ tōr̄ seí!
M-ā m-ə́la hor dɔ púsə rɔ̄ɔ̄
yāí gə̄ tə́ kadə̄ hor o̰o̰ ō,
nin̄ a télən̄ sa hor ō.
Balsáa yāí gə̄ ń
ton̄ tītə̄ ngán ɓɔl gə̄ ní,
a tɔ̄lə̄n̄də́ kɔ̄ɔ́ ta rɔ̄ɔ̄ tə́.
M-ā m̄-dəba ta kɔy yá̰a̰
dɔ gúú tə́ yāí gə̄ kɔ̄ɔ́ dɔ nang tə́ ō,
deē a oō ndū ngé kaw̄ kəla yāí gə̄
loo tə́dá yá̰a̰ gə̄ kə́ kadə̄
de gə̄ ráán̄ tə́ to̰ alé.
Currently Selected:
Makətūbə̄ yā Nahum 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
