Najə̄ kə́ Majə yā Jeju ń Mark ndang ní 10

Najə̄ yā Jeju kə́ dɔ mbātə́ naā yā ngé taā naā gə̄ tə́

(Á̰a̰ī Mat 19.1-12; Luk 16.18)

1Jeju ḭḭ noó aw̄ gō nang kə́ Jude tə́, gidə bā Jurdḛ tə́, anī kósə de gə̄ kánə̄n̄ naā rɔ̄n tə́ ɓáý to̰. Tītə̄ ń i jī bēl̄ loo rāān ní, ni-ndóōdə́ yá̰á̰ ɓáý to̰.

2*Parijiyḛ kə́rēý gə̄ reēn̄ rɔ̄n tə́, ba dəjenən̄ na ké *ndū najə̄ adə̄ dəngam ta róbə tə̄ɓā nə̄yá̰n wa. Nin̄-dəjenən̄ najə̄ ń noō i yā nāānneé.

3Ba ni-tél dəjedə́ na ké Moijə əndā dɔdə́ tə́ na i rí wa.

4Nin̄-ədan̄ na Moijə na adə̄ deē ta róbə ndang makətūbə̄ mbātə́ dəyá̰ yā kəla jī dəyá̰ tə́ ba tə̄ɓānəń kɔ̄ɔ́. 5Banī Jeju ədadə́ na:

I tām̄ dɔ ngan̄g yāsí tə́ n Moijə ndang gō míndə́ ń noō adə̄sí ní. 6Banī ta kəla gíŕ tə́, loo ń Nə́ɓā rāā de gə̄ ní, ni-əndādə́ dəngam ō, dəyá̰ ō. 7I tām̄ najə̄ ń noō tə́ n de kə́ dəngam a əya̰ bɔbə̄n ō, kó̰o̰n ō, ba a ndin̄ naā tə́ kə nə̄yá̰neé, 8kadə̄ nin̄ jōó mbak télən̄ de kə́ kógə̄ḿ beē gə̄ ní. Loo ń noō tə́ nin̄ i jōó to̰ alé, banī nin̄ i de kə́ kógə̄ḿ beē. 9Ní, ngé gə̄ ń Nə́ɓā ɓoodə́ naā tə́ ní, kadə̄ kə deē kēgə̄də́ naā tə́ alé.

10Dan ń nin̄ i kújú anī, ngé ndóō yá̰a̰ yān gə̄ tél dəjenən̄ najə̄ ní to̰. 11Anī ni-ədadə́ na:

Náā nəkɔ́ ń tə̄ɓā nə̄yá̰n ba taā kə́ rang anī, ni-rāȳ i mbée tām̄ yā nə̄yá̰n kə́ kété tə́. 12Ba ré dəyá̰ mbātə́ ngaan ba taā dəngam kə́ rang anī, ni-rāȳ i mbée ō.

Jeju tɔ́r̄ tan dɔ ngáń kə́ dūú gə̄ tə́

(Á̰a̰ī Mat 19.13-15; Luk 18.15-17)

13Anī de gə̄ reēn̄ kə ngán kə́ dūú gēé kə̄ rɔ̄ Jeju tə́ kadə̄ əndā jīn dɔdə́ tə́, ba ngé ndóō yá̰a̰ yān gə̄ ndángə̄n̄də́. 14Dan ń Jeju a̰ā̰ anī, nelə̄n alé, adə̄ ni-ədadə́ na:

Əya̰ī ngáń kə́ dūú gə̄ ādī reēn̄ kə̄ rɔ̄ḿ tə́, ba ī-lōōī kɔgə̄də́ reē, tɔdɔ̄ i de kə́ tītə̄də́ beē gə̄ n *Ɓē ko̰o̰ yā Nə́ɓā i tām̄ yādə́ tə́ ní. 15Ādə̄ m-ə́dásí najə̄ kə́ bo ngá̰ý, deē ń a əhɔ *Ɓē ko̰o̰ yā Nə́ɓā kə̄ rɔ̄n tə́ tītə̄ ń ngáń kə́ dūú gə̄ a rāān̄neé ní aĺ ní anī, kɔ́ɔ̄ a udə kemeé aĺ bátə́.

16Gō tə́ anī ni-ɓir̄də́ kə̄ rɔ̄n tə́ dagə, ba əndā jīn dɔdə́ tə́ ō, tɔ́r̄ tan dɔdə́ tə́ ō.

De kə́ yá̰a̰ kənge yān i ngá̰ý

(Á̰a̰ī Mat 19.16-30; Luk 18.18-30)

17Dan ń Jeju əsō róbó yā kaw̄ anī, deē kógə̄ḿ a̰ȳ ngɔ̄də̄ reē ɔsə kejən nang tə́ non tə́, ba dəjen na:

Ngoljí kə́ majə, kə m̄-rāā i rí tá kadə̄ m̄-ndiń kə kumḿ ngándáńg ní?

18Anī Jeju ədan na:

I tām̄ rí tə́ ā ī-ɓārə́m̄ de kə́ majə ní? De kə́ majə gətóo, i Nə́ɓā ngóy n i de kə́ majə ní. 19Ā ī-tɔ̄l̄ deē alé, ā ī-rāȳ alé, ā ī-ɓogə alé, ā ə́da najə̄ kə́ sor̄ dɔ deē tə́ alé, ā ī-ɓōĺ ndíl bɔbí ō, kó̰ó̰í ō.

20Anī ni-əda Jeju na:

Ngoljí, nin̄ ń noō malang ní, i yá̰a̰ gə̄ kə́ m̄-rāādə́ i kə ngōn̄ dūúḿ beē. 21Jeju əndā kumən dɔn tə́ anī tárən, ba ədan na:

Na̰yiī yá̰á̰ kógə̄ḿ ɓáý: Āw̄ ígə́ yá̰a̰ yāí malang ba ādə̄ ngé ndoō gə̄ narən, anī ā āw̄ kə dūbə̄ yá̰a̰ kənge gə̄ dɔ rā̰ tə́, ba ré loo ń noō tə́ tā anī, ī-reē ba un gōḿ.

22Banī dan ń deē ngeé ń toō oō najə̄ gə̄ ní anī, rɔ̄n ur wak, adə̄ ɔtə aw̄ kɔ̄ɔ́ kə wōngōó, tɔdɔ̄ ni i de kə́ ənge yá̰á̰ ngá̰ý.

23Anī Jeju mbel, go̰ō̰ loo, ba əda ngé ndóō yá̰a̰ yān gə̄ na:

Kudə kem *Ɓē ko̰o̰ yā Nə́ɓā tə́ i yá̰á̰ kə́ ngan̄g ngá̰ý tām̄ yā de kə́ ənge yá̰á̰ ngá̰ý tə́. 24Ngé ndóō yá̰a̰ yān gə̄ ndin̄ kóńg tām̄ najə̄ ń Jeju əda tītə̄ ń noō tə́ ní. Ba Jeju tél ədadə́ na:

Ngánə́ḿ gə̄, ngan̄g ngá̰ý tām̄ yā de gə̄ ń əndān̄ kemdə́ dɔ yá̰a̰ kənge yādə́ kə́ ngá̰ý tə́ ní kadə̄ udən̄ kem *Ɓē ko̰o̰ yā Nə́ɓā tə́. 25Kadə̄ jámbal mān̄ kum bəlo líbə́ri tə́ ní i yá̰á̰ kə́ ngan̄g aĺ tɔȳ kadə̄ de kə́ ənge yá̰á̰ ngá̰ý udə kem *Ɓē ko̰o̰ yā Nə́ɓā tə́.

26Adə̄ ɔr kum ngé ndóō yá̰a̰ yān gə̄ ngá̰ý tɔȳ kə́ kété ɓáý, adə̄ ədan̄ naā dɔ dáńdə́ tə́ na:

Ba ré i beé anī, i náā n a asə kadə̄ ajənən̄ ní?

27Jeju əndā kumən dɔdə́ tə́, ba ədadə́ na:

A dum̄ de gə̄, banī a dum̄ Nə́ɓā alé, tɔdɔ̄ yá̰á̰ kə́ dum̄ Nə́ɓā gətóo.

28Ba Piyer un najə̄ ədan na:

Á̰, ba ń jḭḭ j-əya̰ yá̰a̰ malang kɔ̄ɔ́, ba j-a j-un gōí ní.

29Jeju ədan na:

Ādə̄ m-ə́dásí najə̄ kə́ bo ngá̰ý, ré deē kógə̄ḿ əya̰ kújə yān, aláa i ngákó̰o̰n kə́ dəngam gə̄, aláa i kə́ dəyá̰ gə̄, aláa i kó̰o̰n, aláa i bɔbə̄n, aláa i ngánən gə̄, aláa i loo ndɔr̄ yān kɔ̄ɔ́, tām̄ yāḿ tə́ ō, tām̄ yā Najə̄ kə́ Majə tə́ ō ní anī, 30kɔ́ɔ̄ a ənge kújə gə̄, kə ngákó̰o̰n kə́ dəngam gə̄ ō, kə́ dəyá̰ gə̄ kə kó̰o̰n gə̄, kə ngánən gə̄, kə loo ndɔr̄ gə̄, tɔȳ kə́ kété nja ɓú ngɔlaā kem ndɔ̄ gə̄ ń toō tə́ ní ō, a ndi kə kumneé ngándáńg dɔ nang kə́ kijə kə́ ndɔ̄ń tə́ ō. 31Adə̄ ngá̰ý gə̄ dan ngé kə́ kété gə̄ tə́ a télən̄ ngé kə́ gō gogə́ gə̄ ō, ngá̰ý gə̄ dan ngé kə́ gō gogə́ gə̄ tə́ a télən̄ ngé kə́ kété gə̄ ō.

Jeju tāā nja kə́ nge ko̰ mətá na n-a n-oy ba n-a n-ndól̄

(Á̰a̰ī Mat 20.17-19; Luk 18.31-34)

32Nin̄-əsōn̄ róbó, a aw̄n̄ kə̄ *Jerusalem anī, Jeju a njə̄rā kété no ngé ndóō yá̰a̰ yān gə̄ tə́, banī nin̄-sōlə̄n̄ ngá̰ý ō, ɓōĺ rāā ngé gə̄ ń unən̄ gōn ní ō. Jeju ɓār̄ ngé kə́ kutə gidə i jōó gə̄ kə̄ rɔ̄n tə́ ɓáý to̰, ba əla gír kədadə́ yá̰a̰ gə̄ ń a reēn̄ kə̄ dɔn tə́ ní.

33Ōōī a, j-a j-awī i kə̄ Jerusalem, ba a əlan̄ Ngōn̄ Deē jī ngol gə̄ kə́ dɔ *ngé tun̄ yá̰a̰ gə̄ tə́ tə́ ō, ngé ndóō de gə̄ ndū najə̄ gə̄ tə́ ō. Nin̄ a gāngə̄n̄ sarya dɔn tə́ kadə̄ a tɔ̄l̄nən̄, ba a əlanən̄ jī de gə̄ kə́ nin̄ i *Jipə aĺ gə̄ tə́. 34Nin̄ a lurnən̄ ō, a tībə̄n̄ hōr̄ rɔ̄n tə́ ō, a tə̄ndānən̄ kə mərawaá ō, a tɔ̄l̄nən̄ ō, ba ndɔ̄ mətá gō tə́ anī, a ndól̄.

Yá̰á̰ ń Jakə ō, Ja̰a̰ ō dəjen̄ Jeju ní

(Á̰a̰ī Mat 20.20-28)

35Anī ngán Jebede gə̄ ń i Jakə ō Ja̰a̰ ō ní, reēn̄ rɔ̄ Jeju tə́, ba ədanən̄ na: Ngoljí, jə-gḛy kadə̄ ī-rāā yá̰á̰ ń j-a jə-dəjeī ní ādə̄jí.

36Ni ədadə́ na:

Ī-gḛyiī kadə̄ m̄-rāā i rí m-ādə̄sí?

37Nin̄-ədan̄ na:

Ādə̄ jə-ndi, kógə̄ḿ i dɔ jī ko̰í tə́ ō, kə́rēý i dɔ jī gelií tə́ ō, loo ń ā ī-ndi dan *kɔsə gɔn yāí tə́ ní.

38Jeju ədadə́ na:

Ī-gerī yá̰á̰ ń ī-dəjemī ní alé. Ásiī ka̰ȳ yá̰á̰ kə́ kem kópó ń m-ā m-ā̰ȳ ní a? Asiī kadə rāān̄sí *batéḿ ń a rāāmə̄n̄ ní a?

39Nin̄-ədan̄ na n-asən̄,

Jeju ədadə́ na:

Ā ā̰yī yá̰á̰ kə́ kem kópó ń m-ā m-ā̰ȳ ní ō, a rāān̄sí batéḿ ń a rāāmə̄n̄ ní ō rɔ̄kum, 40banī yā ndi dɔ jī ko̰ḿ tə́ aké i dɔ jī geləḿ tə́ ní, i mā n m-ā m-ādə̄ nge ń noō ní alé, banī i tām̄ yā ngé gə̄ ń Bɔbə́ḿ əndā yá̰á̰ ń noō dɔ jīn tām̄ yādə́ tə́ ní.

41Dan ń ngé kə́ kutə gə̄ oōn̄ beé anī, wōn̄g rāādə́ dɔ Jakə nin̄ kə Ja̰a̰ tə́. 42Jeju ɓāŕdə́, ba ədadə́ na:

Ī-gerī kadə̄ ngé gə̄ ń əndān̄də́ kadə̄ o̰o̰n̄ ɓē dɔ nápar de gə̄ tə́ ní a rāān̄ ngār dɔdə́ tə́ ō, kadə̄ de kə́ bo yādə́ gə̄ a əlan̄ dɔ de gə̄ gíŕ tɔ́gə yādə́ tə́ ō. 43Banī majə kadə̄ to i tītə̄ ń noō dansí tə́ alé. Ba ré de kə́rēý gḛy kadə̄ ni i de kə́ bo kə́ dansí tə́ anī, ādə̄ kɔ́ɔ̄ tél nge rāā kəla yāsí. 44Náā nəkɔ́ ń gḛy kadə̄ ni i de kə́ kété dansí tə́ ní anī, kadə̄ kɔ́ɔ̄ tél ɓəlo yā madə̄n gə̄ malang. 45Tɔdɔ̄ Ngōn̄ Deē reē i kadə̄ de gə̄ rāān̄ kəla yān alé, banī i kadə̄ i ni n rāā kəla tām̄ yādə́ tə́ ō, kadə̄ adə̄ rɔ̄n yá̰a̰ gān̄g dɔ tə́ tām̄ yā de kə́ ngá̰ý gə̄ tə́ ō ní.

Jeju rāā adə̄ kum Bartime a̰a̰ loo

(Á̰a̰ī Mat 20.29-34; Luk 18.35-43)

46Nin̄-ugə̄n̄ Jeriko, ba dan ń Jeju teē kemeé kɔ̄ɔ́ kə ngé ndóō yá̰a̰ yān gə̄ ō, kósə de kə́ ngá̰ý gə̄ ō anī, nge kum tɔ̄ɔ̄ kógə̄ḿ ndi bɔ̄gə̄ róbə́ tə́ a gəde yá̰a̰. Rīn na i Bartime, i ngōn̄ Time. 47Ni oō na i Jeju kə́ *Najaret anī, əla gír kəda najə̄ kə́ ndūn kə́ boó, əda na:

Jeju, Ngōn̄ kaa Dabid, á̰a̰ kum tō ndoō yāḿ!

48De gə̄ ngá̰ý ndángə̄nən̄ kadə̄ utə̄ tan, ba ni-əga kɔŕ ngá̰ý tɔȳ kə́ kété əda na:

Ngōn̄ kaa Dabid, á̰a̰ kum tō ndoō yāḿ!

49Anī Jeju dəba, ba əda na kə ɓāŕnən̄.

Nin̄-ɓārə́n̄ nge kum tɔ̄ɔ̄ ní, ba ədanən̄ na kə əhɔ rɔ̄n tɔgə, kə ḭḭ dɔɔ́, na Jeju a ɓārə́n. 50De kə́ kum tɔ̄ɔ̄ ní ənī kūbə̄ yān kɔ̄ɔ́, ba ḭḭ wa̰t reē rɔ̄ Jeju tə́! 51Jeju dəjen na ké gḛy kadə̄ kə n-rāā i rí kə n-adə̄n wa.

Anī nge kum tɔ̄ɔ̄ ní ədan na:

Ngoləḿ, ī-rāā kadə̄ m-á̰a̰ loo.

52Jeju ədan na kə aw̄, na taā kem yān na ajən. Kə̄ ta jī tə́ noō ni-a̰a̰ loo, ba un gō Jeju róbó.

Currently Selected:

Najə̄ kə́ Majə yā Jeju ń Mark ndang ní 10: BS

Highlight

Copy