Najə̄ kə́ Majə yā Jeju ń Matiye ndang ní 3

Najə̄ ń Ja̰a̰ Batistə əda de gə̄ ní

(Á̰a̰ī Mark 1.1-8; Luk 3.1-18; Ja̰a̰ 1.19-28)

1Dan ngeé ń noō tə́ ní, Ja̰a̰ Batistə teē a ənī mbēr̄ kem dəla loo kə́ Jude tə́, əda de gə̄ na:

Ī-tūrī háĺsí, 2tɔdɔ̄ *Ɓē ko̰o̰ kə́ dɔ rā̰ tə́ reē ngɔr rɔ̄sí tə́. 3Ijai *nge koō ta ɔr̄ najə̄ yā Ja̰a̰ ngeé ń toō kété əda na:

Deē kógə̄ḿ un ndūn kə̄ dɔɔ́ ɔrə̄ń najə̄ kem dəla loo tə́ əda na:

Ī-rāāī róbə yā Kɔ́ɔ̄ɓē,

ī-rāāī ngáń róbə yān gə̄ ādə̄ ran̄ súmūú.

4Ja̰a̰ ní o̰ō̰ i kūbə̄ bḭḭ̄ jámbal ō, əhɔ ɓōdə̄n i kə ndārá ō. Yá̰a̰ kəsa yān i yim̄ gə̄ ō, mbar̄ tejə kə́ bembeé ō. 5Loo ń noō tə́ de gə̄ malang kə́ *Jerusalem ō, kə́ gō nang kə́ Jude tə́ ō, kə́ gō nang kə́ kadə bā Jurdḛ tə́ ō, aw̄n̄ rɔ̄n tə́. 6Nin̄-ədan̄ majaĺ yādə́ gə̄ kə̄ ndágá oy anī, Ja̰a̰ rāādə́ *batém kum man̄ bā Jurdḛ tə́.

7Dan ń Ja̰a̰ a̰a̰ *Parijiyḛ gə̄ ngá̰ý ō, *Sadusiyḛ gə̄ ngá̰ý ō, reēn̄ rɔ̄n tə́ kadə̄ n-rāādə́ *batém anī ədadə́ na:

Sḭḭ̄, gír kaa lī kakə́m gə̄, wōn̄g yā Nə́ɓā ń a reē ní, i náā n ɔjəsí loo ka̰ȳ ta tə́ kɔ̄ɔ́ ní? 8Ī-rāāī yá̰a̰ gə̄ kə́ ɔjən̄ kadə̄ sḭḭ̄ i de kə́ ī-tūrī háĺsí rɔ̄kum gə̄. 9Ba ī-lōōī kudə ndi ba kəda kə̄ kemsí tə́ na sḭḭ̄ na i de kə́ gír kaa yā Abəraham tə́ gə̄. Ādə̄ m-ə́dásí, ré Nə́ɓā ndigə anī a tūr̄ kūbə̄rū mbal̄ gə̄ ń toō kadə̄ télən̄ ngán kaa Abəraham gə̄ karī. 10Kə̄ngā i kə́ kəndā ngəra kāgə̄ gə̄ tə́ ɓá kɔ̄ɔ́, adə̄ kāgə̄ gə̄ malang ń a anə̄n̄ majə aĺ ní, a tə́gān̄də́ yā ɓōkə́də́ horoó kɔ̄ɔ́. 11Mā m̄-rāāsí *batém i kadə̄ ī-tūrīneé háĺsí. Ba nge ń a reē gōḿ tə́ ní, tɔ́gən tɔȳ yāḿ mā. Kɔr̄ sākə̄rā kə́ njan tə́ gə̄gē ngóý ní, mā m-ásə alé. Ni a rāāsí batém kum *Ndíĺ kə́ Táĺ tə́ ō, kum hor tə́ ō. 12Yá̰á̰ tóó yá̰a̰ i jīn tə́. Ni a ɔr̄ njár̄ kōō tayā ō, a ɔr̄ təsá kōō tayā ō. Ni a ɔy njár̄ kōō yān kə́ kem gárāá kə̄ mō̰yō̰ó̰, ba təsán tá a róō kum hor kə́ a oy aĺ bátə́ tə́.

Ja̰a̰ rāā Jeju Batém

(Á̰a̰ī Mark 1.9-11; Luk 3.21-22)

13Tā anī Jeju ḭḭ dɔ nang kə́ Galile tə́ reē rɔ̄ Ja̰a̰ tə́, kadə bā Jurdḛ tə́, kadə̄ Ja̰a̰ rāān batém. 14Banī Ja̰a̰ sāā mbātə́, ədan na:

I mā n i de kə́ yā kadə̄ m-āw̄ rɔ̄í tə́ kadə̄ ī-rāām̄ *batém, anī ḭ̄ ī-reē rɔ̄ḿ mā tə́ i ba̰ý?

15Ba Jeju tél ədan na: Kə́ ngɔr ń toō tə́ ní, ə́ya̰ ādə̄ jə-rāā tītə̄ nəkɔ́ ń toō. Tɔdɔ̄ yá̰a̰ malang ń Nə́ɓā gḛy kadə̄ yā rāā ní, j-a jə-rāā kadə̄ udə gírí i tītə̄ ń noō. Anī Ja̰a̰ ndigə. 16Dan ń rāān̄ Jeju batém oy anī, ni-teē kum man̄ tə́. Ta dɔ rā̰ teē, anī ni-a̰a̰ Ndíĺ Nə́ɓā ḭḭ dɔ rā̰ tə́ jə̄ngā tītə̄ dér ndaa ba reē ndi dɔn tə́. 17Ba ndū deē kógə̄ḿ ɓār̄ dɔ rā̰ tə́, əda na:

Ni ń toō i Ngōn̄ kó tár yāḿ ń nelə̄m̄ seneé ngá̰ý ní.

Currently Selected:

Najə̄ kə́ Majə yā Jeju ń Matiye ndang ní 3: BS

Highlight

Copy