Najə̄ kə́ Majə yā Jeju ń Matiye ndang ní 15

Yá̰a̰ kāgə̄ ɓē yā ngán Israel gə̄

(Á̰a̰ī Mark 7.1-13)

1Tā anī *Parijiyḛ gə̄ ō, ngé ndóō de gə̄ ndū najə̄ gə̄ ō ḭḭn̄ *Jerusalem, reēn̄ rɔ̄ Jeju tə́ 2ba dəjenən̄ na:

I tām̄ rí tə́ á ngé ndóō yá̰a̰ yāí gə̄ a rāān̄ yá̰a̰ a mānə̄n̄neé dɔ yá̰a̰ kāgə̄ ɓē yā kaají gə̄ ní? Tɔdɔ̄ ngé ndóō yá̰a̰ yāí gə̄ tə́gon̄ jīdə́ tá əsan̄neé yá̰a̰ alé.

3Anī Jeju tél ədadə́ na:

Ba sḭḭ̄, i tām̄ rí tə́ á ī-mānī dɔ gō míndə gə̄ yā Nə́ɓā ba ī-rāāīneé yá̰a̰ kāgə̄ ɓē yāsí gə̄ ní? 4Tɔdɔ̄ Nə́ɓā əda na:

Ī-rɔȳ bɔbí ō kó̰ó̰í ō. Tá əda ɓáý to̰ na:

Deē ń ndɔ̄ĺ bɔbə̄n aláa kó̰o̰n ɓáa, kə tɔ̄l̄nən̄ kɔ̄ɔ́.

5Ba sḭḭ̄ ə́daī na, ré deē əda bɔbə̄n aláa kó̰o̰n na yá̰a̰ kənge ń kadə̄ n-rāań seneé ní na n-ɔr̄ kamə̄n tām̄ yā Nə́ɓā tə́ kɔ̄ɔ́, 6anī sḭḭ̄ ədaī na kɔ́ɔ̄ na i kə najá dɔn tə́ alé, adə̄ na a rāā kə bɔbə̄neé to̰ alé. Ní, i tītə̄ ń noō n sḭḭ̄ ī-nujiīneé najə̄ yā Nə́ɓā kɔ̄ɔ́, ba ī-rāāīneé yá̰a̰ kə gō yá̰a̰ kāgə̄ ɓē yāsí ní. 7Sḭḭ̄ ngé lur loo gə̄, najə̄ ń toō ń Ijai əda dɔsí tə́ kə́ *nge koō ta tə́ ní najə̄ i yān, ni-əda na:

8De gə̄ ń toō rɔȳmə̄n̄ i kə tadə́ karī,

ba kemdə́ i sa̰y rɔ̄ḿ tə́.

9Nin̄-rāān̄ kəla yāḿ i ndāńg karī,

tɔdɔ̄ yá̰a̰ gə̄ ń nin̄ a ndóōn̄ de gə̄ ní i *ndū najə̄ yā de gə̄ ngóy.

Yá̰á̰ ń a tákə̄ deē kə majaĺ ní

(Á̰a̰ī Mark 7.14-23)

10Gō tə́ anī Jeju ɓāŕ kósə de gə̄ kə̄ rɔ̄n tə́, ba ədadə́ na:

Ōōī najə̄ ń toō, ba ī-gerī kum. 11I yá̰á̰ ń udə ta deē tə́ ní n a rāā deē kadə̄ tél de kə́ yḛr ní alé, ba i yá̰á̰ ń a teē tan tə́ kə̄ ndágá ní n a rāān kadə̄ ni-tél de kə́ majaĺ tákə̄n ní.

12Anī ngé ndóō yá̰a̰ yā Jeju gə̄ ndɔ́tə̄n̄ kə̄ rɔ̄n tə́ ngɔr, ba ədanən̄ na:

Najə̄ kɔrīí əga *Parijiyḛ gə̄ gəla ngá̰ý ní ī-ger̄ a?

13Anī ni-tél ədadə́ na:

Kāgə̄ malang ń Bɔbə́ḿ kə dɔ rā̰ tə́ əndā aĺ ní, a ró̰ȳn̄də́ kɔ̄kə́. 14Ní, ə́ya̰īdə́ na nin̄ i ngé kum tɔ̄ɔ̄ gə̄ kə́ ngé ndɔ́r̄ madə̄də́ gə̄ ta kāgə̄! Ba ré de kə́ kum tɔ̄ɔ̄ ndɔ́r̄ nge kum tɔ̄ɔ̄ madə̄n ta kāgə̄ anī, nin̄ a əsōn̄ bəloó jōó mbak.

15Piyer un najə̄ ɔr̄, əda Jeju na:

Ɔ́jə́jí kum kūjə́ najə̄ ní.

16Anī Jeju tél əda na:

Adə̄ sḭḭ̄ kɔ́ gə̄ gə̄gē ī-gerī kum najə̄ ní aĺ ō a? 17Yá̰a̰ malang ń deē əsa tan tə́ ní, mān̄ aw̄ kemən tə́, tá kadə̄ teē yedēé kɔ̄ɔ́ ní ī-gerī aĺ a? 18Banī yá̰a̰ ń teē ta deē tə́ ní, ḭḭ i dan wurən tə́, i yá̰á̰ ń noō n a rāā deē kadə̄ tél de kə́ yḛr ní. 19Tɔdɔ̄ gír̄ kə́ majaĺ gə̄ ō, gír̄ tɔ̄l̄ deē ō, ɓīī kə dəyá̰ kə́ rang, aláa kə dəngam kə́ rang ō, gír̄ rāā háĺ kə́ majaĺ ō, sāā ɓogə ō, tétə̄ najə̄ dɔ deē tə́ ō, ngonjə̄ ō, ḭḭn̄ i dan wur deē tə́. 20I yá̰a̰ gə̄ ń noō n a rāān̄ deē kadə̄ téĺ de kə́ yḛr ní, ba kəsa yá̰a̰ kanjə̄ tə́go jīí a rāā deē kadə̄ tél de kə́ yḛr alé.

Dəyá̰ tə̄rā kógə̄ḿ taā kem Jeju

(Á̰a̰ī Mark 7.24-30)

21Jeju ḭḭ noó aw̄ gō nang kə́ Tir tə́ ō, Sidon tə́ ō. 22Anī dəyá̰ Kanaan kógə̄ḿ kə́ ndi dām̄ loo ngeé ń noō tə́ reē rɔ̄n tə́, nōō rɔ̄n, ni-əga kɔŕ ədań na:

Kɔ́ɔ̄ɓē, ngōn̄ kaa Dabid, á̰a̰ kum tō ndoō yāḿ tə́! Ndíĺ kə́ majaĺ kógə̄ḿ rāā kum ngōnə̄ḿ kə́ dəyá̰ ndoō tə́, adə̄ a̰a̰ woy woy ngá̰ý!

23Banī Jeju tūr̄ ədan najə̄ kógə̄ḿ alé. Anī ngé ndóō yá̰a̰ yān gə̄ reēn̄ rɔ̄n tə́ ngɔr ba ədanən̄ na:

Ādə̄n yá̰á̰ ń a sāā ní ādə̄ aw̄ kɔ̄ɔ́ na utə̄ mbījí ngá̰ý.

24Jeju tūr̄ ədadə́ na əlamə̄n̄ i rɔ̄ ngán *Israel gə̄ ń i batə̄ kə́ ta tḭ̄ḭ̄ kɔ̄ɔ́ gə̄ ní tə́ ngóy.

25Dəyá̰ ní reē ɔsə non nang tə́ non tə́ ba ədan na:

Kɔ́ɔ̄ɓē, ī-rāā seḿ!

26Jeju tūr̄ ədan na:

Kun yá̰a̰ kəsa yā ngán gə̄ kənī kadə̄ ngáń bísə gə̄ i yá̰á̰ kə́ gōtə́ alé.

27Dəyá̰ ní əda na:

A̰ýyē, Kɔ́ɔ̄ɓē yāí i rɔ̄, ɓá tā ba ngáń bísə gə̄ a əsan̄ butə̄ yá̰a̰ kəsa gə̄ ń a tə́sō nang tə́ ta kār̄ kəsa yá̰a̰ yā kɔ́ɔ̄də́ tə́ ní!

28Tā anī Jeju tél ədan na:

Dəyá̰, taā kem yāí i taā kem kə́ ngá̰ý! Anī rɔ̄ ngōnən kə́ dəyá̰ ní ngáā kum mbang nəkɔ́ ń noō tə́.

Jeju rāā adə̄ rɔ̄ ngé mo̰y gə̄ ngáā

29Jeju ḭḭ loo ń noō tə́ aw̄ kadə bā bo kə́ Galile tə́. Ni al̄ dɔ mbalá kógə̄ḿ, ndi kə̄ tū tə́ noō. 30Anī kósə de gə̄ reēn̄ rɔ̄n tə́ kə ngé tə́sō motə gə̄ ō, ngé kum tɔ̄ɔ̄ gə̄ ō, kə de kə́ jīdə́ aláa njadə́ gán̄g gə̄ ō, ngé kə́ gír kəlā ndo̰də́ do̰ō̰ naā gə̄ ō, ngé mo̰y kə́ rang gə̄ ngá̰ý ɓáý to̰ ō. Tə́nīn̄də́ nja Jeju tə́, anī ni-rāā adə̄ rɔ̄də́ ngáā. 31Adə̄ dan ń kósə de gə̄ a̰a̰n̄ mbíkī gə̄ ɔrə̄n̄ najə̄ ō, a̰a̰n̄ de kə́ jīdə́ aláa njadə́ nujə gə̄ kə́ tél majən̄ gogə́ ō, ngé tə́sō motə gə̄ njə̄rān̄ dɔɔ́ majə ō, a̰a̰n̄ ngé kum tɔ̄ɔ̄ gə̄ kə́ tél a̰a̰n̄ loo gogə́ ō anī, yáādə́ ngá̰ý ō, nin̄-ɔsən̄ gɔn Nə́ɓā yā *Israel ō.

Jeju adə̄ de gə̄ dūbú sɔ́ yá̰a̰ kəsa

(Á̰a̰ī Mark 8.1-10)

32Jeju ɓāŕ ngé ndóō yá̰a̰ yān gə̄ ba ədadə́ na:

Kumḿ o̰o̰m̄ ngá̰ý kə kósə de gə̄ ń toō, tām̄ ndin̄ rɔ̄ḿ tə́ i ndɔ̄ mətá kɔ̄ɔ́ ō, yá̰a̰ kəsa yādə́ gətóo ō, adə̄ m̄-gḛy kəya̰də́ kadə̄ aw̄n̄ ɓēé kanjə̄ kəsa yá̰a̰ alé, na sōgə́ tɔ́gə́də́ gətóó róbó.

33Anī ngé ndóō yá̰a̰ yān gə̄ ədanən̄ na:

J-a j-ḭḭ kə yá̰a̰ kəsaá i loo kə́ rá tə́ loo kə́ ɓē gətóo tū tə́ ń toō tə́ yā kadə̄ əsa ndānə̄n̄ ní?

34Jeju dəjedə́ na:

Mápa i kóndóńg jīsí tə́?

Nin̄-tél ədanən̄ na i sīrí ō, kānjə̄ to noó sḛ́ý ō.

35Tá anī Jeju əda kósə de gə̄ kadə̄ ndin̄ nang tə́. 36Ni-taā mápa kə sīrí gə̄ ní ō, kānjə̄ gə̄ ní ō, ndadə̄ Nə́ɓā dɔ tə́ tá tétə̄ naā tə́ adə̄ ngé ndóō yá̰a̰ yān gə̄ adə̄ nə̄ɓōn̄ kósə de gə̄. 37Nin̄ malang əsa ndānə̄n̄. Gotə mápá ń na̰y ní, ngé ndóō yá̰a̰ yā Jeju gə̄ ɔyn̄ rosə dōbə̄ sīrí aw̄n̄neé. 38De gə̄ ń əsan̄ yá̰a̰ ní, de kə́ dəngam gə̄ asən̄ deē dūbú sɔ́ ń noō, kanjə̄ tə́da kutə dəyá̰ gə̄ ō ngán gə̄ ō. 39Dan ń Jeju əya̰ kósə de gə̄ adə̄ aw̄n̄ oy anī, al̄ kem toó ba aw̄ gō nang kə́ Magadan tə́.

Currently Selected:

Najə̄ kə́ Majə yā Jeju ń Matiye ndang ní 15: BS

Highlight

Copy