Makətūbə̄ yā Jojue 20
20
Ɓē ɓɔ̄ɔ̄ rɔ̄ gə̄
1Kɔ́ɔ̄ɓē mēr̄ Jojue 2kəda ngán *Israel gə̄ kadə̄ gə̄rān̄ ɓē ɓɔ̄ɔ̄ rɔ̄ɔ̄ gə̄#20.2 Ɓē ɓɔ̄ɔ̄ rɔ̄ gə̄: Á̰a̰ī Tə́da 35.9-34 tām̄ yādə́ tə́, tītə̄ ń n-ədań Moijə kété ní. 3Kadə̄ deē ń tɔ̄l̄ deē ba i kə gō kem ndigə yānneé aĺ ní, kɔ̄ɔ́ əngəń loo ɓɔ̄ɔ̄ rɔ̄n yā teēń jī nge dal ba̰ā̰ deē ń oy tə́ ní. 4Nge tɔ̄l̄ deē ní a a̰ȳ yā kaw̄ kem ɓē ɓɔ̄ɔ̄ rɔ̄ɔ̄ kógə̄ḿ tə́. Ré ni ugə̄ ɓē ní tə́ anī, a dəba ta róbə ndogə̄#20.4 Ta róbə ndogə̄: I loo gān̄g sarya kə́ kem ɓēé. kə́ yā kudəń kə̄ kem ɓē ní tə́, ba a ɔjə *kum kɔɔ̄ gə̄ kə́ kem ɓē ní tə́ yá̰á̰ ń rāā yá̰á̰ ní. Kum kɔɔ̄ gə̄ ní a əhɔnən̄ kə̄ rɔ̄də́ tə́, ba adə̄nən̄ loo kadə̄ ndiń sedə́ kem ɓēé. 5Ré nge dal ba̰ā̰ deē ń oy ní ngɔ̄də̄ gōn anī, nin̄ a adə̄nən̄ seneé alé, tɔdɔ̄ ni tɔ̄l̄ deē ní i kə gō kem ndigə yānneé alé, tām̄ ni imən kemən tə́ kété alé. 6Nge tɔ̄l̄ deē ní a ndi kem ɓē ní tə́ bátə́ kadə̄ ngé kán̄ naā gə̄ gān̄gnəń sarya yān ō, bátə́ kadə̄ ngol *nge tun̄ yá̰a̰ gə̄ ń a rāā kəla kem ɓāl̄ gə̄ ń noō tə́ ní oyń ō. Gō tə́ anī ni-tél yā kaw̄ gogə́ ɓēé looneé, kem ɓē ń ni-ndi tū tə́ kété á a̰ȳń ní.
7Ngán Israel gə̄ ɔrə̄n̄ kam̄ Kedes kə́ Galile ń i ɓē kə́ gō nang ké mbalá yā Nepətali ní ō, Sisem ń i ɓē kə́ gō nang kə́ mbalá yā *Epəraim ō, Kiryat Arba ń a ɓārə́n̄ na i Hebron ń i ɓē kə́ gō nang kə́ mbalá yā *Juda ní ō tayā. 8Gidə bā Jurdḛ ń deē ra Jeriko anī i kə̄ dām̄ kə́ gír ɓē tə́ ní, gə̄rān̄ ɓē kə́ Beser ō, Ramot kə́ Galaad ō, Golan ō tū tə́. Beser i ɓē kə́ kem dəla loo tə́, ndi i loo kə́ kḭḭ kə̄ dɔɔ́ ba gidə asə naā tə́, i ɓē yā de gə̄ kə́ gír ɓē yā Ruben tə́, Ramot kə́ Galaad i ɓē yā de gə̄ ké gír ɓē yā Gad tə́, Golan kə́ Basan i ɓē yā de gə̄ kə́ gír ɓē yā Manase tə́ 9Ɓē gə̄ ń gə̄rān̄ tām̄ yā ngán *Israel gə̄ tə́ malang ō, tām̄ yā tə̄rā gə̄ ń ndin̄ dan ngán Israel gə̄ tə́ ō ní n noó. Gə̄rān̄ ɓē gə̄ ní i yā kadə̄ nge dal ba̰ā̰ tɔ̄ləń nge kənī mósə deē nang tə́ kə gō kem ndigə̄ yānneé aĺ ní kété no sarya yā ngán Israel gə̄ tə́ alé.
Currently Selected:
Makətūbə̄ yā Jojue 20: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
