Makətūbə̄ yā Ojee 2
2
Ndɔ̄ kə́ bo yā Isreel
1Ndɔ̄ kógə̄ḿ tə́ anī, kutə ngán *Israel gə̄ a asə naā kə kutə nán̄g ngárə̄ḿnjēý kə́ ta bā tə́.
Deē a asə tə́da kutədə́ aĺ bátə́.
Nə́ɓā a ədadə́ na sḭḭ̄ i gír deē yāḿ gə̄ aĺ to̰ alé.
Banī ni a ɓāŕdə́ na i Ngáń Nə́ɓā kə́ ndi kə kumneé gə̄.
2Loo ń noō tə́ de kə́ *Juda gə̄ ō, de kə́ *Israel gə̄ ō, a télən̄ yā ɓoo naā gogə́.
Nin̄ a əndān̄ ngār kə́ kógə̄ḿ beē dɔdə́ tə́ ō,
nin̄ a télən̄ Kɔ́ɔ̄ ɓē gə̄ ō. Ndɔ̄ ń noō i ndɔ̄ kə́ bo yā Jisreel.
3Ə́daī ngákó̰ó̰sí kə́ dəngam gə̄ na: Sḭḭ̄ i gír deē yāḿ gə̄ ō,
ngákó̰ó̰sí kə́ dəyá̰ gə̄ na: Sḭḭ̄ i Kó tár gə̄ ō.
Israel i dəyá̰ kə́ ra dɔ ndūn tə́ alé
4Ə́daī yá̰á̰ kə́ majaĺ gə̄ ń kó̰ó̰sí rāā ní, ə́daī yá̰á̰ kə́ majaĺ gə̄ ń ni-rāā ní.
Tɔdɔ̄ ni i nə̄yá̰ḿ to̰ aĺ ō, mā i ngaan to̰ aĺ ō.
Ni-aw̄ kə yá̰a̰ gə̄ ta kumən tə́ kə́ ɔjən̄ kadə̄ ni i dəyá̰ ájə́ba.
Ādə̄ ni-ɔr̄ yá̰a̰ gə̄ ní kɔ̄ɔ́!
Ni-aw̄ kə yá̰a̰ gə̄ dɔ dán mbaan gə̄ tə́ kə́ ɔjən̄ kadə̄ ni i dəyá̰ kə́ nge rāȳ.
Ādə̄ ni-ɔr̄ yá̰a̰ gə̄ ní kɔ̄ɔ́!
5Ré i beé aĺ anī, m-ā m-ɔ̄r̄ yá̰a̰ rɔ̄n tə́ kɔ̄ɔ́
kadə̄ rɔ̄n i karī tītə̄ kə́ ndɔ̄ kojən tə́.
M-ā m̄-rāā dɔ nang kə́ *Israel kadə̄ tél to tītə̄ loo kə́ dəla loo tə́.
M-ā m̄-tūrə̄n kadə̄ tél to tītə̄ dɔ nang kə́ tutə káḿ káḿ .
M-ā m̄-rāā kadə̄ kəndā man̄ tɔ̄lən.
6M-ā m̄-táŕ ngánən gə̄ alé:
I ngán dəyá̰ kə́ nge rāā ájə́ba.
7Tɔdɔ̄ kó̰ó̰də́ i dəyá̰ kə́ nge rāā ájə́ba,
dəyá̰ ń ojədə́ ní rāā adə̄ rɔ̄sɔl̄ utə̄ gidə rɔ̄n malang kɔ̄ɔ́.
A̰á̰ā̰, ni-əda na m-ā m-ún gō ngé sāāḿ gə̄ ń
nin̄ i ngé kadə̄m̄ yá̰a̰ kəsaḿ ō, man̄ ka̰yḿ ō,
kūbə̄ *bḭḭ̄ batə̄ ō, kūbə̄ *lḛ́ḛ ō, yibə̄ ō yá̰a̰ ka̰ȳ gə̄ ō ní.
8I tām̄ najə̄ ń noō tə́ n mā Kɔ́ɔ̄ɓē m-ā m̄-də̄sə́ yá̰á̰ róbən tə́ ní,
m-ā m-dēsə́ túpə kōn̄ gə̄ róbən tə́.
M-ā m-ə̄ndā ndogə̄ mbal̄ yā gīrəń gidən ō, ni a ənge ta róbə yān to̰ aĺ ō.
9Kɔ́ɔ̄ɓē əda na:
Ni a ngɔ̄də̄ gō ngé sāān gə̄,
ba a əngedə́ alé. Ni a ndəledə́, banī a əngedə́ alé.
Loo ń noō tə́ ni a əda na:
M-ā m̄-tél yā kaw̄ gogə́ jī ngaaḿ kə́ ta kəga dɔ tə́.
A̰á̰ā̰, kété ní m̄-ndi majə tɔȳ kə́ ngɔlaā.
10Ni-a̰a̰ yá̰á̰ ń toō ger̄ alé: I mā n m-ādə̄n
gémē ō, kasə *nduú kə́ kijə ō, yibə̄ kə́ kijə ō ní.
M-ādə̄n gində̄ arjā̰a̰ ō, lɔ́ŕ ō,
ɔy aw̄ ndējə̄ ɓesə̄ *Baal ní alé.
Banī ni ɔy tām̄ yā Baal tə́.
11I tām̄ najə̄ ń toō tə́ n dan yā sāā kōō gémē gə̄ tə́ anī, m-ā m̄-tél yā reē taā gémē yāḿ ní ō,
m-ā m̄-tél yā reē taā kasə *nduú yāḿ kə́ kijə dan yā mbə́rē kan̄ nduú gə̄ tə́ ní ō.
M-ā m̄-taā kūbə̄ *bḭḭ̄ batə̄ yāḿ kɔ̄ɔ́ ō, m-ā m̄-taā kūbə̄ *lḛ́ḛ yāḿ kɔ̄ɔ́ ō,
yá̰a̰ gə̄ ń noō ń majə kadə̄ ni utə̄ń gidə rɔ̄n ní.
12Ngɔlaā ní m-ā m̄-ɔ̄r̄ yá̰a̰ rɔ̄n tə́
ta kum ngé sāān gə̄ tə́, ba de kə́ yā kɔgə̄m̄ a gətóo.
13Yá̰a̰ malang ń adə̄n rɔ̄nel̄ á i
pétə yān gə̄ ō, ndɔ̄ rāā nāā kə́ kijə yān gə̄ ō,
ndɔ̄ *sabat yān gə̄ ō,
kán̄ naā kə́ bo yān gə̄ malang ō ní, m-ā m̄-rāā kadə̄ gíŕdə́ a gān̄g kɔ̄ɔ́.
14M-ā m̄-nujə *kāgə̄ nduú yān gə̄ ō, kāgə̄ kótə̄ yān gə̄ ō ń ni-əda na:
I yá̰a̰ kəndā nja ń ngé sāāḿ gə̄ adə̄mə̄n̄ ní n noó ní.
M-ā m̄-rāā kadə̄ nin̄ a télən̄ túpə́ kámbə gə̄ ō,
dā̰ kə́ bembeé gə̄ a əsan̄də́ ō.
15M-ā m̄-rɔ̄ɔ̄n najə̄ kum mbang ń ni un rɔȳń
ɓesə̄ *Baal gə̄ ní.
Ni róō ndujə̄ yá̰á̰ kə́ kotə majə adə̄də́.
Ni o̰ō̰ nə̄ngá gə̄ ō, yá̰á̰ súū rɔ̄ gə̄ ō tām̄ yādə́ tə́.
Ni un gō ngé sāān gə̄,
mā ɓáa dɔn ndígə̄naləḿ kɔ̄ɔ́ ō.
Najə̄ ń Kɔ́ɔ̄ɓē əda ní n noó.
16I tām̄ najə̄ ń noō tə́ n m-ā m̄-ndɔ́rə̄n kə̄ rɔ̄ḿ tə́ ní.
M-ā m-ɔ́rən ta róbə yā kaw̄ seneé dəla loo tə́ ō,
ni a tél yā kadə̄m̄ kemən gogə́ ō.
17Loo ń noō tə́ m-ā m̄-tél kə ndɔr̄
ngán *kāgə̄ nduú yān gə̄ yā kadə̄n gogə́ ō,
wól loo kə́ Akor ń i wól loo yā yá̰á̰ kə́ to kum tō ndoō ní,
m-ā m̄-rāā kadə̄ a tél ta róbə kəndā kem dɔ yá̰á̰ tə́ ō.
Loo ń noō tə́ ni a un gōḿ tītə̄ ń unəń gōḿ kə gōn̄ dūúneé ní,
tītə̄ ń unəń gōḿ dan ń ni teēń kɔ̄ɔ́ kem ɓē kə́ Ejiptə tə́ ní.
Ndɔ̄ kəsō nāā
18Kɔ́ɔ̄ɓē əda na:
Ndɔ̄ ń noō tə́ ní, ni a ɓārə́m̄ na i Ngaaḿ,
ni a ɓārə́m̄ na i ɓesə̄ *Baal yāḿ ń kumən na i ngoləḿ ní to̰ alé.
19M-ā m-ɔ̄r̄ rī ɓesə̄ Baal gə̄ tan tə́ kɔ̄ɔ́ ō,
a əga kem deē dɔ tə́ to̰ aĺ ō.
20Loo ń noō tə́ ní,
m-ā m-ə́hɔ *madə̄ naā kə dā̰ kə́ bembeé gə̄ ō,
kə yel̄ kə́ dɔɔ́ gə̄ ō, kə ngán dā̰ kə́ nang tə́ gə̄ ō, tām̄ yā gír deē yāḿ gə̄ tə́.
M-ā m̄-rāā kadə̄ ga̰ gərā gə̄ ō, kaskar gə̄ ō,
yá̰a̰ rɔ̄ɔ̄ gə̄ ō, gətóon̄ kɔ̄ɔ́ kem ɓēé.
M-ā m-ādə̄ de kə́ kem ɓēé gə̄ a ɓīīn̄ loo yādə́ jəke.
21Israel, ā ī-tél nge *nong yāḿ, ba i kə́ ngándáńg tə́.
Ā ī-tél nge *nong yāḿ, ba nar gírí ń m-ā m-ādə̄ ní
i ra dɔ ndū tə́ ō, i yá̰a̰ rāā kə́ gōtə́ ō, i tár ō, rāā tɔdɔ̄ naā ō.
22A̰á̰ā̰, nar gírí ń m-ā m-ādə̄ ní i ra dɔ ndū tə́.
Loo ń noō tə́ ā ī-ger̄ kadə̄ mā i Kɔ́ɔ̄ɓē.
23Kɔ́ɔ̄ɓē əda na: Ndɔ̄ ń noō tə́ ní,
m-ā m-ādə̄ yá̰á̰ ń dɔ rā̰ ndi a ngóō ta jīḿ tə́ ní ō,
dɔ rā̰ a adə̄ yá̰á̰ ń dɔ nang ndi a ngóō ta jīn tə́ ní ō.
24Dɔ nang a adə̄ yá̰á̰ ń gémē ō,
kasə *nduú kə́ kíjə ō,
yibə̄ kə́ rāā ngɔr ɓáý ō,
ndi a ngóōn̄ ta jīn tə́ ní.
Ba nin̄ malang a adə̄n̄ yá̰á̰ ń wól loo kə́ Jisreel ń
i wól loo ń m̄-dubə̄ yá̰a̰ tū tə́ ní, ndi a ngóō ta jīdə́ tə́ ní.
25A̰á̰ā̰, kem ɓēé ɓáa m-ā m̄-rāān
i wól loo yāḿ kə́ m̄-dubə̄ yá̰a̰ tū tə́.
M-ā m̄-tár Tarəmale.
M-ā m-ə́dá Girdeeyamalgə na:
Gír deē yāḿ gə̄ i ḭ̄ ō,
ni a ədam̄ na: Nə́ɓā yāḿ ō.
Currently Selected:
Makətūbə̄ yā Ojee 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
